ᐊᕐᕌᒍᖓᓴᐃᑦ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓇᓗᓇᐃᖅᓯᓚᐅᖅᑐᑦ ᓴᑭᔮᖅᑎᑦᑎᒃᑲᓐᓂᕆᐊᖃᕐᖓᑕ ᐅᑭᐅᖅᑕᖅᑐᖅ ᐊᕙᑎᖓᓐᓂ ᐊᑦᑕᓇᖅᑐᒦᒋᐊᖃᓐᖏᒻᒪᑦ ᓱᕈᓐᓇᖅᑐᑕᖃᐃᓐᓇᖅᑐᓂᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᔪᓰᓐᓇᖅᑐᑦ ᓯᕗᒃᑲᖅᑕᐃᓪᓗᑎᑦ ᑕᒪᒃᑮᓐᓂᒃ ᓯᓚᕐᔪᐊᒥ ᓄᓇᓕᓐᓂᓪᓗ ᑕᒪᓐᓇ ᓱᕋᖅᑎᖅᑕᐅᕙᓪᓕᐊᓕᕇᕐᖓᑦ, ᓄᖅᑲᑎᑦᑎᑲᓐᓂᕋᓱᒋᐊᖃᕋᑦᑕ ᓴᓇᔨᓂᒃ ᐊᑐᖃᑦᑕᖁᓐᖏᓪᓗᒋᑦ ᓱᕈᓐᓇᖅᑐᐊᓗᓐᓂᒃ ᓴᓇᔭᖏᓐᓂ.

ᐃᓄᐃᑦ ᐃᒻᒥᒃᑯᖅᑐᑦ ᐃᒪᕐᒥᐅᑕᕐᓂᑦ ᓂᕐᔪᑎᓂᑦ, ᓇᑦᑏᑦ, ᓴᖅᐱᓖᑦ ᐊᐃᕖᓪᓗ ᓂᕿᒋᕙᑦᑕᖏᑦ ᓱᕈᓐᓇᖅᑐᑕᖃᐃᓐᓇᖅᑐᓂᑦ ᐱᑕᓖᑦ ᐅᓗᕆᐊᓇᖅᑐᑦ ᐃᓄᓐᓄᑦ. ᓱᕈᓐᓇᖅᑐᑕᖃᐃᓐᓇᖅᑐᓂᑦ ᑲᑎᖅᓱᐸᑦᑐᑦ ᐅᖅᓱᒥ ᓂᕐᔪᑎᓂᑦ ᐃᓄᓐᓂᓪᓗ. ᓱᕈᓐᓇᖅᑐᑕᖃᐃᓐᓇᖅᑐᓂᑦ ᑲᑎᖅᓱᖃᑦᑕᕐᖓᑕ ᓂᓪᓚᓱᓐᓂᖅᓴᓂᑦ ᓯᓚᕐᔪᐊᒥ, ᓱᕈᓐᓇᖅᑐᑦ ᐱᐅᓐᖏᑦᑐᑦ ᐊᒻᒪᓗ ᑕᐃᒫᒃ ᐅᖃᖅᓯᒪᒻᒪᑕ, ᐊᕙᑎᑦᑎᓐᓃᑯᑖᓲᑦ ᐊᑯᓂᐊᓗᒃ. ᐊᖏᓂᖏᑦ ᐃᓱᒫᓗᓇᖅᑐᑦ ᑕᒪᒃᑯᐊ ᐃᓚᔅᓴᐃᑦ ᐊᐅᖏᓐᓂ ᑕᑯᔭᐅᕙᑦᑐᑦ ᐊᒻᒪᓗ ᐊᒫᒪᑦᑕᐅᔫᑉ ᐃᓅᑉ ᐃᒻᒧᖏᓐᓂ ᓯᓚᕐᔪᐊᓕᒫᒥ.

ᐱᓕᕆᓪᓗᐊᑕᖅᑎᐅᓪᓗᑎᑦ ᐊᐃᕙᓂᐅᔪᒥᑦ ᓯᓚᕐᔪᐊᒥ ᓯᑖᒃᕼᐅᒻᒥ ᑲᑎᒪᓂᐅᔪᒥᑦ ᐲᔭᖅᑕᐅᓂᖏᓐᓂ ᓱᕈᓐᓇᖅᑐᑕᖃᐃᓐᓇᖅᑐᓂᑦ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᔪᓰᓐᓇᖅᑐᖅ ᑲᑎᒪᔾᔪᑕᐅᖏᓐᓇᖅᑐᑦ ᑕᒪᒃᑯᐊ ᓄᓇᓕᕐᔪᐊᖏᓐᓂ ᒪᓕᒐᕈᖅᑎᑕᐅᓇᓱᐊᖅᑐᑎᑦ. ᑲᑎᒪᔾᔪᐊᓚᐅᖅᓯᒪᔪᑦ ᒪᐃᒥ 2003−ᒥ ᐊᒻᒪᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᓕᕆᖃᑎᖃᐃᓐᓇᖅᑐᑦ ᑲᑎᒪᓂᕐᔪᐊᖑᓚᐅᖅᑐᑦ ᐱᓕᕆᐊᔅᓴᖏᓐᓂ ᐊᑐᓕᖅᑎᑕᐅᒋᐊᖃᕐᓂᖏᓐᓄᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᓕᕆᖃᑎᖃᐃᓐᓇᖅᑐᑦ ᐋᖅᑭᔅᓱᐃᓇᓱᐊᖅᑐᑎᑦ ᑲᒪᓂᐊᖅᑐᑎᓪᓗ ᖃᐅᔨᓴᕐᓂᕐᒥᑦ ᕿᒥᕐᕈᖃᑦᑕᕐᓂᖏᓐᓂ ᑕᒪᒃᑯᓂᖓ ᓱᕈᓐᓇᖅᑐᑕᖃᐃᓐᓇᖅᑐᓂᑦ ᓄᑖᓂᓪᓗ ᐊᒻᒪᓗ ᓴᖅᑭᐸᓪᓕᐊᔪᓂᒃ ᐃᓚᔅᓴᓂᒃ ᐃᓱᒫᓗᒋᔭᐅᕙᑦᑐᓂᒃ ᐅᑭᐅᖅᑕᖅᑐᒥ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᑐᕐᓗᑎᑦ ᑕᒪᒃᑯᓂᖓ ᑐᑭᓯᒋᐊᕈᑎᓂᒃ ᑲᑎᒪᖃᑎᖃᕐᓗᑎᑦ ᓄᑖᕐᓂᑦ ᐃᓚᔅᓴᓂᒃ ᓯᑖᒃᕼᐅᒻᒥ ᑲᑎᒪᕕᔾᔪᐊᕐᒥ.

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓈᒪᓂᖅᓴᒥᑦ ᐊᑦᑕᓇᐃᖅᓯᓇᓱᐊᖅᑐᑦ ᐅᑭᐅᖅᑕᖅᑑᑉ ᐊᕙᑎᖓᓐᓂ ᓯᓚᕐᔪᐊᒥ ᐅᖃᐅᔾᔪᐃᕙᑦᑐᑎᑦ, ᐱᖃᓯᐅᑎᓪᓗᒋᑦ ᖃᐅᔨᓴᖅᑎᒻᒪᕇᑦ, ᓴᓇᔨᑦ, ᐱᖁᔭᓕᐅᖅᑏᑦ ᑕᑯᖁᓪᓗᒋᑦ ᓱᕈᓐᓇᖅᑐᑕᖃᐃᓐᓇᖅᑐᓂᑦ ᑕᐃᒪᐃᑲᐃᓐᓇᑐᐃᓐᓇᕐᓂᖓᓐᓂ ᑲᒪᒋᓇᓱᐊᓐᖏᓪᓗᒍ, ᑭᓯᐊᓂᓕ ᑐᑭᓯᓗᑎᑦ ᑲᑎᑉᐸᓪᓕᐊᖏᓐᓇᕐᖓᑕ ᐊᑦᑐᐃᓂᖃᖅᑐᑎᓪᓗ ᓱᕈᓐᓇᖅᑐᑕᖃᐃᓐᓇᖅᑐᓂᑦ ᐊᓯᖏᓪᓗ ᓱᕈᓐᓇᖅᑐᑦ ᐃᓄᐃᑦ ᓄᓇᖓᓐᓂ ᐃᒪᖓᓐᓂ, ᐱᓗᐊᖅᑐᒥ ᓯᓚᕐᔪᐊᑉ ᐊᕙᑎᖓᓐᓂ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᓕᕆᖃᑎᖃᑦᑎᐊᖅᑐᑦ ᐅᑭᐅᖅᑕᖅᑑᑉ ᑲᑎᒪᔨᖏᓐᓂ ᐅᑭᐅᖅᑕᖅᑐᒥ ᖃᐅᔨᓴᕐᓂᖏᓐᓂ ᕿᒥᕐᕈᓂᖏᓐᓂᓪᓗ, ᐊᒻᒪᓗ ᓱᕈᓐᓇᖅᑐᑕᖃᐃᓐᓇᖅᑐᓂᑦ ᐱᓕᕆᔨᒻᒪᕇᑦ ᑕᒪᑐᒪᓂ. ᐊᒻᒪᓗ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᖃᐅᔨᓴᐃᓐᓇᕐᓂᐊᖅᑐᑦ ᐃᓚᒋᔭᐅᖏᓐᓇᕐᓗᑎᓪᓗ ᓱᕈᓐᓇᖅᑐᑕᖃᐃᓐᓇᖅᑐᓂᑦ ᐆᑦᑐᕋᕐᓗᑎᑦ ᐊᐃᕙᔾᔪᑕᐅᓯᒪᔪᓂᑦ ᐃᓗᐊᓂ ᓯᓚᕐᔪᐊᑉ ᑲᑐᔾᔨᖃᑎᒌᖏᓐᓂ ᐱᕙᓪᓕᐊᓂᕐᒧᑦ ᑲᑎᒪᔨᖏᓐᓂ ᑕᕆᐅᑉ ᐊᑭᐊᓂ ᑲᑎᒪᓂᕐᔪᐊᒥ ᐊᒻᒪᓗ ᐅᖓᓯᑦᑐᒨᖃᑦᑕᕐᓂᖏᓐᓄᑦ ᓯᓚᒃᑯᑦ ᓱᕈᓐᓇᖅᑐᑦ.

ᑕᒪᓐᓇ ᑲᔪᓰᓐᓇᖅᑐᖅ. ᐱᕙᓪᓕᐊᓂᖏᓐᓂ ᑎᑎᕋᖅᐸᑦᑕᕗᑦ ᐊᕐᕌᒍᑕᒫᖅᓯᐅᑎᑦᑎᓐᓄᑦ ᐅᓂᒃᑳᕐᒨᓛᖅᑐᓂᑦ.