ᐱᓇᓱᐊᕈᓯᐊᓂ ᔫᓂ 6-10, 2022 ᐱᓕᕆᓐᓇᓪᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ. ᑲᑐᔾᔨᔪᑦ ᒐᕙᒪᖃᑎᒌᖏᑦᑐᒃᑯᑦ ᓄᓇᕐᔪᐊᕐᒥᐅᑎᒍᑦ ᑕᕆᐅᕐᓄᑦ ᑲᑎᒪᔨᖏᑦ (IMO), ᑕᕆᐅᕐᓂᒃ ᐊᕙᑎᒥᒃ ᓴᐳᔾᔨᓂᕐᓄᑦ ᑲᑎᒪᔨᖏᑦ (MEPC) 78 ᑲᑎᓚᐅᖅᑐᑦ ᓚᓐᑕᓐᒥ. ᑕᐃᒪᐃᑎᓪᓗᒋᑦ, ᐸᓐ, ᔭᒪᓂᒥ, ᑲᑎᓚᐅᖅᑐᑦ ᑲᑐᔾᔨᔪᑦ ᒐᕙᒪᖃᑎᒌᖏᑦᑐᑦ ᑐᙵᕕᓐᓄᑦ ᑲᑎᒪᓂᖓᑦ ᓯᓚᐃᑦ ᐊᓯᔾᔨᕐᓂᖏᓐᓄᑦ (UNFCCC) ᐃᓚᖏᑦ ᑎᒥᖏᓐᓄᑦ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ ᐃᔅᓯᕙᐅᑕᖓᑕ ᑐᓪᓕᐊ ᓄᓇᕐᔪᐊᕐᒥᐅᑎᒍᑦ ᓖᓴ ᖁᐱᕐᕈᐊᓗᒃ ᐃᓚᐅᓚᐅᖅᑐᖅ ᑲᑎᑦᑐᓂ ᔭᒪᓂᒥ ᐅᐸᑦᑐᑎᒃ, ᓚᓐᑕᓐᒥᓗ, ᖃᕆᑕᐅᔭᑎᒍᑦ.
ᔫᓂ 6ᒥ ᓖᓴ ᖁᐱᕐᕈᐊᓗᒃ ᐃᓚᐅᓚᐅᖅᑐᖅ ᖃᕆᑕᐅᔭᑎᒍᑦ ᐃᓕᓐᓂᐊᕐᓂᖅᑐᓄᑦ ᑕᐃᔭᐅᔪᒧᑦ “ᐅᖅᑰᓯᕙᓪᓕᐊᔪᑦ, ᑕᕆᐅᑦ ᐃᒻᒥᖅᐸᓪᓕᐊᔪᑦ”. ᐅᖃᐅᓯᖃᓚᐅᖅᑐᑦ ᐅᓂᒃᑳᓂᒃ ᓴᓇᔭᐅᔪᓂᒃ ᒐᕙᒪᖃᑎᒌᖏᑦᑐᓂᒃ ᑲᑎᒪᔩᑦ ᓯᓚᐃᑦ ᐊᓯᔾᔨᕐᓂᖏᓐᓄᑦ (IPCC) 6ᖓᓄᑦ ᕿᒥᕐᕈᓐᓇᖅᓯᓂᕐᒧᑦ, ᐱᓗᐊᖅᑐᒥᒃ ᐅᓂᒃᑳᒧᑦ ᖃᓄᐃᓚᔾᔭᐃᒃᑯᑎᓕᐅᕐᓂᕐᓄᑦ ᖃᖓᑦᑎᐊᖅ ᓴᖅᑭᑕᐅᔪᖅ, ᖃᓄᐃᓕᖓᓂᖏᓐᓄᓪᓗ ᓯᓚᐃᑦ ᐊᓯᔾᔨᕐᓂᖏᓐᓂᑦ ᓄᓇᓕᓐᓄᑦ ᐅᑭᐅᖅᑕᖅᑐᒥ ᐅᐊᓐᓇᖓᓄᓪᓗ ᐸᓯᕕᐅᑉ. ᐸᕐᓇᑦᑕᐅᓚᐅᖅᑐᑦ ᓴᓗᒪᔪᑦ ᐅᑭᐅᖅᑕᖅᑐᑦ ᑲᑐᔾᔨᖃᑎᒌᓂᑦ, ᐱᖃᓯᐅᔾᔨᓪᓗᑎᒃ ᐊᖓᔪᖅᑲᐅᑎᓂᒃ ᒐᕙᒪᖓᓂᑦ ᑕᙵᐅᑉ. ᐅᕝᕙ ᑕᑯᓇᒡᕕᒃ ᖃᕋᓴᐅᔭᑎᒍᑦ ᐃᓕᓐᓂᐊᕐᒧᑦ: https://bit.ly/3Hl64gF .
ᔫᓂ 9ᒥ ᐸᓐᒥ ᑲᑎᒪᔪᓂᑦ, ᐊᓯᐊᒍᑦ ᑲᑎᓐᓂᖅ ᐊᑕᐅᑦᑎᒃᑰᖃᑕᐅᔪᖅ ᓄᓇᕐᔪᐊᕐᒥᐅᑎᒍᑦ ᑲᑎᒪᔨᕋᓛᓄᑦ ᓄᓇᖃᖅᑳᖅᓯᒪᔪᓄᑦ ᐱᓕᕆᓂᕐᓂᑦ ᐊᓯᓄᓪᓗ ᑲᑐᔾᔨᖃᑕᐅᔪᓄᑦ ᑲᑎᓚᐅᖅᑐᑦ. ᓖᓴ ᖁᐱᕐᕈᐊᓗᒃ 6ᓂᑦ ᑲᑎᒪᔨᐅᖃᑕᐅᓚᐅᖅᑐᖅ ᐅᖃᐅᓯᖃᖅᑐᑎᒃ ᐱᕐᔪᐊᖑᓂᖏᓐᓂᒃ ᓄᓇᖃᖅᑳᖅᓯᒪᔪᑦ ᐃᓄᐃᑦ ᓄᓇᕐᔪᐊᕐᒥᐅᑎᒍᑦ ᓯᓚᓄᑦ ᖃᓄᐃᒋᐊᕐᓂᖏᑦ.
ᐅᖃᕆᐊᓕᓵᕋᒥ ᓖᓴ ᐅᖃᓚᐅᖅᑐᖅ, ”ᐃᓪᓴᕆᔭᐅᓯᒪᓂᕗᑦ ᒪᓕᑦᑐᒍ ᓄᓇᕐᔪᐊᕐᒥᐅᑎᒍᑦ ᑲᑎᑦᑐᓂ ᓲᕐᓗᑐᑦ ᑲᑐᔾᔨᔪᑦ ᒐᕙᒪᖃᑎᒌᖏᑦᑐᑦ, ᐅᑭᐅᖅᑕᖅᑐᓂ ᑲᑎᒪᔨᖏᓐᓂ,ᒐᕙᒪᖃᑎᒌᖏᑦᑐᓂᒃ ᑲᑎᒪᔩᑦ ᓯᓚᐃᑦ ᐊᓯᔾᔨᕐᓂᖏᓐᓄᑦ, ᓄᓇᕐᔪᐊᕐᒥᐅᑎᒍᑦ ᑕᕆᐅᕐᓄᑦ ᑲᑎᒪᔨᖏᓐᓂ, ᐱᓕᕆᖃᑎᒋᕙᕗᑦ ᑲᑐᔾᔨᖃᑎᕗᑦ ᑖᒃᑯᓇᓂ ᑲᑎᓐᓂᕐᓂ ᑐᑭᓯᔭᐅᓪᓚᑦᑖᖁᓪᓗᒋᑦ ᓇᑭᙶᕐᓂᑦᑎᓐᓂᒃ, ᐱᓗᐊᖅᑐᒥᒃ ᐱᔾᔪᑎᒋᓪᓗᒋᑦ ᐱᔪᓐᓇᕐᓂᕗᑦ, ᖃᐅᔨᒪᔭᕗᑦ, ᐃᓄᐃᑦ ᐃᓕᖅᑯᓯᑐᖃᒃᑯᑦ ᐅᒃᐱᕆᔭᕗᑦ ᖃᓄᕐᓗ ᑲᑎᖃᑎᒋᔭᕆᐊᔅᓴᖅ ᐱᓕᕆᖃᑎᒋᓗᑎᒍᓪᓗ ᓈᒻᒪᒃᑐᒃᑯᑦ ᐱᓕᕆᓂᒃᑯᑦ.”
ᐅᖃᐅᓯᖃᓕᕐᒥᓪᓗᓂ ᐊᐅᓚᔾᔭᑦᑕᐅᓕᓵᖅᑐᒥᒃ ᐅᑭᐅᖅᑕᖅᑑᖃᑎᒌᓂ ᐃᓄᐃᑦ ᐱᓕᕆᔾᔪᓯᖏᓐᓂᒃ ᓇᓕᒧᑦᑐᒃᑯᑦ ᐱᑦᑎᐊᖅᑐᒃᑯᓪᓗ ᑲᑎᓐᓂᕐᓄᑦ, ᓴᖅᑭᑕᐅᓚᐅᖅᑐᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂᑦ ᔫᓂ 2ᒥ, ᖃᕋᓴᐅᔭᑎᒍᓪᓗ ᐅᕙᓂ https://bit.ly/3txKgZT ᓖᓴ ᐅᓂᒃᑳᓚᐅᖅᑐᖅ ᑲᑎᓐᓂᑦᑎᓐᓄᑦ ᒐᕙᒪᖃᑎᒌᖏᑦᑐᓂᒃᑯᓐᓄᑦ ᑲᑎᒪᔩᑦ ᓯᓚᐃᑦ ᐊᓯᔾᔨᕐᓂᖏᓐᓄᑦ ᖃᐅᔨᒪᔨᑕᐅᓪᓗᑕ ᑕᑯᓇᑦᑏᑦ, ᐃᑲᔪᖃᑕᐅᓪᓗᑕ ᐅᖃᓕᒫᒐᓕᐊᓄᑦ, ᐊᒻᒪᓗ
ᒫᓐᓇᕋᑖᖅ ᑕᑯᓐᓇᖅᑎᓪᓚᕆᐅᓪᓗᓂ. ᐅᖃᐅᓯᕆᓚᐅᕐᒥᔭᖏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᐃᓚᐅᓂᖏᑦ ᐊᐅᓚᔾᔭᐃᒋᐊᖅᑐᓄᑦ ᑲᑎᒪᔨᕋᓛᓄᑦ ᐃᓗᐊᓂ ᓄᓇᓕᓐᓂ ᓄᓇᖃᖅᑳᖅᓯᒪᔪᓄᓪᓗ ᐃᓄᓐᓄᑦ ᐱᕕᔅᓴᒧᑦ (LCIPP).
ᐱᓇᓱᐊᕈᓯᐅᑉ ᐃᓚᖓᓂ ᓄᓇᕐᔪᐊᕐᒥᐅᑎᒍᑦ ᑕᕆᐅᕐᓄᑦ ᑲᑎᒪᔨᖏᑕ, ᑕᕆᕈᕐᓂ ᐊᕙᑎᓂᒃ ᓴᐳᔾᔨᓂᕐᓄᑦ ᑲᑎᒪᔨᖏᑕᓗ 78 ᑲᑎᒪᓂᖓᑦ ᓚᓐᑕᓐᒥ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᑎᖃᑎᖃᓚᐅᖅᑐᑦ ᑕᒪᒃᑮᓂ ᐊᐃᕙᖃᑎᒌᑦᑐᓂ ᐋᖅᑭᒋᐊᖅᑕᐅᓂᖓᓄᑦ ᐅᖅᑰᓯᓇᖅᑐᓄᑦ ᐳᔪᓄᑦ (GᕼG) ᐳᔫᖏᓐᓂᖅᓴᐅᓕᖅᑎᑦᑎᓂᕐᓄᑦ ᖃᓄᖅᑑᖅᑐᓄᑦ, ᐃᓚᓕᐅᔾᔨᔭᕆᐊᖃᕐᓂᕐᒥᓪᓗ ᑭᓂᕐᓂᖅᓴᑦ ᑭᓂᖅᑐᓂᒃ ᑕᐃᒪᐃᖏᓐᓇᖃᑦᑕᕐᓂᖏᓐᓄᑦ ᕿᒥᕐᕈᓂᕐᓄᑦ ᑕᕆᐅᕐᓂ ᐅᖁᓱᓂᒃ.
ᑭᖑᓪᓕᖅᐹᒥᒃ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐅᖃᐅᓯᖃᓚᐅᖅᑐᑦ ᓄᓇᕐᔪᐊᕐᒥᐅᑎᒍᑦ ᑕᕆᐅᕐᓄᑦ ᑲᑎᒪᔨᖏᓐᓄᑦ ᑭᓂᕐᓂᖅᓴᓄᑦ ᑭᓂᖅᑐᓄᑦ ᑎᑎᕋᑎᒍᑦ ᑲᑐᔾᔨᔪᓄᑦ ᐊᔅᓱᕉᑎᖃᕈᒪᔪᓄᑦ ᓴᓇᔭᐅᓂᖏᓐᓄᑦ ᐳᔫᕝᕕᐅᓗᐊᖁᔭᐅᖏᑦᑐᓂᒃ ᓄᓇᓂᒃ, ᓱᒃᑲᓂᕐᓂᒃ ᓱᒃᑲᐃᓪᓕᑎᑦᑎᓂᕐᓄᑦ ᓴᓇᓗᑎᓪᓗ ᒪᓕᒋᐊᓕᓐᓂᒃ ᖃᓄᐃᒋᐊᕈᑎᓂᒃ ᐊᑐᕈᓐᓃᖅᑎᓪᓗᒋᑦ ᑭᓂᕐᓂᖅᓴᓂᒃ ᑭᓂᖅᑐᓂᒃ (HFO) ᐅᑭᐅᖅᑕᖅᑐᒥ.