ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᑎᓕᐅᕆᕗᑦ ᓄᓇᓕᔾᔪᐊᓂᑦ ᐃᖅᑲᒋᕙᖃᑦᓯᐊᖁᓪᓗᒋᑦ ᐱᔪᓐᓇᐅᑎᖏᓐᓂᑦ ᓄᓇᖃᖅᑳᖅᓯᒪᔪᑦ ᐱᐅᕆᔅᒥ ᓯᓚ ᐱᓪᓗᒍ ᐊᖏᖃᑎᒌᒍᑎᒥ

ᑎᓯᐱᕆ 3, 2015 – ᐱᐅᕆᔅ, ᕗᕌᓐᔅ – ᐅᑲᓕᖅ ᐃᔨᑦᓯᐊᖅ, ᐃᒃᓯᕙᐅᑕᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑲᑎᔭᖅᑐᖅᓯᒪᖃᑕᐅᔪᖅ ᑲᑐᔾᔨᖃᑎᒌᑦᑐᑦ ᓄᓇᓕᐅᔪᓄᑦ ᐊᑐᕈᒫᕐᓂᐊᖅᑕᒥᓐᓂᒃ ᑲᑎᒪᔾᔪᑎᖃᖅᑎᓪᓗᒋᑦ ᓯᓚᐅᑉ ᐊᓯᔾᔨᕐᓂᖓᑕ ᒥᒃᓵᓄᑦ COP 21 ᐅᖃᐅᓯᐅᑎᓪᓗᒍ ᐱᐅᕆᔅᒥ ᓂᐱᖃᐅᑎᒋᓪᓗᓂᔾᔪᒃ ᑭᒡᒐᖅᑐᐃᓪᓗᑎᒃ ᐃᓄᖕᓂᑦ. ᒫᓐᓇᐅᔪᒥ, ᐋᔩᖃᑎᒌᑦᑏᑦ ᐱᓕᕆᖃᓖᑦ ᓴᖅᑭᑎᑦᓯᓂᕐᒧᑦ ᑎᑎᕋᖅᑕᐅᒋᐊᙵᖅᑐᒥᒃ ᐊᖏᖃᑎᒌᒍᑎᒥᒃ ᑐᓂᔭᐅᒐᔭᖅᑐᒥᒃ ᓯᕗᓕᖅᑎᓄᑦ ᐱᐅᕆᔅᓯᓕᐊᕐᓂᐅᔭᔪᓄᑦ ᐱᓇᓱᐊᕈᓯᐅᓛᖅᑐᒥ. ᑕᒪᒃᑯᐊ ᐋᔨᖃᑎᒌᖕᓃᑦ ᓯᕗᓕᕐᓂᐅᔭᒻᒪᑕ ᐃᓚᖏᓪᓗ ᓄᓇᓕᔾᔪᐊᑦ ᐃᑲᔪᖅᑐᐃᖏᑦᑐᑦ ᑕᕝᕙᐅᓂᖓᓂᒃ ᐅᖃᐅᓯᐅᑉ ᓇᓗᓇᖏᑎᑦᓯᔪᒥᒃ ᓯᓚᐅᑉ ᐊᓯᔾᔨᕐᓂᖓᓂᒃ ᐊᑦᑐᐃᓂᕐᓗᑦᑐᒥᒃ ᑎᒥᓕᓐᓂᑦ ᐃᓄᖕᓂᑦ ᐱᔪᓐᓇᐅᑎᓕᓐᓂᒃ ᓄᓇᖃᖅᑳᖅᓯᒪᔪᓂᒃ. “ᓯᓚᐅᑉ ᐊᓯᔾᔨᕐᓂᖓ ᐊᕙᑎᒧᑦ ᐃᓱᒫᓘᑕᐅᑐᐃᓐᓇᖏᑦᑐᖅ ᑎᒥᓕᓐᓄᑦ ᐃᓄᖕᓄᑦ ᐱᔪᓐᓇᐅᑎ ᐃᓱᒫᓗᓐᓇᖅᑑᓪᓗᓂ ᐊᐅᑉᐸᓪᓕᐊᓂᖓᓗ ᐅᑭᐅᖅᑕᖅᑑᑉ ᐊᑦᑐᐃᔪᖅ ᐃᓘᓐᓇᐃᓂᑦ ᐃᓄᐃᑦ ᐃᓅᓯᖏᓐᓂᑦ ᑕᐃᒪᐃᒻᒪᑦ ᑭᖑᓪᓕᐹᖑᒐᔭᖅᑐᖅ ᑎᑎᕋᖅᓯᒪᔪᖅ ᐱᔪᓐᓇᐅᑎᖏᓐᓂᑦ ᓄᓇᖃᖅᑳᖅᓯᒪᔪᑦ ᑎᒍᖑᓯᔭᕆᐊᖃᖅᐳᖅ ᐊᐅᓚᑦᓯᒍᑎᒋᓗᒍᓗ ᐸᐸᓪᓗᒍᓗ ᑎᑎᕋᖅᑕᐅᓯᒪᔪᒥ 2.2.−ᒥ ᓄᓇᑖᕈᑎᒥ ᐱᔪᓐᓇᐅᑎᖃᖅᑐᒍᑦ ᓂᒡᓚᓱᑦᑐᒦᓐᓂᕐᒥᒃ” ᐊᐃᕙᐅᑎᓕᒥᓂᖅ ᑕᒪᑐᒧᖓ ᐃᔨᑦᓯᐊᖅ.

ᓄᓇᖃᖅᑳᖅᓯᒪᔪᑦ ᐊᒻᒪᓗ ᑎᒥᓕᓐᓄᑦ ᐃᓄᖕᓄᑦ ᐱᔪᓐᓇᐅᑎᖃᕐᓃᑦ ᐱᓪᓗᒋᑦ ᑲᑎᒪᔭᖅᑐᖅᓯᒪᖃᑕᐅᔪᑦ ᑐᑭᓯᑕᐃᓐᓇᖅᐳᑦ ᖃᐅᔨᓪᓗᑎᒃ ᑎᑎᕋᖅᑕᐅᓯᒪᔪᑦ ᐃᓕᑕᖅᓯᓯᒪᔭᕆᐊᖃᕐᒪᑦᓄᓇᖃᖅᑳᖅᓯᒪᔪᑦ ᐊᒻᒪᓗ ᑎᒥᓖᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐱᖃᓯᐅᑎᓯᒪᓗᒋᓪᓗ ᐱᔪᓐᓇᐅᑎᖏᑦ ᓄᓇᖃᖅᑳᖅᓯᒪᔪᑦ ᐅᓗᕆᐊᓇᖅᑐᒧᑦ ᑕᒪᑐᒧᖓ. “ᐃᓱᒪᔪᖓᓕ ᐊᖏᖃᑎᒌᑦᑐᐃᓐᓇᐅᒍᓐᓇᓂᑦᑎᓐᓂᒃ ᑎᒥᓖᑦ ᐃᓄᐃᑦ ᐱᔪᓐᓇᐅᑎᖃᕐᓂᖏᓐᓂᒃ ᐊᑦᑕᓇᖏᑦᑐᒥ ᐊᕙᑎᖃᕐᓂᕐᒥᒃ ᐊᒻᒪᓗ ᓄᓇᖃᖅᑳᖅᓯᒪᔪᑦ ᓯᕗᓪᓕᖅᐸᐅᓂᖏᓐᓂᒃ ᐱᓕᕆᔩᑦ ᓯᓚᐅᑉ ᐊᓯᔾᔨᕐᓂᖓᑕ ᐊᑦᑐᐃᓂᕐᓗᒍᑎᖏᓐᓂᑦ. ᓄᓇᓕᖁᑎᓕᒫᕗᑦ ᐅᑭᐅᖅᑕᖅᑐᒥ ᐱᒋᐊᕐᓗᓂ ᐅᖅᑰᔪᒦᑦᑐᓄᑦ ᐊᒃᓱᕈᕐᓇᑐᖅᓯᐅᕐᒪᑕ ᐊᓯᔾᔨᐸᓪᓕᐊᔪᒧᑦ ᓯᓚᒧᑦ. ᐃᓕᑕᕆᔭᐅᑦᓯᒪᑦᓯᐊᕆᐊᖃᕐᒪᑦ ᑕᒪᓐᓇ,” ᐅᖃᖅᑐᒥᓂᖅ ᐃᔨᑦᓯᐊᖅ.

“ᑎᓕᐅᖅᐸᕗᑦ ᑲᓇᑕ, ᓄᐊᐅᐃ, ᒥᐊᓕᒐᐃᑦ ᓄᓇᖓᑦ, ᑲᓛᖡᑦ ᓄᓈᑦ, ᕋᓴ, ᓱᕖᑕᓐ, ᕕᓐᓚᓐ ᐃᑲᔪᖅᑐᐃᖁᓪᓗᒋᑦ ᓄᓇᖃᖅᑳᖅᓯᒪᔪᓂᑦ ᑕᕝᕙᐅᓂᖓᑦ ᐊᒻᒪᓗ ᑎᒥᓖᑦ ᐃᓄᐃᑦ ᐱᔪᓐᓇᐅᑎᖃᕐᓂᖏᓐᓂᒃ ᐅᖃᐅᓯᖓᑦ ᑎᑎᕋᖅᑕᓯᒪᐃᓐᓇᖁᓪᓗᒍ ᑎᑎᕋᖅᑕᐅᓯᒪᔪᒥ 2.2.−ᒥ ᓄᓇᑖᕈᑎᒥ,” ᐅᖃᖅᑐᒥᓂᖅ ᐃᔨᑦᓯᐊᖅ. “ᑭᖒᒪᒋᒐᑦᑎᒍᑦ ᓄᓇᓖᑦ ᑕᒪᒃᑯᓇᓂ ᓄᓇᓕᕐᔪᐊᓂ ᐊᐅᓚᑦᔭᐃᓗᑎᒃ ᐊᒻᒪᓗ ᐊᔪᐃᓐᓇᕐᕕᒋᓗᒋᑦ ᐃᖅᑲᒋᔭᖏᑦ ᒐᕙᒪᐃᑦ ᑕᒪᑐᒧᖓ. ᐊᔪᐃᓐᓇᕐᓂᖅ ᐊᒥᓱᓄᑦ ᓇᓕᒧᒋᔭᖃᕐᒪᑕ ᐊᔪᐃᓐᓇᖅᑐᓄᑦ ᓄᓇᖃᖅᑳᖅᓯᒪᔪᓄᑦ ᑲᑎᒪᔭᖅᑐᖅᓯᒪᔪᓄᑦ ᐊᑐᖅᑕᐅᔪᓄᑦ ᐋᔩᖃᑎᒌᑎᓄᑦ ᑕᕝᕙᓂ ᐱᐅᕆᔅᒥ.”