Arraagungasait, Inuit Ukiuqtaqtumiuqatigiit Katimajingit nalunaiqsilauqtut sakijaaqtittikkanniriaqarngata ukiuqtaqtuq avatinganni attanaqtumiigiaqanngimmat Surunnaqtutaqainnaqtunit. Inuit Ukiuqtaqtumiuqatigiit Katimajingit kajusiinnaqtut sivukkaqtaillutit tamakkiinnik silarjuami nunalinnillu tamanna suraqtiqtauvallialiriirngat, nuqqatittikannirasugiaqaratta sanajinik atuqattaqunngillugit Surunnaqtualunnik sanajanginni.

Inuit immikkuqtut imarmiutarnit nirjutinit, nattiit, saqpiliit aiviillu niqigivattangit surunnaqtutaqainnaqtunit pitaliit ulurianaqtut inunnut. Surunnaqtutaqainnaqtunit katiqsupattut uqsumi nirjutinit Inunnillu. Surunnaqtutaqainnaqtunit katiqsuqattarngata nillasunniqsanit silarjuami, surunnaqtut piunngittut ammalu taimaak uqaqsimammata, avatittinniikutaasuut akunialuk. Anginingit isumaalunaqtut tamakkua ilassait aunginni takujauvattut ammalu amaamattaujuup inuup immunginni silarjualimaami.

Pilirilluataqtiullutit aivaniujumit silarjuami Sitaakhummi Katimaniujumit Piijaqtauninginni Surunnaqtutaqainnaqtunit, Inuit Ukiuqtaqtumiuqatigiit Katimajingit kajusiinnaqtuq Katimajjutaunginnaqtut tamakkua nunalirjuanginni maligaruqtitaunasuaqtutit. Katimajjualauqsimajut Maimi 2003−mi ammalu Inuit Ukiuqtaqtumiuqatigiit Katimajingit piliriqatiqainnaqtut katimanirjuangulauqtut piliriassanginni atuliqtitaugiaqarninginnut. Inuit Ukiuqtaqtumiuqatigiit Katimajingit piliriqatiqainnaqtut aaqqissuinasuaqtutit kamaniaqtutillu qaujisarnirmit qimirruqattarninginni tamakkuninga surunnaqtutaqainnaqtunit nutaanillu ammalu saqqipalliajunik ilassanik isumaalugijauvattunik ukiuqtaqtumi. Inuit ukiuqtaqtumiuqatigiit katimajingit aturlutit tamakkuninga tukisigiarutinik katimaqatiqarlutit nutaarnit ilassanik Sitaakhummi katimavijjuarmi.

Inuit Ukiuqtaqtumiuqatigiit Katimajingit naamaniqsamit attanaiqsinasuaqtut ukiuqtaqtuup avatinganni silarjuami uqaujjuivattutit, piqasiutillugit qaujisaqtimmariit, sanajit, piqujaliuqtiit takuqullugit Surunnaqtutaqainnaqtunit taimaikainnatuinnarninganni kamaginasuanngillugu, kisianili tukisilutit katippallianginnarngata attuiniqaqtutillu surunnaqtutaqainnaqtunit asingillu surunnaqtut inuit nunanganni imanganni, piluaqtumi silarjuap avatinganni. Inuit Ukiuqtaqtumiuqatigiit Katimajingit piliriqatiqattiaqtut Ukiuqtaqtuup Katimajinginni Ukiuqtaqtumi Qaujisarninginni Qimirruninginnillu, ammalu Surunnaqtutaqainnaqtunit Pilirijimmariit tamatumani. Ammalu, Inuit Ukiuqtaqtumiuqatigiit Katimajingit qaujisainnarniaqtut ilagijaunginnarlutillu Surunnaqtutaqainnaqtunit uutturarlutit aivajjutausimajunit iluani Silarjuap Katujjiqatigiinginni Pivallianirmut Katimajinginni Tariup Akiani Katimanirjuami ammalu Ungasittumuuqattarninginnut Silakkut Surunnaqtut.

Tamanna kajusiinnaqtuq. Pivallianinginni titiraqpattavut arraagutamaaqsiutittinnut unikkaarmuulaaqtunit.