ᐊᐅᒡᒍᓯ 30, 2021 – ᐊᓐᑯᕆᔾ, ᐊᓛᔅᑲ – ᐃᓄᐃᑦ ᑎᓕᔭᐅᓯᒪᔪᑦ ᑭᒡᒐᑐᖅᑐᑦ ᐅᑭᐅᖅᑕᖅᑐᒥ ᓄᓇᓕᐅᔪᓂᑦ – ᐊᓛᔅᑲ, ᑲᓇᑕ, ᑲᓛᖠᑦ ᓄᓈᑦ, ᐊᒻᒪᓗ ᓱᑯᑦᑲ (ᕋᓴ) – ᐅᓪᓗᒥ ᑲᑎᒪᔪᑦ, ᓯᕗᓪᓕᖅᐹᒥ ᑲᑎᖃᑎᒌᓐᓂᐅᖃᑦᑕᓂᐊᖅᑐᓂ ᐃᓕᓐᓂᐊᓯᓐᓈᑦ ᑲᑎᒪᓂᐅᖃᑦᑕᓂᐊᖅᑐᓂ, ᐱᒋᐊᕈᑎᒋᑦᓱᒍ ᐱᕙᓪᓕᐊᑎᑦᓯᓂᕐᒥᒃ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᐆᑦᑑᑕᐅᔪᓂᑦ ᐊᑐᐊᒐᕐᓂᑦ ᐊᔾᔨᒌᑎᑦᓯᓂᕐᒨᖓᔪᒥᒃ ᐊᒻᒪᓗ ᐊᑲᐅᔪᒃᑯᑦ ᐃᓚᐅᑎᑦᓯᖃᑦᑕᓂᕐᒥᒃ ᐃᓄᖕᓂᑦ (EEE) ᐃᓄᖕᓂᑦ ᓄᓇᓕᒻᒥᐅᖑᔪᓂᒃ ᐊᒻᒪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂᒃ. ᑖᒃᑯᐊ ᐆᑦᑑᑕᐅᔪᑦ ᐊᑐᐊᒐᐃᑦ ᐊᑐᕆᐊᖃᓪᓚᕆᓐᓂᐊᕐᒪᑕ ᐱᕚᓪᓕᑎᒃᑲᓂᕐᓂᐊᕐᓗᒍ ᐃᓄᐃᑦ ᐊᐅᓚᑦᓯᒍᓐᓇᕐᓂᖏᑦ, ᐃᒫᖓᐃᕐᓂᖏᑎᒍᑦ ᑐᑭᒧᐊᓐᓂᕐᒧᑦ, ᐊᒻᒪᓗ ᓯᕗᓪᓕᐅᑎᑕᐅᔭᕆᐊᓕᑦᑎᒍᑦ ᑲᓇᑕᒥ ᐱᓕᕆᕕᑎᒍᓪᓗᑦᑕᐅᖅ ᐊᒻᒪᓗ ᓄᓇᕐᔪᐊᒥ ᑲᑎᒪᖃᑕᐅᖃᑦᑕᓂᒃᑯᑦ, ᓲᕐᓗ ᐅᑭᐅᖅᑕᖅᑐᒧᑦ ᑲᑎᒪᔨᓄᑦ ᐊᒻᒪᓗ ᑲᑐᔾᔨᖃᑎᒌᑎᒍᑦ ᓄᓇᓕᐅᔪᓄᑦ.
“ᐊᔪᐃᓐᓈᖑᒻᒪᑦ ᑭᖒᒪᔭᐅᓂᖓ ᐊᖏᔪᒥᒃ−ᐊᒥᓲᓂᖅ ᒪᓕᓪᓗᒍ ᐱᓕᕆᕕᑦᓴᓂᒃ ᖃᓄᐃᒋᐊᖃᕐᕕᖃᕈᓐᓇᖅᑐᓂᒃ ᐃᓕᖅᑐᕈᓐᓇᖅᑐᓂᓪᓗ ᑐᑭᓯᔭᐅᖁᓪᓗᒍ ᖃᓄᐃᒋᐊᕈᑕᐅᓗᑎᓪᓗ ᐊᔾᔨᒌᖏᑦᑐᑦ ᐃᓱᒫᓘᑕᐅᔪᑦ ᐊᒥᓲᓂᖏᑦ ᒪᓕᓪᓗᒋᑦ ᐃᓄᖃᕐᓂᒃᑯᑦ. ᐃᓕᑦᑐᕆᐊᖃᕐᓂᖅ ᐱᓪᓗᒍ ᐃᒪᐅᑎᖃᑦᑕᓂᒃᑯᑦ ᐊᑐᖅᑕᐅᓗᑎᓪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ ᖃᐅᔨᓴᖅᑐᓕᕆᓂᕐᒥ, ᖃᐅᔨᓴᕐᓂᕐᒥ ᓇᐅᑦᓯᑐᕐᓂᒧᓪᓗ ᐱᓕᕆᐊᓂ, ᐱᔪᓐᓇᐅᑎᖃᕐᓂᕐᓗ.” ᐅᖃᖅᑐᒥᓂᖅ ICC−ᑯᑦ ᐃᒃᓯᕙᐅᑕᖓᑦ ᓵᒻᐳ ᑐᐊᕉ.
ᑖᓐᓇ 2018 ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑲᓇᑕᒥ ICC−ᑯᑦ ᐅᑦᕿᐊᕕᒃ ᐊᖏᖃᑎᒌᒍᑦ – ᐊᖅᑯᓯᐅᕈᑕᐅᓯᒪᔪᖅ ᑎᒥᖁᑎᒋᔭᐅᔪᒧᑦ ᓄᓇᕐᔪᐊᒥ ᐱᓕᕆᖃᑎᒌᓐᓂᕐᒧᑦ ᐃᖅᑲᓇᐃᔮᕆᓗᒍ – ᑎᓕᓯᔪᖅ ICC−ᑯᑦ ᑐᑭᒧᐊᑦᑎᑦᓯᖁᓪᓗᒋᑦ ᐱᕙᓪᓕᐊᔭᐅᓗᓂ ᑖᕝᕘᓇ EEE−ᒧᑦ ᐆᑦᑑᑕᐅᔪᑦ ᐊᑐᐊᒐᐃᑦ. ᐱᕙᓪᓕᐊᓂᐊᕐᓗᒋᑦ ᐆᑦᑑᑕᐅᓂᐊᖅᑐᑦ ᐊᑐᐊᒐᐃᑦ, ICC−ᑯᑦ ᑐᑭᒧᐊᑦᑎᑦᓯᔨᐅᓂᐊᖅᑐᑦ ᐅᖃᖃᑎᒌᒍᑕᐅᔪᓂᑦ ᑖᒃᑯᓄᖓ ᐃᓄᖕᓄᑦ ᑎᓕᔭᐅᓯᒪᔪᓄᑦ ᑭᒡᒐᖅᑐᐃᓂᒃᑯᑦ ᐃᓄᐃᑦ ᓄᓈᓂ ᖃᕆᑕᐅᔭᒃᑯᑦ ᑲᑎᒪᓂᖅᑎᒍᑦ ᐃᓕᓐᓂᐊᖃᑎᒌᓯᓐᓈᑦ, ᐱᒋᐊᕐᓗᒍ ᐅᓪᓗᒥ ᑐᙵᓱᑦᑎᖃᑦᑕᐅᑎᓂᒃᑯᑦ ᑲᑎᒪᓂᕐᒥ. ᐃᓘᓐᓇᑎᑦ ᑎᓕᔭᐅᓯᒪᔪᑦ ᑭᒡᒐᖅᑐᐃᔪᑦ ᓴᙱᔪᒥᒃ ᑐᙵᕕᓖᑦ ᐃᓄᐃᑦ ᖃᐅᔨᒪᓂᖏᑎᒍᑦ ᐅᔾᔨᕈᓱᓐᓂᖏᑎᒍᓪᓗ ᐊᒃᓱᕈᕐᓇᖅᑐᓂᒃ ᐊᐳᕈᑕᐅᕙᑦᑐᓂᒃ ᐊᒻᒪᓗ ᐋᖅᑭᒋᐊᕆᒍᑕᐅᒍᓐᓇᖅᑐᓂᒃ ᓄᓇᓕᒻᒥ ᖃᐅᔨᒪᔭᐅᔪᓄᑦ, ᓄᓇᐃᑦ ᐊᕕᑦᑐᖅᑕᐅᓯᒪᓂᖏᑎᒍᑦ ᐊᒻᒪᓗ ᓄᓇᕐᔪᐊᓕᒫᒥ. ᑕᒪᓐᓇ ᐃᖅᑲᓇᐃᔮᖑᓂᖓ ᑐᓴᐅᒪᑎᑕᐅᒍᑕᐅᔪᖅ ᑲᑎᖅᓱᖅᑕᐅᓯᒪᔪᑎᒍᑦ ᐅᓂᒃᑳᓕᐊᕆᓯᒪᔪᑎᒍᑦ ᐱᒋᐊᖅᑎᑕᐅᓯᒪᔪᑦ ICC−ᑯᓐᓄᑦ. ᐅᓂᒃᑳᓕᐊᕆᓯᒪᔪᑦ ᑲᑎᑎᑦᓯᕙᑦᑐᖅ ᑐᓴᐅᒪᔾᔪᑎᒃᓴᓂᑦ ᐊᒻᒪᓗ ᑎᑎᕋᖅᓯᒪᔪᓂᑦ ᐃᓄᐃᑦ−ᓴᖅᑭᖅᑎᓯᒪᔭᖏᓐᓂᒃ ᐊᑐᐊᒐᕐᓂᑦ, ᒪᓕᒐᕐᓂᑦ, ᐱᓪᓚᕆᖁᑎᒋᔭᐅᔪᓂᑦ, ᐊᑐᐊᕆᐊᓕᓐᓂᒃ, ᐆᑦᑑᑕᐅᔪᑦ ᐊᑐᐊᒐᐃᑦ, ᐊᒻᒪᓗ ᖃᐅᔨᒪᔭᐅᔪᑦ ᑐᑭᒧᐊᒍᑎᑦᓴᐃᑦ ᖃᓄᖅ ᐊᓯᖏᑦ ᐃᓄᐃᑦ ᐃᓚᐅᑎᕆᐊᖃᕐᒪᖔᑕ ᓄᓇᓕᖁᑎᑦᑎᓐᓂ ᐊᒻᒪᓗ ᖃᐅᔨᒪᓂᑦᑎᒍᑦ.
ᐃᖅᑲᓇᐃᔮᕆᓗᐊᖅᑕᖓᑕ ᐃᓗᓕᖏᑦ ᐱᕙᓪᓕᐊᑎᑦᓯᓂᖅ ᐊᒻᒪ ᑎᑎᕋᖅᑕᐅᒋᐊᖓᕐᓂᖓᑕ ᑖᒃᓱᒪ EEE ᐆᑦᑑᑕᐅᓂᐊᖅᑐᑦ ᐊᑐᐊᒐᐃᑦ ᐱᒋᐊᖅᑕᐅᒐᔭᖅᑐᑦ ᐊᑯᓂᐅᓂᖅᓴᖅ ᒪᕐᕉᒃ ᐃᓕᓐᓂᐊᖃᑎᒌᑦᓯᓐᓈᑦ ᑲᑎᒪᓂᐅᒐᔭᖅᑑᓐᓂ ᓯᑦᑕᕝᕙᒥ ᐋᒃᑑᕝᕙᒥᓗ. ᐊᑐᓂᒃ ᐃᓕᓐᓂᐊᖃᑎᒌᑦᓯᓐᓈᑦ ᑲᑎᒪᓂᐅᒐᔭᖅᑑᒃ ᐱᖓᓱᓄᑦ ᐅᓪᓗᓄᑦ, ᐃᖃᕐᕋᑦ ᐱᖓᓱᑦ ᐅᖓᑖᓅᖏᑦᑐᖅ ᐅᓪᓗᑕᒫᑦ. ᑭᖑᓪᓕᖅᐹᖑᓗᓂ ᐅᓪᓘᒃ−ᒪᕐᕉᒃ ᑲᑎᒪᓂᐅᓗᓂ ᐸᕐᓇᑕᐅᓯᒪᔪᖅ ᓅᕙᐃᒻᕙᒥ ᕿᒥᕐᕈᓇᖅᑕᐅᓂᐊᕐᓗᑎᒃ ᐅᖃᐅᓯᐅᓯᒪᔪᓂᒃ ᐱᔭᕆᐊᖃᓪᓚᕆᑦᑐᓂᒃ ᐊᑐᕋᑦᓴᐅᔪᑦ ᐊᐅᓚᔾᔭᒋᐊᕈᑕᐅᓗᑎᒃ ᓇᓗᓇᐃᖅᑕᐅᓯᒪᔪᑦ ᐃᓕᓐᓂᐊᓯᓐᓈᑦ ᑲᑎᒪᓂᐅᖃᑦᑕᖅᓯᒪᔪᓂ ᐃᓚᓕᐅᑎᔭᐅᒐᔭᖅᑐᓂᒃ ᑎᑎᕋᖅᑕᐅᒋᐊᕐᖓᓕᖅᐸᑦ ᑖᓐᓇ EEE ᐆᑦᑑᑕᐅᔪᒃᓴᑦ ᐊᑐᐊᒐᐃᑦ.
ᑭᖑᓪᓕᐹᖑᓗᓂ ᑎᑎᕋᖅᑕᐅᓂᖓ ᑎᑎᕋᖅᓯᒪᓕᖅᑎᓪᓗᒍ ᓂᕆᐅᒋᔭᐅᔪᖅ ᑐᓂᐅᖅᑲᐅᑕᐅᒐᔭᕐᓂᖓ ᐃᓘᓐᓇᖏᓐᓄᑦ ICC−ᑯᓐᓄᑦ ᐃᓚᐅᒍᑎᓕᓐᓄᑦ ᑎᒥᐅᔪᓄᑦ ᐱᒋᐊᓕᕋᑖᖅᑎᓪᓗᒍ ᐊᕐᕌᒍ 2022 ᑕᖅᑭᓕᒫᒥᖅ ᕿᒥᕐᕈᓇᖅᑕᐅᕕᖃᕐᓗᓂ.
ᑭᖑᓪᓕᐹᖑᓗᓂ ᑎᑎᕋᖅᑕᐅᓯᒪᓕᖅᑎᓪᓗᒍ ᑐᓂᔭᐅᒍᒫᕐᓂᐊᖅᑐᖅ ICC−ᑯᑦ ᐊᐅᓚᑦᓯᔨᖏᓐᓄᑦ ᑲᑎᒪᔨᓄᑦ ᐅᐱᕐᖓᑦᓵᖓᓂ 2022 ᓈᒻᒪᒋᔭᐅᖁᓪᓗᒍ ᑐᓴᕋᑦᓴᐅᓕᕐᓗᓂᓗ ᑭᒃᑯᑐᐃᓐᓇᕐᓄᑦ ᓯᕗᖓᓂ 14−ᒋᓕᖅᑕᖓᑕ ICC−ᑯᑦ ᑲᑎᒪᓂᖃᓕᕐᒥᑉᐸᑕ. ᑖᒃᑯᐊ ᐆᑦᑑᑕᐅᔪᑦ ᐊᑐᐊᒐᐃᑦ ᐊᑑᑎᖃᕋᔭᖅᑐᑦ ᑕᐃᒃᑯᓄᖓᓕᒫᖅ ᐱᖃᑕᐅᒍᒪᔪᓄᑦ ᐃᖅᑲᓇᐃᔮᖃᕐᓂᕐᒥᒃ ᐃᓄᐃᑦ ᓄᓈᓂᑦ, ᐃᖅᑲᓇᐃᔭᖃᑎᖃᕐᓗᑎᒃ ᒥᑦᓯᖃᖅᑐᒃᑯᑦ ᑲᑐᔾᔨᖃᑎᖃᕐᓂᒃᑯᑦ ᐅᕙᑦᑎᓐᓂᑦ, ᐃᑲᔪᖅᓯᓯᒪᓂᐊᕐᒪᑦ ᐃᑲᔪᖅᑐᐃᓂᒃᑯᑦ ᐊᔾᔨᒌᑎᑦᓯᓂᕐᒨᖓᔪᒥᒃ ᐊᒻᒪᓗ ᐊᑲᐅᔪᒃᑯᑦ ᐃᓚᐅᑎᑦᓯᖃᑦᑕᓂᕐᒥᒃ ᐃᓄᖕᓂᑦ ᓄᓇᓕᒻᒥᐅᖑᔪᓂᒃ ᐊᒻᒪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂᒃ, ᐊᒻᒪᓗ ᐃᑲᔪᖅᑐᐃᑲᓐᓂᕋᔭᖅᑐᖅ ᐃᓄᐃᑦ ᐊᐅᓚᑦᓯᒍᓐᓇᕐᓂᖏᓐᓂᑦ.
ᑭᐊᓕ ᐃᓂᖑᕗᒃ
ICC (ᐊᓛᔅᑲ)
+1 907-274-9058
kelly@iccalaska.org
ᑐᑯᒻᒥᙳᐊᖅ ᓇᐃᒃᔭᐃ ᐆᓪᓴᓐ
ICC (ᑲᓛᖠᑦ ᓄᓈᑦ)
+299 323632
tukumminnguaq@inuit.org
ᑭᐅᕈᓪ ᓴᐃᒪᓐ
ICC (ᑲᓇᑕ)
+1 613 293-9728
csimon@inuitcircumpolar.com