ᐅᓪᓗᑐᐃᓐᓇᕐᒥ ᒫᔾᔨ 11−ᒥ, 2016 – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐸᑦᑕᖅᑐᓚᐅᖅᑐᑦ ᐱᓕᕆᖃᑕᐅᓂᐊᕐᓂᕐᒥᓂᒃ ᓴᖅᑮᒻᒪᑕ ᒥᐊᓕᒐᕐᒥᐅᑦ ᑲᓇᑕᐅᑉ ᒐᕙᒪᒃᑯᖏᓐᓂ ᐅᑭᐅᖅᑕᖅᑐᓕᕆᓂᕐᒥᑦ. ᐱᓗᐊᖅᑐᒥᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᖁᔭᒋᔭᖃᑦᑎᐊᕐᖓᑕ ᓈᓚᑦᑕᐅᓂᖏᓐᓂ ᑕᒪᑐᒧᖓ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ, ᐆᒻᒪᖅᑯᑎᑖᕆᐊᖃᕐᓂᐅᔪᒥᑦ, ᐊᑦᑕᓇᓐᖏᑦᑐᒥᑦ ᐊᑦᑐᐃᓗᐊᓐᖏᑦᑐᓂᓪᓗ ᐅᒥᐊᕐᔪᐊᖅᑕᖃᖃᑦᑕᕐᓂᖅ, ᐅᑭᐅᖅᑕᖅᑐᒥ ᐃᖃᓗᒐᓱᐊᕐᓂᕐᒥᑦ, ᓄᓇᖃᖅᑳᖅᑐᒥᓃᑦ ᖃᐅᔨᒪᓂᖏᓐᓂ, ᐱᒻᒪᕆᐅᓂᖏᓐᓂᓪᓗ ᓄᓇᖃᖅᑳᖅᑐᒥᓃᑦ ᐅᑭᐅᖅᑕᖅᑐᒥ ᐊᒻᒪᓗ ᐱᑕᖃᕆᐊᖃᕐᓂᖏᓐᓂ ᖃᐅᔨᒪᑦᑎᐊᕐᓗᑎᑦ ᐃᓱᒪᓕᐅᕈᓐᓇᕐᓂᖏᓐᓂ. ᐃᑉᐸᔅᓴᖅ ᓇᓗᓇᐃᖅᓯᔪᖃᕐᖓᑦ ᓇᓗᓇᕈᓐᓃᓚᐅᖅᑐᖅ ᓯᕗᓕᖅᑎᔅᓴᖏᑦ ᓴᓐᖏᔪᐊᓗᐃᑦ ᐅᐹᒪ ᑐᕉᑑᓗ ᐱᓕᕆᔪᒪᓂᖏᑦ, ᐊᒻᒪᓗ ᐱᑕᖃᕆᐊᖃᕐᓂᖏᓐᓂ ᑕᒪᒃᑯᓂᖓ ᑲᒪᒋᔭᐅᖃᑦᑕᕐᓂᐊᖅᑐᓂᑦ ᐊᒥᓱᓂᑦ ᐃᓱᒫᓘᑎᐅᕙᑦᑐᓂᒃ ᓯᓚᕐᔪᐊᑎᓐᓂ ᐅᓪᓗᒥᐅᔪᖅ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᔅᓯᕙᐅᑕᖓ ᐅᑲᓕᖅ ᐃᔨᑦᓯᐊᖅ ᐅᖃᓚᐅᖅᑐᖅ ᓄᓇ ᐊᓯᔾᔨᐸᓪᓕᐊᓂᖓᓐᓂ ᓅᑉᐸᓪᓕᐊᓂᖏᓐᓄᑦ ᐅᑭᐅᖅᑕᖅᑐᒧᑦ ᑕᒪᒃᑯᐊ ᐃᓱᒫᓘᑎᐅᕙᑦᑐᑦ ᓯᓚᕐᔪᐊᒥ ᐃᓱᒫᓗᒋᔭᐅᓂᖅᓴᐅᓕᕐᖓᑕᒎᖅ, ᐃᓕᓴᖅᓯᓯᒪᔪᑦ ᐊᑦᑐᐊᓂᖏᓐᓂ ᐅᑭᐅᖅᑕᖅᑐ ᐃᓚᖓᓪᓗ ᓄᓇᕐᔪᐊᖅ. “ᐃᑉᐸᔅᓴᖅ ᐃᖅᑲᐃᔾᔪᑎᖃᓚᐅᖅᑐᖓ ᓯᕿᓂᖅ ᑕᑯᒃᑲᓐᓂᓕᕐᒥᒐᑦᑎᒍ ᑕᖅᑭᒐᓚᓐᓄᑦ ᑕᑯᓚᐅᕐᓇᑎᒍ ᐅᑭᐅᖅᑕᖅᑐᖅ ᑖᖃᑦᑕᕐᓂᖏᓐᓂ ᐅᑭᐅᒃᑯᑦ. ᐅᑭᐅᖅᑕᖅᑐᓕᒫᖅ ᖁᕕᐊᓲᑎᖃᕆᐊᓕᒃ ᑕᒪᑐᒥᖓ ᐊᖏᕈᑎᐅᔪᒥᑦ ᐅᓪᓗᒥᐅᔪᖅ, ᑕᐃᒫᐸᓗᑦᑕᐅᑎ.”
ᔨᒻ ᓯᑖᑦᔅ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ - ᐊᓛᒃᑲᐅᑉ ᐊᖏᔪᖅᑳᖓ ᐅᖃᓚᐅᖅᑐᖅ, “ᖁᓅᒻᒥᖅᓯᒪᓪᓚᕆᑦᑐᒍᑦ ᐃᓄᐃᑦ ᖃᐅᔨᒃᑲᖅᑕᐅᓯᒪᓐᖏᒻᒪᑕ ᓯᕗᓂᖓᓐᓂ ᐊᖏᕈᑎᓕᐊᖑᓚᐅᖅᑐᒥᑦ. ᒥᐊᓕᒐᐃᑦ ᐅᑭᐅᖅᑕᖅᑐᒥ ᐱᖁᔭᖏᓐᓂ ᑲᑎᒪᑎᑦᑎᖅᑳᕆᐊᖃᓲᖑᒐᓗᐊᕐᖓᑕ ᐃᓄᓐᓂᑦ. ᑭᓯᐊᓂᓕ, ᑕᒪᓐᓇ ᐅᑭᐅᖅᑕᖅᑐᓕᕆᓂᖅ ᐃᓄᓐᓅᖓᔪᖅ ᖁᕕᐊᒋᔭᐅᒻᒪᑦ. ᓯᕗᒧᐊᖅᐸᓪᓕᐊᓕᖅᑐᒍᑦ, ᐅᐸᑦᑕᐅᖅᑳᕆᐊᖃᖃᑦᑕᕐᓂᐊᕋᑦᑕ ᐃᓱᒪᓕᐅᕐᓂᐊᖅᑎᓪᓗᒋᑦ ᐅᕙᑦᑎᓐᓄᑦ ᐊᑦᑐᐃᓂᖃᕐᓂᐊᖅᑐᓂᒃ.”
ᑕᑯᔪᒪᓗᐊᓐᖑᐊᖅᑕᖏᓪᓕ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑐᑭᓯᐅᒪᒻᒪᑕ ᐃᓕᓴᖅᓯᓯᒪᓪᓗᑎᓪᓗ ᐱᒻᒪᕆᐅᓂᖏᓐᓂ ᐃᓱᒪᓕᐅᖅᑕᐅᕙᑦᑐᓂᒃ ᑐᓴᖅᓯᒪᓪᓗᑎᑦ ᐊᑐᐃᓐᓇᐅᔪᓂᒃ ᐊᒻᒪᓗ ᑕᒪᒃᑯᐊ ᑐᑭᓯᒋᐊᕈᑏᑦ ᑕᒪᒃᑮᓐᖔᖓᔪᑦ ᖃᐅᔨᓴᖅᑎᒻᒪᕆᓐᓂᑦ ᐊᒻᒪᓗ ᓄᓇᖃᖅᑳᖅᑐᒥᓃᑦ ᖃᐅᔨᒪᓂᖏᓐᓂ. ᐃᓄᐃᑦ ᐃᓚᒋᔭᐅᒻᒪᑕ ᐅᑭᐅᖅᑕᖅᑐᒥ ᐆᒪᔪᓂᒃ ᐊᒻᒪᓗ ᐱᖅᑯᓯᖏᑦᑎᒍ ᐊᑦᑕᓇᐃᖅᓯᒪᓪᓗᑎᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᖅᑲᐃᑎᑦᑎᕙᑦᑐᑦ ᒐᕙᒪᒃᑯᓂᓕᒫᖅ ᐱᒻᒪᕆᐅᓂᖏᓐᓂ ᑕᒪᒃᑯᓂᖓ ᐱᕈᖅᑐᓂᒃ ᐅᑭᐅᖅᑕᖅᑐᒥ ᐱᕙᓪᓕᐊᔾᔪᑕᔪᓐᓇᖅᓂᑐᒃ ᑲᒪᒋᔭᐅᕙᑦᑐᓄᒃ ᑎᒍᒥᐊᖅᑕᐅᔪᓄᓪᓗ ᐃᓄᓐᓄᑦ. ᑕᒪᒃᑯᐊ ᐊᑐᕆᐊᖃᕋᑦᑎᒍ ᐊᔅᓱᕈᓐᓇᖅᑑᔪᑦ ᐅᓪᓗᒥᐅᔪᖅ ᑕᐃᒪᐃᓪᓗᐊᑎᑦᑎᒐᓱᐊᕐᓂᐊᖅᑎᓪᓗᑕ ᑭᓱᑐᐃᓐᓇᑦᑎᐊᕐᓂᑦ.
ᐊᒥᓲᒻᒪᑕ ᐊᓯᔾᔨᖅᓯᒪᔪᑦ ᓯᓚ ᐱᔾᔪᑎᒋᓪᓗᒍ ᐅᕝᕙᓘᓐᓃᑦ ᓯᓚᕐᔪᐊᖅ ᐊᓯᔾᔨᐸᓪᓕᐊᓂᖓᓐᓂ. ᐸᕆᔅᒥ ᓯᓚ ᐅᖃᐅᓯᐅᓚᐅᖅᑎᓪᓗᒋᑦ ᐱᐅᓂᖅᓴᐅᔪᓂᒃ ᐅᖃᐅᓯᖃᖅᑐᑎᑦ ᐊᒥᓲᓂᖅᓴᓂᒃ ᐊᓯᔾᔨᖅᑐᓂᒃ. ᐸᕆᔅᒥ ᓯᓚᒥᑦ ᐅᖃᐅᓯᖃᓚᐅᖅᓯᒪᔪᑦ ᑏᓯᐱᕆᒥ, ᐃᔨᑦᓯᐊᖅ ᑎᓕᔭᐅᓚᐅᖅᓯᒪᔪᖅ ᐃᓄᓐᓂᑦ ᓂᓪᓕᐊᓪᓗᓂ ᓯᓚᕐᔪᐊᑉ ᓯᕗᓕᖅᑎᖏᓐᓂ ᐅᑭᐅᖅᑕᖅᑐᓂᒃ, ᐊᑦᑐᖅᑕᐅᒐᔪᓐᓂᖅᐹᖑᒻᒪᑕ ᐱᔭᕆᐊᑭᑦᑐᑎᓪᓗ ᐆᒪᔪᓂᒃ. ᐅᖃᖅᑐᓂᓗ, ᐱᒻᒪᕆᐅᓂᖅᐹᖑᒻᒥᔪᖅ ᐃᓚᖓ ᑐᓐᖓᕕᒋᔭᐅᔪᖅ ᑕᒪᑐᒥᖓ ᒪᑭᒪᔾᔪᑕᐅᓇᓱᐊᖅᑐᒥᑦ ᑲᔪᓯᑎᑕᐅᑦᑎᐊᓚᐅᖅᑐᖅ ᐸᕆᔅᒥ. ᖁᕕᐊᓪᓚᕆᑦᑐᒍᑦ ᐃᓕᓴᕆᔭᐅᒻᒥᒐᑦᑕ ᐱᒻᒪᕆᐅᓂᑦᑎᓐᓂ ᐊᒻᒪᓗ ᐊᑦᑐᖅᑕᐅᔪᓐᓇᑦᑎᐊᕐᓂᖓᓐᓂ ᐅᑭᐅᖅᑕᖅᑐᖅ ᐱᓕᕆᖃᑎᒌᓐᓂᐊᖅᑎᓪᓗᑕ ᖁᕕᐊᓇᕐᓂᐊᖅᑐᖅ.”
ᐊᒥᓱᑦ ᐅᖃᖃᑎᒌᓚᐅᖅᓯᒪᔪᑦ ᓯᓚᕐᔪᐊᒦᓐᖔᖅᓯᒪᔪᑦ ᓇᑭᑐᐃᓐᓇᖅ ᐱᖁᔭᐃᑦ ᐱᔾᔪᑎᒋᓪᓗᒋᑦ ᐃᓱᒫᓘᑕᐅᔪᑦ, ᐃᓄᐃᑦ ᓄᓇᓕᖏᑦ ᖃᐅᑕᒫᑦ ᐊᔅᓱᕉᑎᖃᖃᑦᑕᖅᑐᑦ, ᓲᕐᓗ ᐊᑭᑦᑐᐸᓪᓕᐊᖏᓐᓇᑎᓪᓗᒋᑦ ᐆᒻᒪᖅᑯᑏᑦ ᐱᔨᑦᑎᕋᐅᑏᓪᓗ. ᒪᕐᕉᓐᓂᒃ ᐱᓕᕆᔫᓐᓂᒃ ᖃᐅᔨᓴᖃᑎᖃᕈᒪᒻᒪᑕ, ᓇᓗᓇᐃᔭᕐᓗᒋᑦ ᐊᑐᓕᖅᑎᓪᓗᒋᓪᓗ ᑕᒪᒃᑯᐊ ᐆᒻᒪᖅᑯᑎᐅᔪᓐᓇᖅᑐᑦ ᓴᓐᖏᓂᖅᓴᐅᓕᕈᓐᓇᕋᔭᖅᑐᒍ ᓄᓇᓕᐅᓪᓗᑎᑦ ᑕᐃᒪᐃᑦᑐᑎᒎᓇ.
ᐱᓕᕆᖃᑎᖃᕈᒪᑦᑎᐊᖅᑐᒍᑦ ᒥᐊᓕᒐᕐᓂᑦ, ᑲᓇᑕᒥᐅᑕᕐᓂᑦ ᐊᓯᖏᓐᓂᓪᓗ ᒐᕙᒪᐅᔪᓂᒃ ᑕᒪᑐᒥᖓ ᐅᖃᐅᓯᖃᕐᓗᑎᑦ ᐊᔅᓱᕈᐊᕆᓗᑎᒍᓪᓗ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓄᓇᖃᖅᑳᖅᑎᒥᓂᐅᓪᓗᓂ ᑲᑐᔾᔨᖃᑎᒌ ᑭᒡᒐᖅᑐᐃᔪᑦ 160,000−ᓂᑦ ᐃᓄᓐᓂᑦ ᓯᑳᑦᑲᒥ, ᐊᓚᔅᑲᒥ, ᑲᓇᑕᒥ ᑲᓛᖡᓪᓗ ᓄᓈᓂ ᐊᒻᒪᓗ ᓯᓚᕐᔪᐊᓕᒫᒥᑦ ᐃᓱᒫᓘᑕᐅᔪᓂᒃ ᐱᒻᒪᕆᐅᒋᔭᖃᕐᒥᔪᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᓕᕆᖃᑎᖃᕈᓐᓇᑦᑎᐊᖅᑐᑎᑦ ᑎᒍᒥᐊᕐᒥᔪᑦ II ᓯᓚᕐᔪᐊᑉ ᑲᑐᔾᔨᖃᑎᒌᖓᓐᓂ ᐊᒻᒪᓗ ᐱᖃᑕᐅᖏᓐᓇᖅᑎᑕᐅᓪᓗᑎᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ.
