ᐋᒃᑐᕙᕝ 28, 2021−ᖑᑎᓪᓗᒍ – ᐊᓐᑯᕆᔾ, ᐊᓛᔅᑲ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ICC) ᓯᕗᒃᑲᑕᕐᕕᓖᑦ ᑲᑎᒪᔭᖅᑐᖅᑐᓂᒃ ᐃᓄᖕᓂᑦ ᖃᑐᔾᔨᖃᑎᒌᑦ ᓄᓇᓕᐅᖃᑎᒌᑦ ᑲᑎᒪᔾᔪᑎᖃᓂᕆᕙᑦᑕᖓᓄᑦ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐱᓪᓗᒍ (UNFCCC) COP26 ᑲᑎᒪᓂᕐᒧᑦ ᒐᓛᔅᒍᒥ, ᓯᑳᑦᓚᓐ ᑲᑎᒪᓂᐅᒍᒫᕐᓂᐊᖅᑐᖅ ᐅᑐᐱᕆ 31 ᑎᑭᓪᓗᒍ ᓄᕕᐱᕆ 12, 2021. ᑲᑎᒪᔭᖅᑐᖅᑐᑦ ᐱᖃᓯᐅᔾᔨᔪᑦ ICC−ᑯᑦ ᐃᒃᓯᕙᐅᑕᖓ ᑕᓖ ᓴᒻᐳ ᑐᐊᕉ (ᓯᕗᓕᖅᑐᖅ ᑲᑎᒪᔭᖅᑐᖅᑐᓂᑦ), ICC−ᑯᑦ ᑲᓇᑕᒥ ᐊᖓᔪᖅᑳᑉ−ᑐᒡᓕᐊ (ᓄᓇᕐᔪᐊᒥ) ᓖᓴ ᖁᐱᕐᕈᐊᓗᒃ, ᑲᓇᑕᒥ ᐃᓄᐃᑦ ᐃᓅᓱᑦᑐᓄᑦ ᑲᑎᒪᔩᑦ (NIYC) ᐊᖓᔪᖅᑳᖅ ᐳᕋᐃᓐ ᐸᑦᑐᓪ, ᐃᓄᐃᑦ ᐃᓄᑐᖃᐃᑦ, ᓄᓇᓕᐅᖃᑕᐅᔪᑦ, ᐊᒻᒪᓗ ᐃᓅᓱᑦᑐᑦ ᐊᓛᔅᑲᒦᙶᖅᓯᒪᔪᑦ, ᑲᓇᑕᒥᒃ, ᐊᒻᒪᓗ ᑲᓛᖡᑦ ᓄᓈᓂᒃ.
“ᐃᓄᐃᑦ ᐅᓗᕆᐊᓇᖅᑐᒦᓕᕐᒪᑕ ᐊᑑᑎᓕᖅᓱᑎᓪᓗ ᐃᓅᓗᓂ ᑎᒥᖃᕐᓗᓂ ᑲᒪᒋᔭᐅᑦᓯᐊᖏᓂᑉᒥᒃ ᑎᒥᖃᕐᓗᓂ ᐱᔪᓐᓴᐅᑕᐅᑎᓪᓗᒍ ᐊᑦᑕᓇᖏᑦᑐᒥ ᖃᓄᐃᖏᓯᐊᖅᑐᒥᓪᓗ ᐊᕙᑎᖃᕆᐊᖃᕐᓂᕐᒥᒃ, ᐅᖃᖅᑐᒥᓂ ICC−ᑯᑦ ᐃᒃᓯᕙᐅᑕᖓ ᑕᓖ ᓴᒻᐳ ᑐᐊᕉ. “ᐅᖓᑖᓄᑦ ᐊᕐᕌᒍᑦ 30 ᐃᓄᐃᑦ ᑕᑯᓯᒪᓕᖅᐳᑦ ᐅᑭᐅᖅᑕᖅᑑᑉ ᐊᕙᑎᖓ ᓱᕋᑦᑕᐅᑎᓪᓗᒍ ᓯᓚᐅᑉ ᐊᓯᔾᔨᕐᓂᖓᓄᑦ. ᑲᑎᒪᔾᔪᑕᐅᔭᕆᐊᖃᓪᓚᕆᑦᑐᖅ ᑕᒪᓐᓇ ᓯᓚᐅᑉ ᐊᓯᔾᔨᕐᓂᖓ ᑲᑎᒪᔭᖅᑐᕐᕕᒋᔭᕗᑦ ᑎᓕᓯᕗᒍᑦ ᐃᓅᓪᓗᑕ ᑲᑎᒪᓂᕐᒥ ᑕᕝᕙᓂ ᓄᓇᕐᔪᐊᒥ ᓯᕗᓕᖅᑎᓄᑦ ᐃᑲᔪᖅᑕᐅᒍᒪᓪᓗᑕ ᐱᖓᓱᓂᒃ ᐱᔭᕆᐊᖃᓪᓚᕆᓕᖅᑐᓂᒃ ᐊᐅᓚᔾᔭᒋᐊᕐᕕᖃᕈᒪᓪᓗᑕ.”
ICC−ᑯᑦ ᐱᕙᒌᔭᖅᓯᒪᕗᑦ COP26 ᐃᓂᓪᓚᒍᑕᐅᓗᓂ ᐸᐃᑉᐹᒥ ᑎᑎᕋᕐᕕᒋᓯᒪᔪᒥᒃ ᐱᖓᓱᓂᒃ ᐊᐅᓚᔾᔭᒋᐊᕐᕕᐅᖁᔭᐅᔪᓂᑦ ᑲᑎᓪᓗᒋᑦ “ᐱᓕᕆᔾᔪᑎᒃᓴᓂᒃ ᐊᑐᕋᒃᓴᓂᒃ ᑭᙴᒪᔭᐅᔪᓂᒃ ᓴᐳᑎᒍᒪᓗᒍ ᐅᑭᐅᖅᑕᖅᑐᖅ”. ᐃᓄᐃᑦ ᐃᑲᔪᖅᑕᐅᒍᒪᔪᑦ ᓄᓇᕐᔪᐊᒥ ᓯᕗᓕᖅᑎᓄᑦ ᐃᒪᐃᖁᓪᓗᒋᑦ:
- ᐱᒋᐊᕐᓗᑎᒃ ᐊᔪᐃᓐᓇᕐᕕᒋᓗᒍᓗ ᖃᑦᓱᕐᔫᒥᑎᓪᓗᒍ ᓄᓇᕐᔪᐊᑉ ᓂᕈᒥᑦᓯᕙᓪᓕᐊᓂᖓ.
- ᐅᒃᐱᕆᓗᒋᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖓ ᐊᒻᒪᓗᓯᕗᓕᕈᓐᓇᕐᓂᖏᑦ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐱᓪᓗᒍ ᑲᒪᒍᓐᓇᓂᒃᑯᑦ ᐃᑲᔪᖅᑐᖅᑕᐅᓗᓂᓗ ᓄᓇᖃᖅᑳᖅᓯᒪᔪᑦ ᐱᖃᑕᐅᖃᑦᑕᕐᓂᖓ ᐊᐅᓚᑦᓯᓂᒃᑯᑦ ᓯᓚᒥᒃ.
- ᐃᓕᑕᕆᒋᑦ ᐃᒪᕖᑦ ᐊᒻᒪᓗ ᐃᒪᐃᑦ ᖁᐊᖑᐃᓐᓇᖅᑐᑦ ᓂᒡᓚᓱᑦᑐᒧᑦ ᑐᐊᕕᕐᓇᖅᑐᒦᓕᕐᓂᖏᓐᓂᒃ ᓴᐳᑎᔭᐅᔭᕆᐊᓖᑦ ᓇᒻᒥᓂᖃᖃᑕᐅᓗᑎᒃ ᐱᓕᕆᖃᑕᐅᓂᒃᑯᑦ ᐃᓄᐃᑦ.
“ᐃᓅᓯᕆᖃᓯᐅᑎᑦᓱᒍ ᓯᓚᐅᑉ ᐊᓯᔾᔨᕐᓂᖓ ᐊᑐᖅᑎᓪᓗᒍ ᓱᓕᔫᕗᑦ ᐊᕐᕌᒍᒐᓴᓐᓄᑦ. ᕿᑎᖅᐸᓯᐊᓂ – ᐅᑐᐱᕆᒥ ᓄᓇᓐᓃᓚᐅᖅᓯᒪᒐᒪ, ᐳᕕᕐᓂᖅᑐᒥ, ᐅᑭᐅᖅᑕᖅᑐᖓᓂ ᑯᐸᐃᒃ. ᐊᐳᑎᑕᖃᔪᖏᑦᑐᖅ, ᓯᑯᕙᓪᓕᐊᔪᖃᕋᓂᓘᓐᓃᑦ. ᐱᖅᓯᕋᔪᒃᑲᓗᐊᕐᒪᑦ ᐊᐳᑎᑕᖃᖅᓱᓂᓗ ᐃᓄᐃᓪᓗ ᐅᑕᖅᑭᓯᐊᖅᓱᑎᒃ ᓯᒃᑯᑦᓰᔪᑦ ᐊᐅᓪᓚᖃᑦᑕᕐᕕᒋᓂᐊᓕᕐᒥᒐᒥᐅᒃ ᓯᑯᑉᐸᑦ,” ᐅᖃᖅᑐᒥᓂᖅ ICC−ᑯᑦ ᑲᓇᑕᒥ ᐊᖓᔪᖅᑳᑉ−ᑐᒡᓕᐊ (ᓄᓇᕐᔪᐊᒥ) ᓖᓴ ᖁᐱᕐᕈᐊᓗᒃ. “ᓄᓇᕐᔪᐊᒥᐅᑦ ᐊᑑᑎᓕᖅᑐᑦ ᖃᓄᖅ ᑐᑭᖃᕐᒪᖔᖅ ᖃᐅᔨᓪᓗᑎᒃ ᐃᓅᓯᖃᕆᐊᒃᓴᖅ ᓯᓚᐅᑉ ᐊᓯᔾᔨᕐᓂᖓ ᐊᑐᖅᑎᓪᓗᒍ. ᑕᕝᕙᓂ ᐊᕐᕌᒍᒥ ᐃᓄᐃᑦ ᐅᓕᕕᔾᔪᐊᒃᑐᓂ ᐊᑑᑎᓯᒪᓕᖅᑐᑦ ᐃᐅᕈᒻᒥ ᐊᐃᓴᒥᓗ, ᐃᑯᐊᓚᔪᑦ ᑲᓇᑕᒥ, ᕋᓴᒥ, ᐊᒻᒪᓗ ᒥᐊᓕᒐᐃ ᓄᓇᖏᓐᓂ, ᐸᓂᖅᑐᖅᓯᐅᑐᓪᓗ ᐳᕋᔨᐅᓪᒥ ᒫᑕᒑᔅᑲᒥᓗ.”
ᐅᖓᑖᓃᓕᖅᑐᑦ ᐊᕐᕌᒍᑦ ᖁᓕᑦ 2009−ᒥ ᓯᓚᐅᑉ ᐊᓯᔾᔨᕐᓂᖓ ᐱᓪᓗᒍ ᑲᑎᒪᓂᕐᒥ COP15, ᐃᓄᖕᓂᑦ ᓂᐱᖃᖅᑎᑦᓯᔪᖅ ᓰᓚ ᕗᐊᑦ−ᑯᓘᑦᑎᐊ ᐅᖃᐅᓯᖃᖅᑐᒥᓂᖅ ᐅᑭᐅᖅᑕᖅᑐᖅ ᓇᓗᓇᐃᒃᑯᑕᐅᒋᐊᖓᓂᒃ ᓯᓚᕐᔪᐊᓕᒫᒥᒃ. ᐅᑭᐅᖅᑕᖅᑐᖅ ᐅᓗᕆᐊᓇᖅᑐᒦᓕᕇᖅᓯᒪᔪᖅ ᖃᐅᔨᒪᒋᐊᑦᓯᐊᖁᔨᑦᓱᓂᓗ , ᐃᒫᖓᐃᖅᓱᓂᓗ ᑕᒪᑐᒪ ᒥᒃᓵᓄᑦ ᐊᓯᔾᔨᕐᓂᖅ ᐱᓪᓗᒍ. ᐅᖃᕆᐊᕈᑎᒋᑦᓱᒍ “ᓴᐳᑎᒍᑦᑎᒍ ᐅᑭᐅᖅᑕᖅᑐᖅ, ᓴᐳᔾᔨᕗᒍᑦ ᓄᓇᕐᔪᐊᒥᒃ.”
ᐃᓄᐃᑦ ᐃᓅᓱᑦᑐᑦ, ᑕᐃᒫᑦᓴᐃᓐᓇ ᐃᓅᓱᑦᑐᑦ ᓄᓇᕐᔪᐊᒥ ᑕᐃᒪᐃᒻᒪᑕ, ᒫᓐᓇᐅᓕᖅᑐᖅ ᓇᓗᓇᖅᑐᒥᒃ ᓯᕗᓂᒃᓴᖃᓕᖅᑐᑦ. “ᐅᖃᐅᓯᑐᐃᓐᓇᐅᖏᑦᑐᓂᒃ ᑭᖒᒪᑦᓯᓕᕋᑦᑕ,” ᐅᖃᖅᑐᒥᓂᖅ ᐳᕋᐃᓐ ᐸᑦᑐᓪ, ᐊᖓᔪᖅᑲᖅ ᑲᓇᑕᒥ ᐃᓄᐃᑦ ᐃᓅᓱᑦᑐᓄᑦ ᑲᑎᒪᔨᓄᑦ (NIYC). “ᐅᑭᐅᖅᑕᖅᑐᖅ ᖃᐅᔨᒪᔭᕗᑦ ᐊᕐᕌᒎᒐᓴᓗᓐᓄᑦ ᐊᓯᐅᕙᓪᓕᐊᓕᕐᒪᑦ ᐊᐅᔪᐃᑦᑐᑦ ᒪᖒᒪᓕᕐᓂᖏᓐᓄᑦ ᓯᑰᓗ ᐊᐅᓴᖃᐃᓕᕐᓂᖓᓄᑦ. ᓄᓇᕗᑦ ᐃᓕᑕᕐᓇᕈᓐᓃᖅᐸᓪᓕᐊᓕᕐᒪᑦ.”
ᑖᒃᑯᐊ ICC−ᑯᑦ ᑲᑎᒪᔭᖅᑐᖃᑕᐅᑎᑕᖏᑦ ᓯᓚᐅᑉ ᐊᓯᔾᔨᕐᓂᖓ ᐱᓪᓗᒍ COP26 ᓯᕗᓕᕈᑕᐅᓂᐊᖅᑐᑦ ᑕᕆᐅᒥ ᐊᐅᓚᑦᓯᓂᕐᒧᑦ; ᐃᓅᓱᑦᑐᑦ ᐊᒻᒪᓗ ᐃᒡᓗᕐᔪᐊᓕᕆᓂᖅ; ᐊᒻᒪᓗ ᐃᓄᐃᑦ ᖃᐅᔨᒪᓂᖓ ᓯᓚᐅᑉ ᐊᓯᔾᔨᕐᓂᖓᓂᒃ; ᐅᑎᕐᔫᒥᑎᑦᓯᓂᕐᒥᒃ , ᐃᓕᑦᑐᕐᓂᕐᒥᒃ ᐊᒻᒪᓗ ᐋᖅᑭᒋᐊᕆᒍᓐᓇᓂᕐᒥᒃ. “ᐃᓄᐃᑦ ᐅᓐᓄᖓ” ᐱᑕᖃᖃᓯᐅᑎᒐᔭᕐᒥᔪᖅ ᓄᕕᐱᕆ 5−ᖑᓕᖅᐸᑦ ᖁᐊᖑᐃᓐᓇᖅᑐᑦ ᓂᒡᓚᓱᑦᑐᒧᑦ ᐃᓪᓗᖁᑎᖓᓂ. ᓄᓇᕐᔪᐊᒥ ᐃᓄᐃᑦ ᐅᓪᓗᖓ ᐱᒋᐊᖅᐸᑦᑐᖅ ᑲᑎᒪᓂᖃᖅᑎᓪᓗᒋᑦ COP26−ᒥᒃ ᓄᕕᐱᕆ 7−ᒥ. ᐅᓪᓗᓕᒫᒥᒃ ᐃᖅᑲᐅᒪᒃᓯᓃᑦ ᐊᑑᑎᑎᑕᐅᒐᔭᖅᑐᑦ ᓯᑐᕌᔅᑲᓚᐃᑦ ᓯᓚᑦᑐᓴᕐᕕᔾᔪᐊᖓᓂ ᐊᒻᒪᓗ ᐃᑲᔪᖅᑐᖅᑕᐅᓪᓗᓂ ᓯᒃᑳᓯᒃᑯᑦ ᒐᕙᒪᖓᓄᑦ. ᑕᕐᕆᔮᒃᓴᓕᐊᒥᓂᖅ “ᑭᖑᓪᓕᖅᐹᖅ ᓯᑯ”, ᐊᒻᒪᓗ “ᐊᑑᑎᓕᖅᑕᕗᑦ” ᑕᑯᑦᓴᐅᑎᑕᐅᒍᒫᕐᓂᐊᖅᑐᖅ, ᐱᖅᑯᓯᕐᒧᖓᔪᓪᓗ ᓱᕈᓘᔭᕐᓂᑦ ᐸᕐᓇᑕᐅᓯᒪᓪᓗᑎᒃ.
ICC−ᑯᑦ ᓯᕗᓕᖅᑎᖏᑦ ᐊᒻᒪᓗ ᐃᓚᒋᔭᐅᔪᑦ ICC−ᑯᓐᓄᑦ ᑲᑎᒪᔭᖅᑐᖅᑐᑦ ᐱᖃᑕᐅᓛᕐᒥᔪᑦᑕᐅᖅ ᐊᒥᓱᓂ ᐱᓕᕆᓂᕐᓂ, ᐱᖃᓯᐅᑎᑦᓱᒋᑦ ᓄᓇᓕᒻᒥ ᓄᓇᓖᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᐅᖃᕐᕕᖃᖅᑎᑕᐅᓂᖓ ᑲᑎᒪᓂᕐᒥ (LCIPP) ᑐᑭᒧᐊᑦᑎᑦᓯᓂᕐᒧᑦ ᐱᓕᕆᖃᑎᒌᑦ, ᑲᓇᑕᒥ ᐃᐊᒻᐸᓯᒃᑯᑦ, ᓴᓗᒪᔪᒥᒃ ᐆᒻᒪᖅᑯᑎᖃᕐᓂᕐᒧᑦ ᑲᑐᔾᔨᖃᑎᒌᑦ, ᓄᓇᕐᔪᐊᒥ ᐆᒪᔪᓕᕆᔨᕐᔪᐊᒃᑯᑦ, ᐊᒻᒪᓗ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐱᐅᖅᓱᐊᖅᑕᐅᒋᐊᖃᕐᓂᖏᓐᓂᒃ ᐅᑭᐅᖅᑕᖅᑐᒥ ᐱᕈᖅᑐᐃᑦ ᐊᒻᒪᓗ ᐆᒪᔪᑦ ᐱᓪᓗᒋᑦ (CAFF) ᐱᓕᕆᖃᑎᒌᑦ.
-30-
ᖃᐅᔨᒋᐊᕐᕕᒃᓴᑦ:
ᑭᐊᓕ ᐃᓂᖑᕗᒃ ICC (ᐊᓛᔅᑲ) +1 907-274-9058 kelly@iccalaska.org
ᑐᑯᒻᒥᙳᐊᖅ ᓇᐃᒃᔭᐃ ᐆᓪᓴᓐ ICC (ᑲᓛᖦᖡᑦ ᓄᓈ) +299 323632 tukumminnguaq@inuit.org
ᓯᑏᕙᓐ ᕼᐃᐊᓐᑐᕆ ICC (ᑲᓇᑕ) +1 613 668-1923 type88@post.com