ᒪᐃ 12, 2016 – ᓯᓚᕐᔪᐊᑉ ᑲᑐᔾᔨᖃᑎᒌᖏᑦᑕ ᐊᓪᓚᑯᖓᓐᓂ, ᓅ ᔪᐊᒃ – ᐅᑲᓕᖅ ᐃᔨᑦᓯᐊᖅ ᐃᔅᓯᕙᐅᑕᕆᔭᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᐊᒻᒪᓗ ᔭᓪᒫᕐ, ᑕᓪ, ᐃᔅᓯᕙᐅᑕᐅᑉ ᑐᖏᓕᖓ ᑲᓛᖡᑦ ᓄᓈᓄᑦ ᐱᖃᑕᐅᓚᐅᖅᓯᒪᔫᒃ ᑲᑐᔾᔨᖃᑎᒌᓐᓂᒃ ᓯᓚᕐᔪᐊᒥ ᑲᑎᒪᓂᐅᔪᒥᑦ ᓄᓇᖃᖅᑳᖅᑐᓕᕆᓂᕐᒥᑦ ᓅ ᔪᐊᒃᒥ ᐱᓇᓱᐊᕈᓯᕐᒥᑦ ᑕᒪᓂ. ᑖᒃᑯᐊ ᑲᑐᔾᔨᖃᑎᒌᓐᓂᒃ ᓯᓚᕐᔪᐊᒥ ᑲᑎᒪᓂᐅᔪᒥᑦ ᓄᓇᖃᖅᑳᖅᑐᓕᕆᓂᕐᒥᑦ ᐱᒻᒪᕆᐅᒻᒪᑕ ᓴᖅᑭᔮᖅᑎᑦᑎᓂᕐᒥᑦ ᐅᖃᖃᑎᒌᒃᑲᓐᓂᕈᓐᓇᕐᓂᖏᓐᓂ ᒐᕙᒪᒃᑯᑦ, ᓄᓇᖃᖅᑳᖅᑐᒥᓃᓪᓗ ᐊᒻᒪᓗ ᓯᓚᕐᔪᐊᒥ ᑲᑐᔾᔨᖃᑎᒌᑦ. ᓄᓇᖃᖅᑳᖅᑐᒥᓃᑦ ᓇᑭᓐᖔᖅᓯᒪᑐᐃᓐᓇᑦᑎᐊᖅᑐᓂ ᓯᓚᕐᔪᐊᒥ ᐱᖃᑕᐅᔪᒪᓂᖏᓐᓂ ᓇᓗᓇᐃᖅᓯᕗᑦ ᑲᔪᓯᖁᔨᓪᓗᑎᑦ 2030−ᒥ ᐃᑯᐱᑦᑐᓕᕆᓂᕐᒧᑦ ᑐᒑᒐᐅᔪᓂᒃ.
“ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ICC) ᐃᓕᓴᖅᓯᓯᒪᕗᑦ ᐅᖃᐅᓯᐅᓯᒪᔪᓂᒃ ᐊᓯᖏᓐᓂ ᐅᑭᐅᖅᑕᖅᑐᒥ ᐃᓕᓴᖅᓯᓯᒪᒻᒪᑕ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᑐᒥᓂᑦ ᐊᒻᒪᓗ ᓄᓇᓕᕐᔪᐊᑦ ᓯᓚᕐᔪᐊᒥ ᐊᑐᓕᖁᔨᕗᑦ ᑲᑐᔾᔨᖃᑎᒌᑦ ᓯᓚᕐᔪᐊᒥ ᓇᓗᓇᐃᖅᓯᓗᑎᑦ ᑕᒪᑐᒥᖓ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᑐᒥᓃᑦ” ᐃᔨᑦᓯᐊᖅ ᐅᖃᖅᑐᓂ. “ᑲᔪᓯᒃᑲᓐᓂᕈᒪᓪᓗᑕ ᑲᓇᑕᐅᑉ ᓄᑖᕐᒥᑦ ᐱᓕᕆᐊᕆᓂᐊᕐᓂᕋᖅᑕᖓᓐᓄᑦ ᓄᓇᖃᖅᑳᖅᑐᒥᓂᕐᓂᑦ ᑲᓇᑕᒥ, ᐃᓱᒫᓗᓇᖅᑐᖃᕐᖓᑦ ᓱᓕ ᑐᓐᖓᕕᐅᓂᐊᖅᑐᓂᒃ ᐅᖃᐅᓯᐅᖅᑲᐅᔪᓂᒃ ᐅᓪᓗᒥᐅᔪᖅ ᑕᒪᑐᒥᖓ ᐱᓕᕆᓂᐊᖅᑎᓪᓗᒋᑦ ᐃᓄᓐᓂᑦ ᐊᓯᖏᓐᓂᓪᓗ ᓄᓇᖃᖅᑳᖅᑐᒥᓂᕐᓂᑦ.”
ᔨᒥ ᓯᑕᑦᔅ, ᐃᔅᓯᕙᐅᑕᐅᑉ ᑐᖏᓕᖓ ᐊᓛᔅᑲᒥ ᐅᖃᓚᐅᖅᑐᖅ, ᑖᒃᑯᐊ “ᑲᑐᔾᔨᖃᑎᒌᓐᓂᒃ ᓯᓚᕐᔪᐊᒥ ᑲᑎᒪᓂᐅᔪᒥᑦ ᓄᓇᖃᖅᑳᖅᑐᓕᕆᓂᕐᒥᑦ ᐱᕕᖃᖅᑎᑦᑎᓲᖑᒻᒪᑕ ᐃᓄᓐᓂᑦ ᐊᓛᔅᑲᒥ, ᑲᓇᑕᒥ, ᑲᓛᖡᑦ ᓄᓈᓂ, ᓯᑳᑦᑲᒥᓗ ᐱᓕᕆᖃᑎᖃᕐᓗᑎᑦ ᐊᖏᓂᖅᓴᐅᔪᓂᒃ ᓯᓚᕐᔪᐊᒥ ᓄᓇᖃᖅᑳᖅᑐᒥᓂᕐᓂᑦ ᑕᐃᒪᐃᑦᑐᓴᐃᓐᓇᕐᓂᑦ ᑲᒪᔪᓂᒃ.” ᐅᖃᖅᑐᓂᓗ, “ᐅᖃᐅᓯᐅᕋᑖᓚᐅᖅᑐᓄᑦ ᐱᔪᒪᓕᒃᑲᓂᕐᒥᔪᖓ ᑲᓇᑕᒥᐅᑦ ᒐᕙᒪᒃᑯᖏᓐᓂ ᐊᑐᓕᖅᑎᑦᑎᓂᕐᒥᑦ ᓯᓚᕐᔪᐊᒥ ᑲᑐᔾᔨᖃᑎᒌᖏᑦ ᓇᓗᓇᐃᖅᓯᓂᖏᓐᓂ, ᑕᒪᓐᓇ ᐱᐅᔪᐊᓗᒃ ᐱᕙᓪᓕᐊᔪᖅ ᐃᓄᓐᓄᑦ ᑲᓇᑕᒧᓪᓗ”.
ᑕᓐᒫᒃ ᑲᓛᖡᑦ ᓄᓈᓂ, ᕕᓐᓛᓐ, ᐊᐃᔅᓛᓐ, ᓱᕖᑕᓐ ᐊᒻᒪᓗ ᓄᐊᐅᐃ ᐅᖃᓚᐅᖅᓯᒪᔪᑦ ᓄᓇᖃᖅᑳᖅᑐᒥᓃᑦ ᐱᓗᐊᖅᑐᒥᑦ ᐊᑦᑐᖅᑕᐅᒍᓐᓇᑦᑎᐊᕐᖓᑕ ᓯᓚᕐᔪᐊᒥ ᓯᓚ ᐊᓯᔾᔨᕐᓂᖓᓐᓄᑦ ᐊᒻᒪᓗ ᐊᔭᐅᖅᑐᖅᑕᐅᓂᖅᓴᐅᓕᖅᑐᑎᓪᓗ ᓯᓚᕐᔪᐊᑉ ᑭᓱᑯᑦᑎᖏᓐᓂ ᐱᔪᓐᓇᕐᓂᖏᓐᓂ ᐊᑐᐃᓐᓇᐅᔪᓂᒃ. ᑲᑐᔾᔨᖃᑎᒌᑦ ᓯᓚᕐᔪᐊᒥ ᓇᓗᓇᐃᖅᓯᕗᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᑐᒥᓃᑦ ᓇᓗᓇᓐᖏᑦᑎᐊᖅᑐᑦ ᐃᓕᓴᖅᓯᓯᒪᒻᒪᑕ ᑕᒪᑐᒥᖓ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᑐᖃᖏᓐᓂ, ᐱᖅᑯᓯᖏᓐᓂ ᐃᓕᖅᑯᓯᖏᓐᓂᓪᓗ ᐊᑐᖃᑦᑕᖅᑕᖏᓐᓂ ᐱᐅᖅᓱᐊᓂᖏᓐᓂ ᑕᐃᒪᐃᓪᓗᐊᑎᑦᑎᓂᖏᓐᓂᓪᓗ. ᐃᔨᑦᓯᐊᖅ ᑐᓐᖓᓱᑦᑎᑦᑎᓚᐅᖅᑐᖅ ᐊᔭᖅᑐᑲᓐᓂᖅᑐᒋᓪᓗ ᑎᒥᐅᔪᓕᒫᑦ, “ᑮᓇᐅᔭᖃᖅᑎᑕᐅᖃᑦᑕᑦᑎᐊᕐᓗᑎᑦ ᐃᓄᓐᓄᑦ ᐱᔪᓐᓇᐅᑏᑦ ᓄᓇᖃᖅᑳᖅᑐᒥᓂᕐᓅᖓᔪᓂᒃ ᓇᒥᑐᐃᓐᓇᖅ ᓄᓇᓕᕐᔪᐊᓂᑦ. ᐃᓚᓕᐅᔾᔭᐅᖃᑦᑕᕐᓗᑎᑦ ᑭᓯᐊᓂ ᓄᓇᖃᖅᑳᖅᑐᒥᓃᑦ ᑎᒥᐅᔪᓂᒃ ᓯᕗᒧᐊᑉᐸᓪᓕᐊᓂᐊᖅᑐᑦ ᑐᕌᒐᖏᑦ ᐸᕆᔅᒥ ᐊᖏᕈᑎᖓᓐᓂ ᐊᒻᒪᓗ 2030 ᐱᓕᕆᐊᔅᓴᐅᔪᓂᒃ ᐃᑯᐱᑦᑐᓕᕆᓂᕐᒥᑦ.”
ᔭᓪᒫ ᑖᓪ ᐅᖃᖅᑐᓂ, “ᓄᓇᖃᖅᑳᖅᑐᒥᓂᑦ ᐊᐅᓚᑦᑎᒋᐊᖃᕐᖓᑕ ᐱᕙᓪᓕᐊᓂᖏᓐᓂ ᐱᖓᓲᔪᖅᑐᓂᒃ ᐱᓕᕆᐊᔅᓴᓂᑦ ᑎᒥᐅᔪᒥᑦ ᐊᒻᒪᓗ ᐱᖃᑕᐅᖃᑦᑕᕐᓗᑎᑦ ᐃᓱᒪᓕᐅᕐᓂᐅᔪᓂᑦ ᑕᒪᑐᒥᖓ.” ᑖᓪ ᐅᖃᖅᑐᓂᓗ “ᐃᑲᔪᖅᑐᐃᑲᓐᓂᖁᓪᓗᒋᑦ ᑕᒪᑐᒥᖓ ᓯᓚᕐᔪᐊᒥ ᑮᓇᐅᔭᖃᖅᑎᑦᑎᓂᕐᒥᑦ ᐱᖃᑕᐅᖃᑦᑕᖁᓪᓗᒋᑦ ᓄᓇᖃᖅᑳᖅᑐᒥᓃᑦ ᓯᓚᕐᔪᐊᒥ ᑲᑎᒪᕕᔾᔪᐊᖅᑐᖃᖅᑎᓪᓗᒍ ᐅᖃᐅᓯᖃᖅᑐᓂᑦ ᓄᓇᖃᖅᑳᖅᑐᒥᓂᕐᓂᑦ, ᐊᒻᒪᓗ ᑕᐃᒪᐃᑦᑐᑦ ᑮᓇᐅᔭᑦ ᐋᖅᑭᑦᑕᐅᓗᑎᑦ ᐊᐅᓚᑕᐅᓪᓗᑎᓪᓗ ᓄᓇᖃᖅᑳᖅᑐᒥᓂᕐᓄᑦ ᓇᒻᒥᓂᖅ.”
ᐅᑲᓕᖅ ᐃᔨᓯᑦᑎᐊᖅ ᐅᖃᓱᖓᖅᑐᓂ, “ᑕᒫᓂ ᐱᓇᓱᐊᕈᓯᕐᒥᑦ ᑎᒥᐅᔪᑦ ᐱᕕᖃᕐᒥᔪᑦ ᓯᕗᕙᖅᑎᑦᑎᑲᓐᓂᕐᓗᑎᑦ ᓄᓇᖃᖅᑳᖅᑐᒥᓂᕐᓂᑦ, ᐋᓐᓂᐊᖅᑕᐃᓕᒪᔪᓕᕆᓂᕐᒥᑦ, ᐃᓕᓐᓂᐊᖅᑐᓕᕆᓂᕐᒥᑦ, ᐊᕙᑎᓕᕆᓂᕐᒥᑦ ᐃᓚᓕᐅᔾᔨᖃᑦᑕᓂᕐᒥᓪᓗ ᐃᓱᒪᓕᐅᖅᑐᖃᖅᑎᓪᓗᒍ ᐃᓅᓯᕐᒥᓄᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᓄᓇᖃᖅᑳᖅᑐᒥᓂᑦ. ᐃᓄᐃᑦ ᕿᓚᓈᑦᑎᐊᖅᑐᑦ ᐱᓕᕆᖃᑕᐅᓂᐊᕐᓂᕐᒥᑦ ᓯᓚᕐᔪᐊᒥ ᓂᕆᐅᒋᔭᖃᕐᓂᖅᓴᐅᓕᕐᓗᑎᓪᓗ.”
For more information: Carole Simon, ICC Canada csimon@inuitcircumpolar.com P: 613-563-2642