ᒪᐃ 24, 2019 – ᐋᑐᐋ, ᐊᓐᑎᐅᕆᔪ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕ ᓴᐳᒻᒥᔾᔨᔪᖅ ᑎᒍᒥᐊᖅᑕᒥᓂᒃ ᑲᓇᑕᒥᐅᑦ ᐅᑭᐅᖅᑕᖅᑐᓂᖓᓐᓂ ᑐᓂᓯᓚᐅᖅᓯᒪᓪᓗᑎᑦ 2,100−ᓂᑦ ᒪᑉᐱᖅᑐᒐᓕᓐᓂ ᓯᓚᕐᔪᐊᑉ ᑲᑐᔾᔨᖃᑎᒌᖏᓐᓄᑦ ᑲᑎᒪᓂᕐᔪᐊᖓᓐᓄᑦ ᒪᓕᒐᕐᒥᑦ ᐃᒪᕐᒧᑦ (UNCLOS) ᓇᓗᓇᐃᓯᓯᒪᔪᓂᒃ “ᐅᖓᕙᕆᐊᖁᓪᓗᒋᑦ” ᐅᖓᓯᑦᑐᐊᓗᒻᒧᑦ ᐃᓯᖅᑕᐅᔪᓐᓇᖏᓪᓗᑎᑦ ᑭᓪᓕᖃᕐᓗᑎᑦ.
“ᐃᓄᐃᑦ ᐅᐸᖃᑦᑕᕐᖓᑕ ᓯᑯᒃᑯᑦ ᐅᖓᑖᓅᓂᖅᓴᒻᒪᕆᒃ ᑭᓪᓕᖓᒍᑦ ᓄᓇᓐᖑᐊᒦᑦᑐᓂᑦ ᑕᒪᑐᒥᖓ ᐊᒻᒪᓗ ᓂᕿᔅᓴᖅᓯᐅᕐᓂᖏᓐᓂ. ᖁᕕᐊᒋᑦᑎᐊᖅᑕᕗᑦ ᐅᑭᐅᓄᑦ ᖁᓕᓄᑦ ᖃᐅᔨᓴᕐᓂᒥᑦ ᖃᐅᔨᓴᖅᓯᒪᒻᒪᑕ ᑎᑎᕋᖅᓯᒪᔭᖏᓪᓗ ᑐᓂᔭᐅᓚᐅᖅᑐᑎᑦ ᐃᑉᐸᔅᓴᖅ,” ᐅᖃᖅᑐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ ᐊᖏᔪᖅᑳᖅ ᒫᓂᑲ ᐃᐅᓪ-ᑲᓇᔪᖅ. “ᖁᕕᐊᑦᑐᖓ ᑕᐃᒪᐃᑦᑐᓕᕆᔭᐅᒻᒪᑦ. ᒪᓕᑦᑐᒋᑦ ᖃᐅᔨᓴᖅᑏᑦ, ᐱᓕᕆᖃᑎᖃᖅᑐᑎᓪᓗ ᐊᒥᓱᓂᑦ ᒐᕙᒪᐅᔪᓂᒃ, ᓯᕗᒧᐊᑦᑕᐅᓪᓗᑎᑦ ᓯᓚᕐᔪᐊᒥ ᐱᓕᕆᔨᓂᒃ ᑲᓇᑕᒥ, ᐱᖃᓯᐅᔾᔨᓪᓗᑎᑦ ᒪᑯᓂᖓ ᐃᓄᐃᑦ ᒥᔅᓵᓂᑦ ᐱᓕᕆᓂᖏᓐᓂ. ᓇᓗᓇᐃᔭᖅᑕᐅᓪᓗᑎᑦ ᓇᓗᓇᐃᖅᓯᓪᓗᑎᑦ ᑲᓇᑕᒥᐅᑕᕐᓂᑦ ᑎᒍᒥᐊᖅᑕᐅᓂᖏᓐᓄᑦ ᐊᒥᓱᑎᒍᑦ ᓱᓇᒃᑯᑖᖅᑎᒍᑦ. ᐃᓄᐃᑦ ᖃᐅᔨᒪᒻᒪᑕ ᑕᒪᑐᒥᖓ ᐊᑐᖅᑕᐅᖏᓐᓇᖅᑐᖅ ᓇᓗᓇᐃᔭᖅᑕᐅᓂᖏᓐᓂ ᑲᓇᑕ ᑎᒍᒥᐊᖏᓐᓇᑦᑎᐊᕐᖓᑦ ᑕᒪᑐᒥᖓ ᐅᐊᑦᑎᐊᕈᓂᐊᓗᒃ.”
ᑲᓇᑕᐅᑉ ᑎᒍᓯᓂᖓ ᑎᒍᒥᐊᕐᓂᖓᐃᓛᒃ ᐊᒻᒪᓗ ᓯᕗᒃᑲᖅᑕᐃᓂᖓ ᐅᑭᐅᖅᑕᖅᑐᒥ ᐱᑕᖃᖅᑐᖅ ᐱᓕᕆᖃᑎᖃᕐᓂᕐᒥᑦ ᐃᓄᓐᓂᑦ. ᑕᐃᒫᒃ ᐅᖃᖅᓯᒪᒻᒪᑦ ᓯᓚᕐᔪᐊᑉ ᐅᑭᐅᖅᑕᖅᑐᖓᓐᓂ ᐃᓄᐃᑦ ᓇᓗᓇᐃᖅᑕᐅᓯᒪᒻᒪᑕ ᑎᒍᒥᐊᖅᑎᐅᔭᕆᐊᖏᑕ ᓄᓇᒥᑦ ᐅᑭᐅᖅᑕᖅᑐᒥ, ᐱᔭᕆᐊᑐᔪᐊᓘᓗᐊᓐᖏᑦᑐᖅ ᐊᑦᑐᐊᓂᖓ ᑕᒪᓐᓇ ᑎᒍᒥᐊᖅᑕᐅᓂᖓᓂ ᑭᒃᑯᓐᓄᑦ ᓄᓇ ᐊᒻᒪᓗ ᐱᔪᓐᓇᐅᑎᖏᑦ ᐅᑭᐅᖅᑕᖅᑐᒥ ᐊᒻᒪᓗ ᐃᓄᐃᑦ ᐱᓕᕆᓂᖏᓐᓂ ᐊᓯᖏᓐᓂᓪᓗ ᐱᔪᓐᓇᐅᑎᖃᖅᑐᑎᑦ ᑎᑎᕋᖅᓯᒪᔪᓂᒃ ᐱᑕᖃᕐᓂᖓᓐᓂ ᑲᒪᒋᐊᖃᕐᓂᖏᓐᓂᓪᓗ ᐃᓄᐃᑦ ᐱᓕᕆᖃᑕᐅᓗᑎᑦ ᓯᓚᕐᔪᐊᒥ ᐱᓕᕆᐊᓄᑦ ᐊᑦᑐᐊᔪᑦ ᐅᑭᐅᑦᑕᖅᑐᒥ... ᑐᓐᖓᕕᖓ, ᒥᔅᓴᐅᓴᑦᑕᐅᓯᒪᓂᖓᓗ ᐊᒻᒪᓗ ᖁᕕᐊᒋᔭᐅᓂᖓ ᐅᑭᐅᖅᑕᖅᑐᒥ ᑎᒍᒥᐊᖅᑕᐅᓂᖓᓐᓂ ᐊᒻᒪᓗ ᐱᔪᓐᓇᐅᑎᓂᑦ ᐱᐅᑦᑎᐊᕆᐊᓕᒃ ᓄᖑᓴᖅᑕᐅᖏᓪᓗᑎᑦ ᓱᓇᒃᑯᑖᖏᑦ ᓄᓇᓕᓪᓗ ᐅᑭᐅᖅᑕᖅᑐᒥ.”
ᑖᒃᑯᐊ UNCLOS−ᑯᑦ ᑐᓂᓯᓚᐅᖅᑐᑦ ᐱᒻᒪᕆᐅᔪᓂᑦ ᑲᓇᑕᒥ ᑎᒍᓯᕙᓪᓕᐊᓂᖏᓐᓂ ᓄᓇᒥᑦ ᓯᓚᕐᔪᐊᑉ ᑲᔾᔨᖓᓐᓂ ᐃᓚᒋᒻᒪᒍ ᑕᒪᓐᓇ ᐅᖓᓯᑦᑐᐊᓗᒻᒥ ᐃᓯᖅᑕᐅᒋᐊᖃᓐᖏᓂᕐᒥᑦ. ᑲᓇᑕ ᑐᓂᓯᓚᐅᕐᒥᔪᖅ ᓇᓗᓇᐃᖅᓯᓚᐅᖅᑐᑦ ᑕᒪᑐᒥᖓ ᐅᖓᓯᑦᑐᐊᓗᒻᒥ ᐃᓯᖅᑕᐅᒋᐊᖃᓂᖏᓂᕐᒥᑦ ᐅᑭᐅᖅᑕᖅᑐᒧ ᐅᖓᕙᕆᐊᖅᑕᐅᔪᖅ ᑕᒫᓂ 200−ᓂᒃ ᒪᐃᓕᓐᓂᒃ ᓯᔾᔭᖏᓐᓂ ᑭᓪᓕᖃᕐᓗᓂ. ᑖᒃᑯᐊ ᑎᒥᖁᑎᕗᑦ UNCLOS ᑐᓂᓯᓚᐅᕐᒥᔪᑦ ᓇᓗᓇᐃᖅᓯᔾᔪᑎᒥᑦ ᐅᖓᓯᑦᑐᐊᓗᒻᒥ ᐃᓯᖅᑕᐅᒋᐊᖃᓂᖏᓐᓂᖅ “ᐅᖓᕕᕆᐊᖅᑕᐅᖁᓪᓗᒍ” ᑭᓪᓕᖏᓐᓂ ᐊᑯᓂᐅᖁᓪᓗᒋᑦ ᓄᓇᒥᑦ ᐱᕈᖅᑐᐃᑦ ᓄᓇᒋᒐᑦᑎᒍ. ᑕᐃᒪᐃᓐᓂᖓᓐᓄᑦ ᑲᓇᑕᒥ ᒥᔅᓴᐅᓴᐃᓯᒪᔪᖅ ᑕᒫᓂᖃᐃ 85−ᓂᒃ ᓄᓇᓕᕐᔪᐊᓂᑦ ᐅᖓᕙᕆᐊᖅᑎᑦᑎᓯᒪᓕᖅᑐᖅ ᐅᖓᓯᓐᓂᖃᕆᐊᖃᕐᓂᖏᓐᓄᑦ ᐊᕗᖔᓗᒃ ᐃᓯᖅᑕᐅᔭᕆᐊᖃᓐᖏᓐᓂᖓᓐᓄᑦ.
“ᑕᒪᓐᓇ ᐱᓪᓚᕆᐊᓘᒻᒪᑦ ᑲᒪᒋᔭᕆᐊᖃᕋᑦᑎᒍ,” ᐅᖃᖅᑐᓂ ᒫᓂᑲ ᐃᐅᓪ-ᑲᓇᔪᖅ. “ᑐᑭᓯᔪᖓ ᐊᕐᕌᒍᒐᓵᓗᓐᓂ ᖁᓕᐅᓗᐊᖅᑐᓂᑦ ᑕᒪᓐᓇ ᑐᓕᔭᐅᔾᔪᑎ ᕿᒥᕐᕈᔭᐅᓇᓱᒃᑲᔭᕐᒥᒻᒪᑦ ᑐᓂᔭᐅᔪᑦ, ᐊᒻᒪᓗ ᒪᓕᒻᒥᔪᑦ ᖁᓕᕇᓕᕐᒪᖔᑕ ᑲᓇᑕᒥ ᐅᖓᓯᑦᑐᒦᒋᐊᖃᕐᓂᖏᑦ ᐅᐸᑦᑕᐅᑦᑕᐃᓕᒪᓂᖏᑦ ᐊᓯᖏᓐᓄᑦ, ᐊᑯᓂᒃᑲᓐᓂᐅᒐᔭᕆᓪᓗᓂᓗ ᑭᖑᓂᖓᓂ. ᐊᐃᕙᖃᑎᖃᕆᐊᖃᖅᑐᒍᑦ, ᐅᓛᓵᒥᐅᑕᕐᓂᑦ, ᑕᓐᒫᒃ, ᒥᐊᓕᒐᐃᓪᓗ ᓄᓇᖓᓐᓂ. ᑕᒪᒃᑯᐊ ᐱᒻᒪᕆᐅᒻᒪᑕ ᐃᓱᒪᓕᐅᕐᓂᐅᔪᑦ ᐊᑦᑐᐃᓂᖃᕋᔭᕐᖓᑕ ᓯᕗᓂᑦᑎᓐᓂ ᐊᒻᒪᓗ ᓄᓇᑦᑎᓐᓂ ᐃᓄᓐᓂᓪᓗ ᐃᓚᒋᔭᐅᔪᒪᔪᓂᒃ ᐊᐃᕙᓂᕐᒥᑦ ᑲᓇᑕᒥ.”