ᕖᕝᕗᐊᕆ 21, 2019 - ᓚᓐᑕᓐ, UK – ᑕᒫᓂ ᐱᓇᓱᐊᕈᓯᕐᒥᑦ ᓯᓚᕐᔪᐊᒥ ᐃᒪᕐᒥᐅᑕᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᑲᑎᒪᔨᕋᓛᖏᑦ ᓱᕈᓐᓇᖅᑐᖅᑖᖅᑎᑎᑕᐃᓕᒪᓂᕐᒧᑦ ᑲᒪᒋᔭᖃᕐᓂᒧᓪᓗ ᑲᑎᒪᔪᓄᑦ ᓛᓐᑕᒥ, UK. ᐃᓄᐃᑦ ᐅᑭᐅᖅᑕᖅᑐᒦᐅᖃᑎᒌᑦ ᑲᑎᒪᔨᖏᑦ ᑲᓇᑕ ᐊᖏᔪᖅᑳᑉ ᑐᖏᓕᖓ (ᓯᓚᕐᔪᐊᒧᑦ) ᓖᓴ ᖁᐱᕐᕈᐊᓗᒃ ᑲᑎᒪᖃᑕᐅᓚᐅᖅᑐᖅ ᐅᓂᒃᑲᕆᐊᖅᑐᖅᑐᓂ ᐃᓄᐃᑦ ᓂᐱᖏᓐᓂ ᐅᑭᐅᖅᑕᖅᑐᒥ ᐅᒥᐊᕐᔪᐊᒃᑰᖅᐸᑦᑐᓂ ᓴᓗᒪᓂᖅᓴᐅᒋᐊᖃᕐᓂᖏᓐᓂ, ᐊᑦᑕᓇᓐᖏᓪᓗᑎᓪᓗ ᐅᖅᓱᐊᓗᐃᑦ ᓇᒧᑐᐃᓐᓈᖅᐸᑦᑐᑦ. ᑲᑎᒪᔾᔪᑎᖏᓐᓂ ᐃᒪᐃᑦᑑᓪᓗᑎᑦ, “ᐅᓗᕆᐊᓇᓐᖏᑎᑦᑎᓂᖅᓴᐅᓂᖏᑦ ᐊᑐᕐᓂᖏᓪᓗ ᐅᓯᑲᑦᑕᕐᓂᖏᓐᓂᓪᓗ ᐅᖅᓱᐊᓗᓐᓂ ᐃᓚᖃᓐᖏᑦᑐᓂᑦ ᐅᒥᐊᕐᔪᐊᒃᑯᑦ ᐅᑭᐅᖅᑕᖅᑑᑉ ᐃᒪᖏᑎᒎᖅᑐᓂᑦ”.
ᐅᖅᓱᐊᓗᑦ ᐃᓚᖃᓐᖏᑦᑐᑦ ᓄᖅᑲᖅᑎᑕᐅᓯᒪᒻᒪᑕ ᐋᓐᐋᑦᑎᑲ ᐃᒪᖏᓐᓄ, ᐊᒻᒪᓗ ᓯᓚᕐᔪᐊᒥ ᐃᒪᕐᒥᐅᑕᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᓱᕈᓐᓇᖅᑐᖅᑖᖅᑎᑦᑕᐃᓕᒪᑎᑎᓂᕐᒧᑦ ᑲᒪᒋᔭᖃᕐᓂᒧᓪᓗ ᑲᑎᒪᔨᕋᓛᖏᑦ ᐊᑐᓕᖁᔨᕗᑦ ᓯᓚᕐᔪᐊᒥ ᐃᒪᕐᒥᐅᑕᓕᕆᓂᕐᒧᑦ ᑲᑐᔾᔨᖃᑎᒌᖏᓐᓂ ᖃᓄᖅ ᐅᖅᓱᐊᓗᐃᑦ ᐃᓚᖃᓐᖏᑦᑐᑦ ᑲᒪᒋᔭᐅᒋᐊᖃᕐᒪᖔᑕ ᐅᑭᐅᖅᑕᖅᑑᑉ ᐃᒪᖏᑦᑎᒎᖅᐸᑦᑐᑦ. ᓯᓚᕐᔪᐊᒥ ᐃᒪᕐᒥᐅᑕᓕᕆᓂᕐᒧᑦ ᑲᑐᔾᔨᖃᑎᒌᖏᓐᓂ.
ᓯᓚᕐᔪᐊᒥ ᐃᒪᕐᒥᐅᑕᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᑖᒃᑯᐊᖑᔪᑦ ᓯᓚᕐᔪᐊᒥ ᑲᑐᔾᔨᖃᑎᒌᑦ ᑎᒥᖓ ᐊᑭᓖᑎᑕᐅᕙᒻᒪᑕ ᒪᓕᒐᓕᐅᕐᓂᖏᓐᓂ ᓯᓚᕐᔪᐊᒥ ᐅᓯᒃᑲᑦᑕᕐᓂᖓᓐᓂ ᐅᒥᐊᕐᔪᐊᒃᑯᑦ. ᑖᒃᑯᐊ ᐅᖅᓱᐊᓗᑦ ᓴᓗᒻᒪᓴᖅᓯᒪᓐᖏᑦᑐᑦ ᐅᑭᐅᖅᑕᖅᑐᒥ ᐃᑲᔫᕐᓂᖃᖃᑕᖅᑐᑦ ᐃᒪᕐᒥᐅᑕᓕᕆᓂᕐᒧᑦ ᑲᑐᔾᔨᖃᑎᒌᖏᓐᓂ ᐱᓕᕆᐊᕆᔭᕆᐊᓕᖏᓐᓂ ᐸᖅᑭᑦᑎᓂᖏᓐᓂ ᐃᒪᕕᓐᓂ ᐊᒻᒪᓗ ᐃᓄᓐᓂᑦ ᐋᓐᓂᐊᖅᑕᐃᓕᒪᒋᐊᖃᕐᓂᖏᓐᓂ ᐊᒻᒪᓗ ᐱᓐᖏᓂᖅᓴᐅᑎᑦᑎᒐᓛᓕᖅᑐᑎᑦ ᓯᓚᒥ ᐊᓯᔾᔨᐸᓪᓕᐊᓂᖏᓐᓂ ᑕᒪᒃᑯᓄᖓ ᓯᓚᕐᔪᐊᒥ ᑲᑐᔾᔨᖃᑎᒌᑦ ᐃᑯᐱᑦᑐᓕᕆᓂᕐᒧᑦ ᑐᕌᒐᖏᓐᓂ, ᐱᓗᐊᖅᑐᒥ ᓯᓚ ᐊᓯᔾᔨᐸᓪᓕᐊᓂᖓᓐᓂ, ᐊᒻᒪᓗ ᐃᒪᕕᒃ (SDG 13, ᐊᒻᒪᓗ 14).
ᐃᓄᐃᑦ ᐅᑭᐅᖅᑕᖅᑐᒦᐅᖃᑎᒌᑦ ᑲᑎᒪᔨᖏᑦ (ᑲᓇᑕᒥ) ᐊᖏᔪᖅᑳᑉ ᑐᖏᓕᖓ ᐅᓂᒃᑳᓚᐅᖅᑐᖅ ᒪᑐᐃᖅᐸᓪᓕᐊᓕᖅᑎᓪᓗᒋᑦ ᑲᑎᒪᔩᑦ ᐅᓂᒃᑳᕐᓂᐊᖅᑐᑦ. “ᓯᓚᕐᔪᐊᒥ ᑲᑐᔾᔨᖃᑎᒌᑦ ᓇᓗᓇᐃᖅᓯᓂᖏᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᑐᒥᓃᑦ ᐃᓕᓴᕆᔭᐅᓚᐅᖅᑐᑦ ᐱᖅᑯᓯᑦᑕ ᐱᔪᓐᓇᐅᑎᖏᑦ, ᐱᕙᓪᓕᐊᓂᕐᒧᑦ ᐱᔪᓐᓇᐅᑏᑦ, ᓄᓇᖃᖅᑳᖅᑐᒥᓃᑦ ᖃᐅᔨᓴᓂᖏᑦ ᐊᒻᒪᓗ ᓇᒻᒥᓂᖅ ᐱᓇᓱᐊᕐᓂᖅ,” ᐅᖃᓚᐅᖅᑐᖅ ᓖᓴ ᖁᐱᕐᕈᐊᓗᒃ. “ᑖᒃᑯᐊ ᓱᕈᓐᓇᖅᑐᖅᑖᖅᑎᑎᑕᐃᓕᒪᓂᕐᒧᑦ ᑲᒪᒋᔭᖃᕐᓂᒧᓪᓗ ᑲᑎᒪᔨᕋᓛᖏᑦ ᖃᐅᔨᒪᑦᑎᐊᕆᐊᓖᑦ ᑖᒃᑯᐊ ᓄᓇᓖᑦ ᐱᐅᓐᖏᑦᑐᐊᓗᒃᑯᑦ ᐊᑦᑐᖅᑕᐅᑲᒻᒪᓐᓂᐊᖏᒻᒪᑕ, ᐱᖅᑯᓯᖏᑦᑎᒍᑦ, ᐃᓄᓕᕆᓂᕐᒧᑦ ᒪᑭᒪᔾᔪᑎᖏᓐᓂᓪᓗ ᐃᓱᒪᓕᐅᖅᑐᖃᖅᑎᓪᓗᒍ ᐅᕙᓂ. ᑕᒪᓐᓇ ᑲᔪᓯᑎᒍᓐᓇᕋᑦᑎᒍ ᐱᐅᓯᕙᓪᓕᖅᑎᒐᓱᐊᕐᓗᒋᑦ ᐃᓄᐃᑦ ᓄᓇᓕᖏᑦ ᐱᒻᒪᕆᐅᔪᒃᑯᑦ ᓄᖅᑲᖅᑎᑕᐅᓇᓱᓐᓂᖏᓐᓂ ᐊᑐᖅᑕᐅᖃᑦᑕᕐᓂᖏᓐᓂ ᐅᓯᑲᖅᑕᖅᑎᐅᓂᖏᓐᓂᓪᓗ ᐅᖅᓱᐊᓗᑦ ᐃᓚᖃᓐᖏᑦᑐᑦ ᐅᑭᐅᖅᑕᖅᑑᑉ ᐃᒪᖏᑎᒍᑦ.”
ᖁᐱᕐᕈᐊᓗᒃ ᐅᓂᒃᑳᓚᐅᕐᒥᔪᖅ ᐅᖃᖅᑐᓂ ᐃᓄᐃᑦ ᐃᑲᔪᖅᑐᐃᖃᑦᑕᖅᑐᑦ ᓄᖅᑲᖅᑎᑕᐅᓂᖓᓐᓂ ᐊᑐᖅᑕᐅᖃᑦᑕᖅᑐᑦ ᐅᖅᓱᐊᓗᑦ ᐃᓚᖃᓐᖏᑦᑐᑦ ᐅᑭᐅᖅᑕᖅᑑᑉ ᐃᒪᖓᓐᓂ. ᑕᒪᓐᓇ ᒪᓕᑦᑐᑦ ᔪᓚᐃᒥ, 2018 ᐃᓄᐃᑦ ᐅᑭᐅᖅᑕᖅᑐᒦᐅᖃᑎᒌᑦ ᑲᑎᒪᔨᖏᑦ ᐅᑦᕿᐊᕕᒃ ᓇᓗᓇᐃᖅᑕᐅᓯᒪᓂᖓᓂ, ᒪᓕᒐᕐᒥᑦ 18−ᒥ, ᑎᓕᓯᒪᔪᑦ ᐃᓄᐃᑦ ᐅᑭᐅᖅᑕᖅᑐᒦᖃᑎᒌᑦ ᑲᑎᒪᔨᖏᓐᓂ ᐃᒪᐃᖁᔭᐅᓪᓗᑎᑦ: “ᐅᖃᐅᔾᔨᒋᐊᖅᑎᐅᓗᑎᑦ ᐊᔭᐅᖅᑐᕈᑎᓂᒃ ᓯᓚᕐᔪᐊᒥ ᐃᒪᕐᒥᐅᑕᓕᕆᓂᕐᒧᑦ ᑲᑐᔾᔨᖃᑎᒌᖏᓐᓂ ᐅᑭᐅᖅᑕᖅᑐᒥ ᓇᓗᓇᐃᒃᑯᑎᓂᒃ, ᐊᓯᖏᓐᓂᓪᓗ ᓯᓚᕐᔪᐊᒥ ᐊᒻᒪᓗ ᐊᕕᑦᑐᖅᓯᒪᔪᑦ ᐊᑐᐊᒐᖏᓐᓂ, ᑐᐊᕕᕐᓇᖅᑐᓂᑦ ᑲᒪᔭᕆᐊᖃᕐᓂᖏᓐᓂ, ᐊᒻᒪᓗ ᐊᑯᑦᑐᔫᑎᔾᔫᒥᓗᒋᑦ ᐅᖅᓱᐊᓗᐃᑦ ᐃᓚᖃᖏᑦᑐᑦ ᐊᑦᑐᐃᓗᐊᖁᓇᒋᑦ ᐃᒪᕐᒥᐅᑕᐃᓂ ᐃᖃᓗᓐᓂᓪᓗ ᓯᓚᓗ ᒪᓕᑦᑐᒍ ᐊᓯᕙᕐᓂᐅᕙᑦᑐᓂᒃ ᐊᒻᒪᓗ ᐊᑦᑕᓇᖅᑐᒦᖁᓇᒋᑦ ᐊᕙᑎᕗᓪᓗ ᐸᖅᑭᔭᐅᑦᑎᐊᕐᓗᓂ.” ᖁᐱᕐᕈᐊᓗᒃ ᐅᖃᖅᑐᓂ, “ᑕᒪᓐᓇ ᑕᐃᒪᐃᒋᐊᓕᒃ ᐊᑭᖃᓐᖏᓪᓗᒍ ᐅᕝᕙᓘᓐᓃᑦ ᐊᔅᓱᕈᓐᓇᖏᓪᓗᓂ ᓄᓇᓕᑦᑎᓐᓄᑦ.”
ᐅᖅᓱᐊᓗᑦ ᐃᓚᖃᓐᖏᑦᑐᑦ ᕿᓂᖅᑐᐊᓘᒻᒪᑦ ᓯᖁᓪᓗᒐᔅᓴᐅᓇᓂ ᓂᓪᓚᓱᑦᑐᒥ ᐅᑭᐅᖅᑕᖅᑐᒥ. ᐊᓪᓛᒃ ᖃᓄᐃᑦᑑᔮᓐᖏᑦᑑᒐᓗᐊᕐᓂᑦ, ᑯᕕᔪᖃᕐᓂᖅᑲᑦ ᑲᒪᒋᐊᖃᕐᓂᑎᓐᓂ ᐅᑭᐅᖅᑕᖅᑐᒥ ᐊᔪᕐᓇᓪᓚᕆᒃᑲᔭᖅᑐᖅ. ᑲᓇᑕᒥ ᐅᒥᐊᕐᔪᐊᒃᑰᖅᑐᑦ ᐅᑭᐅᖅᑕᖅᑐᒥ ᐊᑐᖃᑦᑕᖅᑐᑦ ᐅᖅᓱᐊᓗᑦ ᐃᓚᖃᓐᖏᑦᑐᑦ. ᐅᖅᓱᐊᓗᐃᑦ ᐃᓚᖃᓐᖏᑦᑐᑦ ᐳᔪᕐᓗᒻᒥ ᖁᒻᒧᑦ ᐃᖏᕐᕋᒥᒻᒪᑕ ᐅᓗᕆᐊᓇᖅᑐᑎᑦ ᐱᐅᓂᖏᑦᑑᓪᓗᑎᑦ ᓲᕐᓗ (sulphur) ᐊᒻᒪᓗ (nitrogen oxides), ᕿᓂᖅᑕᐃᓪᓗ ᐳᔪᕐᓗᐊᓗᐃᑦ. ᐊᓯᔾᔨᕐᓗᑎᑦ ᐅᖅᓱᐊᓗᑦ ᐃᓚᖃᓐᖏᑦᑐᒥᑦ ᒥᑭᓂᖅᓴᒥᑦ (sulphur−ᓕᒻᒥ) ᑭᓕᓪᓕᔮᓪᓕᑎᑦᑎᓲᖑᒻᒪᑕ ᕿᓐᓂᖅᑖᓗᓐᓂᒃ ᓯᓚᒨᖅᑲᖅᑐᓂᑦ 30-80%−ᒥ.
ᖁᐱᕐᕈᐊᓗᒃ ᐅᖃᓚᐅᕐᒥᔪᖅ ᐅᖓᑖᓅᓗᐊᖅᑐᖅ 50% ᖃᐅᑕᒫᑦ ᐃᓄᐃᑦ ᓂᕆᕙᑦᑕᖏᑦ ᓄᓇᒥᓐᖔᖅᓯᒪᔪᑦ ᐃᒪᕐᒥᓪᓗ. ᓴᓗᒪᓂᖓᓂ ᐊᕙᑎᓄᑦ ᐃᒪᕐᓗ ᐆᑦᑐᕋᔅᓴᐅᓐᖏᑦᑐᖅ ᖃᓄᒋ ᐱᐅᑎᒋᒻᒪᖔᖅ. ᐅᖅᓱᐊᓗᑦ ᐃᓚᖃᓐᖏᑦᑐᑦ ᑯᕕᔪᖃᕐᓂᖅᑲᑦ ᐊᔅᓱᐊᓗᒃ ᐅᓗᕆᐊᓇᖅᑐᒦᒐᔭᖅᑐᑦ ᓄᓇᓕᑦ. ᐊᒻᒪᓗ ᐃᓄᐃᑦ ᓄᓇᓕᖏᑦ ᐅᓗᕆᐊᓇᖅᑐᒦᓐᓂᖅᓴᐅᓗᑎᓪᓗ ᓂᕿᒋᕙᑦᑕᖏᑦ ᑕᐃᒃᑯᓇᓐᖓᑦ ᑲᓇᑕᒥᐅᑕᕐᓂᑦ, ᐃᖏᕐᕋᔪᓕᕆᓂᕐᒧᑦ ᐊᑭᖏᓐᓂ ᐊᑭᑐᔪᕐᔪᐊᕌᓘᓪᓗᑎᑦ ᓱᓇᒃᑯᑖᓕᒫᐸᓗᐃᑦ, ᐱᖃᓯᐅᑎᓪᓗᒋᑦ ᓂᖀᑦ, ᐊᕐᕌᒍᑕᒫᑦ ᐅᒥᐊᕐᔪᐊᒃᑰᖃᑦᑕᖅᑐᑦ.
ᐱᖁᔭᓕᐅᕆᐊᓕᑦ ᕿᓚᒥᒨᒐᓗᐊᖅᑲᑦ ᑕᐃᒪᒃ ᐊᓯᔾᔨᕈᓐᓇᕋᔭᕐᖓᑕ ᓱᕈᓐᓇᖅᑐᓕᓐᓂᑦ ᐅᖅᓱᐊᓗᓐᓂᑦ ᓲᕐᓗ ᐅᖅᓱᐊᓗᑦ ᐃᓚᖃᓐᖏᑦᑐᑦ, ᐊᒻᒪᓗ “ᐊᓯᔾᔨᕐᓗᑎᑦ ᐅᖅᓱᐊᓗᓐᓄᑦ ᑮᓇᐅᔭᓂᒃ” ᐃᓚᒋᔪᓐᓇᕐᒥᔭᑕ ᑕᐃᒫᒃ.
ᖁᐱᕐᕈᐊᓗᒃ ᐅᖃᒃᑲᓂᖅᑐᓂ ᖃᓪᓗᓈᓂ 600 ᐅᒥᐊᕐᔪᐊᑦ ᑎᑭᖃᑦᑕᖅᑐᑦ ᐱᐅᓂᖅᓴᒥᑦ ᓴᓗᒪᓂᖅᓴᒥ ᐅᖅᓱᐊᓗᖃᕆᐊᓖᑦ, ᓱᕈᓐᓇᓗᐊᓐᖏᑦᑐᓂᑦ ᑕᐃᔭᑦᑎᓐᓂ ᒫᓐᓇ ᓴᖅᑭᖃᑦᑕᖅᑐᓂᑦ ᓱᕈᕐᓂᖅ ᐊᐅᓚᑕᐅᓂᖓ.
ᐋᖅᑭᓱᖅᑕᐅᓯᒪᒻᒪᑕ ᐅᓗᕆᐊᓇᓗᐊᖅᑕᐃᓕᒪᓪᓗᑎᑦ ᓴᖅᑭᐸᑦᑐᑦ ᐊᓂᕐᓂᑎᓐᓄᑦ ᐊᑦᑐᐃᓂᖃᖅᑐᓂᑦ ᐃᓄᓐᓄᑦ. ᑕᐃᒫᒃ ᐅᒥᐊᕐᔪᐊᑦ “ᐅᖅᓱᐊᓗᓐᓂ ᐊᓯᔾᔨᖅᑲᒋᑦ”, ᓱᕈᓐᓇᖅᑐᖃᓐᖏᓂᖅᓴᓂ ᐃᓚᖃᕐᓗᑎᑦ ᖃᓪᓗᓈᓃᑦᑐᓂᑦ ᓴᖅᑭᖃᑦᑕᖅᑐᓂᑦ ᓱᕈᕐᓂᖅ ᐊᐅᓚᑕᐅᓂᖓ, ᐊᓯᐊᓂᖔᖅ ᐊᑐᓕᕐᓗᑎᑦ ᓱᕈᓐᓇᖏᓐᓂᖅᓴᓂᑦ ᐅᖅᓱᐊᓗᑦ ᐃᓚᖃᓐᖏᑦᑐᑦ ᐅᑭᐅᖅᑕᖅᑐᒥ.