ᑐᑭᓯᑎᑦᑎᑲᓐᓂᕆᐊᖃᒃᑲᓂᓪᓚᕆᓕᕋᑦᑕ ᑕᒪᒃᑯᓂᖓ ᐊᓯᔾᔨᐸᓪᓕᐊᔪᓂᒃ ᐅᑭᐅᖅᑕᖅᑑᑉ ᐃᓗᐊᓂ ᐊᒻᒪᓗ ᖁᕕᐊᒋᔭᕆᐊᖃᖅᑐᑎᒍᓪᓗ ᖃᓄᖅ ᓄᓇᖃᖅᑳᖅᑐᒥᓂᑦ ᖃᐅᔨᒪᓂᑐᖃᐃᑦ ᑐᑭᓯᔭᐅᒪᓂᖏᑦ ᐊᑑᑎᖃᑦᑎᐊᕈᓐᓇᓂᖅᓴᐃᓕᕐᓗᑎᑦ ᐊᓯᔾᔨᑦᑐᑦ ᐱᓪᓗᒋᑦ. ᑕᒪᓐᓇ ᖃᐅᔨᒪᓂᖅ ᐃᓚᓕᐅᔾᔭᐅᓗᓂ ᐱᐅᓯᕚᓪᓕᑲᓐᓂᕈᑎᒋᓗᒍ ᖃᐅᔨᓴᕐᓂᕐᒧᑦ ᐅᓂᒃᑳᓕᐅᕐᓗᑎᓪᓗ ᐊᑖᓃᓪᓗᓂ ᐅᑭᐅᖅᑕᖅᑑᑉ ᑲᑎᒪᔨᖏᑦ, ᐊᑐᓕᖅᑎᑕᐅᑦᑎᐊᖁᓪᓗᒋᑦ.

ᑐᑭᓯᐅᒪᑦᑎᐊᓕᖅᑲᑕ ᐱᑕᖃᕆᐊᖃᕐᓂᖏᓐᓂ ᑕᒪᒃᑯᓂᖓ ᐊᑐᐃᓐᓇᐅᔪᓂᒃ ᖃᐅᔨᒪᓂᐅᔪᒥᑦ, ᖃᐅᔨᒪᓂᑐᖃᕐᒥᓪᓗ, ᖃᐅᔨᓴᖅᑏᓪᓗ ᐅᑭᐅᖅᑕᖅᑐᒥ ᖃᐅᔨᓴᖅᐸᑦᑐᑦ, ᑐᑭᓯᐅᒪᑎᑕᐅᑦᑎᐊᕐᓗᑎᑦ ᐃᓱᒪᓕᐅᕈᓐᓇᖃᑦᑕᕐᓂᐊᕐᖓᑕ, ᐱᒻᒪᕆᐅᒻᒪᓂᓛᒃ ᐊᖏᖃᑎᒌᓐᓂᐊᖅᑎᓪᓗᒋᑦ ᖃᐅᔨᒪᔭᑐᖃᖏᑦ ᐱᔾᔪᑎᒋᓪᓗᒋᑦ. ᓈᒪᔪᐊᓘᓐᖏᒃᑲᓗᐊᕐᓗᓂ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᒪᐃᑦᑐᓂ ᐊᑐᐃᓐᓇᖃᖅᑐᑦ ᑐᑭᖓᓐᓂ:

ᓄᓇᖃᖅᑳᖅᑐᒥᓃᑦ ᖃᐅᔨᒪᓂᖏᑦ ᐃᓱᒪᑐᒐᓱᓐᓂᐅᒻᒪᑕ ᖃᓄᖅ ᐊᑐᖅᑕᐅᔪᓐᓇᕐᒪᖔᑖ ᒪᑯᓄᖓ ᐱᕈᖅᑐᓄᑦ ᐆᒪᔪᓂᒃ, ᑎᒥᑦᑎᒍᑦ, ᐱᖅᑯᓯᖅᑎᒍᑦ ᐅᑉᐱᕆᔭᖏᑦᑎᒍᓪᓗ ᐊᑐᖅᑐᑎᑦ. ᐱᖃᓯᐅᔾᔨᒻᒥᔪᑦ ᒪᑯᓂᖓ ᐃᓱᒪᒋᔭᖏᓐᓂ ᑕᑯᓯᒪᔭᖏᓐᓂ ᑕᕝᕗᖓᓪᓚᕆᒃ ᐊᑯᓂᓪᓗ ᐊᑐᖅᓯᒪᔭᖏᓐᓂ ᐊᖏᔪᐊᓘᒻᒪᑕ ᑭᖑᕚᕇᓄᓪᓗ ᑕᑯᔭᐅᒋᐊᖃᕐᓂᖏᓐᓄᑦ, ᐃᓕᓐᓂᐊᖅᑕᐅᓗᑎᒃ ᐊᒻᒪᓗ ᐱᓕᒻᒪᓴᖅᑕᐅᓗᑎᑦ. ᐋᖅᑮᒪᒻᒪᑕ ᐊᖏᔪᐊᓗᓐᓂ ᓱᓕ ᐱᕙᓪᓕᐊᖏᓐᓇᖅᑐ ᑕᒪᓐᓇ ᐃᓅᓯᑦᑎᓐᓂᒪᓕᑦᑐᖅ, ᒪᑯᐊᓗ ᖃᐅᔨᒪᓂᐅᔪᑦ ᐅᓪᓗᒥᐅᔪᖅ ᑎᒍᕙᑦᑕᕗᑦ ᐊᒻᒪᓗ ᓯᕗᓂᑦᑎᓐᓄᑦ, ᑭᖑᕚᖅᑎᓐᓅᖅᑲᐸᓪᓕᐊᓪᓗᒋᓪᓗ.

ᑕᕝᕙᓂ ᑐᑭᖓᓐᓂ, ᓄᓇᖃᖅᑳᖅᑐᒥᓃᑦ ᖃᐅᔨᒪᓂᑐᖃᖏᑦ ᐊᕗᖔᓗᖓᔪᖅ ᐅᐊᑦᑎᑐᐃᓐᓇᕐᓂᒨᖏᑦᑐᖅ ᐊᒻᒪᓗ ᐆᒫᔪᓐᓇᖅᑐᓕᒪᑦ ᐊᕙᑎᑦᑎᓐᓂ ᖃᐅᔨᒪᓂᕐᒧᑐᐃᓐᓇᐅᖏᑦᑐᖅ, ᑭᓯᐊᓂᑦᑕᐅ ᐊᔾᔨᐅᖏᑦᑐᓂ “ᖃᐅᔨᒪᓂᐅᔪᖅ ᑕᐃᒪᒃ” ᓇᓗᓇᐃᕐᓗᒋᑦ ᐊᑐᕐᓗᒋᓪᓗ ᖃᐅᔨᓴᕐᓂᐅᒋᐊᓕᓐᓂᒃ ᐊᑐᖅᑕᐅᖃᑦᑕᓕᕋᔭᖅᑐᑎᓪᓗ ᐃᓱᒪᓕᐅᖅᑎᓪᓗᒋᑦ.