ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᓕᕆᖃᑕᐅᕙᑦᑐᑦ ᓯᓚᕐᔪᐊᓂ ᑲᑎᒪᔨᐅᔪᓂᒃ ᓴᐳᒻᒥᑦᑎᓂᕐᒥᑦ ᐱᔪᓐᓇᐅᑎᒋᔭᐅᔪᓂᒃ ᐊᓯᕙᖅᑎᓄᑦ ᐊᓯᕙᖅᑕᐅᕙᑦᑐᓄᓪᓗ ᓂᕐᔪᑎᓂᒃ, ᐊᒻᒪᓗ ᐱᐅᖅᓱᐊᖅᑕᐅᖁᓪᓗᒋᑦ ᐊᕙᑎᑦᑎᓐᓃᑦᑐᑦ ᓂᕐᔪᑏᑦ. ᑲᑎᒪᖃᑕᐅᓚᐅᖅᓯᒪᒻᒥᔪᒍᑦ ᐱᕈᖅᑐᓂᒃ ᐊᕙᑎᑦᑎᓐᓂᓐ ᐊᔾᔨᐅᖏᑦᑐᓂᒃ ᑐᕌᒐᖃᖅᑐᑕ ᔭᒐᐃᓐᖏᓂᖅᓴᐅᒍᒪᓪᓗᑕ ᐱᕈᖅᑐᓂ ᐊᕙᑎᑦᑎᓐᓂ ᓯᓚᕐᔪᐊᓕᒫᒥ. ᓯᓚᕐᔪᐊᒥ ᑲᑐᔾᔨᖃᑎᒌᑦ ᑲᑎᒪᓂᕐᔪᐊᒧᑦ ᓄᓇᑦᑎᓐᓂ ᐊᖏᓂᖅᐹᖑᖃᑕᐅᔪᖅ ᐊᕙᑎᑦᑎᓐᓂ ᐱᖁᔭᖅᑕᖃᖅᑐᓂ ᐅᖃᐅᔾᔨᒋᐊᖅᑎᐅᓪᓗᑎᓪᓗ ᓯᓚᕐᔪᐊᒥ. ᑲᑎᒪᖃᑎᖃᑦᑎᐊᓚᐅᖅᓯᒪᔪᒍᑦ ᓴᖅᑮᓇᓱᐊᖅᑐᑕ ᓄᓇᖃᖅᑳᖅᑐᒥᓂᕐᓂᑦ ᑲᑐᔾᔨᖃᑎᒌᓐᓂᒃ ᐊᕕᑦᑐᖅᓯᒪᔪᓂᒃ. ᐱᐅᓯᕚᓪᓕᑎᑦᑎᑲᓐᓂᕋᓱᐊᖅᑐᑕ ᐊᕙᑎᑦᑎᓐᓂ, ᓂᕐᔪᑎᓂᒃ, ᐅᑎᖅᑕᕆᐊᓕᓐᓂᓪᓗ ᐱᔭᐅᕙᑦᑐᓂᒃ ᓯᓚᕐᔪᐊᒥ ᐱᕈᖅᑐᓂᒃ. ᑲᑎᒪᑎᑦᑎᓂᐅᔪᑦ ᓯᓚᕐᔪᐊᒥ ᐱᓕᕆᓂᖏᓐᓂ ᐅᓗᕆᐊᓇᖅᑐᒦᒍᓐᓇᖅᑐᓂᒃ ᓂᕐᔪᑎᓂᑦ ᓯᓚᕐᔪᐊᒥ ᐊᖏᕈᑎᐅᔪᖅ ᐃᓚᐅᔪᖃᖅᑐᓂ ᐅᖓᑖᓄᑦ 190 ᐊᕕᑦᑐᖅᓯᒪᔪᓂᒃ. ᑲᑎᒪᑎᑦᑎᓂᐅᔪᑦ ᓯᓚᕐᔪᐊᒥ ᐱᓕᕆᓂᖏᓐᓂ ᐅᓗᕆᐊᓇᖅᑐᒦᒍᓐᓇᖅᑐᓂᒃ ᓂᕐᔪᑎᓂᑦ ᖃᐅᔨᒪᑦᑎᐊᕋᓱᐊᓲᑦ ᒪᓕᒐᖅᑎᒍᑦ ᓯᖁᒥᑦᑎᔪᖃᓐᖏᒃᑲᓗᐊᕐᒪᖔᕐᓗ ᐊᑦᑐᐃᓂᖃᑲᒻᒪᓪᓗᑎᑦ ᓴᖅᑭᑲᓐᓂᓐᖏᑐᐃᓐᓇᕆᐊᓕᓐᓂᒃ ᑭᓱᑐᐃᓐᓇᕐᓂᑦ, ᐱᐅᖅᓱᐊᕋᓗᐊᕐᒪᖔᑕᓗ, ᐊᓐᓇᐅᒪᒐᓗᐊᕐᒪᖔᑕᓗ ᓂᕐᔪᑏᑦ ᐊᔾᔨᒌᓐᖏᑦᑐᑦ ᓯᓚᕐᔪᐊᒥ ᐱᓕᕆᐊᖑᓪᓗᑎᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᓕᕆᖃᑕᐅᖃᑦᑕᖅᓯᒪᔪᑦ ᑲᑎᒪᑎᑦᑎᓂᐅᔪᑦ ᓯᓚᕐᔪᐊᒥ ᐱᓕᕆᓂᖏᓐᓂ ᐅᓗᕆᐊᓇᖅᑐᒦᒍᓐᓇᖅᑐᓂᒃ ᓂᕐᔪᑎᓂᑦ ᖃᐅᔨᒪᑦᑎᐊᕈᒪᓪᓗᑎᑦ ᐃᓄᐃᑦ ᐱᓕᕆᖃᑕᐅᖏᓐᓇᖁᓪᓗᒋᑦ ᐱᐅᓯᕙᓪᓕᓪᓗᒋᓪᓗ ᓇᓄᐃᑦ ᐱᐅᖅᓱᐊᖅᑕᐅᒋᐊᖃᕐᓂᖏᓐᓂ, ᓇᓐᓄᑦᑕᐅᔪᓐᓇᕐᓂᖏᓐᓂ ᑕᐅᖅᓰᔪᖃᕈᓐᓇᕐᓂᖏᓐᓂᓪᓗ.