News

Documenting our Progress

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐅᖃᓚᐅᖅᑐᑦ ᐱᑕᖃᕆᐊᖃᕐᓂᖓᓐᓂ ᐃᓄᐃᑦ ᖃᐅᔨᒪᔭᑐᖃᖏᓐᓂ ᐃᓱᒪᓕᐅᕐᓂᐊᖅᑎᓪᓗᒋᑦ

ᒫᔾᔨ 23, 2016 – ᐃᖃᓗᐃᑦ, ᓄᓇᕗᑦ – ᐱᖓᔪᐊᓐᓂ ᑲᑎᒪᑎᑦᑎᑲᓐᓂᓕᓚᐅᖅᓯᒪᔪᑦ ᐅᓪᓗᑐᐃᓐᓇᕐᒥ, ᒫᔾᔨ 18 ᕕᐅᐹᒃᔅ, ᐊᓛᔅᑲᒥ. ᑲᑎᒪᔪᑦ ᐃᓄᖃᓚᐅᖅᓯᒪᔪᑦ 450−ᓂᒃ 30−ᓃᓐᖔᖅᑐᓂ ᓄᓇᓕᕐᔪᐊᓂᑦ, ᒪᑯᐊᓗ ᖃᐅᔨᓴᖅᑎᒻᒪᕇᑦ, ᓄᓇᖃᖅᑳᖅᑐᒥᓂᓪᓗ ᐱᖃᑕᐅᓪᓗᑎᑦ ᐅᑭᐅᖅᑕᖅᑐᒦᓐᖔᖅᓯᒪᔪᓂᒃ, ᐊᒻᒪᓗ ᒐᕙᒪᒃᑯᓐᓂ ᑎᒥᐅᔪᓂᓪᓗ ᑭᒡᒐᖅᑐᐃᔨᑕᖃᐅᖅᑐᓂ. ᑲᑎᒪᔭᖅᑐᖃᑕᐅᓯᒪᔪᑦ ᐅᖃᐅᓯᖃᖅᑐᑎᑦ ᖃᐅᔨᓴᖅᑐᖃᕆᐊᖃᕐᓂᖓᓐᓂ ᓯᓚ ᐊᓯᔾᔨᐸᓪᓕᐊᓂᖓᓐᓂ ᐊᒻᒪᓗ ᐊᑦᑐᐃᓂᖃᕐᓂᖓᓐᓂ ᓄᓇᕐᔪᐊᓕᒫᒥᑦ, ᐊᒻᒪᓗ ᐱᓗᐊᖅᑐᒥᑦ ᐱᒻᒪᕆᐅᓂᖏᓐᓂ ᐅᑭᐅᖅᑕᖅᑐᒥ ᐊᒻᒪᓗ ᓄᓇᖃᖅᑳᖅᑐᒥᓃᑦ, ᐊᑦᑐᖅᑕᐅᓯᒪᔪᓂᒃ ᐊᑐᖅᑕᒥᓂᒃ.

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᔅᓯᕙᐅᑕᖓ, ᐅᑲᓕᖅ ᐃᔨᑦᓯᐊᖅ, ᑲᑎᒪᖃᑕᐅᓚᐅᖅᑐᖅ ᓯᓚᕐᔪᐊᒥ ᐅᑭᐅᖅᑕᖅᑐᒥ ᐅᓪᓗᖓᓐᓂ ᑲᑎᒪᓂᕐᔪᐊᒥᑦ, ᑲᔪᓯᑎᑦᑎᓚᐅᖅᑐᓂᓪᓗ ᐅᑭᐅᖅᑕᖅᑐᒥ ᑕᑯᓐᓇᖅᑕᐅᓂᖏᓐᓂ ᑲᑎᒪᓂᐅᔪᒥᑦ. “ᐅᑭᐅᑦ 200−ᓂᒃ ᐊᓂᒍᖅᑐᓂᒃ ᐅᑭᐅᖅᑕᖅᑐᒥ ᖃᐅᔨᓴᖃᑦᑕᖅᓯᒪᓕᕐᖓᑕ, ᐃᓄᐃᓪᓗ ᖃᐅᔨᒪᔭᖏᓐᓂ ᓱᓕ ᐃᓱᒫᓘᑎᐅᕙᑦᑐᑦ ᒪᑯᐊ ᖃᐅᔨᓴᕐᓂᐅᔪᑦ ᐃᓄᐃᑦ ᓄᓇᖏᓐᓂ. ᑐᓴᐅᒪᑎᑦᑎᓐᖏᓗᐊᖃᑦᑕᕐᓂᖏᓐᓂ ᓄᓇᓕᓐᓂᑦ, ᐱᓕᕆᖃᑎᖃᓐᖏᓗᐊᖅᑐᑎᓪᓗ ᐃᓚᓕᐅᔾᔨᓐᖏᓗᐊᖅᑐᑦ ᐃᓄᐃᑦ ᖃᐅᔨᒪᔭᑐᖃᖏᓐᓂ ᖃᐅᔨᓴᖅᑎᓂᒃ ᐊᒻᒪᓗ ᖃᐅᔨᒪᓂᖏᓐᓂ ᐊᑐᓗᐊᓐᖏᑦᑎᐊᖅᐸᑦᑐᑦ ᐃᓱᒪᓕᐅᕋᓱᐊᖅᑎᓪᓗᒋᑦ. ᓄᓇᓖᑦ ᐃᓚᒋᔭᐅᔪᒪᒻᒪᑕ ᐱᕙᓪᓕᐊᔪᓂᒃ, ᐃᑲᔪᕐᓗᑎᓪᓗ ᖃᐅᔨᒪᓂᖏᓐᓂ ᐃᓱᒪᓕᐅᖅᑐᖃᕐᓂᐊᖅᑎᓪᓗᒍ ᐊᒻᒪᓗ ᖃᓄᖅᑑᕐᓂᐊᖅᑐᑎᑦ ᐸᖅᑭᔭᐅᖁᔨᓪᓗᑎᑦ ᐅᑭᐅᖅᑕᖅᑐᒥ, ᓂᕿᕗᓪᓗ ᐃᓅᓇᓱᐊᕈᑦᑎᕐᓂᕗᓪᓗ ᐱᔾᔪᑎᒋᓪᓗᒋᑦ ᐃᔨᑦᓯᐊᖅ ᐅᖃᖅᑐᓂ.

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᑲᔪᖅᑐᐃᔪᑦ ᐅᑭᐅᖅᑕᖅᑐᒥ ᑕᑯᓐᓇᕐᓂᖏᓐᓂ ᑲᑎᒪᓂᐅᔪᓂᒃ ᐅᖃᐅᓯᐅᓯᒪᔪᓂᓪᓗ, ᓴᖅᑭᖅᑕᐅᕋᑖᖅᑲᐅᔪᒥᑦ ᐅᓪᓗᒥ. ᐅᖃᐅᓯᖃᖅᑐᖅ 7−ᓂᒃ ᐊᑐᓕᖁᔭᐅᔪᓂᒃ, ᐅᓪᓗᓄᑦ ᐱᖓᓱᓄᑦ ᑲᑎᒪᓚᐅᖅᑎᓪᓗᒋᑦ. ᐊᑐᓕᖁᔭᐅᓯᒪᔪᑦ ᐱᕙᓪᓕᐊᒍᒪᔪᓂᒃ ᐊᑐᐃᓐᓇᖅᑕᓕᒃ ᓯᓚᕐᔪᐊᒥ ᒪᓕᒐᐅᒐᔭᖅᑐᓂᒃ, ᐊᑐᐊᒐᕐᓂᑦ ᐃᓕᖅᑯᓯᐅᒐᔭᖅᑐᓂᓪᓗ ᒪᑐᒃᑯᓂᖓ ᐊᑐᐊᒐᐅᒐᔭᖅᑐᓂᒃ ᖃᐅᔨᓴᖅᑎᓄᑦ, ᐅᑉᐱᕆᔭᑦᑎᐊᕐᓗᑎᓪᓗ ᐱᕙᓪᓕᐊᓗᑎᑦ, ᐃᖃᑕᐅᖃᑦᑕᕐᓗᑎᓪᓗ ᐅᑭᐅᖅᑕᖅᑐᒥ ᓄᓇᖃᖅᑳᖅᑐᒥᓃᑦ ᖃᐅᔨᒪᓂᖏᓐᓂ ᖃᐅᔨᒪᔪᑦ, ᓄᓇᖃᖅᑳᖅᑐᒥᓂᕐᓂᓪᓗ ᐃᓚᓕᐅᔾᔨᓯᒪᓗᑎᑦ.

ᑲᑎᒪᓂᐅᔪᒥ ᐅᖃᐅᓯᐅᓚᐅᖅᑐᑦ “ᐅᑭᐅᖅᑕᖅᑐᑦ ᓄᓇᓕᖏᑦ ᖃᐅᔨᒪᓂᖃᑦᑎᐊᕐᖓᑕ ᐱᓕᕆᔨᒻᒪᕆᖃᐅᕐᖓᑕ ᐱᓕᕆᖃᑕᐅᒍᓐᓇᖅᑐᓂᑦ ᐋᖅᑭᔅᓱᐃᒍᓐᓇᖅᑐᓂᒃ ᐊᑐᓕᖅᑎᑦᑎᔪᓐᓇᖅᑐᓂᓪᓗ ᑕᒪᒃᑯᓂᖓ ᐃᑲᔪᖅᑐᐃᓗᑎ ᐃᓱᒪᓕᐅᕈᑎᐅᔪᓂᒃ ᒪᑯᓂᖓ ᓱᒃᑲᓕᔪᐊᓗᒻᒥᑦ ᐊᓯᔾᔨᐸᓪᓕᐊᔪᒥᑦ ᐅᑭᐅᖅᑕᖅᑐᒥ. ᑭᓯᐊᓂᓕ, ᑭᓱᑐᐃᓐᓇᐃᑦ ᐊᑐᐃᓐᓇᐅᔪᑦ ᑐᑭᒧᐊᖅᑕᐅᔭᕆᐊᖃᕐᓂᖏᓐᓂᓪᓗ ᐃᓱᖃᕆᐊᓕᑦ, ᐅᓪᓗᒥᐅᔪᖅ ᑎᑭᑦᑐᒍ, ᐱᕙᓪᓕᐊᓯᒫᕐᔪᓕᖅᑑᒐᓗᐊᖅ.”

ᐅᑲᓕᖅ ᐃᔨᑦᓯᐊᖅ ᐅᖃᖅᑐᓂᓗ ᒫᓐᓇᕈᓗᒃ ᑲᓇᑕ/ᒥᐊᓕᒐᑦ ᐅᑭᐅᖅᑕᖅᑐᒥ ᐊᖏᕈᑎᖓ ᐊᖏᔪᖅᑳᕐᔪᐊᖅ ᑐᕉᑑ ᐊᒻᒪᓗ ᐊᖏᔪᖅᑳᖅ ᐅᐹᒪ ᑲᒪᔪᓐᓇᑦᑎᐊᕐᓂᐊᖅᑐᑦ ᓄᓇᖃᖅᑳᖅᑐᒥᓃᑦ ᖃᐅᔨᒪᓂᖏᓐᓂ “ᐊᑐᕐᓂᖅᓴᐅᓗᑎᑦ” ᐃᓱᒪᓕᐅᖅᑐᖃᖅᑎᓪᓗᒍ. ᐃᔨᑦᓯᐊᖅ ᐅᖃᖅᑐᓂ, “ᓯᕗᓕᖅᑎᑦᑎᐊᕙᐅᓂᕐᒥᑦ ᓴᖅᑭᔮᖁᔭᕗᑦ ᑲᓇᑕ ᒥᐊᓕᒐᕐᓗ, ᓱᓕᑦᑎᐊᕐᓗᑎᑦ ᓱᓕᓂᕋᕈᑏᓪᓗ ᑲᔪᓯᑦᑎᐊᕐᓗᑎᑦ ᐊᒻᒪᓗ ᑎᓕᓯᓗᑎ ᑕᒪᑐᒧᖓ ᑲᒪᑦᑎᐊᕈᓐᓇᕐᓂᐊᖅᑐᒥᑦ. ᕿᓚᓈᑦᑎᐊᖅᑐᒍ ᐃᑲᔪᕐᓂᐊᓂᑦᑎᓐᓂ ᑲᔪᓯᒐᓱᐊᖅᑎᓪᓗᒋᑦ ᑕᒪᑐᒥᖓ ᑐᕌᒐᖏᓐᓂ.”

For more information: Carole Simon csimon@inuitcircumpolar.com P: 613-563-2642

The Inuit Circumpolar Council (ICC) is an Indigenous Peoples’ Organization (IPO), founded in 1977 to promote and celebrate the unity of 180,000 Inuit from Alaska (USA), Canada, Greenland, and Chukotka (Russia). ICC works to promote Inuit rights, safeguard the Arctic environment, and protect and promote the Inuit way of life. In regard to climate change, we believe that it is crucial for world leaders and governments to recognize, respect and fully implement the human rights of Inuit and all other Indigenous peoples across the globe.