ᓯᓚᕐᔪᐊᑉ ᑲᑐᔾᔨᖃᑎᒌᖏᑦ ᑲᑎᒪᔨᐅᖏᓐᓇᖅᑐᑦ ᓄᓇᖃᖅᑳᖅᑐᓃᑦ ᒥᔅᓵᓅᖓᔪᓂᒃ ᓯᓚᕐᔪᐊᒥ ᑲᑐᔾᔨᖃᑎᒋᑦ ᑐᑭᒧᐊᑦᑎᑦᑎᕙᑦᑐᑦ ᑎᒥᓂᑦ ᐃᓱᒫᓘᑕᐅᔪᓂᒃ ᐱᔪᓐᓇᐅᑎᓂᓪᓗ ᓯᓚᕐᔪᐊᒥ ᓄᓇᖃᖅᑳᖅᑐᒥᓂᕐᓂᑦ. ᐅᖓᑖᓅᖓᒻᒪᑕ 370 ᒥᓕᐊ ᓄᓇᖃᖅᑳᖅᑐᒥᓃᑦ ᐊᒻᒪᓗ 70 ᓄᓇᓕᕐᔪᐊᒦᑦᑐᑎᑦ ᓯᓚᕐᔪᐊᒥ. ᐃᓗᐊᓂ ᓯᓚᕐᔪᐊᒥ ᑲᑐᑎᔾᔨᖃᑎᒌᒻ, ᑖᒃᑯᐊ ᓯᓚᕐᔪᐊᑉ ᑲᑐᔾᔨᖃᑎᒌᖏᑦ ᑲᑎᒪᔨᐅᖏᓐᓇᖅᑐᑦ ᓄᓇᖃᖅᑳᖅᑐᓃᑦ ᒥᔅᓵᓅᖓᔪᓂᒃ ᐅᖃᐅᔾᔨᒋᐊᖅᑏᑦ ᑎᒥᐅᔪᑦ ᐅᓂᒃᑳᖃᑦᑕᖅᑐᑎᑦ ᒪᑭᒪᒐᓱᐊᕐᓂᕐᒧᑦ ᐃᓄᓕᕆᓂᕐᒧᓪᓗᑲ ᑲᑎᒪᔨᖏᓐᓄᑦ, ᐅᖃᐅᓯᖃᖅᐸᑦᑐᑎᑦ ᓄᓇᖃᖅᑳᖅᑐᒥᓃᑦ ᒥᔅᓵᓄᑦ ᐃᓱᒫᓘᑕᐅᔪᓂᒃ ᒪᑭᒪᔾᔪᑎᓕᕆᓂᕐᒥᑦ ᐃᓄᓕᕆᓂᕐᒥᓪᓗ, ᐱᖅᑯᓯᖏᓐᓂ, ᐊᕙᑎᖏᓐᓂ, ᐃᓕᓐᓂᐊᖅᑐᓕᕆᓂᕐᒥᑦ, ᐋᓐᓂᐊᖅᑕᐃᓕᒪᔪᓕᕆᓂᕐᒥᑦ ᐃᓄᓕᕆᓂᕐᒧᓪᓗ ᐱᔪᓐᓇᐅᑏᑦ.

ᓯᓚᕐᔪᐊᑉ ᑲᑐᔾᔨᖃᑎᒌᖏᑦ ᑲᑎᒪᔨᐅᖏᓐᓇᖅᑐᑦ ᓄᓇᖃᖅᑳᖅᑐᓃᑦ ᒥᔅᓵᓅᖓᔪᓂᒃ ᑲᑎᒪᑎᑦᑎᕙᑦᑐᑦ ᐊᕐᕌᒍᑕᒫᑦ ᐱᓇᓱᐊᕈᓰᓐᓄᒃ ᒪᕐᕉᓐᓄᒃ ᐊᐃᐳᓗᒥ ᒪᐃᒥᓘᓐᓃᑦ ᓯᓚᕐᔪᐊᑉ ᑲᑐᔾᔨᖃᑎᒌᖏᑦᑕ ᑲᑎᒪᕕᖏᓐᓂ ᓅ ᔪᐊᒃᒥ. ᓯᕗᓪᓕᖅᐹᖅ ᒪᐃᒥᐅᓚᐅᖅᓯᒪᔪᖅ 2002−ᒥ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᑎᒪᖃᑎᖃᖅᑐᑎᑦ ᐱᓕᕆᖃᑎᖃᖅᑐᑎᓪᓗ ᑲᑎᒪᔨᐅᔪᓂᒃ ᐊᕐᕌᒍᓄᑦ ᖁᓖᑦ ᐅᖓᑖᓄᑦ. ᑕᒪᓐᓇ ᐅᑭᐅᖅᑕᖅᑐᒥ ᑲᑎᒪᔨᐅᓂᖏᓐᓂ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᓚᒋᔭᐅᓚᐅᖅᓯᒪᔪᑦ ᐱᒻᒪᕆᐅᓪᓗᑎᓪᓗ ᐃᓄᐃᑦ ᑮᓇᐅᔭᓕᕆᓂᕐᒧᓪᓗ ᐱᓕᕆᖃᑎᒌᓐᓂᐊᖅᑎᓪᓗᒋᑦ ᑲᑎᒪᔨᐅᖏᓐᓇᕐᓂᐊᖅᑐᓄᑦ.

ᐃᓕᓯᒪᐃᓐᓇᖅᑐᑦ ᑲᑎᒪᔩᑦ ᐱᒻᒪᕆᐅᕗᖅ ᐃᓄᓐᓄᑦ ᐊᓯᖏᓐᓄᓪᓗ ᓄᓇᖃᖅᑳᖅᑐᒥᓂᕐᓄᑦ ᓯᓚᕐᔪᐊᒥ ᖁᑦᑎᓂᖅᐹᑑᒻᒪᑦ ᓯᓚᕐᔪᐊᒥ ᑲᑐᔾᔨᖃᑎᒌᓐᓂᑦ ᑎᒥᖓ ᐊᕕᑦᑐᖅᓯᒪᔪᓄᑦ ᑎᒃᑯᐊᖅᑕᐅᓯᒪᓐᖏᑦᑐᓪᓕ ᑖᒃᑯᐊ.

ᑲᑎᒪᔨᐅᔪᑦ 16−ᖑᓪᓗᑎᑦ ᐃᒻᒥᒃᑯᖅᑐᑦ ᐱᓕᕆᔨᒻᒪᕇᑦ, ᐊᐅᓚᔪᑦ ᐃᒻᒥᓂᒃ ᐱᓕᕆᓪᓗᑎᑦ, ᑎᒃᑯᐊᖅᑕᐅᓪᓗᑎᓪᓗ ᐊᕐᕌᒍᓄᑦ ᐱᖓᓱᓄᑦ. ᐃᓱᓕᑦᑎᒐᐃᒻᒪᑕ, ᓂᕈᐊᖅᑕᐅᓕᖅᑭᒍᓐᓇᖅᑐᑦ ᑎᒃᑯᐊᖅᑕᐅᓕᖅᑭᓪᓗᑎᓪᓘᓐᓃ ᐊᑕᐅᓯᒃᑲᓂᕐᒧᑦ ᐃᓕᓯᒪᒍᓐᓇᖅᑐᑎᑦ.

ᑕᐃᒃᑯᓇᓐᖓᑦ 16 ᑲᑎᒪᔨᑦ, ᑎᓴᒪᐅᔪᖅᑐᑦ ᓂᕈᐊᕋᔅᓴᓕᐊᕆᔭᐅᓪᓗᑎᑦ ᒐᕙᒪᒃᑯᓐᓄ ᐊᒻᒪᓗ ᑎᓴᒪᐅᔪᖅᑐᑦ ᑎᓕᔭᐅᑦᑕᐅᑎᒋᓪᓗᑎᑦ ᓄᓇᖃᖅᑳᖅᑐᒥᓃᑦ ᑲᑐᔾᔨᖃᑎᒌᖏᓐᓄᑦ. ᑖᒃᑯᓂᖓ ᓂᕈᐊᕋᔅᓴᓕᐊᖑᓯᒪᔪᓂᑦ ᒐᕙᒪᒃᑯᑦ ᓂᕈᐊᕋᔭᖅᑐᑦ ᐱᓕᕆᔨᐅᓂᐊᖅᑐᓂᒃ ᐱᕙᓪᓕᐊᓂᕐᒧᑦ ᐃᓄᓕᕆᓂᕐᒧᓪᓗ ᑲᑎᒪᔨᖏᓐᓄᑦ ᒪᓕᓪᓗᒋᑦ ᑕᐃᒃᑯᐊ ᑕᓪᓕᒪᑦ ᐊᕕᑦᑐᖅᓯᒪᔪᓂᒃ ᓯᓚᕐᔪᐊᒥ ᑲᑐᔾᔨᖃᑎᒌᓐᓂᒃ. ᑕᐃᒪᓕ ᓂᕈᐊᕋᔅᓴᕈᖅᑎᑕᒥᓂᑦ ᑲᑐᔾᔨᖃᑎᒌᓐᓂᒃ ᑎᒃᑯᐊᖅᑕᐅᓗᑎᑦ ᐊᖏᔪᖅᑲᖓᓐᓄᑦ ᒪᑭᒪᒐᓱᐊᕐᓂᕐᒧᑦ ᐃᓄᓕᕆᓂᕐᒧᓪᓗᑲ ᑲᑎᒪᔨᖏᓐᓄᑦ, ᐊᒻᒪᓗ ᑭᒡᒐᑐᖅᑕᐅᓗᑎᑦ 7 ᐃᓄᓕᕆᓂᕐᒧᑦ ᐱᖅᑯᓯᓕᕆᓂᕐᒧᓪᓗ ᐊᕕᑦᑐᖅᓯᒪᔪᑦ ᑭᒡᒐᖅᑐᐃᓂᖏᓐᓂ ᓯᓚᕐᔪᐊᒥ ᓄᓇᖃᖅᑳᖅᑐᒥᓂᕐᓂᑦ. ᐃᓄᐃᑦ ᓵᒦᓪᓗ ᑭᒡᒐᖅᑐᖅᑕᐅᔪᑦ ᑖᒃᑯᑎᒎᓇ ᐅᑭᐅᖅᑕᖅᑐᒥ.