ᐊᑦᑑᑉᐱᕆ 19, 2023 – ᕋᐃᒃᔭᕕᒃ, ᐊᐃᔅᓚᓐ (Reykjavik, Iceland) – ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ (ICC) ᐸᑦᑕᑐᖅᑐᖅ ᐊᑎᓕᐅᖅᓯᓂᖓᓐᓄᑦ ᑎᑎᖅᑲᒥᑦ ᐱᔾᔪᑕᐅᓂᐊᖅᑐᒥᑦ (LOI) ᑖᒃᑯᓂᖓ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᒻᒪᓗ ᑲᓛᖦᖡᑦ ᓄᓈᓂ ᐊᑐᓕᖁᔨᓪᓗᑎᑦ 2017−ᒥ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ (ICC) ᐊᐅᓚᑕᐅᓗᑎᑦ ᐱᑭᐊᓚᓱᕐᓱᐊ ᑲᑎᒪᔨᖏᓐᓄᑦ ᐅᓂᒃᑲᕐᒥᑦ, ᐃᓄᐃᑦ ᓂᓚᒥᐅᑕᐃᑦ ᐊᖅᑯᑎᖃᕐᓂᖏᑦ: ᓯᕗᓂᔅᓴᕗᑦ ᐱᑭᐊᓚᓱᕐᓱᐊᖅ. ᐱᑭᐊᓚᓱᕐᓱᐊᖅ ᐃᒪᐃᒦᑦᑐᑦ ᐊᑯᓐᓂᖓᓐᓂ ᐊᕙᓂᕐᓱᐊᖅ ᐊᒻᒪᓗ ᐅᐊᓐᓇᖅᐸᓯᖓᓐᓂ ᑕᑉᐹᓂ ᑲᓛᖦᖡᑦ ᓄᓈᓂ ᐊᒻᒪᓗ ᐅᐊᓐᓇᖓᓂ ᓄᓇᕗᒻᒥ ᑲᓇᑕᒥ.
ᑎᑎᖅᑲᖅ ᐱᔾᔪᑕᐅᔪᖅ ᐃᑲᔪᖅᑐᐃᓂᕐᒧᑦ ᐱᓕᕆᖃᑎᖃᖅᑐᑦ ᑖᒃᑯᐊ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᑲᓇᑕᐅᑉ ᒐᕙᒪᒃᑯᖏᑦ, ᑲᓛᖦᖡᑦ ᓄᓈᓂ ᐊᒻᒪᓗ ᑕᓐᒫᒃ (Denmark), ᐊᖅᑯᑕᐅᔪᓐᓇᕐᓗᑎᑦ ᓂᕿᔅᓴᓯᐅᖃᑦᑕᕐᓗᑎᑦ ᐊᐅᓚᑦᑎᓗᑎᓪᓗ ᐃᒪᕐᒥᑦ ᐊᒻᒪᓗ ᐊᕙᑎᕗᑦ ᐸᖅᑭᔭᐅᓗᓂ ᑕᐃᑲᓂ ᐱᑭᐊᓚᓱᕐᓱᐊᒥ, ᐊᒻᒪᓗ ᐃᖏᕐᕋᕕᐅᔪᓐᓇᑦᑎᐊᕐᓗᓂ ᐃᓄᓐᓄᑦ ᑕᒫᓃᑦᑐᓄᑦ.
ᐱᑭᐊᓚᓱᕐᓱᐊᖅ ᑲᓛᖡᓱᑦ (ᐱᖓᖕᓇᖅᐸᓯᖓ ᑲᓛᖦᖡᑦ ᓄᓈᓐᓂ) ᐊᑎᓕᒃ ᑐᑭᖃᖅᑐᓂ “ᑰᑦᑐᐊᓗᒃ”, ᐊᒻᒪᓗ ᓴᕐᕙᕐᔪᐊᖅ ᐃᓄᑦᑎᑐᑦ “ᖁᐊᕈᓐᓇᖏᑦᑐᖅ” ᕿᑭᖅᑕᒥᓗ ᐅᐊᓐᓇᖓᓂ ᓯᑯᓱᐃᑦᑐᖅ. ᑕᒪᓐᓇ ᑲᑐᔾᔭᐅᒻᒪᑦ ᐃᒪᖅ ᑲᓇᑕᒥ (ᓄᓇᕗᑦ) ᑲᓛᖦᖡᑦ ᓄᓈᓂᓗ. ᓯᑯᓱᐃᑦᑐᖅ ᑕᒪᓐᓇ ᖃᖓᓕᒫᖅ ᐅᑭᐅᒃᑯᑦ ᓯᑯᓚᐅᖅᓯᒪᓐᖏᑦᑐᖅ ᐃᒪᕕᒃ ᐃᖏᕐᕋᓂᖃᐃᓐᓇᖅᑐᓂᓗ. ᐱᐅᔪᕐᔪᐊᕌᓗᒃ ᐃᒪᖅ ᐆᒪᔪᓕᐊᓗᒃ. ᐱᑭᐊᓚᓱᕐᓱᐊᖅ ᐊᖏᓂᖅᐹᖑᖃᑕᐅᔪᖅ ᓯᑯᓱᐃᑦᑐᖅ ᐅᑭᐅᖅᑕᖅᑐᒥ ᐊᒻᒪᓗ ᐆᒪᔪᖃᕐᓂᖅᐹᖑᓪᓗᓂ ᐅᐊᓐᓇᖓᓂ ᐅᑭᐅᖅᑕᖅᑐᖓᓐᓂ ᓯᓚᕐᔪᐊᑉ.
ᐱᑭᐊᓚᓱᕐᓱᐊᖅ ᐊᓯᔾᔨᐸᓪᓕᐊᒻᒪᑦ. ᓄᓇᓖᑦ ᑕᒪᒃᑭᓐᓂᒃ ᐊᒪᕕᒻᒥ ᐅᔾᔨᕈᓱᒻᒪᑕ ᐊᓯᔾᔨᐸᓪᓕᐊᓕᖏᓐᓂ ᑕᒪᓐᓇ ᐃᓅᓇᓱᕝᕕᐅᓇᓱᑦᑐᓂᓪᓗ, ᑭᓯᐊᓂ ᐊᑐᖅᑕᐅᓂᖅᓴᐅᖃᑦᑕᓕᕐᖓᑦ ᓯᓚᓪᓗ ᐊᓯᔾᔨᐸᓪᓕᐊᓂᖓᓐᓂ.
ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ (ICC) ᐃᔅᓯᕙᐅᑕᖓ ᓯᐅᕋ ᐆᓪᔅᕕᒃ ᐅᔾᔨᕈᓱᒻᒥᔪᖅ, “ᐃᓄᐃᑦ ᖃᐅᔨᒪᔭᑐᖃᖏᓐᓂ ᑲᔪᓰᓐᓇᕐᓂᐊᖅᑐᖅ ᑐᓴᐅᒪᑎᑦᑎᖃᑦᑕᕐᓗᑐᑎᑦ ᐱᑭᐊᓚᓱᕐᓱᐊᖅ/ᓴᕐᕙᕐᔪᐊᒥᑦ. ᓄᓇᖃᖅᑳᖅᑐᒥᓃᓪᓗ ᖃᐅᔨᒪᓂᖏᓐᓂ ᐊᓯᖏᓐᓂᓪᓗ, ᐃᓄᐃᑦ ᐊᐅᓚᑦᑎᖃᑎᖃᖅᑐᑦ ᑕᒪᑐᒥᖓ, ᓇᓗᓇᐃᖅᓯᒪᓪᓗᑎᓪᓗ ᑭᓪᓕᖏᑦ. ᐱᑭᐊᓚᓱᕐᓱᐊᖅ ᐱᖅᑯᓯᑐᖄᓗᓐᓂᒃ ᐊᑐᖅᑕᐅᓯᒪᔪᖅ ᐃᓄᓐᓄᑦ, ᓯᓚᕐᔪᐊᓕᒫᒥ ᐱᐅᓂᖅᐹᖑᖃᑕᓪᓚᕆᒃ ᓲᕐᓗ ᐊᑭᓕᕋᔅᓴᐅᖏᑦᑐᖅ ᐊᑭᒥᑦ. ᐊᐅᓚᑦᑎᑦᑎᐊᕈᒪᒐᑦᑕ ᐊᑐᖅᑕᐅᖃᑦᑕᕐᓗᓂ ᑕᒪᓐᓇ ᐱᑭᐊᓚᓱᕐᓱᐊᖅ ᑭᖑᕚᑦᑎᓄᑦ ᐊᕗᖔᓗᓪᓗ. ᓯᕗᒧᐊᑉᐸᓪᓕᖓᖏᓐᓇᕐᓗᑕ ᐃᖏᕐᕋᕕᐅᖃᑦᑕᕐᓗᓂ ᐃᓄᓐᓄᑦ ᖁᕕᐊᒋᔭᐅᑦᑎᐊᕐᓗᓂᓗ ᐃᓄᐃᑦ ᓄᓇᖓᓐᓂ ᐊᒻᒪᓗ ᐃᓚᒌᓐᓄᑦ ᐊᑦᑐᐊᑏᓐᓇᕐᓗᒍᑦ ᐱᖅᑯᓯᑦᑎᓄᓪᓗ”. ᑕᒪᓐᓇ ᐊᔾᔨᐅᖏᒻᒪᑦ ᒪᑭᒪᔾᔪᑕᐅᔪᓐᓇᖅᑐᖅ ᐅᕙᑦᑎᓐᓄᑦ ᓴᓐᖓᑎᒃᑲᓂᕐᓗᒋᓪᓗ ᐃᓄᐃᑦ ᑎᒍᒥᐊᕈᓐᓇᕐᓂᖏᑦ ᐃᒪᕐᒥ ᐱᐅᖅᓱᐊᕐᓗᑎᑦ ᓄᑖᓂᓪᓗ ᐱᓇᓱᐊᕐᓗᑎᑦ ᑲᑐᔾᔨᖃᑎᖃᕐᓗᑎᑦ ᐃᓄᓐᓄᑦ ᐃᒪᑦᑎᓐᓂ ᐊᐅᓚᑦᑎᓂᒃᑯᑦ ᓯᕗᓂᑦᑎᓄᓪᓗ ᐱᕕᔅᓴᖅᑕᖃᐃᓐᓇᕐᓗᓂ.”
ᐅᓛᔪ ᐊᑭᓱ, ᐊᖏᔪᖅᑳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᑐᐃᓐᓇᐅᑎᑦᑎᓚᐅᕐᖓᑦ, ‘”ᐊᑎᓕᐅᖅᑕᐅᓪᓗᓂ ᑎᑎᖅᑲᖅ ᐱᔾᔪᑕᐅᓂᐊᖅᑐᖅ ᐊᑐᓕᖅᑎᑕᐅᓪᓗᓂᓪᓗ ᓯᕗᓪᓕᖅᐸᐅᔾᔭᐅᒍᒪᔪᑦ ᐱᐅᖅᓱᐊᖅᑕᐅᓗᓂ ᐱᑭᐊᓚᓱᕐᓱᐊᖅ ᐱᒻᒪᕆᐅᓘᒻᒪᑦ ᐱᓕᕆᖃᑎᒌᑦᑎᐊᕐᓗᑎᑦ ᐋᖅᑮᖃᑎᖃᕈᓐᓇᕐᖓᑕ ᐃᓄᐃᑦ ᐅᑭᐅᖅᑕᖅᑐᒥ. ᑲᑐᔾᔨᑦᑎᐊᕐᓗᑕ ᐱᖅᑯᓯᑐᐃᓐᓇᐅᓐᖏᑦᑐᓂᑦ ᑭᓯᐊᓂᓕ ᐊᐅᓚᑦᑎᓂᕐᒥᑦ ᐃᒪᕕᒻᒥ ᐱᐅᖏᓐᓇᖁᓪᓗᒍ ᐊᔅᓱᕈᓐᓇᖅᑐᓪᓗ ᑲᒪᒋᓇᓱᐊᖃᑦᑕᕐᓗᑎᑦ ᒪᑯᐊ ᓯᓚ ᐊᓯᔾᔨᐸᓪᓕᐊᓂᖓᓗ. ᐊᑐᓕᖅᑎᑦᑎᒋᐊᖃᕋᑦᑕ ᐊᑐᓕᖁᔭᐅᓯᒪᔪᒥᑦ 2017−ᓕᓴᕐᒥᑦ ᑲᑎᒪᔩᑦ ᐅᓂᒃᑳᖏᓐᓂ ᐃᓄᓐᓄᑦ ᐅᑭᐅᖅᑕᖅᑐᒥ ᓯᑯᓱᐃᑦᑐᒥᑦ. ᕿᑭᖅᑖᓗᒻᒥᐅᑕᐃᓪᓗ ᐃᓄᐃᑦ ᐱᐅᖅᓱᐊᕈᒪᓂᖏᓐᓂ ᐆᒪᔪᓂᒃ ᑕᒫᓂ ᐊᓗᐊᓂ ᖃᓂᒋᔭᖏᓐᓂᒥᓗ ᐱᑭᐊᓚᓱᕐᓱᐊᒥ ᐱᐅᖏᓐᓇᖁᓪᓗᒋᑦ ᐃᓗᓕᖏᑦ ᐊᒻᒪᓗ ᖃᓄᐃᖁᓇᒋ ᕿᑭᖅᑖᓘᑉ ᓄᓇᓕᖏᓐᓂ.
ᐱᑭᐊᓚᓱᕐᓱᐊᖅ/ᓴᕐᕙᔪᐊᖅ ᐱᒻᒪᕆᐅᒋᔭᐅᒻᒪᑦ ᐱᖅᑯᓯᖏᑎᒍᑦ ᐃᓄᓐᓄᑦ, ᐱᓯᒪᔭᐅᖏᓐᓇᖅᑐᓂᓗ, ᐊᐅᓚᑕᐅᓪᓗᓂᓗ, ᐊᑐᖅᑕᐅᕙᑦᑐᑎᓪᓗ ᐃᒪᖓ ᐊᑯᓂᕐᔪᐊᕌᓘᓕᖅᑐᖅ ᑕᐅᓴᖏᓐᓃᓗᐊᖅᑐᓂᒃ. “ᐱᑭᐊᓚᓱᕐᔪᐊᖅ ᐃᑎᔪᐊᓗᒻᒥᑦ ᑐᑭᖃᕆᔭᐅᒻᒪᑦ ᐃᓄᓐᓄᑦ ᓄᓇᕗᒻᒥ ᐊᒻᒪᓗ ᑲᓛᖦᖡᑦ ᓄᓈᓂᒥᐅᑕᕐᓄᑦ,” ᐅᖃᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ ᐃᔅᓯᕙᐅᑕᖓᑦᑕ ᑐᖏᓕᖓᓐᓄᑦ ᖁᐱᕐᕈᐊᓗᒻᒧᑦ. “ᑕᑎᒋᖃᑦᑕᖅᓯᒪᒐᑦᑎᒍ ᑕᐅᓴᖏᓐᓃᑦᑐᓄᑦ ᐅᑭᐅᓄᑦ ᓂᕿᔅᓴᖃᕐᕕᒋᓪᓗᑎᒍ, ᐱᖅᑯᓯᑐᖃᕆᓪᓗᑎᒍᓪᓗ, ᖃᐅᔨᒪᔭᑐᖃᕗᓪᓗ, ᐃᖏᕐᕋᕕᒋᖃᑦᑕᖅᑐᒍᓪᓗ, ᑲᑎᕝᕕᐅᖃᑦᑕᖅᑐᓂᓪᓗ ᐃᓚᒌᓐᓄᑦ. ᑕᒪᓐᓇ ᐱᒋᐊᕈᑎᒃ ᐃᑲᔪᖅᑐᐃᔪᖅ ᐃᓄᓐᓂᑦ ᓄᓇᓕᖏᓐᓂ ᐸᖅᑭᔭᐅᓗᓂ ᐊᕙᑎᕗᑦ ᐱᐅᖅᓱᐊᖅᑕᐅᓪᓗᑎᓪᓗ ᐆᒪᔪᑦ ᐊᔾᔨᒌᓐᖏᑦᑐᑦ ᑕᒫᓂ.”
“ᑖᓐᓇ ᑎᑎᖅᑲᖅ ᐱᓇᓲᑎ ᐱᒻᒪᕆᐅᒻᒪᑦ ᐃᓄᓐᓄᑦ ᐊᐅᓚᑦᑎᓂᕐᒨᖓᒻᒪᑦ ᐃᓄᐃᑦ ᓄᓇᖏᓐᓂ ᐃᑲᔪᖅᑐᕐᓗᒋᓪᓗ ᐊᑐᓕᖅᑎᑦᑎᓇᓱᐊᖅᑎᓪᓗᒋᑦ ᓯᓚᕐᔪᐊᒥ ᑲᑐᔾᔨᖃᑎᒌᓐᓂᒃ ᓇᓗᓇᐃᖅᑕᐅᓯᒪᔪᒥᑦ ᑕᒪᒃᑯᓂᖓ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᑐᒥᓃᑦ.” ᐊᑐᐃᓐᓇᐅᑎᑕᐅᔪᖅ ᐃᓄᐃᑦ ᓯᓚᕐᔪᐊᒥ ᑲᑎᒪᔨᖓᑦᑕ ᐃᔅᓯᕙᐅᑕᖓᓐᓄᑦ ᐆᓪᔅᕕᒃ.
-30-
CONTACT:
Christina Fields
ICC (Alaska)
(907) 274-9058
christina@iccalaska.org
Kuluk Lyberth
ICC (Greenland)
299 34 22 25
kuluk@inuit.org
Cassandra Elliott
ICC (Canada)
613-407-2642
celliott@inuitcircumpolar.com