ᓅᒃ, ᑲᓛᖡᑦ ᓄᓈᓂ – ᔪᓚᐃ 24-31, 1998

8−ᖓᓐᓂ ᐃᓄᐃᑦ ᐅᑭᐅᖅᑕᖅᑎᒥᐅᖃᑎᒌᑦ ᑲᑎᒪᕕᔾᔪᐊᓚᐅᖅᓯᒪᔪᑦ ᓅᒃᒥ, ᑲᓛᖡᑦ ᓄᓈᓂ ᑐᑦᑕᕐᕕᐅᔪᖅ (ᑲᓛᖡᑦ ᓄᓈᑦ) ᔪᓚᐃᒥ 24-31, 1998. ᐱᔾᔪᑎᖃᓐᖑᐊᓚᐅᖅᓯᒪᔪᑦ ᑲᑎᒪᕕᔾᔪᐊᕐᓂᖓᓐᓂ “ᐃᓄᐃᑦ ᐅᑉᐱᕆᔭᖏᑦ ᓯᓚᕐᔪᐊᒥ ᐱᓕᕆᖃᑎᖃᕐᓂᐊᕐᓂᖏᓐᓂ”, ᑕᒪᓐᓇ ᐃᓄᓐᓄᑦ ᐱᓕᕆᖃᑎᖃᕈᒪᓂᖏᓐᓂ ᐊᒥᓱᓂᑦ ᑲᔪᓯᓯᒪᑦᑎᐊᖅᑐᓂᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐅᑭᐅᓄᑦ ᐊᕙᑎᐅᓗᐊᓕᖅᑐᓄᑦ. ᐃᓕᓴᖅᓯᒻᒥᔪᑦ ᐱᒻᒪᕆᐅᓂᖓᓂ ᐱᓕᕆᖃᑎᖃᒃᑲᓐᓂᕋᓱᐊᕐᓗᓂ ᐊᓯᖏᓐᓂ ᓄᑖᕐᓂᑦ.

ᑲᓇᑕᒥ ᑎᓕᔭᐅᓯᒪᔪᑦ ᓅᒃᒨᖁᔭᐅᓪᓗᑎᑦ 70−ᐅᓚᐅᖅᓯᒪᔪᑦ ᒪᑯᐊ 18−ᖑᓪᓗᑎᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᑎᒪᕕᔪᐊᕆᐊᖅᑐᑦ, ᑎᓴᒪᑦ ᐃᓐᓇᐃᑦ ᑎᓕᔭᐅᓯᒪᔪᑦ, ᐃᓅᓱᑦᑐᐃᑦ, ᑐᓵᔩᑦ, ᐱᓐᖑᐊᖅᑏᑦ ᐃᖅᑲᓇᐃᔭᖅᑏᓪᓗ. ᑭᒡᒐᖅᑐᐃᔩᑦ ᐊᓯᖏᓐᓂ ᓄᓇᖃᖅᑳᖅᑐᒥᓃᓐᖔᖅᑐᑦ ᑲᑐᔾᔨᖃᑎᒌᓐᓂᒃ, ᒐᕙᒪᒃᑯᓐᓂ, ᐃᓕᓐᓂᐊᕕᔾᔪᐊᕐᓂᑦ, ᑕᕐᕆᔮᓕᕆᔨᓂᒃ ᐱᕙᓪᓕᐊᔪᓕᕆᔨᒃᑯᓐᓃᓐᖔᖅᓯᒪᔪᓂᓪᓗ ᑕᒫᓂᖃᐃ ᑲᑎᑦᑐᒋᑦ 150−ᐅᓚᐅᖅᓯᒪᔪᑦ.

ᐅᓪᓗᓄᑦ 9−ᓄᑦ ᑲᑎᒪᑎᓪᓗᒋᑦ, 32−ᓂᒃ ᐱᖁᔨᕗᖔᕐᓂᑦ ᑲᔪᓯᑎᑦᑎᓚᐅᖅᓯᒪᔪᑦ ᐊᔾᔨᒌᓐᖏᕈᓘᔭᖅᑐᓂᒃ ᒪᑯᓂᖓ ᐱᔪᓐᓇᐅᑎᓕᕆᓂᕐᒥᑦ, ᐱᕙᓪᓕᔪᓕᕆᓂᕐᒥᑦ, ᑕᐅᖅᓰᓂᕐᒥᑦ, ᐃᓕᓐᓂᐊᖅᑐᓕᕆᓂᕐᒥᑦ, ᐃᖏᕐᕋᔪᓕᕆᓂᕐᒥᑦ, ᑐᓴᐅᒪᖃᑦᑕᐅᑎᓕᕆᔨᒻᒥᑦ ᐊᕙᑎᓕᕆᓂᕐᒥᓪᓗ. ᓇᓗᓇᐃᖅᓯᓚᐅᖅᓯᒪᒋᓪᓗᑎᑦ ᐃᓄᐃᑦ ᐱᔪᓐᓇᐅᑎᖏᓐᓂ ᐊᓯᕙᕈᓐᓇᕐᓂᖏᓐᓂ, ᑲᑐᔾᔨᒍᓐᓇᕐᓂᖏᓐᓂ ᑕᐅᖅᓰᒍᓐᓇᕐᓂᖏᓐᓂᓪᓗ ᐃᒪᕐᒥᐅᑕᕐᓂᑦ ᓱᓇᒃᑯᑖᖁᑎᖏᓐᓂᓪᓗ ᑲᔪᓯᑎᑕᐅᓪᓗᑎᑦ. ᐃᓐᓇᐃᑦ ᐃᓅᓱᑦᑐᐃᓪᓗ ᑲᔪᓯᑎᑦᑎᓪᓗᑎᑦ ᐱᖁᔨᕗᖔᕈᑎᓂᒃ ᐃᓱᒫᓘᑎᒋᔭᖏᓐᓂ. ᐱᖁᔨᕗᖔᕈᑏᑦ ᐱᓕᕆᐊᕆᔭᐅᓚᐅᖅᑐᑦ ᐊᔅᓱᕈᖅᑐᑎᑦ ᑲᑎᕕᔾᔪᐊᑎᓪᓗᒋᑦ ᑎᓕᓯᓪᓗᑎᓪᓗ ᖃᓄᐃᑦᑐᑦ ᑲᒪᒋᔭᐅᒋᐊᖃᕐᓂᐊᕐᒪᖔᑕ ᐊᕐᕌᒍᓂᒃ ᑎᓴᒪᐅᓂᐊᖅᑐᓂᒃ.

ᐊᖏᔪᐊᓗᐃᑦ ᐅᐱᓐᓇᒻᒪᕆᑦᑐᑦ ᐱᖃᑕᐅᔪᑦ ᐅᓛᓵᓂᑦ ᓯᑳᑦᑲᒥ ᐱᓗᐊᖅᑐᒥᑦ ᐱᒻᒪᕆᐅᕗᖅ ᑲᑎᒪᕕᔾᔪᐊᖅᑐᓂᑦ ᐊᒻᒪᓗ ᓇᓗᓇᐃᖅᑕᐅᓂᖏᓐᓂ ᑲᔪᓯᓯᒪᔭᖏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐅᑭᐅᓄᑦ ᐱᖓᓱᓄᑦ, ᔮᓐ ᐊᒪᕈᐊᓕᒃ ᐃᖅᑲᐅᒪᔪᖅ ᑲᑎᒪᓂᐅᓚᐅᖅᓯᒪᔪᒥ ᓲᕕᐊᑦ ᑐᑦᑕᕐᕕᖓᓐᓂ ᑲᓇᑕᒧᑦ 1983−ᒥᑦ ᐊᐱᕆᓪᓗᓂ ᐅᓛᓵᒥᐅᑦ ᐃᓄᐃᑦ ᐱᖃᑕᐅᔪᓐᓇᖁᓪᓗᒋᑦ ᐃᖃᓗᓐᓂ ᐊᐅᔭᒃᑯᑦ ᑲᑎᒪᕕᔾᔪᐊᕐᓂᕐᒥᑦ. ᑐᔅᓯᕌᖓ ᐊᖏᖅᑕᐅᓪᓗᓂ ᑭᓯᐊᓂ ᑲᑉᐱᐊᓱᓚᐅᖅᑐᑦ ᐅᑉᐱᕆᔭᖃᑦᑎᐊᕐᓇᑎᓪᓗ, ᑭᓯᐊᓕ ᐊᔪᐃᓐᓇᕈᓘᔭᑦᑕᕐᖓᑕ ᑕᒪᓐᓇ ᐃᓱᒪᖓ ᐊᓯᔾᔨᖅᑕᐅᓚᐅᖅᓯᒪᔪᖅ. ᐅᖃᖅᑐᓂᓗ “ᐊᒻᒪᓗᑭᑖᖅ ᐃᓗᐃᑦᑐᕈᕐᓂᕋᖅᑐᓂᐅᒃ” ᐃᓕᓴᕆᔭᐅᑦᑎᐊᖅᑐᑎᓪᓗ ᐅᑭᐅᒐᓚᓐᓄᑦ ᐊᔅᓱᕉᑎᒋᓚᐅᖅᓯᒪᓂᖓᓐᓄᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ, ᐊᒻᒪᓗ ᐱᖃᑕᐅᓂᖏᓐᓂ ᐅᓛᓵᑦ ᑲᑎᒪᕕᔾᔪᐊᕐᓂᕐᒥᑦ ᖁᕕᐊᓇᓪᓚᕆᑦᑐᐊᓘᓚᐅᖅᓯᒪᔪᖅ.

ᐱᓕᕆᐊᖑᔪᑦ ᑲᑎᒪᕕᔾᔪᐊᑎᓪᓗᒋᑦ ᑕᑯᓐᓇᑎᑦᑎᓪᓗᑎᑦ ᐱᓐᖑᐊᖅᑐᓂᑦ ᐱᖅᑯᓯᖏᑦ ᐊᑐᖅᑐᒋᑦ ᐊᑐᓂ ᓄᓇᓕᕐᔪᐊᑦ ᐅᓐᓄᒃᑯᑦ. ᑭᖑᓪᓕᖅᐹᖓᓐᓂᓪᓕ ᐃᓐᓄᖓᓐᓂ, ᑲᓇᑕᒥ ᐅᐸᔅᓯᒪᔪᑦ ᐱᓐᖑᐊᓚᐅᖅᑐᑦ ᐃᓄᐃᑦ ᐅᑉᐱᕆᔭᖏᓐᓂ. ᐅᐸᔅᓯᒪᔪᑦ ᐃᖅᑲᓇᐃᔭᖅᑏᓪᓗ ᐱᖅᑯᓯᖏᓐᓂ ᐊᑐᖅᑐᑎᑦ ᑲᓛᖡᑦ ᓄᓈᓃᓐᖓᖅᑐᓂᑦ “ᖁᔭᓐᓇᒦᕈᑎᖃᓚᐅᖅᑐᑦ” ᐃᓐᖏᖅᑐᑎᒃ. ᐃᓱᓕᓚᐅᖅᑐᑦ ᐃᓐᖏᑦᑐᑎᑦ ᐃᒫᒃ “ᓄᓇᕐᔪᐊᖑᒐᑦᑕ”.