ICC−ᑯᑦ ᑲᑎᒪᖃᑕᐅᖃᑦᑕᖅᓯᒪᕗᑦ ᐱᒻᒪᕆᐅᔪᓂᒃ ᓄᓇᕐᔪᐊᕐᒥ ᑲᑐᔾᔨᖃᑎᒌᒃᑯᑦ ᑲᑎᒪᑎᑦᓯᓂᖏᓐᓂ ᑖᒃᑯᐊ ᓄᓇᕐᔪᐊᒥ ᐃᒪᕐᒥᐅᑕᓕᕆᔨᒃᑯᑦ ᑎᒥᖁᑎᖓᑦᑕ (IMO−ᑯᑦ) ᐊᕐᕌᒎᒐᓴᓐᓂᑦ. IMO−ᑯᑦ ᐱᒋᐊᖅᑎᑕᒥᓃᑦ 1958−ᒥ ᑲᒪᔨᐅᖁᓪᓗᒋᑦ ᐊᑐᐊᒐᓕᐅᖅᑎᐅᓗᑎᓪᓗ ᐅᓯᑲᑦᑕᕐᓂᕐᒨᖓᔪᓄᑦ ᓄᓇᕐᔪᐊᒥ. ᓚᓐᑕᓐᒦᑦᑐᖅ, UK−ᒥ.
ᓂᐱᖃᖅᑎᑦᓯᔪᑦ ᐃᓄᖕᓂᑦ ᑲᑎᒪᖃᑦᑕᕐᓂᐅᔪᓂ ᐱᒻᒪᕆᐅᕗᖅ ᐱᔾᔪᑎᒋᓪᓗᒍ ᐃᒪᕐᒥᐅᑕᓄᑦ ᐃᓅᓇᓱᐊᕈᑎᖃᕐᒥᒐᑦᑕ, ᓂᕿᑦᓴᖃᕐᕕᒋᒐᑦᑎᒍ ᐃᒪ, ᓂᕿᑦᓴᑦᑕᑦᑕᐅᖅ ᐃᓚᖏᑦ ᐅᓯᔭᐅᖃᑦᑕᕆᐊᖃᕐᒥᒻᒪᑕ ᐅᒥᐊᕐᔪᐊᑎᒍᑦ ᐊᕐᕌᒍᑕᒫᑦ ᐅᒥᐊᕐᔪᐊᖃᕐᓇᐅᑎᓪᓗᒍ ᐅᓯᔪᓂᒃ. ᐃᓅᓇᓱᐊᕈᓯᕗᑦ ᐊᒃᑐᐊᓂᖃᕐᒪᑦ ᐅᑭᐅᖅᑕᖅᑐᒥ ᐆᒪᔪᑦ ᓇᔪᒐᖃᑎᒌᖕᓂᖏᓐᓄᑦ ᓯᓚᖃᑎᒌᖕᓂᖏᓐᓄᓪᓗ ᐱᖅᑯᓯᕗᓪᓗ ᖃᐅᔨᒪᓂᕆᔭᐅᔪᑎᒍᓪᓗ. ᑕᑎᖃᖅᐸᑲᑦᑕ ᐅᑭᐅᖅᑕᖅᑐᒥ ᐃᒪᕐᒥᒃ, ᓯᓈᓂᒃ, ᐃᒪᕐᒥᓗ ᐱᕈᖅᑐᓂᒃ ᓂᕿᑦᓴᑎᓐᓂᒃ.
ᐱᔾᔪᑎᒋᓪᓗᒍ ᐊᑦᑐᐃᓂᕐᓗᑦᑐᑦ ᓯᓚᐅᑉ ᐊᓯᔾᔨᕐᓂᖓᓄᑦ, ᐅᑭᐅᖅᑕᖅᑐᖅ ᓯᑯᒥᓂᖅᑕᖃᕈᓐᓃᐸᓪᓕᐊᑐᐃᓐᓇᖅᑐᖅ ᐊᐅᔭᒃᑯᑦ, ᐱᔾᔪᑕᐅᖃᓯᐅᑎᒻᒥᔪᖅ ᐊᒥᓲᓂᖅᓴᐃᑦ ᐅᓯᑲᑦᑕᖃᑦᑕᓕᕐᓂᖏᓐᓄᑦ ᐃᒪᑦᑎᓐᓂ. ᐅᑭᐅᖅᑕᖅᑐᒧᑦ ᑲᑎᒪᔩᑦ ᐅᓂᒃᑳᓕᐊᕆᓯᒪᔭᖓᑦ ᑕᑯᓐᓇᖅᓱᒋᑦ ᐅᓯᖃᑦᑕᕐᓂᒥᓃᑦ ᐊᕐᕌᒍᑦ 2013-2019−ᒧᑦ 75−ᐳᓴᒥᒃ ᐊᒥᓱᖑᕆᐊᖅᓯᒪᓂᖏᑦ ᐃᖏᕐᕋᕙᑦᑐᑦ ᐃᒪᒃᑯᑦ, ᐊᒻᒪᓗ 25−ᐳᓴᒥᒃ ᐊᒥᓱᖑᕆᐊᖅᓯᒪᓪᓗᑎᒃ ᑕᑯᓕᒪᓇᐃᑦᑐᑦ ᐅᒥᐊᕐᔪᐊᑦ. ᑕᒪᓐᓇᓗ ᑕᐃᒪᐃᓕᐅᑐᐃᓐᓇᓚᖓᓕᕐᓂᖓᓂᒃ ᓂᕆᐅᒋᔭᐅᓪᓗᓂ.
ICC−ᑯᑦ ᓯᕗᓪᓕᖅᐸᐅᓪᓗᑎᒃ ᓄᓇᖃᖅᑳᖅᓯᒪᔪᓄᑦ ᑎᒥᖁᑕᐅᔪᖅ ᐃᓕᑕᕆᔭᐅᓂᖃᕈᒪᓪᓗᑎᒃ ᖃᐅᔨᒋᐊᕐᕕᑦᓴᐅᓂᕐᒥᒃ IMO−ᑯᑦ ᐊᖅᑯᑕᐅᓗᑎᒃ. ᑕᒪᓐᓇ ᓅᕙᐃᒻᕙ 2021−ᖑᑎᓪᓗᒍ ᐃᓕᑕᕆᔭᐅᔾᔪᑎᑖᕈᑎᒋᔪᔭᕗᑦ. ᑕᕝᕙᓂ ᖃᐅᔨᒋᐊᕐᕕᑦᓴᒥ ᑕᑯᓂᐊᖅᑐᑎᑦ ᑕᒪᒃᓱᒧᖓ ᐊᒃᑐᐊᔪᓂᒃ ᑎᑎᕋᖅᓯᒪᔪᓂᒃ ᑐᒃᓯᕋᕈᑎᒋᔭᑦᑎᓐᓂᒃ ᐊᑐᑲᐃᓐᓇᑐᐃᓐᓇᖏᓪᓗᓂ ᐊᑐᐃᓐᓇᕐᓂᐊᓕᕐᓗᓂ ᖃᐅᔨᒋᐊᕐᕕᑦᓴᐅᓂᑦᑎᓐᓂᑦ. ᖃᐅᔨᓂᐊᕐᒥᔪᑎᑦ ᑎᑎᕋᖅᓯᒪᔪᓂᒃ ᑐᕌᖓᔪᓂᒃ ᐃᓱᒫᓘᑎᒋᕙᑦᑕᑎᓐᓂᒃ ᐅᖃᐅᓯᕆᕙᑦᑕᕗᑦ ᑖᒃᑯᓄᖓ IMO−ᑯᓐᓄᑦ, ᓲᕐᓗ ᐸᐅᖅ ᕿᕐᓂᖅᑕᖅ, ᐃᒪᐅᑉ ᐃᖅᑳᓂ ᐃᑦᑐᑐᖅᑐᑦ, ᐊᒻᒪᓗ ᐅᖅᓴᐊᓗᖃᖃᑦᑕᕐᓂᖅ ᐅᖅᓱᖅᑎᕈᑎᓕᓐᓂᒃ ᑕᖏᓕᓐᓂᒃ (HFOs) ᐅᑭᐅᖅᑕᖅᑐᒥ.
ᒪᓕᑦᓱᒍ ᑖᓐᓇ UN ᐊᖏᖃᑎᒌᒍᑦ ᐱᔪᓐᓇᐅᑎᖏᑕ ᓄᓇᖃᖅᑳᓯᒪᔪᑦ ᐱᓪᓗᒋᑦ (UNDRIP), ᐃᓄᐃᑦ ᐊᓯᖏᓪᓗ ᓄᓇᖃᖅᑳᖅᓯᒪᔪᑦ ᓄᓇᕐᔪᐊᒥ ᐱᔪᓐᓇᐅᑎᖃᕐᒪᑕ ᑕᒪᒃᑯᓄᖓ ᓄᓇᓄᑦ ᓄᓇᒥᓗ ᐊᑐᒐᒃᓴᓄᑦ. ICC−ᖁᑦ ᓂᕆᐅᑦᑐᑦ ᑐᑭᓕᓐᓂᒃ ᐊᑲᐅᓂᖅᓴᓂᓪᓗ ᒥᓇᕋᖅᐸᓂᕐᒥᒃ ᐊᖅᑯᑎᒋᓗᒍ ᑖᓐᓇUNDRIP ᓄᓇᕐᔪᐊᒥ ᐊᐅᓚᑕᐅᑦᓯᐊᖁᓪᓗᒍ, ᐃᓱᒪᒋᔭᕗᓪᓗ ᑖᒃᑯᐊ IMO−ᑯᑦ ᑲᑎᒪᔨᖁᑎᖏᓪᓗ ᑎᒥᖁᑕᐅᔪᒧᑦ ᐃᑲᔪᖅᑕᐅᓚᖓᓂᖏᓐᓂᑦ ᑕᕝᕘᓇ ᐱᒋᐊᕈᑎᒋᓗᒍ.
ICC−ᑯᑦ ᐱᖃᑕᐅᒍᒪᓂᖃᕐᒥᔪᑦ ᐃᓅᑉ ᑎᒥᓕᐅᑉ ᐱᔭᕆᐊᖃᕐᓂᖓᓂ ᐊᑦᑕᓇᖏᑦᑐᒥᓪᓗ ᐊᐅᓚᑦᓯᓂᖅᑕᖃᖁᓪᓗᒍ ᐃᒪᒃᑯᑦ, ᐱᓗᐊᖅᑐᒥ ᓄᓇᖃᖅᑳᖅᓯᒪᔪᑦ ᓄᓇᓕᒻᒥᓂ ᐊᖑᓇᓱᐊᖅᑏᑦ ᐊᒻᒪᓗ ᐅᒥᐊᕐᔪᐊᖅᑕᖃᕐᓂᐊᓕᕋᐃᒻᒪᑦ ᐅᓯᔪᒥᒃ ᐊᐅᓚᑦᓯᓂᐅᕙᑦᑐᑦ. ᐃᓄᐃᑦ ᐅᒥᐊᖃᐅᖅᑐᑦ ᐊᐅᓚᒍᓐᓇᖅᑕᒥᓐᓂᒃ, ᐱᖃᑕᐅᒍᒪᓂᖃᖅᓱᑎᓪᓗ ᐊᑲᐅᓂᖅᐹᒃᑯᑦ ᐊᐅᓚᑦᓯᓂᕐᒥᒃ ᐊᕙᑎᒥᒃ ᐊᑑᑎᓕᒻᒥᒃ ᐃᓄᖕᓄᑦ ᐱᖅᑯᓯᕐᒥᖕᓂᓪᓗ ᐃᓕᖅᑯᓯᓕᖕᓄᑦ ᐃᓅᓇᓱᐊᕈᓯᖃᖅᑐᓄᓪᓗ ᓄᓇᒥ.
ᓯᓚᕐᔪᐊᒥ ᐃᒪᕕᓕᕆᓂᕐᒥ ᑎᒥᐅᔪᖅ (IMO) ᐊᓪᓚᕕᑦᓴᑎᒍᑦ
ᐃᓄᑐᐃᓐᓀᑦ ᐅᑭᐅᕐᑕᑐᒥᐅᖑᖃᑎᒌᑦ ᑲᑎᒪᔨᖏᑦ (ICC) – ᓄᕕᐱᕆ 22, 2023-ᒥᓂᑌᑦ
ᑎᑎᖅᑲᐃᑦ ICC−ᑯᑦ ᑐᓂᔭᕆᐊᓕᖏᑦ IMO−ᑯᓐᓄᑦ:
Sub-committee Documents:
Sub-committee on Ship Design and Construction (10th session. Agenda item 5)
Sub-committee on Pollution Prevention and Response (11th session. Agenda item 6)
Sub-committee on Pollution Prevention and Response (11th session. Agenda item 7)
