ᓄᕕᐱᕆ 29, 2019 – ᒪᑐᕆᑦ, ᓯᐸᐅᓐ – ᐃᓄᐃᑦ ᓯᕗᓕᖅᑏᑦ ᐃᓄᓱᑦᑐᐃᓪᓗ ᑲᑎᒪᖃᑕᐅᔪᒫᖅᑐᑦ ᓯᐸᐅᓐᒥ ᑕᐃᑲᓂ ᓯᓚᕐᔪᐊᑉ ᑲᑐᔾᔨᖃᑎᒌᖏᓐᓂ (UN COP25) ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᑲᑎᒪᓂᕐᒥ. ᐃᔅᓯᕙᐅᑕᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑕᓕ ᓵᒻᐳ ᑕᕈ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕ ᐊᖏᔪᖅᑳᑉ ᑐᖏᓕᖓ (ᓯᓚᕐᔪᐊᒧᑦ) ᓖᓴ ᑯᐱᕐᕈᐊᓗᒃ, ᐊᒻᒪᓗ ᐊᖏᔪᖅᑲᖅ ᑲᓇᑕᒥ ᐃᓄᓐᓄᑦ ᐃᓄᓱᑦᑐᐃᑦ ᑲᑎᒪᔨᖏᓐᓄᑦ ᑯᕆᔅᑕ ᒫᑎᓐ-ᓚᐸᓐᔅᑭ ᑲᑎᒪᖃᑕᐅᓚᖅᑐᑦ ᐊᔾᔨᒌᓐᖏᑦᑐᕈᓘᔭᕐᓂᑦ ᐱᓇᓱᐊᕈᓰᓐᓄᒃ ᒪᕐᕉᓐᓄᒃ. ᑲᑎᒪᓛᖅᑐᑦ ᓴᓐᖏᔪᐊᓗᓐᓂ ᐃᓅᓱᑦᑐᓂ ᐃᓅᕕᐊᓗᒻᒥᐅᓂᑦ ᑐᒃᑑᔭᒃᑎᒻᒥᐅᑕᕐᓂᑦ ᒪᑐᕆᑦᒨᓛᖅᑐᑦ ᑕᕐᕆᔮᔅᓴᓂᑦ ᑕᑯᔅᓴᐅᑎᑦᑎᒍᒫᖅᑐᑦ ᓯᓚ ᐊᓯᔾᔨᐸᓪᓕᐊᓂᖓᓐᓂ ᓄᓇᓕᖏᓐᓂ, ᐃᓄᒃ ᑕᑯᔅᓴᐅᑎᑦᑎᓗᓂᓗ ᓯᕗᓕᖅᑎᒥᑦ ᐱᓕᕆᐊᖑᔪᒥᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐊᓛᔅᑲᐅᑉ ᐊᓪᓚᕕᖓᓐᓂ, ᐸᓐᔨᒪᓐ ᓵᕈᔅ [ᔪᑉᐱᒃ] ᐱᖃᑕᐅᓛᕐᒥᔪᖅ.
ᐱᒻᒪᕆᐅᒻᒪᑦ ᑕᒪᓐᓇ ᑲᑎᒪᓂᐅᓛᖅᑐᖅ ᐅᖃᐅᓯᖃᓛᖅᑐᓂ ᑭᓱᑐᐃᓐᓇᕐᓂᑦ ᐱᓇᓱᐊᕈᓯᕐᒥ ᓄᑖᓂᓪᓗ ᐅᓂᒃᑳᓕᐅᕐᓗᑎᑦ ᓯᓚᕐᔪᐊᑉ ᑲᑐᔾᔨᖃᑎᒌᖏᑦᑕ ᐊᕙᑎᓕᕆᓂᕐᒧᑦ ᑕᐃᒫᒃ ᐃᓄᐃᑦ ᓯᕗᓕᖅᑎᒋᑦ ᑲᓛᖡᑦ ᓄᓈᓂ, ᐊᓛᔅᑲᒥ, ᓯᑳᑦᑲᒥ ᐱᖃᓯᐅᔾᔭᐅᓗᑎᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᓯᕗᓕᖅᑏᑦ ᑲᑎᒪᔨᖏᑦ ᐃᓗᓕᔅᓴᒥᑦ, ᑲᓛᖡᑦ ᓄᓈᓂ.
“ᐅᓂᒃᑳᖅ ᐅᖃᐅᔾᔨᒋᐊᖅᓯᒪᔪᖅ ᐱᒋᐊᕈᑎᖃᕐᓂᐊᖏᑉᐸᑕ ᐊᖏᔪᓂᑦ ᓯᓚᕐᔪᐊᕗᑦ ᐆᓇᖅᓯᓈᓕᖅᑐᖅ 3.2−ᒧᑦ ᐅᖅᑰᓂᖃᕐᓗᓂ 2100−ᖑᓕᖅᑲᑦ,” ᐅᖃᓚᐅᖅᑐᖅ ᑕᓕ ᓵᒻᐳ ᑐᕈ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᓯᓚᕐᔪᐊᒥ ᐃᔅᓯᕙᐅᑕᖅ. “ᓯᑯᕗᑦ ᐊᐳᑎᕗᓪᓗ ᐅᑭᐅᖅᑕᖅᑐᒥ ᐊᓯᔾᔨᖅᓯᒪᓕᕇᖅᑐᑦ ᐊᐅᑉᐸᓪᓕᐊᓕᖅᑐᑦ. ᑖᓐᓇ ᐅᓂᒃᑳᖅ ᓇᓗᓇᐃᖅᓯᑲᓐᓂᖅᑐᖅ ᐱᒋᐊᕆᐊᖃᓕᕋᑦᑕ ᐊᔅᓱᕈᕐᓗᑕᓗ ᓴᖅᑮᒋᐊᖃᕈᓐᓃᖅᑐᒍ ᐳᔪᕐᓗᓐᓂ (CO2). ᑕᕝᕙᑦᑕᐅᑎᒋ ᑲᒪᒋᐊᖃᓕᖅᑐᒍ ᐊᒻᒪᓗ ᐃᓱᓕᑦᑎᑦᑎᓇᓱᐊᕐᓗᑕ ᑕᒪᑐᒥᖓ ᐊᑦᑐᐃᓂᖃᖅᑐᐊᓗᓐᓂᑦ ᐃᓄᓐᓄᑦ ᓯᓚᕐᔪᐊᑎᓐᓂ.”
COP25 ᐋᖅᑭᔅᓯᒻᒪᑦ ᐱᔭᕆᐊᖃᓪᓚᕆᓐᓂᐊᖅᑐᒥᑦ ᑲᑐᔾᔨᖃᑎᒌᑦ ᓯᓚᕐᔪᐊᒥ ᓯᓚ ᐊᓯᔾᔨᕐᓂᖓᓐᓄ ᑲᒪᒋᔭᐅᒋᐊᓕᓐᓂᒃ. ᐊᖏᕈᑎᐅᓚᐅᖅᑎᓪᓗᒍ ᐊᑐᓕᖅᑎᑕᐅᒋᐊᖃᖏᓂᖏᓐᓄᑦ ᐊᑐᐊᒐᕐᓂᑦ ᐸᕆᔅᒥ ᐊᖏᕈᑎᒥᑦ COP24−ᒥᑦ ᑲᑐᐃᔅ, ᐴᓚᒥ ᐊᕐᕌᓂ, ᑐᕌᒐᖏᑦ ᐱᔭᕇᕆᐊᖃᕐᖓᑕ ᑕᒪᒃᑯᓂᖓ ᓱᓕ ᐊᐅᓚᑦᑎᐊᕐᓂᐊᑐᐊᖅᑲᑦ ᐸᕇᔅᒥ ᓯᓚᒧᑦ ᐊᓯᔾᔨᕐᓂᖓᓐᓄᑦ ᐊᖏᕈᑎ, ᐱᖃᓯᐅᑎᓗᒋᑦ ᐳᔪᕐᓗᓕᐅᖅᐸᑦᑐᑦ.
“ᓯᓚᓕ ᐊᓯᔾᔨᐸᓪᓕᐊᔪᑦ ᐃᑉᐱᓐᓂᐊᖏᒻᒪᑦ ᑲᑎᒪᔩᑦ ᑭᓪᓕᖏᓐᓂ ᐊᒻᒪᓗ ᓯᓚ ᐊᓯᓱᔾᔨᐸᓪᓕᐊᓂᖓ ᐃᓱᒪᒋᔭᐅᔪᓂᑦ ᐃᑉᐱᒍᓱᓐᖏᒻᒪᑦ,” ᐅᖃᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ ᐊᖏᔪᖅᑳᑉ ᑐᖏᓕᖓ ᓖᓴ ᖁᐱᕐᕈᐊᓗᒃ. “ᓯᓚ ᐊᓯᔾᔨᕐᓂᖓ ᓯᓚᕐᔪᐊᒥ ᑐᐊᕕᕐᓇᓯᒻᒪᑦ. ᐃᓅᓪᓗᑕ ᐋᖅᑭᔅᓱᕋᓱᒋᐊᖃᕋᑦᑎᒍ ᐃᑲᔪᖅᑎᒌᓪᓗᑕ. ᒪᑐᕆᑦᒥ, ᐱᓕᕆᖃᑎᖃᕐᓂᐊᕋᑦᑕ ᒐᕙᒪᒃᑯᓐᓂ, ᐊᔭᐅᖅᑐᕐᓗᒋᓪᓗ ᐱᒋᐊᖅᑎᑦᑎᔾᔪᑎᖃᑦᑎᐊᖁᓪᓗᒋᑦ ᓯᓚᕐᔪᐊᑉ ᐆᓇᖅᓯᕙᓪᓕᐊᓕᕐᓂᖓᓐᓄᑦ.”
ᐊᕐᕌᒍᒥ ᐊᑕᐅᓯᕐᒥᑦ ᐃᓗᐊᓂ ᓯᓚ ᐅᖃᐅᓯᐅᓯᒪᓪᓚᕆᓕᕐᖓᑦ ᐊᓯᖏᓪᓗ ᐱᒋᐊᕈᑕᐅᓯᒪᓕᖅᑐᑎ ᓯᓚᕐᔪᐊᒥ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐅᑭᐅᖅᑕᖅᑐᒥᐅᑕᕐᓂᑦ ᐆᑦᑑᑎᔅᓴᐅᔪᓂᒃ ᑕᑯᔅᓴᐅᑎᑦᑎᖁᔨᒻᒪᑕ ᑕᒪᑐᒥᖓ ᐳᔪᕐᓗᐊᓗᒻᒥᑦ ᐊᓂᕐᓂᑎᓐᓅᖃᖅᑐᓂᑦ ᒥᑭᓪᓕᕚᓪᓕᑎᑦᑎᑲᓐᓂᕐᓗᑕ ᐊᒻᒪᓗ ᐃᓕᑦᑐᕐᓗᒋᑦ ᐊᔅᓱᕈᑕᐅᔪᑦ.
ᐊᒻᒪᓗ ᑕᒪᓐᓇ COP25 ᑲᑎᒪᓂᐅᓛᖅᑐᖅ, ᐊᒥᓱᓂᑦ ᖃᓄᐃᓘᕐᓂᐅᓚᖅᑐᓂ ᐸᕐᓇᓯᒪᒻᒪᑕ, ᐱᕕᖃᖅᑎᑦᑎᓛᕐᖓᑕ ᑲᑐᔾᔨᖃᑎᒌᓐᓂᒃ, ᑎᒥᐅᔪᓂᒃ ᐊᒻᒪᓗ NGO−ᒥᑦ ᐅᖃᖃᑎᒌᖃᑦᑕᓛᕐᖓᑕ ᓯᓚ ᐊᓯᔾᔨᐸᓪᓕᐊᓂᖓᓐᓂ. ᑕᒪᒃᑯᐊ ᑲᑐᔾᔨᖃᑎᒌᑦ ᐱᖔᓱᓕᖅᑲᖓᓗᑎᑦ ᐊᕕᑦᑐᖅᓯᒪᓛᕐᖓᑕ: ᐱᐅᓯᕚᓪᓕᑲᓐᓂᕐᓗᒋᑦ ᐱᔪᒪᓂᖏᑦ, ᓴᖅᑭᔮᖅᑎᑦᑎᓂᖅ ᐊᑐᓕᖅᑎᑕᐅᓂᖏᓐᓂ, ᐊᒻᒪᓗ ᐃᑲᔪᖅᑐᐃᓂᖅ.
ᐃᓄᐃᑦ ᐱᖃᑕᐅᓛᖅᑐᑦ ᖃᓄᐃᓘᕐᓂᐅᔪᒥᑦ ᐊᑎᓕᒃ “ᐱᖓᓐᓇᖅᐸᓯᖓᓐᓂ ᐅᑭᐅᖅᑕᖅᑐᒧᑦ: ᓄᓇᖃᖅᑳᖅᑐᒥᓃᑦ ᖃᐅᔨᓴᓂᖏᑦ ᐊᒻᒪᓗ ᓯᕗᓕᖅᑎᖏᑦ ᓯᓚᒥ ᐅᓪᓗᒥᓕᓴᐅᔪᓂᒃ ᐃᓕᑦᑐᓯᕐᒥᓪᓗ” ᑏᓰᑉᐱᕆ 5−ᒥ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐃᔅᓯᕙᐅᑕᖓ ᑕᓕ ᓵᒻᐳ ᑐᕈ ᓂᓪᓕᐊᓛᕐᒥᔪᖅ, ᐊᒻᒪᓗ ᐃᓅᓱᑦᑐᓂᑦ ᐊᓛᔅᑲᒦᓐᖔᖅᓯᒪᔪᒥᑦ ᑲᓇᑕᒥᓗ.
ᐅᑭᐅᖅᑕᖅᑐᒥ ᖃᓄᐃᓘᕐᓂᐅᓛᕐᒥᔪᖅ ᓄᓇᖃᖅᑳᖅᑐᒥᓃᓐᖔᕐᓗᑎᑦ ᑕᑯᓐᓈᑎᑦᑎᓗᑎᑦ COP25−ᒥᑦ. ᑕᒪᓐᓇ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᖃᓄᐃᓘᖅᑎᑦᑎᓗᑎᑦ ᑕᐃᑲᓂ ᑲᑎᕝᕕᐅᕙᑦᑐᓂᑦ ᐃᓅᓱᑦᑐᓂᑦ ᑭᒡᒐᖅᑐᐃᔨᓂᒃ ᑐᑦᑑᔭᖅᑐᕐᒥ ᑕᕐᕆᔭᖅᑎᑦᑎᓛᖅᑐᑦ “ᐃᒪᐃᑦᑐᒦᓕᖅᑐᒍᑦ”. ᐃᐅᕆᔪ ᓚᒡᑦ, ᑕᕐᕆᔮᔅᓴᓕᐅᖅᑎ ᓯᐸᐃᓐᒦᓛᖅᑐᖅ ᐅᖃᓚᐅᖅᑐᖅ, “ᓱᕈᓰᑦ ᖃᐅᔨᒪᒋᐊᓖᑦ ᓯᓚ ᐊᓯᔾᔨᐸᓪᓕᐊᓕᕐᓂᖓᓐᓂ ᐊᒻᒪᓗ ᐱᓪᓚᕆᐊᓘᒻᒪᑦ ᑕᐃᒫᒃ ᐃᑉᐱᒋᔭᕆᐊᖃᖅᑕᕗᑦ ᐅᕙᒍᑦ ᑭᖑᕚᕆᔭᐅᔪᒍᑦ ᐊᒻᒪᓗ ᐊᓯᔾᔩᔪᓐᓇᕋᑦᑕ ᓯᓚᕐᔪᐊᒥ. ᐅᑉᐱᕆᔭᐅᓐᖏᑐᐃᓐᓇᕆᐊᖃᕋᓗᐊᖅᑐᒋᑦ, ᑭᓯᐊᓂᓕ ᐅᕙᒍᑦ ᓴᓐᖏᓂᖃᕐᒥᔪᒍᑦ ᖃᓄᐃᓘᕋᓱᒍᓐᓇᖅᑐᒍᑦ.”
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᓯᕗᓕᖅᑎᖏᑦ ᓂᓪᓕᐊᓛᕐᒥᔪᑦ ᖃᓄᐃᓘᕐᓂᐅᔪᓂᒃ ᒪᑯᓂᖓᓗ ᓯᓚᕐᔪᐊᑉ ᑲᑐᔾᔨᖃᑎᒌᖏᑦᑕ ᓄᓇᓕᖏᓐᓂ ᓄᓇᖃᖅᑳᖅᑐᒥᓂᕐᓂᓪᓗ ᑎᒥᐅᔪᓂᒃ, ᒐᕙᒪᒃᑯᓪᓗ ᑲᑎᒪᔨᖏᑦ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ, ᐊᒻᒪᓗ ᓯᓚᕐᔪᐊᒥ ᓯᓚᓕᕆᔩᑦ ᑲᑐᔾᔨᖃᑎᒌᖏᑦ.