ᑎᓯᐱᕆ 8, 2015 – ᕚᓐᑰᕗ, ᑲᓇᑕ – ᑐᐊᐃᓐ ᓯᒥᔅ, ᐊᖓᔪᖅᑳᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᑲᓇᑕᒧᑦ ᕚᓐᑰᕗᒦᑉᐳᖅ, ᐳᑎᓯ ᑲᓚᒻᐱᐊ ᐅᐸᒍᑎᓯᒪᓪᓗᓂ ᐅᑭᐅᖅᑕᖅᑐᒥ ᓱᕈᕐᓇᖅᑐᓄᑦ ᐱᓕᕆᐊᑉ ᒥᒃᓵᓄᑦ ᖃᓄᐃᓯᒪᔪᖃᓕᕐᒪᖔᖅ ᑲᒪᔭᖅᑐᕈᑎᒋᓯᒪᓪᓗᒍ. ᑖᓐᓇ NCP−ᐅᑭᐅᖅᑕᖅᑐᒥ ᓱᕈᕐᓇᖅᑐᓄᑦ ᐱᓕᕆᐊᖅ ᖃᓄᐃᓕᐅᕈᑕᐅᓯᒪᓕᖅᑐᑦ ᑭᖑᓂᖓᓂ ᖃᑎᒪᓂᖅ, ᐊᕐᕌᒍᓕᖅᑭᒐᐃᒻᒪᑦ ᑲᑎᒪᑎᑦᓯᓂᐅᕙᑦᑐᖅ, ᐊᖅᑯᑎᓪᓚᕆᑐᐊᖅ ᑲᓇᑕᒥ ᑭᓪᓕᓯᓂᐊᖅᑎᓄᑦ ᖃᐅᔨᓴᖅᑐᓕᕆᓂᖕᒪᕆᑎᒍ. ᓄᓇᖃᖅᑳᖅᓯᒪᔪᑦ ᐊᒻᒪᓗ ᐊᑐᐊᒐᓕᐅᖅᑏᑦ ᑐᕌᒐᖃᖁᓪᓗᒋᑦ ᖃᐅᔨᓴᖅᑕᐅᓗᓂ ᓇᑭᖔᕐᓂᖏ ᐱᔾᔪᑕᐅᔪᑦ ᐊᑦᑐᐊᔪᑦ ᓱᕈᕐᓇᖅᑐᓄᑦ ᓯᕕᑐᔪᒥᒃ ᐊᑐᖅᑕᐅᒍᓐᓇᖅᑐᑦ ᑲᓇᑕᐅᑉ ᐅᑭᐅᖅᑕᖅᑐᖏᓐᓂ, ᐃᓕᒍᑕᐅᓗᑎᒃ ᐅᖃᖃᑎᒌᒍᑕᐅᓗᑎᓪᓗ ᖃᓄᐃᓕᖓᓕᐅᕐᓂᐅᔪᑦ ᑭᖑᓪᒥ ᖃᐅᔨᔭᐅᒍᑎᒥᓂᖅᑎᒍ, ᐅᓪᓗᒥᒧᑦ ᖃᓄᐃᓕᖓᓕᕐᒪᖔᑕ ᖃᐅᔨᒪᓂᕐᒨᖓᔪᑦ ᐊᒻᒪᓗ ᐊᑐᐊᒐᕐᓅᖓᔪᑦ, ᐸᕐᓇᐅᑕᐅᔪᕐᓗ ᓯᕗᓂᒃᓴᒥ ᐊᑐᕋᑦᓴᓄᑦ ᑕᒪᑐᒧᖓᓕᖓᔪᑦ.
“ᐅᖓᑖᓄᑦ ᐊᕐᕌᒍᑦ ᐊᕙᑎᑦ ᐊᑕᐅᓯᕐᓗ ᒐᕙᒪᒃᑯᑯᑦ ᑮᓇᐅᔭᖃᖅᑎᑦᓯᓯᒪᓕᖅᐳᑦ ᐅᑭᐅᖅᑕᖅᑐᒥ ᓱᕈᕐᓇᖅᑐᓄᑦ ᐱᓕᕆᐊᒧᑦ ᑐᑭᓯᐅᒪᔭᐅᓕᓚᐅᖅᓯᒪᒻᒪᑦ ᐱᓕᕆᖃᑎᒌᖕᓂᖅ ᐱᒻᒪᕆᐅᓂᖓᓂᒃ ᓴᙱᔪᒥᒃ ᓇᖕᒥᓂᖃᖃᑎᒌᑦᓯᐊᕐᓂᐊᕈᒪᔪᖃᕈᓂ ᐃᓄᖕᓂᑦ ᐃᓅᓯᓕᖕᓂᒃ ᐅᑭᐅᖅᑕᖅᑐᒥ” ᐅᖃᖅᑐᒥᓂᖅ ᑐᐊᐃᓐ ᓯᒥᔅ. “ᑲᓇᑕᒥ ᐱᓕᕆᐊᖑᓪᓗᓂ, ᐃᓄᐃᑦ ᓯᑕᒪᓃᙶᖅᓯᒪᔪᑦ ᓄᓇᐃᑦ ᐊᕕᑦᑐᖅᑕᐅᓯᒪᓂᖏᓐᓂ ᐃᓄᐃᑦ ᓄᓈᓂᒃ ᐊᓯᖏᓐᓂᓗ ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᓂ ᖃᐅᔨᒪᓂᕐᒥᒃ ᑎᒍᒥᐊᖅᑏᑦ, ᐃᓕᓐᓂᐊᖅᓯᒪᓂᓖᑦ ᐃᓕᓐᓂᐊᕐᕕᑎᒍ ᐊᒻᒪᓗ ᒐᕙᒪᒃᑯᑦ ᑭᓪᓕᓯᓂᐊᖅᑎᖁᑎᒋᑦ ᖃᐅᔨᓴᖅᑐᓕᕆᓂᒃᑯᑦ. ᐃᓄᐃᑦ ᓯᕗᓕᕈᓐᓇᖅᓯᒪᕗᑦ ᖃᐅᔨᓴᖅᑐᓕᕆᓂᕐᒥ ᑭᐅᖃᑦᑕᖅᓯᒪᓪᓗᑎᓪᓗ ᐊᐱᖅᑯᑎᒋᔭᐅᔪᓂᒃ ᐱᒻᒪᕆᐅᔪᓂᒃ ᐊᑑᑎᖃᕐᓂᖏᓐᓄᑦ ᓄᓇᓕᖁᑎᑦᑎᓐᓄᑦ.” ᓂᓪᓕᐊᔪᒥᓂᖅ ᓇᑖᓐ ᐆᐸᑦ, ᐊᖓᔪᖅᑳᖅ ᐃᓄᐃᑦ ᑲᓇᑕᒥ ᑕᐱᕇᒃᑯᓐᓄᑦ.
ᐅᖃᐅᓯᒥᓂᖅ ᐃᒃᓯᕚᕐᕕᒻᒥ ᑎᓯᐱᕆ 4−ᖑᑎᓪᓗᒍ ᑎᑎᕋᖅᑕᐅᓂᖅᐳᐅᖅ ᓇᓗᓇᐃᒃᑯᑕᕆᔭᐅᓂᐊᕐᓗᓂ ᐃᓱᒪᓕᐅᕈᑕᐅᔪᖃᓕᕋᐃᑉᐊᑦ−ᑐᑭᑖᕋᓱᐊᕈᑕᐅᓂᐊᖅᑐᒥᒃ−ᐊᕙᑎᓕᕆᓂᕐᒧᑦ ᐊᑦᑐᐃᓂᕐᓗᑦᑐᑦ ᑐᑭᓯᔭᐅᓂᐊᕐᒪᑕ ᐃᑯᓪᓚᖅᑕᐅᓗᓂᓗ ᐊᑦᑐᐃᓂᕐᓗᓐᓂᖅ. ᐃᓱᒪᓕᐅᕈᑕᐅᔪᑦ ᑐᓴᖅᑎᑦᓯᒍᑕᐅᒐᔭᖅᑐᑦ ᑭᓪᓕᓯᓂᐊᕐᓂᒃᑯᑦ ᖃᐅᔨᔭᐅᓯᒪᔪᑎᒍ. ᐊᒻᒪᓗ ᓄᓇᖃᖅᑳᖅᓯᒪᔪᑦ ᐱᖃᑕᐅᓂᖃᕐᓂᖅᓴᐅᓂᐊᕐᒪᑕ ᕿᒥᕐᕈᓇᕐᓂᐅᔪᓂ ᓇᐅᑦᓯᑐᕐᓂᕐᓂᓗ ᐱᕐᔪᐊᖑᓂᖅᓴᓂᒃ ᓄᓇᒥ ᐊᑐᖅᑕᐅᒍᓐᓇᖅᑐᖅ ᐱᓪᓗᒍ ᐱᕙᓪᓕᐊᓂᕐᒧᑦ ᐱᓕᕆᐊᒃᓴᓂ.
ᑖᓐᓇ NCP ᐱᓕᕆᐊᖅ ᐱᓕᕆᔾᔪᑕᐅᖃᑦᑕᖅᓯᒪᓕᖅᑐᖅ ᑲᓇᑕᒥ ᓄᓇᕐᔪᐊᒥᓗ ᐅᑭᐅᖅᑕᖅᑐᒥ ᖃᐅᔨᓴᖅᑐᓕᕆᓂᕐᒧᑦ – ᑲᔪᓯᒍᑕᐅᖃᑦᑕᖅᓯᒪᑦᓯᐊᖅᑐᖅ. “ᑖᓐᓇ ᐱᓕᕆᐊᖅ NCP ᑐᕌᖅᑕᖃᖅᑐᒥᓂᖅ ᓯᕕᑐᔪᒃᑯᑦ ᐅᓯᑲᑦᑕᖅᑕᐅᕙᓐᓂᖏᑦ ᓱᕈᕐᓇᖅᑐᑦ ᑭᖑᓈᖏᑦ ᐊᒻᒪᓗ ᐊᑦᑐᐃᓂᕐᓗᓐᓂᖏᑦ ᐅᑭᐅᖅᑕᑑᑉ ᐊᕙᑎᖓᓂᒃ ᐃᓄᖏᓐᓂᓪᓗ, ᓇᓗᓇᕈᓐᓃᖅᑐᓂᒃ ᓇᓗᓇᐃᖅᑕᐅᓯᒪᓕᕐᒪᑕ ᐋᔩᖃᑎᒋᒍᑕᐅᔭᕆᐊᖃᓕᕐᓂᖓᓂᒃ ᓯᑖᒃᕼᐆᒻ ᖃᑎᒪᓂᕐᒥ ᐃᓂᖃᐃᓐᓇᓕᖅᑐᑦ ᓱᕈᕐᓇᖅᑐᑦ ᑐᖁᓐᓇᖅᑐᖃᐅᖅᑐᑦ ᐊᒻᒪᓗ ᐊᑐᐃᓐᓇᐅᑎᑦᓯᕕᐅᓗᑎᒃ ᐱᕕᑦᓴᖃᖅᑎᑕᐅᓂᕐᒥᒃ ᖃᐅᔨᓴᕐᓂᕐᒧᑦ ᐱᕕᖃᖅᑎᑕᐅᕕᖃᕐᓗᓂ ᐊᒥᓱᓄᑦ ᓈᓴᕋᑦᓴᐅᒍᓐᓃᖅᑐᓄᑦ ᑲᓇᑕᒥ ᓄᓇᕐᔪᐊᒥᓗ ᐊᑐᐊᒐᕐᓂ,” ᓇᓗᓇᐃᖅᓯᔪᒥᓂᖅ ᓯᒥᔅ “ᓇᓗᓇᕈᓐᓃᖅᑐᒥᒃ ᓴᖅᑭᑦᓯᕕᐅᒐᕙᕐᒪᑦ ᐊᑐᐊᒐᓕᐅᖅᑐᓂ ᐱᕙᓪᓕᐊᑐᐃᓐᓇᖅᑐᓄᑦ ᐃᓱᒫᓘᑕᐅᔪᓄᓂᑦ ᐅᑭᐅᕋᓴᓐᓄᑦ ᐊᒡᒋᖅᑐᓄᑦ”.
“ᑖᓐᓇ ᐱᓕᕆᐊᖅ NCP ᐊᑑᑎᖃᕐᓂᖓ ᑲᔪᓯᓂᖃᑦᓯᐊᖅᓯᒪᕗᖅ, ᐊᑑᑎᖃᕐᓂᖓᑕ ᐱᓕᕆᖃᑎᖃᕐᓃᑦ ᐃᓄᖕᓂᒃ, ᑐᑭᓯᓂᖃᑦᑎᑦᓯᑲᓐᓂᕐᓂᖓ ᖃᐅᔨᒪᓇᖏᑦᑐᑦ ᐊᒻᒪᓗ ᓱᑲᑦᑐᒥᒃ ᐊᓯᔾᔨᕈᑕᐅᔪᑦ ᑕᑯᕙᓪᓕᐊᑐᐃᓐᓇᖅᑕᕗᑦ ᑕᕆᐅᕐᒥᐅᑕᓂ ᐊᒻᒪᓗ ᐱᓱᒃᑏᑦ ᓄᓇᒥᐅᑕᐃᑦ ᐆᒪᔪᑦ ᓯᓚᒧᑦ ᐊᓯᔾᔨᖅᑐᒧᑦ ᐊᒻᒪᓗ ᐊᑦᑐᐃᓂᕐᓗᒍᑎᑕᐅᔪᑎᒍᑦ ᐆᒪᔪᑦ ᓇᔪᒐᖏᖕᓂᑦ ᓯᓚᖃᑎᒌᖕᓂᖏᓐᓂᓪᓗ, ᐊᒻᒪᓗ ᐊᑦᑐᓂᕐᓗᑦᑕᐅᓂᖓᑕ ᐃᓗᓯᖏᑕ ᖃᓄᐃᖏᑦᓯᐊᕆᐊᖃᕐᓂᖏᑕᓗ ᐃᓄᐃᑦ,” ᓯᒥᔅ ᐅᖃᖅᑐᒥᓂᖅ.
ᓯᒥᔅᑯᒃ ᐆᐸᑦᑯᒃ ᑎᓕᐅᕆᔭᖃᖅᐴᒃ ᒐᕙᒪᒃᑯᖏᓐᓂᒃ ᑲᓇᑕᐅᑉ, “ᐱᕚᓪᓕᕆᐊᖅᑕᐅᖁᓪᓗᒍ ᐱᓕᕆᐊᖅ ᑐᕌᖓᑦᓯᐊᕐᓗᓂ ᐱᕙᓪᓕᐊᑐᐃᓐᓇᖅᑐᓂᒃ ᐃᓱᒫᓘᑎᖃᖅᑐᓂᒃ ᐅᑭᐅᖅᑕᖅᑐᒥ ᐊᑐᖅᑕᐅᓕᖅᑐᓄᑦ, ᐃᓕᑕᕆᔭᐅᓯᒪᒋᐊᑦᓯᐊᕐᓗᑎᒃ ᑕᕝᕘᓇ ᐱᓕᕆᐊᖑᔪᒃᑯᑯᑦ ᐊᑑᑎᖃᕐᓂᖏᑦ ᓇᐅᑦᓯᑐᕐᓂᕐᒥ ᐆᒪᔪᑦ ᐊᑦᑐᐊᖃᑎᒌᖕᓂᖏᑕ ᓯᓚᖃᑎᒌᖕᓂᖏᑕᓗ ᐃᓗᓯᖏᓐᓂᒃ ᐊᑦᑐᐊᓂᖃᕐᒪᑦ ᓄᓇᖃᖅᑳᖅᓯᒪᔪᑦ ᐃᓗᓯᖏᓐᓄᑦ ᐱᖅᑯᓯᖓᓄᓪᓗ, ᓂᕿᖃᐅᓯᖓᓄᑦ ᐊᒻᒪᓗ ᐊᑑᑎᖃᕋᔭᕐᒪᑦ ᑕᒪᒃᑯᐊ ᐃᓗᓕᕆᑉᐸᖏᑦ ᐊᑐᐊᒐᐅᑉ.”