ᐊᐅᒡᒍᓯ 27, 2021 – ᐊᓐᑯᕆᔾ, ᐊᓛᔅᑲ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ (ICC−ᑯᑦ), ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ (ITK−ᑯᑦ) ᑲᓇᑕᒥ, ᑲᑐᔾᔨᕕᖃᖅᓱᑎᒃ ᑐᓂᓯᓯᒪᕗᑦ ᑖᒃᑯᓄᖓ ᑲᑐᔾᔨᖃᑎᒌᑦᑐᓄᑦ ᓄᓇᓕᐅᔪᓄᑦ ᐱᔭᕆᐊᖃᓪᓚᕆᑦᑐᑦ ᐱᓪᓗᒋᑦ (UNSR) ᐃᓄᐃᑦ ᑎᒥᖃᖅᑐᑦ ᐱᔪᓐᓇᐅᑎᖓ ᐊᑐᖅᓱᒍ ᐃᒥᑦᓯᐊᕙᖕᒥᒃ ᐃᒥᕋᑦᓴᖅᑕᖃᑦᓯᐊᕆᐊᖃᕐᓂᖅ ᐱᓪᓗᒍ ᐊᒻᒪᓗ ᓴᓗᒪᔪᒦᒋᐊᖃᕐᓂᖅ. ᑐᓂᔭᐅᔪᑦ ᐱᖃᓯᐅᑎᓯᒪᓪᓗᑎᒃ ᓯᑕᒪᓂᒃ ᓯᕗᓪᓕᐅᑎᑕᐅᔪᓂᒃ ᐊᑐᓕᖁᔭᓕᐊᖑᓯᒪᔪᓂᒃ ᐱᒋᐊᖅᑕᐅᑦᓴᐅᑎᒋᖁᓪᓗᒋᒃ ᐋᖅᑭᒋᐊᖅᑕᐅᓂᖏᑦ ᐊᑐᖅᑕᐅᕙᑦᑐᑦ ᐊᒥᓱᑦ ᓯᖁᑦᑎᕋᑦᓴᑐᐃᓐᓇᐃᑦ ᐃᓂᒋᔭᐅᑎᑕᐅᔪᑦ ᐊᒻᒪᓗ ᓴᓗᒪᒐᑎᒃ.
“ᐃᓕᑕᖅᓯᓂᒃᑯᑦ ᑖᒃᑯᐊ ICC−ᑯᑦ ᑎᓕᔭᐅᔾᔪᑎᖃᖅᓯᒪᒻᒪᑕ ᓂᐱᒋᔭᐅᓗᑎᒃ ᐃᓄᐃᑦ ᐱᔪᓐᓇᐅᑎᖏᑦ ᐱᔾᔪᑎᒋᓪᓗᒋᑦ ᑲᑭᐊᑦᑐᒥᒃ ᐃᒥᖃᕆᐊᖃᕐᓂᕐᒥᒃ ᐅᕙᖓᖔᖅᓯᒪᔪᒥ 2018 ᐅᑦᕿᐊᒡᕕᒃ ᐊᖏᖃᑎᒌᒍᑦ ᑎᓕᐅᖅᐸᕗᑦ ᒐᕙᒪᐅᔪᑦ ᑲᓇᑕᒥ, ᑲᓛᖦᖠᑦ ᓄᓈᓂ, ᐊᒻᒪᓗ ᒥᐊᓕᒐᐃᑦ ᓄᓇᖓᓂ ᐱᒋᐊᑦᓴᐅᑎᒋᖁᓪᓗᒋᑦ ᑖᒃᑯᐊᓇᖓᑦ ᓯᑕᒪᓂᑦ ᐊᑐᓕᖁᔭᓕᐊᖑᓯᒪᔪᓂᒃ ᑕᕝᕙᓃᑦᑐᓂᒃ ᐅᓂᒃᑳᓕᐊᖑᓯᒪᔪᒥ ᐅᖃᖅᑐᒥᓂᖅ ICC−ᑯᑦ ᐃᒃᓯᕙᐅᑕᖓᑦ ᑕᓖ ᓴᒻᐳ ᑐᐊᕉ. “ᓱᓕᒃᑲᓐᓂᖅ, ᑖᓐᓇ 2011 ICC−ᑯᑦ ᐊᖏᖃᑎᒌᒎᑎᖓᑦ ᓄᓇᒦᖔᖅᑐᓂᒃ ᐱᕙᓪᓕᐊᑎᑦᓯᓂᕐᒧᑦ ᐃᓄᐃᑦ ᓄᓈᓂ ᐅᖃᖅᓯᒪᔪᖅᑕᓕᒃ, ‘ᐅᓪᓗᒥᓯᐅᑎᑎᒍᑦ, ᖃᓄᐃᖏᓯᐊᖁᓪᓗᒋᑦ ᓄᓇᓖᑦ ᐅᑭᐅᖅᑕᖅᑐᒥ ᓴᖅᑭᑎᑦᓯᓂᒃᑰᕆᐊᖃᖅᐳᖅ, ᐊᐅᓚᑦᓯᓂᒃᑯᑦ ᐊᒻᒪᓗ ᐋᖅᑭᒋᐊᕐᓗᒋᑦ ᐱᔭᕆᐊᖃᓪᓚᕆᑦᑐᑦ ᐃᓪᓗᕐᔪᐊᖅ ᐱᓪᓗᒍ ᑭᖒᒪᔭᐅᔪᑦ…’ ᐊᓯᐊᓂᒃ ᑐᐊᕕᕐᓇᓗᐊᖅᑐᖃᖅᑑᔮᖏᒻᒪᑦ ᐃᒥᑦᓯᐊᕙᖕᒥᒃ ᐃᒥᕋᑦᓴᖅᑕᖃᑦᓯᐊᕆᐊᖃᕐᓂᐅᑉ, ᐊᒻᒪᓗ ᓴᓗᒪᑎᑦᓯᓂᕐᒧᑦ ᐃᓪᓗᕐᔪᐊᖃᕆᐊᖃᕐᓂᖅ ᐱᓪᓗᒍ ᓄᓇᓕᖁᑎᑦᑎᓐᓂ.”
ᑲᑐᔾᔨᖃᑎᒌᕝᕕᐅᓪᓗᓂ ᑐᓂᓯᔭᐅᓯᒪᔪᖅ ᑎᑎᕋᖅᑕᐅᓯᒪᓂᖓ ᒥᑦᓴᐅᑦᑐᖅ ᐊᔪᖅᓴᕐᓂᖏᓐᓂᒃ ᑖᒃᑯᐊ 211 ᓄᓇᓖᑦ ᐃᓂᖃᖅᑐᑦ ᓱᑯᑦᑲᒥ (ᕋᓴᐅᑉ ᑲᓇᓐᓇᖅᐸᓯᐊᓃᓐᓂᖅᐸᑦ), ᐅᑭᐅᖅᑕᖅᑐᖅ ᐊᓛᔅᑲ, ᐅᑭᐅᖅᑕᖅᑐᖅ ᑲᓇᑕ (ᐃᓄᕕᐊᓗᒻᒥ ᓄᓇᓖᑦ, ᓄᓇᕗᑦ, ᓄᓇᕕᒃ ᐊᒻᒪᓗ ᓄᓇᑦᓯᐊᕗᑦ), ᐊᒻᒪᓗ ᑲᓛᖦᖠᑦ ᓄᓈᑦ (ᐊᑯᑭᑦᑐᖅ). ᑎᑎᕋᖅᓯᒪᔪᑦ ᓇᓗᓇᐃᖅᓯᓯᒪᔪᑦ ᐊᒥᓱᑦ ᐱᓇᐅᓗᑕᐅᓂᖏᑕ ᓯᑕᒪᓂ ᓄᓇᓕᕐᔪᐊᓂ ᐋᖅᑭᑦᓯᐊᖅᓯᒪᖏᑦᑐᓂᒃ ᐃᒥᑦᓯᐊᕙᖕᒥᒃ ᐃᒥᖃᑦᓯᐊᖏᓐᓂᐅᑉ ᐊᒻᒪᓗ ᓴᓗᒪᖅᓴᐃᕕᐅᓗᓂ ᐃᓪᓗᕐᔪᐊᖅ, ᓇᓗᓇᐃᔭᖅᑕᐅᓯᒪᑦᓯᐊᖅᓱᑎᒃ ᑕᕝᕗᖓᖓᔪᑦ ᐃᓱᒫᓘᑕᐅᔪᑦ ᐊᑐᓂᒃ ᓄᓇᓕᕐᔪᐊᒧᑦ.
ᑖᒃᑯᐊ ᓯᑕᒪᑦ ᐊᑐᓕᖁᔭᓕᐊᖑᓯᒪᔪᑦ ᐱᖃᓯᐅᔾᔨᓯᒪᔪᑦ ᑕᕝᕙᓂ ᐃᓄᐃᑦ ᑲᑐᔾᔨᖃᑎᒌᕝᕕᒋᓪᓗᒍ ᑐᓂᓯᒪᔭᖓᓂᒃ ᑖᒃᑯᓄᖓ UNSR−ᑯᓐᓄᑦ ᐅᑯᐊᖑᔪᑦ:
- ᓄᓇᓕᕐᔪᐊᑦ ᐊᕕᑦᑐᖅᑕᐅᓯᒪᓂᒃᑯᑦ ᐊᖏᔫᑕᐅᔪᓂᒃ ᓄᑖᓂᒃ ᐃᓄᖕᓄᑦ−ᑐᕌᖓᔪᓂᒃ ᐊᑐᖏᓐᓇᓂᐊᖅᑐᓂᑦ ᓴᖅᑭᑎᑦᓯᒋᐊᖃᕐᓂᖅ ᐃᓄᐃᑦ ᓄᓇᖏᓐᓂ ᐃᒥᓕᕆᓂᕐᒧᑦ ᐊᒻᒪᓗ ᓴᓗᒻᒪᖅᓴᕐᕕᐅᓗᓂ ᐃᓪᓗᕐᔪᐊᒥᒃ ᐅᑦᑑᑕᔪᓂᓪᓗ ᐊᐅᓚᑦᓯᒍᑎᑦᓴᓂᑦ ᐱᕙᓪᓕᐊᑎᑦᓯᔪᖃᕐᓗᓂ ᓄᓇᓕᒻᒧᑦ ᓂᐅᕕᕐᓂᕐᒧᑦ ᑮᓇᐅᔭᖃᖅᑎᑦᓯᒍᑕᐅᔪᑎᒍᑦ.
- ᑖᒃᑯᐊ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐃᑲᔪᖅᓯᑲᓐᓂᕆᐊᖃᖅᐳᑦ ᐋᖅᑭᒋᐊᕈᑎᑦᓴᓂᑦ ᐋᖅᑭᒋᐊᖅᑕᐅᖁᓪᓗᒍ ᐃᒥᕐᒥᒃ ᐃᒥᖃᕐᓂᖅ ᐊᒻᒪᓗ ᓴᓗᒪᔭᕆᐊᖃᕐᓂᖓ.
- ᑖᒃᑯᐊ ᒐᕙᒪᒃᑯᖏᑦ ᑲᓇᑕᐅᑉ ᓯᕗᓪᓕᐅᑎᑦᓯᔭᕆᐊᓖᑦ ᐋᖅᑭᒋᐊᕆᒍᑕᐅᒍᒪᔪᓂᒃ ᐃᒥᓕᕆᓂᕐᒧᑦ ᐊᒻᒪᓗ ᓴᓗᒻᒪᖅᓴᐃᕕᒃᓴᐅᓗᓂ ᐃᓪᓗᕐᔪᐊᒃᓴᒥᒃ ᐃᓄᐃᑦ ᓄᓇᖓᓂ.
- ᓄᓇᓕᕐᔪᐊᑦ ᐊᒻᒪᓗ ᐸᐃᑉᐸᔾᔨᕆᓂᒃᑯᑦ ᐃᓕᓐᓂᐊᕐᕖᑦ ᓯᕗᓪᓕᐅᑎᑦᓯᔭᕆᐊᖃᖅᐳᑦ ᐊᑐᖏᓐᓇᖅᑕᐅᒍᓐᓇᖅᑐᓂᑦ ᐃᓄᖕᓄᑦ−ᓯᕗᓕᖅᑕᐅᓗᑎᒃ ᖃᐅᔨᓴᖅᑐᓕᕆᓂᖅ ᐱᔾᔪᑎᒋᓪᓗᒍ ᐃᒥᖅ ᐃᒥᕋᑦᓴᖅ ᐊᒻᒪᓗ ᓴᓗᒻᒪᖅᓴᐃᑎᒃᓴᑦ ᐃᓄᐃᑦ ᓄᓇᓕᖏᓐᓂ.
ᑖᓐᓇ ᑲᑐᔾᔨᕕᐅᑦᓱᓂ ᑐᓂᔭᐅᓯᒪᔪᖅ ᐅᖃᖅᓯᒪᔪᖅᑕᓕᒃ ᐃᒪᐃᒻᒪᑦ “ ᐃᒥᖅᑕᕕᑦᓴᖅᑕᖃᑦᓯᐊᖏᓐᓂᖅ ᐃᒥᕐᒥᒃ ᐊᒻᒪᓗ/ᐅᕝᕙᓘᓐᓃᑦ ᓴᓇᓯᒪᑦᓯᐊᖏᑦᑐᓂᒃ ᓴᓗᒪᖅᓴᐃᒍᓐᓇᖅᑐᓂᒃ ᐊᐅᓚᑦᓯᔾᔪᑎᑦᓴᖃᑦᓯᐊᖏᓐᓂᖅ ᐃᓄᖕᓄᑦ ᓯᐊᒻᒪᖃᑦᑕᓲᓂᒃ ᐋᓐᓂᐊᒍᑕᐅᒐᔪᖃᓯᐅᑎᕗᖅ ᐊᒻᒪᓗ ᖃᓂᒻᒪᓴᕋᐃᒍᑕᐅᖃᓯᐅᑎᕗ, ᐱᖃᓯᐅᑎᑦᓱᒋᑦ ᐊᓂᖅᑎᕆᓂᕐᒨᖓᔪᑦ, ᐊᒥᕐᓗᓐᓂ, ᐊᒻᒪᓗ ᓈᕐᓗᖃᑦᑕᕐᓃᑦ… ᑲᓇᑕᒥ ᐊᒻᒪᓗ ᑲᓇᑕᒥᐅᓂ ᐃᒥᖅ ᐃᒥᑦᓯᐊᕙᐅᒋᐊᖃᕐᓂᖓᑕ ᒪᓕᒐᖏᑦ, ᐱᖃᓯᐅᑎᓪᓗᒋ ᐃᒥᕐᓄᑦ ᐊᖅᑯᑕᐅᕙᑦᑐᑦ ᖃᐅᔨᓴᖅᑕᐅᖃᑦᑕᕆᐊᖃᕐᓂᖏᑦ ᐃᒥᕋᑦᓴᑦᓯᐊᕙᐅᔭᕆᐊᖃᕐᓂᖓᓂᒃ, ᓇᐅᑦᓯᑐᖅᑕᐅᕙᑦᑐᑦ ᖃᑯᑎᒃᑯᑦ ᐊᑐᖅᑎᑕᐅᓪᓗᑎᓪᓗ ᐱᓕᕆᖃᑎᒌᖕᓂᒃᑯᑦ ᑖᒃᑯᓄᖓ ᐊᔾᔨᒌᖏᑦᑐᓄᑦ ᑎᓕᔭᐅᔾᔪᑕᐅᕙᑦᑐᓄᑦ ᒐᕙᒪᐅᔪᓄᑦ. ᐊᑐᐃᓐᓇᐅᑎᑕᐅᔪᑦ ᑐᖅᑯᖅᑕᐅᓯᒪᔪᑦ ᑐᓴᒋᐊᒃᑲᓐᓂᕈᑎᑦᓴᐃᓪᓗ ᖃᓄᐃᓕᖓᓂᖓᑕ ᐃᒥᐅᑉ ᐃᒥᖅᑕᐅᕙᑦᑐᑦ ᐊᒻᒪᓗ ᓴᓗᒪᖅᓴᐃᕕᐅᓗᓂ ᐃᓪᓗᔾᔪᐊᑦ ᐃᓄᐃᑦ ᓄᓇᓕᖏᓐᓃᑦᑐᑦ ᐱᖃᓯᐅᑎᖃᓯᐅᑎᒻᒥᔪᖅᑕᐅᖅ ᐱᔪᓐᓇᕐᓂᖓᑦ ᐃᓄᐃᑦ ᐊᑐᕐᓂᖓᑕ ᐱᔪᓐᓇᐅᑎᑦᑎᓐᓂᒃ ᐃᒥᖅ ᐱᓪᓗᒍ ᐊᒻᒪᓗ ᓴᓗᒪᖅᓴᐃᕕᑦ ᐊᔾᔨᒌᑉᐸᖏᑦᑐᑦ ᓄᓇᐃᑦ ᑭᓪᓕᓕᐅᖅᑕᐅᓯᒪᓂᖏᑎᒍᑦ ᓄᓇᓖᑦ ᒪᓕᑦᓱᒋᑦ.”
ᑖᓐᓇ ᐊᑕᖏᖅᑐᖅ ᑲᑐᔾᔨᒍᑕᐅᓪᓗᓂ ᑐᓂᔭᐅᔪᖅ ᐊᑐᐃᓐᓇᐅᔪᖅ ᖃᕆᑕᐅᔭᒃᑯᑦ ᐅᕙᓂ: https://bit.ly/3sR7pVx
-30-
ᑭᐊᓕ ᐃᓂᖑᕗᒃ ICC (ᐊᓛᔅᑲ) +1 907-274-9058 kelly@iccalaska.org
ᑐᑯᒻᒥᙳᐊᖅ ᓇᐃᒃᔭᐃ ᐆᓪᓴᓐ ICC (ᑲᓛᖦᖠᑦ ᓄᓈᑦ) +299 323632 tukumminnguaq@inuit.org
ᑭᐅᕈᓪ ᓴᐃᒪᓐ ICC (ᑲᓇᑕ) +1 613 293-9728 csimon@inuitcircumpolar.com