ᖁᕝᕙᓯᓐᓂᖅᓴᓕᐅᖅᑐᑦ ᓱᕈᓐᓇᖅᑐᒥᓐᖔᖅᓯᒪᔪᑦ ᑕᒪᒃᑯᐊ ᐊᑯᓂ ᐱᖃᑦᑕᖅᑐᒋᑦ ᓂᕿᒋᔭᐅᔪᓅᖅᑲᕐᖓᑕ ᐃᓄᐃᑦ ᓂᕿᖏᓐᓄᑦ ᐅᑭᐅᖅᑕᖅᑐᒥ. ᖃᐅᔨᓴᓪᓚᕆᓕᓚᐅᖅᑐᑦ ᓱᕈᓐᓇᖅᑐᕈᔪᓐᓂᒃ ᐊᒻᒪᓗ ᓯᓚᕐᔪᐊᒥ ᐊᑐᖅᑐᑎᑦ ᒪᑯᓂᖓ ᐊᓯᖏᓐᓃᑦᑐᓂᒃ ᓯᑖᒃᕼᐅᒻᒥ ᑲᑎᒪᕕᔾᔪᐊᕐᓂᕐᒥᑦ ᐱᔾᔪᑎᖃᖅᑐᑎᑦ ᐃᓚᔅᓴᓂᑦ ᓱᕈᓐᓇᖅᑐᑕᖃᐃᓐᓇᖅᑐᓂᑦ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐋᖅᑭᔅᓱᐃᔪᒪᒻᒪᑕ ᖃᐅᔨᓴᖅᑎᒻᒪᕆᑎᒍᑦ ᐃᓄᐃᓪᓗ ᐃᓱᒫᓘᑎᖏᑦ ᓴᖅᑭᖅᑕᐅᓗᑎᑦ ᓯᓚᕐᔪᐊᕐᒧᑦ ᑲᓇᑕᒥᓗ ᖃᐅᔨᓴᖅᑐᓕᕆᓂᕐᒨᕐᓗᒋᑦ, ᓲᕐᓗ ᐅᑭᐅᖅᑕᖅᑐᒥ ᖃᐅᔨᓴᕐᓂᕐᒥᑦ ᐃᑲᔫᑎᓂᒃ ᐅᑭᐅᖅᑕᖅᑑᑉ ᑲᑎᒪᔨᖏᓐᓄᑦ, ᐊᒻᒪᓗ ᑲᓇᑕᐅᑉ ᐅᑭᐅᖅᑕᖅᑐᖓᓐᓂ ᓱᕈᓐᓇᖅᑐᓂᑦ ᐃᑲᔫᑎᓂᒃ.
ᐊᔾᔨᐸᓗᖓᓂᓗ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᐃᕙᖃᑕᐅᓇᓱᐊᓪᓚᕆᑦᑐᑦ ᑕᒪᑐᒥᖓ ᑲᑎᒪᓂᕐᔪᐊᖏᓐᓂ ᐊᕿᕐᕉᔭᓂᑦ, ᐊᑐᓕᖅᑎᑕᐅᓚᐅᖅᓯᒪᓪᓗᓂ 2017−ᒥ. ᐃᓚᖏᑦ ᓱᕈᓐᓇᖅᑐᑦ ᒥᑭᓪᓕᕙᓪᓕᐊᔫᒐᓗᐊᑦ ᐅᑭᐅᖅᑕᖅᑐᒥ, ᑭᓯᐊᓂᓕ ᓄᑖᕐᓂᑦ ᓱᕈᓐᓇᖅᑐᑕᖃᓕᖅᐸᓪᓕᐊᒻᒥᔪᖅ. ᐊᐅᑦᑕᔫᖅ ᓱᕈᐃᓪᓚᕆᓂᖅᑐᖅ ᑕᒪᓐᓇ ᓄᑖᖅ, ᐅᓗᕆᐊᓇᖅᓯᔪᑦ. ᓲᕐᓗ, ᐊᐅᑦᑕᔫᔅᓴᐃᑦ ᐃᕐᕋᕕᖏᓐᓂ ᐆᒪᔪᓐᓂ ᓇᓂᔭᐅᖃᑦᑕᓕᖅᑐᑦ ᓂᕿᔅᓴᖅᓯᐅᖅᑕᐅᓯᒪᔪᙵᓂᒃ ᓂᕆᔭᐅᕙᑦᑐᓂᓪᓗ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᓕᕆᓐᓇᕐᓂᐊᖅᑐᑦ ᑕᒪᒃᑯᓂᖓ ᓯᓚᕐᔪᐊᒥ ᐊᖏᕈᑕᐅᓯᒪᔪᓂᒃ ᒪᑯᓄᖓ ᖃᓄᖅ ᐃᓄᐃᑦ ᐋᓐᓂᐊᖅᑕᐃᓕᒪᓂᖏᑦ ᐊᑦᑐᖅᑕᐅᕙᒻᒪᖔᑕ ᓱᕈᓐᓇᖅᑐᓂᒃ ᐅᑭᐅᖅᑕᖅᑐᒥ, ᐊᒻᒪᓗ ᑲᔪᓯᑎᑦᑎᑦᑎᐊᕋᓱᓪᓗᑎᑦ ᐱᐅᓂᖅᓴᓂᓗ ᒪᓕᒐᓕᐅᕐᓗᑎᑦ ᐊᑑᑎᖃᑦᑎᐊᕐᓂᖅᓴᐅᒐᔭᖅᑐᓂᒃ.