ᓚᓐᓴᑦ ᐃᓅᓴᐃᓕᕆᔨᓄᑦ ᕿᒥᕐᕈᔭᐅᓲᖅ ᐃᓅᓕᓴᐃᓂᕈᔪᓐᓄᑦ ᐅᖃᓕᒫᒐᐅᔪᖅ. ᓄᓇᕐᔪᐊᕐᒥ ᓄᑕᐅᙱᓛᖑᓪᓗᓂ ᖃᐅᔨᒪᔭᐅᓛᖑᓪᓗᓂᓗ ᐃᓅᓕᓴᐃᓂᕈᔪᓐᓄᑦ ᐅᖃᓕᒫᒐᐅᕗᖅ. ᐱᒋᐊᖅᑎᑕᐅᓚᐅᖅᑐᖅ 1823ᒥ ᑖᒪᔅ ᐅᐊᒃᓕᒧᑦ, ᐄᙵᓚᒥᐅᖅ ᐱᓚᑦᑐᖅᑎ ᐊᑦᑎᖅᑐᓂᐅᒃ ᐱᓚᑦᑑᑎᒧᑦ ᐊᑎᓕᒻᒥᒃ ᓚᓐᓴᑦᒥᒃ. ᐊᕐᕌᒍᐃᑦ 200 ᐊᓂᒍᖅᑎᓪᓗᒋᑦ, ᓚᓐᓴᑦ ᓵᑦᑎᓇᓱᔅᓯᒪᔪᖅ ᑐᐊᕕᕐᓇᖅᑐᓂ ᖃᓄᐃᑦᑐᓄᑦ ᐃᓅᓯᑦᑎᓐᓂ, ᐱᒋᐊᖅᑎᑦᑎᓪᓗᑎᒃ ᐅᖃᖃᑎᒌᓐᓂᕐᓂᒃ, ᑭᒡᓕᓯᓂᐊᕐᓂᖅ ᑐᑭᓯᓇᖅᓯᑎᑦᑐᒍ, ᖃᓄᖅᑑᕈᑎᓄᓪᓗ ᐃᑲᔫᑕᐅᓯᒪᓪᓗᓂ ᖃᓄᖅᑑᖅᑎᓄᑦ ᓄᓇᕐᔪᐊᒻᒥ.
ᓚᓐᓯᐊᑦ ᓴᓇᓯᒪᒻᒥᔪᑦ ᐅᓄᖅᑐᓂᒃ “ᑲᑎᒪᔨᓂᒃ” ᐅᖃᐅᓯᖃᓲᓂᒃ ᐊᑑᑎᖃᓗᐊᖅᑐᓂᒃ ᐊᑲᐅᙱᓕᐅᕈᑎᓂᒃ. ᑲᑐᔾᔨᖃᑎᒌᓲᑦ ᓄᓇᕐᔪᐊᕐᒥᐅᓂᑦ ᖃᐅᔨᓴᖅᑎᓂᒃ, ᐃᓄᓕᒫᓄᑦ ᖃᓂᒪᖃᕐᓇᖏᓐᓂᕐᓄᑦ ᖃᐅᔨᒪᔨᑕᕐᓂᒃ ᐊᑐᐊᒐᓕᐅᖅᑎᓂᓪᓗ ᓵᖁᓪᓗᒋᑦ ᐊᔅᓱᕈᕐᓇᓛᑦ ᐊᑲᐅᙱᓕᐅᕈᑏᑦ ᓄᓇᕐᔪᐊᒻᒥ ᖃᓄᐃᖏᓐᓂᕐᓄᑦ, ᓯᕗᒧᐊᖁᓪᓗᒋᑦ ᐱᔪᓐᓇᐅᑏᑦ ᖃᓄᐃᖏᓐᓂᕐᓄᑦ, ᖃᓄᐃᖏᓐᓂᕐᓄᑦ ᓇᓕᒧᓐᓃᑦ, ᐃᓅᓯᒃᑯᓪᓗ ᐱᑦᑎᐊᖅᑕᐅᖏᑦᑐᑦ ᐱᑦᑎᐊᖅᑕᐅᖁᓪᓗᒋᑦ.
ᓚᓐᓴᑦ ᑲᑎᒪᔨᖏᑦ ᐅᑯᖅᑕᖅᑐᒥ ᖃᓄᐃᖏᓐᓂᖏᓐᓄᑦ ᑕᐃᒪᓐᓇᑦᑕᐅᖅ ᐱᒋᐊᕈᑕᐅᕗᖅ. ᐱᒋᐊᕈᑏᑦ ᑲᑎᒪᓃᑦ ᓴᖅᑭᑦᑎᖁᓪᓗᒋᑦ ᑲᑎᒪᔨᖏᓐᓂᒃ ᐱᒋᐊᓗᐊᐅᖅᑐᑦ ᐅᑭᐊᔅᓵᖓᓂ 2019ᒥ ᑖᑦᒪᐅᑦ, ᓂᐅ ᕼᐋᒻᓱᒥ. ᓯᕗᓪᓕᖅᐹᒻᒧᑦ ᑲᑎᒪᓪᓚᑦᑖᓚᐅᖅᑐᑦ ᕖᕝᕗᐊᕆ 2020ᒥ. ᑭᖑᓂᐊᒍᑦ ᑲᑎᓐᓃᑦ ᖃᕋᑕᐅᔭᑎᒎᖅᓯᒪᔪᑦ ᓄᓇᕐᔪᐊᒻᒥ ᓄᕙᓐᓇᕐᔪᐊᒻᒧᑦ ᐱᔾᔪᑎᒋᓪᓗᒍ.
ᑲᑎᒪᔨᖏᑦ ᓇᐃᓂᒃ ᐃᓚᖃᖅᑐᑦ ᓯᕗᓕᖅᑎᒃᑯᑦ ᑲᑎᒪᔨᖏᑦ, 21ᓂᓪᓗ ᑲᑎᒪᔨᖃᖅᑐᑎᒃ. ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᑕ ᐃᔅᓯᕙᐅᑕᖓ ᑕᓖ ᓴᒻᐳ ᑐᕈ ᐃᔅᓯᕙᐅᑕᐅᖃᑕᐅᓪᓗᓂ ᒪᕐᕉᓐᓂᑦ, ᐊᐃᑉᐸᕆᓪᓗᒍ ᓖᓴ ᐋᑕᒻ ᑕᐅᑦᒪᐅᑦ ᓯᓚᑦᑐᖅᓴᕝᕕᒻᒥᑦ. ᐊᓯᖏᑦ ᓯᕗᓕᖅᑎᓄᑦ ᐃᓚᒋᔭᐅᔪᑦ ᐱᖃᓯᐅᔾᔨᔪᑦ: ᓰᓚ ᐅᐊᑦ-ᒃᓘᑎᐊᐃ, ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᑕ ᑲᓇᑕᒥ ᖃᓂᒪᖃᕐᓇᖏᑦᑐᓕᕆᓂᕐᓄᑦ ᐃᖅᑲᓇᐃᔭᖅᑎ ᓯᐊᓪᒪ ᕗᐊᑦ. ᐃᓄᐃᑦ ᑭᒡᒐᖅᑐᖅᑕᐅᑦᑎᐊᖅᑐᑦ ᐃᓗᐃᑦᑐᒃᑯᑦ ᑲᑎᒪᔨᑎᒍᑦᑕᐅᖅ.
ᓚᓐᓴᑦ ᑲᑎᒪᔨᖏᑦ ᐅᑭᐅᖅᑕᖅᑐᒥ ᖃᓂᒪᖃᕐᓇᖏᓐᓂᕐᓄᑦ ᐱᕕᖃᖅᑎᑦᑎᓂᐊᖅᑐᑦ “ᒎᓗᒧᑦ ᐅᖃᐅᑎ” ᒥᒃ ᑕᕝᕘᓇ ᐱᒋᐊᕈᓐᓇᖅᓯᓂᐊᕋᑦᑕ ᑐᓴᐅᒪᔭᐅᑎᓪᓗᒋᑦ ᐅᓂᒃᑳᑦ ᐃᓕᑕᐅᓯᒪᔪᓪᓗ ᖃᓄᐃᖏᓐᓂᖏᓐᓄᑦ ᐃᓅᑦᑎᐊᕐᓂᖏᓐᓄᓪᓗ ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᓄᑦ ᓄᓇᖃᖅᑳᖅᓯᒪᔪᑦ ᑕᐅᑦᑐᐊᓂᑦ ᓄᓇᕐᔪᐊᕐᒥᐅᓄᑦ ᓈᓚᑦᑐᓄᑦ.
ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᑦ ᐃᑲᔪᖅᑐᑦ ᑖᔅᓱᒧᖓ ᐅᓂᒃᑳᒧᑦ, ᐅᖃᐅᓯᖃᕐᓂᐊᖅᑐᑎᒃ ᖃᓄᐃᓕᖓᓂᖏᓐᓄᑦ ᖃᓄᐃᖏᓐᓃᑦ ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᑦ ᐃᓄᐃᑦ ᑕᐃᒪᐃᑦᑕᕆᐅᖅᑐᑦ ᐃᓅᖃᑎᒌᑎᒍᓪᓗ ᑐᑭᓂᑦ. ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᑦ ᐃᑲᔪᕐᓂᐊᖅᑐᑦ ᓵᓪᓗᒋᑦ ᕿᒪᒃᑕᑦᑎᓐᓂ ᓄᓇᐃᖅᑕᐅᓂᕐᓄᑦ ᐅᓂᒃᑳᑉ ᓇᓗᓇᐃᕈᑎᐊᓂ. ᑲᑎᒪᔨᖏᑦ ᐅᖃᐅᓯᖃᕐᓂᐊᕐᒥᔪᑦ ᑕᐅᑦᑐᓂᒃ ᓄᓇᖃᖅᑳᖅᓯᒪᔪᑦ ᐃᓄᐃᑦ ᐃᓱᒪᒋᔭᖏᓐᓄᑦ ᐃᓅᖃᑎᒌᑎᒍᑦ, ᐃᑉᐱᒍᓱᓐᓂᒃᑯᑦ, ᐅᒃᐱᕐᓂᒃᑯᓪᓗ ᖃᓄᐃᖏᓐᓂᕐᓄᑦ, ᐱᖃᓯᐅᓪᓗᒋᑦ ᐱᕐᔪᐊᖑᓂᖏᑦ ᐃᓚᐃᑦ, ᓄᓇᖅᑲᑎᒌᑦ ᑲᑎᓪᓗᒋᓪᓗ ᐃᓕᖅᑯᓯᖏᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ. ᑕᐅᑦᑐᕗᑦ ᐱᖅᓯᐅᔾᔭᐅᓂᐊᕐᒥᔪᑦ ᐅᓂᒃᑳᑉ ᐃᓱᐊᓂ ᑎᓕᐅᕈᑎᖏᓐᓂᓗ.
ᓚᓐᓴᑦ ᖃᕋᑕᐅᔭᒃᑯᑦ ᑕᑯᔭᔅᓴᑦ ᐅᕙᓂ: https://www.thelancet.com/