ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᑦ ᑲᓇᑕᒥ / ᑯᐃᓐ ᑲᓇᑕᒥ ᓄᓇᓕᕆᔨᒃᑯᑦ ᓴᓴᐃᐊᑎᖓᑦ ᐱᕙᓪᓕᐊᔪᓕᕆᔨᓄᑦ ᑐᓴᒐᔅᓴᑦ
ᐊᐃᕐᕆᓕ 20, 2022 – ᐋᑐᐋ, ᑲᓇᑕ – ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᑦ ᑲᓇᑕᒥ ᐊᒻᒪ ᑯᐃᓐ ᑲᓇᑕᒥ ᓄᓇᓕᕆᔨᒃᑯᑦ ᓴᓴᐃᐊᑎᖓᓪᓗ ᐊᓕᐊᓇᐃᒍᓱᑦᑐᑦ ᐅᖃᐅᓯᖃᕈᓐᓇᕋᒥᒃ ᑲᑐᔾᔭᐅᔪᒥᒃ ᐱᓕᕆᓂᒻᒥᒃ ᑐᕌᖅᑐᒥᒃ ᐅᔾᔨᕈᓱᓐᓂᖅᓴᐅᓂᕐᓄᑦ ᐅᑭᐅᖅᑕᖅᑐᓂ ᐃᓄᓐᓄᑦ ᐊᑲᐅᙱᓕᐅᕈᑎᓂᒃ ᐱᕐᔪᐊᖑᓂᖏᓐᓄᓪᓗ ᐃᓄᐃᑦ ᓄᓇᕐᔪᐊᕐᒥ ᐃᑲᔫᑕᐅᓗᑎᒃ ᐱᑦᓯᐊᓕᕐᓂᕐᓄᑦ. ᑖᓐᓇ ᐱᓕᕆᓂᖅ ᐱᖃᓯᐅᔾᔨᔪᖅ ᐅᓂᒃᑳᓕᐊᓂᒃ ᑲᓇᑕᒥ ᓄᓇᓕᕆᓂᕐᓄᑦ ᐅᖃᓕᒫᒐᒻᒥ, ᐃᓄᒋᐊᑦᑐᓂ ᐅᖃᐅᓯᖃᕐᓂᓐᓄᑦ, ᐃᓕᓐᓂᐊᕈᑎᓄᑦ ᑐᓴᖅᑎᑦᓯᓇᓱᓐᓂᕐᓄᓪᓗ, ᐅᓂᒃᑳᖅᑐᓪᓗ ᑕᕐᕆᔭᓕᐊᖑᔪᖅ
“ᑭᒡᒐᖅᑐᖅᑐᒋᑦ ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᑦ ᑲᓇᑕᒥ ᐊᓕᐊᓇᐃᒍᓱᑦᑐᖓ ᐅᖃᐅᓯᕆᔪᓐᓇᕋᒃᑯ ᑲᑐᔾᔨᖃᑎᒌᓐᓂᖅ ᑎᒥᑦᓯᓐᓄᑦ ᓴᖅᑭᔮᖅᑎᓪᓗᒋᑦ ᐱᕐᔪᐊᖑᓂᖓ ᐃᓄᐃᑦ ᓂᐱᖏᑕ ᓄᓇᕐᔪᒻᕐᒥ ᐊᐅᓚᔾᔪᓯᕐᓄᑦ. ᑯᐃᓐ ᑲᓇᑕᒥ ᓄᓇᓕᕆᔨᒃᑯᑦ ᓴᓴᐃᐊᑎᖓᑦ ᑐᓴᐅᒪᑎᑦᓯᓯᒪᔪᑦ ᑲᓇᑕᒥᐅᓂᒃ 1929ᒥᓂᑦ ᑲᓇᑕᐅᑉ ᒥᔅᓵᓄᑦ ᐊᖏᖅᓯᒪᓪᓗᑎᓪᓗ ᓂᐱᖅᑯᖅᑎᑦᓯᓂᖅᓴᐅᔪᒪᓪᓗᑎᒃ ᐃᓄᐃᑦ ᓂᐱᖏᓐᓂᒃ. ᑖᓐᓇ ᑲᑐᔾᔨᖃᑎᒌᓐᓂᖅ ᓴᖅᑭᔮᖅᑎᑦᓯᔪᖅ ᐃᓄᓐᓂᑦ ᐱᒋᐊᖅᑐᓄᑦ ᐱᑦᓯᐊᓕᕐᓂᕐᓄᑦ ᖃᓄᐃᒋᐊᕐᓂᕐᓄᑦ ᑲᓇᑕᐅᑉ ᐃᓗᐊᓂ, ᐱᕈᖅᓗᓂᓗ ᑲᑎᒪᓂᕐᓂᑦ ᐱᓕᕆᔨᓂᑦ ᑎᒥᑦᓯᓐᓂᑦ ᖃᖓᒧᑦ. ᑲᑎᒪᔨᕗᑦᑕᐅᖅ ᑖᓐᓇ ᐱᓕᕆᓂᖅ ᐊᓕᐊᓇᐃᒍᓱᑦᓯᐊᖅᑐᑎᒃ ᐱᓕᕆᓯᒪᕗᑦ, ᐃᑉᐱᒍᓱᑦᑐᒍᓪᓗ ᐱᕚᓕᐅᕈᑎᒋᓂᐊᕋᑦᓯᒍᑦ ᑕᒪᒃᑮᑦᓯᓐᓄᑦ. ᖁᔭᒋᕙᕋ ᓂᖅᓱᕐᓇᕐᓂᕐᔪᐊᖓ ᐃᑲᔪᕐᒪᑦ ᑖᔅᓱᒥᖓ ᐱᓕᕆᓂᕐᒥᒃ.” ᐅᖃᖅᑐᖅ ᒫᓂᑲ ᐃᐊᓪ-ᑲᓇᔪᖅ, ᐊᖓᔪᖅᑳᖅ, ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᑦ ᑲᓇᑕᒥᒃᑯᓐᓄᑦ.
“ᑯᐃᓐ ᑲᓇᑕᒥ ᓄᓇᓕᕆᔨᒃᑯᑦ ᓴᓴᐃᐊᑎᖓᑦ ᐊᖏᖅᓯᒪᓪᓚᒋᑦᑐᑦ ᐊᑐᕐᓂᕐᓄᑦ ᐅᑉᐱᕆᔭᐅᔪᓂᒃ ᐱᑦᓯᐊᓕᕐᓂᕐᓄᑦ ᓇᐅᒃᑯᓕᒫᖅ ᐱᓕᕆᓂᑦᓯᒍᑦ. ᐃᓕᓴᕆᓪᓚᑦᑖᕐᓗᒍ ᐱᓕᕆᔭᕗᑦ – ᑲᓇᑕ ᖃᐅᔨᒪᔭᐅᑦᓯᐊᓕᖅᑎᓪᓗᒍ ᑲᓇᑕᒥᐅᓄᑦ ᓄᓇᕐᔪᐊᕐᒥᐅᓄᓪᓗ – ᓂᐱᖅᑯᖅᑐᓯᒋᐊᕆᐊᖃᖅᑕᕗᑦ ᐃᓄᐃᑦ ᓂᐱᓪᓚᑦᑖᖏᑦ ᐊᑦᑐᐊᔪᓄᑦ ᖃᐅᔨᒪᔭᖏᓐᓄᑦ ᐃᓄᐃᑦ ᓄᓇᖓᓂᒃ ᐊᐅᓚᑦᓯᓂᕐᓄᓪᓗ ᐊᑐᖅᑕᐅᓪᓗᓂ ᑐᕌᕈᑕᐅᓪᓗᓂ ᓇᒻᒥᓂᖅ ᖃᓄᐃᒋᐊᖅᑕᑦᓯᓐᓄᑦ, ᑲᓇᑕᒥᐅᓕᒫᓄᓪᓗ, ᖃᓄᐃᓕᐅᕋᓱᑦᓯᓪᓗᑕ ᓱᒃᑲᐃᓪᓕᑎᓐᓇᓱᑦᑐᒍ ᓯᓚᐅᑉ ᐊᓯᔾᔨᕐᓂᖓ ᐳᔪᓂᓪᓗ ᓯᓚᓄᑦ ᖃᓄᐃᒋᐊᕐᓗᑕ. ᑲᑐᔾᔨᖃᑎᒌᓐᓂᕗᑦ ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᑦ ᑲᓇᑕᒥ ᐱᕕᖃᖅᑎᑦᓯᔪᖅ ᑖᒃᑯᓄᓇ ᐱᕕᔅᓴᓄᑦ ᐅᐱᑦᑐᒍᓪᓗ ᓂᕈᐊᖅᑕᐅᒐᑦᑕ ᐅᑉᐱᕆᔭᐅᓪᓗᑕ ᐱᓕᕆᖃᑕᐅᓪᓗᑕ ᐃᓄᓐᓂᑦ ᑖᔅᓱᒧᖓ ᐱᓕᕆᓂᕐᒧᑦ.” ᔭᓐ ᒐᐃᒍ, ᐊᐅᓚᑦᓯᔨᓪᓗᐊᑕᖅ, ᑯᐃᓐ ᑲᓇᑕᒥ ᓄᓇᓕᕆᔨᒃᑯᑦ ᓴᓴᐃᐊᑎᖓᓄᑦ.
ᓇᓗᓇᐃᖅᓯᔪᑦ ᑲᑐᔾᔨᓂᕐᒧᑦ ᓇᓂᔭᐅᔪᓐᓇᖅᐸᒌᖅᑐᑦ ᒪᑉᐱᒐᖏᓐᓂ ᖃᖓᑦᓯᐊᖅ ᑎᑎᕋᖅᑕᐅᔪᓂ ᑲᓇᑕᒥ ᓄᓇᓕᕆᓂᕐᓄᑦ ᐅᖃᓕᒫᒐᖓᓂ, ᐅᖃᐅᓯᖃᖅᑐᑎᒃ ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᑕ ᓄᓇᕐᔪᐊᕐᒥ ᐱᓕᕆᔭᖏᓐᓂᒃ, ᖃᖓᑦᓯᐊᖑᓛᓵᒃᑯᑦᑕᐅᖅ ᐊᑐᐃᓐᓇᖏᑦᑐᖅ ᑎᑎᕋᖅᑕᐅᔪᖅ ᓄᓇᖃᖅᑳᖅᓯᒪᔪᑦ ᓂᐱᖏᓐᓄᑦ ᐅᖃᐅᓯᕆᔭᐅᓛᖑᓪᓗᓂ ᐱᒋᐊᒃᑲᓐᓂᕐᓂᖏᓐᓂᒃ ᐃᓕᖅᑯᓯᑐᖃᒃᑯᑦ ᑲᒃᑭᓯᓂᕐᓂᒃ. ᖃᖓᐅᓕᖅᑎᓪᓗᒍ 2022ᒥ, ᐱᕖᑦ ᐱᕕᖃᖅᑎᑦᓯᓕᕈᑎᒃ, ᑲᑐᔾᔨᔪᓄᑦ ᐃᓄᒋᐊᑦᑐᓄᑦ ᐅᖃᐅᓯᖃᕐᓂᖅ ᐸᓐᓇᑦᑕᐅᓯᒪᔪᖅ, ᐱᓕᕆᓕᖅᑐᑎᓪᓗ ᑕᒫᓂ ᐊᕐᕌᒍᒥ ᐸᓐᓇᓕᑦᑐᑎᒃ ᐅᓂᒃᑳᖅᑐᒥᒃ ᑕᕐᕆᔭᒥᒃ ᐅᖃᐅᓯᖃᕐᓗᓂ ᐊᑑᑎᖃᓗᐊᖅᑐᓂᒃ ᐅᑭᐅᖅᑕᖅᑐᓂ ᐃᓄᓐᓄᑦ ᐊᑲᐅᙱᓕᐅᕈᑎᓂᒃ.
“ᑖᓐᓇ ᐱᓕᕆᓂᖅ ᐊᓕᐊᓇᐃᑦᑐᐊᓗᒃ ᐃᓄᓐᓄᑦ,” ᐅᖃᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᑦ ᑲᓇᑕᒥᒃᑯᑦ ᐊᖓᔪᖅᑳᑉ ᑐᓪᓕᐊ ᓖᓴ ᑯᐳᖁᐊᓗᒃ. “ᐊᑦᑐᐃᓃᑦ ᐅᑭᐅᖅᑕᖅᑐᓂ ᑎᑭᑦᑐᑦ ᑕᕆᐅᑦ ᐊᑭᖏᓐᓂᑦ, ᓴᐳᑎᖁᓪᓗᒍᓗ ᐅᑭᐅᖅᑕᖅᑐᖅ ᐃᓄᐃᑦ ᓂᐱᖏᑦ ᑐᓴᖅᑕᐅᔭᕆᐊᓖᑦ. ᐃᓄᐃᑦ ᐅᐊᑲᓪᓚᓂᒃ ᐱᓕᕆᔪᑦ ᓄᖅᑲᖅᑎᑦᓯᓂᕐᓄᑦ ᓯᓚᐅᑉ ᐊᓯᔾᔨᕐᓂᑐᐊᖑᖏᑦᑐᒧᑦ, ᑭᓯᐊᓂᑦᑕᐅᖅ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᑦᓯᒍᑦ ᐊᓯᐅᔾᔭᐃᖅᑕᐅᓂᖏᓐᓄᓪᓗ ᐅᖃᐅᓯᕗᑦ ᑐᓂᔭᔅᓴᖃᓪᓚᑦᑐᒍᑦ ᒪᒃᑯᒃᑐᑦᓯᓐᓄᑦ, ᑲᓇᑕᒧᑦ ᓄᓇᕐᔪᐊᕐᒧᓪᓗ. ᑲᓇᑕᒥ ᓄᓇᓕᕆᔨᒃᑯᑦ ᓴᓴᐃᐊᑎᖓᑦ ᑲᑐᔾᔨᖃᑎᑦᓯᐊᕚᓪᓗᒃ ᐃᑲᔪᕐᓗᑎᒃ ᐅᓂᒃᑳᑦᓯᓐᓂᒃ ᐅᖃᐅᓯᖃᓪᓗᑎᒃ. ᑲᒪᓇᖅᑐᓂᒃ ᑲᑎᓐᓂᖃᕋᑦᑕ ᑲᑎᙵᓪᓗᑕ, ᑕᐃᒪᐃᒻᒪᑦ ᑖᓐᓇ ᑲᑐᔾᔨᖃᑎᒌᓐᓂᖅ ᓴᖅᑭᓯᒪᕗᖅ ᑕᕝᕙᙵᑦᑕᐃᓐᓇᐸᓗᒻᒥᑦ, ᐊᓕᐊᓇᐃᒍᓱᑦᑐᐊᓘᔪᖓᓗ ᐅᖃᐅᓯᕆᒐᑦᓯᒍᑦ ᐅᓪᓗᒥ, ᐃᑲᔪᖅᑕᐅᓗᑕ ᒐᕙᓄ ᔨᐊᓄᕈᒧᑦ ᑲᓇᑕᒥ.”
“ᑲᑐᔾᔨᖃᑎᒌᖏᑦ ᐃᓄᓐᓄᑦ, ᓄᓇᖃᖅᑳᖅᓯᒪᔪᓄᑦ ᒪᐃᑏᓄᓪᓗ ᐊᐅᓚᑕᐅᔪᓄᑦ ᓯᕗᒧᐊᖅᑎᓪᓗᒋᑦ ᓇᒻᒥᑎᕗᑦ, ᑲᓇᑕᒥᐅᓪᓗ, ᑐᑭᓯᓂᖅ ᐊᑑᑎᖃᑦᓯᐊᖅᑐᖅ ᑕᐃᒪᐃᓕᖅᑎᑦᓯᓂᕐᓄᑦ ᑲᓇᑕᒥ ᓄᓇᓕᕆᔨᒃᑯᑦ ᓴᓴᐃᐊᑎᖓᑕ ᐸᓐᓇᑦᓯᐊᖅᓯᒪᔪᓄᑦ ᐊᔅᓱᕉᕆᖏᑦ ᓯᕗᒧᐊᕋᓱᓪᓗᒋᑦ ᓱᓕᓂᕐᓄᑦ ᐱᑦᓯᐊᓕᕐᓂᕐᓄᑦ ᑲᓇᑕᓕᒫᒥ. ᐅᐱᑦᑐᖓ ᖁᕕᐊᓱᖃᑎᒋᒐᑦᓯᒍᑦ ᑖᓐᓇ ᑲᑐᔾᔨᖃᑎᒌᓐᓂᖅ ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᓐᓄᑦ ᑲᓇᑕᒥ,” ᓵᓖᓐ ᐱᐅᕼᐃᐊᑦ, ᐊᐅᓚᑦᓯᔨ ᐱᑦᓯᐊᓕᕐᓂᕐᓄᑦ, ᑲᓇᑕᒥ ᓄᓇᓕᕆᔨᒃᑯᑦ ᓴᓴᐃᐊᑎᖓᓄᑦ.
-30-
ᐅᖃᖃᑎᒋᔪᒃ:
ᑭᐅᕈᓪ ᓴᐃᒪᓐ ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᑦ (ᑲᓇᑕᒥ) csimon@inuitcircumpolar.com
ᑮᒐᓐ ᕼᐅᐸᓐ ᑲᓇᑕᒥ ᓄᓇᓕᕆᔨᒃᑯᑦ ᓴᓴᐃᐊᑎᖓᑦ hoban@canadiangeographic.ca (877) 786-2376 ext.138
ᑲᓇᑕᒥ ᓄᓇᓕᕆᔨᒃᑯᑦ ᓴᓴᐃᐊᑎᖓ
ᓴᖅᑭᑕᐅᔪᖅ 1929ᒥ, ᑲᓇᑕᒥ ᓄᓇᓕᕆᔨᒃᑯᑦ ᓴᓴᐃᐊᑎᖓᑦ ᑲᓇᑕᒥᒃ ᑐᓴᐅᒪᔭᐅᓂᖅᓴᐅᓕᖅᑎᑦᓯᓯᒪᔪᑦ ᑲᓇᑕᒥᐅᓄᑦ ᓄᓇᕐᔪᐊᕐᒧᓪᓗ 90 ᐊᕐᕌᒍᓄᑦ. ᖃᐅᔨᒪᔭᐅᓛᖑᓗᓂ ᑲᓇᑕᒥ ᓄᓇᓕᕆᓂᕐᓄᑦ ᐅᖃᓕᒫᒐᒧᑦ, ᓴᓴᐃᐊᑎ ᐃᑲᔪᕐᒥᔪᑦ ᑲᓇᑕᒥ ᓄᓇᓄᑦ ᖃᐅᔨᓴᕐᓂᕐᓄᑦ ᑐᓂᓯᕙᑦᑐᑎᓪᓗ ᑮᓇᐅᔭᓂᒃ ᐃᓕᓐᓂᐊᕈᑎᓄᑦ ᓯᕗᓕᖅᑎᓄᑦ ᓄᓇᓕᕆᓂᕐᓄᑦ ᖃᐅᔨᓴᕐᓂᕐᓄᑦ. ᓴᓴᐃᐊᑎᒃᑯᑦ ᓯᕗᒧᑦᑕᐅ ᐃᑲᔫᑕᐅᓗᓂ ᑲᓇᑕᒥᐅᓂᒃ ᐊᖅᑯᑎᐅᓪᓗᑎᒃ ᑲᔪᓯᑦᓯᐊᖅᑐᓄᑦ ᓯᕗᓂᕐᓄᑦ ᐱᕈᖅᓴᐃᓗᑎᒃ ᑐᑭᓯᓂᖅᓴᐅᓂᕐᓂᒃ ᑲᓇᑕᐅᑉ ᓄᓇᖏᓐᓂᒃ – ᐊᔾᔨᒌᖏᑦᑐᑦ ᐃᓄᓐᓄᑦ ᑕᐅᑐᒃᑯᓪᓗ ᓄᓇᖏᑦ – ᐱᖃᓯᐅᓪᓗᒋᑦ ᐊᓯᔾᔩᓃᑦ ᐊᑦᑐᔪᓄᑦ ᐃᓄᖏᒃ ᐊᕙᑎᓂᓪᓗ.
ICC