ᒫᔾᔨ 28, 2023 – ᐋᑐᐋ, ᑲᓇᑕ − 2023ᒥ ᒐᕙᒪᑐᖃᒃᑯᑦ ᑮᓇᐅᔭᑦ ᐸᕐᓇᑦᑕᖏᑦ ᓴᖅᑭᔮᖅᑎᑦᑎᕗᑦ 7ᓂᒃ ᐊᔅᓱᕉᑕᐅᔪᓂᒃ ᑎᓕᐅᕈᑕᐅᔪᓄᑦ ᐃᓄᐃ ᐅᑭᐅᖅᑕᖅᑐᒥᐅᖃᑎᒌᓄᑦ ᑲᑎᒪᔨᖏᓐᓂᑦ (ICC) ᐸᕐᓇᑦᑕᐅᙱᑎᓪᓗᒋᑦ ᑐᓂᔭᖏᓐᓄᑦ ᑮᓇᐅᔭᓕᕆᔨᓖᑦ ᐱᓕᕆᕝᕕᖏᓐᓄᑦ ᓴᓇᔭᐅᔪᓄᑦ ᐃᓱᐊᓂ 2022.
“ᐃᓚᖓᑦ ᐊᑲᐅᙱᓕᐅᕈᑎᐅᑉ ᐱᓕᕆᓪᓚᔅᓯᒪᔭᕗᑦ ᐊᑦᑐᐊᔪᖅ ᓯᕗᒧᐊᖅᑎᑕᐅᓂᖏᓐᓄᑦ ᐊᑦᑕᕐᓇᖏᑦᑐᒃᑯᑦ ᐊᑭᑭᑦᑐᓄᓪᓗ ᐅᑭᐅᖅᑕᖅᑐᒥ ᐅᓯᑲᖅᑕᖅᑎᓄᑦ ᐅᒥᐊᕐᔪᐊᓄᑦ, ᑕᕆᐅᕐᓂᓗ ᐊᐅᓚᑦᑎᓂᕐᓄᑦ ᓄᓇᕐᔪᐊᕐᒧᑦ ᑕᕆᐅᕐᓂ ᑎᒥᒥ (IMO)” ᐅᖃᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥᒃᑯᑦ ᐊᖓᔪᖅᑳᖓᑦ ᓖᓴ ᖁᐱᕐᕈᐊᓗᒃ. “ᐊᓕᐊᓇᐃᒍᓱᑦᑐᖓ $162 ᒥᓕᐊᓐᑕᖃᕐᒪᑦ ᑖᒃᑯᓇᓂ ᐸᕐᓇᒃᓯᒪᔪᓂ ᓴᓇᔭᐅᓂᖓᓄᑦ ᓱᕉᖏᓐᓂᖅᓴᐅᔪᓄᑦ ᖃᓄᐃᖏᓐᓂᖅᓴᓄᓪᓗ ᑐᓚᑦᑕᕐᕕᓐᓄᑦ, ᐃᒪᐅᓪᓗ ᐃᓗᐊᓂ ᓂᐲᑦ ᐅᖃᐅᓯᕆᔭᐅᓪᓚᑦᑖᖅᑐᑎᒃ ᐃᓗᐊᓂ ᑖᔅᓱᒪ ᐱᒋᐊᕈᑎᐅᑉ ᐊᑲᐅᙱᓕᐅᕈᑎᐅᓪᓗᓂᓗ ᐱᕐᔪᐊᖑᓪᓗᓂ ᐃᓄᓐᓄᑦ ᐊᖑᓇᓱᑦᑎᓄᑦ ᐊᑦᑐᐃᓂᖏᓐᓄᑦ ᑕᕆᐅᕐᒥᐅᓄᑦ ᓂᕐᔪᑎᓄᑦ.”
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥᒃᑯᑦ ᑎᓕᐅᕆᓚᐅᕐᒥᔪᑦ ᑲᔪᓰᓐᓇᖅᑐᒃᑯᑦ ᐃᑲᔪᕐᓂᕐᓄᑦ ᓯᓚᐃᑦ ᐊᓯᔾᔨᕐᓂᖏᓐᓄᑦ ᖃᓄᐃᓕᐅᖅᑐᓄᑦ ᑐᕌᓪᓗᐊᑕᖅᑐᓄᑦ ᐊᑦᑐᐊᔪᓄᑦ ᐅᑭᐅᖅᑕᖅᑐᒧᑦ ᐱᖃᓯᐅᓪᓗᒋᑦ ᑭᒡᒐᖅᑐᐃᔨᖃᕐᓗᑎᒃ ᑲᑐᔾᔨᔪᑦ ᒐᕙᒪᖃᑎᒌᖏᑦᑐᑦ ᑐᙵᕕᐊᓄᑦ ᑲᑎᓐᓂᕐᓄᑦ ᓯᓚᐃᑦ ᐊᓯᔾᔨᕐᓂᖏᓐᓄᑦᑯᓐᓂ (UNFCCC) ᒐᕙᒪᖃᑎᒌᖏᑦᑐᓂᓪᓗ ᑲᑎᒪᔨᓂᑦ ᓯᓚᐃᑦ ᐊᓯᔾᔨᕐᓂᖏᓐᓄᑦ (IPCC).
“ᐊᓕᐊᓇᐃᒍᓱᓚᐅᖅᑐᖓ ᑲᑎᖃᑎᒋᔪᓐᓇᕋᒃᑯ ᐊᕙᑎᓕᕆᓂᕐᓄᑦ ᒥᓂᔅᑐ ᓯᑏᕙᓐ ᒋᐅᓪᐳᓪ ᒪᕐᕉᓐᓂ ᑭᖑᓪᓕᖅᐹᖕᓂ ᑲᑐᔾᔨᔪᑦ ᒐᕙᒪᖃᑎᒌᖏᑦᑐᑦ ᓯᓚᐃᑦ ᐊᓯᔾᔨᕐᓂᖏᓐᓄᑦ ᑲᑎᓐᓂᕐᓂ ᔅᑳᑦᓚᓐᒥ ᐄᔨᑉᑦᒥᓗ,’ ᐅᖃᖅᑐᖅ ᐊᖓᔪᖅᑳᖅ ᖁᐱᕐᕈᐊᓗᒃ. “ᖃᔅᓯᑲᓪᓚᓐᓂᒃ ᖃᓄᐃᒋᐊᕐᓂᓕᒃ ᑕᕝᕙᓂ ᑮᓇᐅᔭᓂ ᐸᕐᓇᑦᑕᐅᓯᒪᔪᓂ ᓵᑦᑎᔪᓂᒃ ᐳᔫᖏᓐᓂᖅᓴᐅᓂᕐᓂᒃ, ᐋᖅᑭᒋᐊᕐᓂᕐᓂᒃ ᓯᓚᐃᑦ ᐊᓯᔾᔨᕐᓂᖏᓐᓄᑦ, ᓄᖑᓪᓗᒋᓪᓗ ᐊᐅᑦᑕᔪᑦ ᓱᕈᐃᑦ. ᑖᒃᑯᐊ ᖃᓄᐃᒋᐊᕐᓃᑦ ᐃᑲᔪᕐᓂᐊᖅᑐᑦ ᓯᓚᐃᑦ ᐊᑦᑐᐃᓂᖏᑦ ᐊᑦᑐᐃᓗᐊᖅᑎᖏᓪᓗᒋᑦ ᐅᑭᐅᖅᑕᖅᑐᒥ.”
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥᒃᑯᑦ ᐱᓕᕆᒻᒦᔪᑦᑕᐅᖅ ᐊᑐᓕᖅᑎᑕᐅᓂᖓᓄᑦ ᕿᑎᐊᓂ ᐅᑭᐅᖅᑕᖅᑑᑉ ᑕᕆᐅᖓᓄᑦ ᐊᖏᖃᑎᒌᒍᑎᐅᑉ ᓂᐅᕕᐊᔅᓴᓄᑦ ᐃᖃᓗᒐᓱᖁᔨᖏᑦᑐᖅ ᑕᒫᓂ ᑭᓯᐊᓂ ᑐᑭᓯᒃᑲᓐᓂᕈᑎᒃ ᑖᔅᓱᒥᖓ ᐊᔾᔨᐅᖏᑦᑐᒥᒃ ᑕᕆᐅᓂ ᐃᓂᒥᒃ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥᒃᑯᑦ ᐊᓕᐊᓇᐃᒍᓱᑦᑐᑦ #3.5 ᐱᓕᐊᓐ ᐸᕐᓇᔅᓯᒪᔪᑦ ᓴᐳᔾᔭᐅᓂᖏᓐᓄᑦ ᐃᓄᐃᑦ ᓄᓇᖏᓐᓂ ᓯᒡᔭᓄᑦ ᐃᒥᓄᓪᓗ ᐃᓗᐊᓂ ᑕᕆᐅᕐᓄᑦ ᓴᐳᑎᓂᕐᓄᑦ ᐸᕐᓇᐅᑎᒥ.
“ᓱᓕᑦᑕᐅᖅ ᐱᓕᕆᕝᕕᒋᓯᒪᔭᕗᑦ ᓴᓇᔭᐅᓂᖏᓐᓄᑦ ᑐᕌᕈᑏᑦ ᐊᑦᑐᐊᔪᓄᑦ ᖃᐅᔨᓴᕐᓂᕐᓄᑦ ᐅᑭᐅᖅᑕᖅᑐᓂ ᐃᓄᐃᑦ ᖃᐅᔨᒪᔭᖏᑦ ᓴᖅᑭᔮᓪᓚᑦᑖᖁᓪᓗᒋᑦ ᕿᒥᕐᕈᓂᖏᓐᓂ ᒐᕙᒪᖃᑎᒌᖏᑦᑐᓂ ᑲᑎᒪᔨᓂᑦ ᓯᓚᐃᑦ ᐊᓯᔾᔨᕐᓂᖏᓐᓄᑦ ᐃᓄᓐᓄᓪᓗ ᐊᐅᓚᑕᐅᔪᓂᒃ ᐱᓕᕆᓂᖅᓴᐅᓗᑎᒃ ᓴᐳᔾᔨᓂᕐᓄᑦ ᐆᒪᔫᖃᑎᒌᖏᑦᑐᓄᓪᓗ ᐱᓕᕆᔪᓄᑦ,” ᐅᖃᖅᑐᖅ ᓖᓴ ᖁᐱᕐᕈᐊᓗᒃ. “ᐅᔾᔨᕆᕙᕗᑦ ᑮᓇᐅᔭᑦ ᑐᕌᑲᐅᑎᒋᔪᓄᑦ ᖃᖓᑦᑎᐊᖅ COP15 ᐆᒪᔫᖃᑎᒌᖏᑦᑐᓄᑦ ᑲᑎᑦᑐᓄᑦ ᒪᓐᑐᕆᐊᓪᒥ. ᓄᓇᕐᔪᐊᕐᒥ ᐆᒪᔫᖃᑎᒌᖏᑦᑐᓄᑦ ᑐᙵᕕᒃ (GBF) ᐱᕐᔪᐊᖑᔪᖅ ᐱᔭᐅᔪᖅ ᑕᐃᑲᙵᑦ ᑲᑎᒪᓂᕐᒥᑦ ᐊᖏᖅᓯᒪᓂᕐᒧᓪᓗ $800-ᒥᓕᐊᓐᓄᑦ ᓄᓇᖃᖅᑳᖅᑐᓄᑦ ᐊᐅᓚᑕᐅᔪᓄᑦ ᓴᐳᔩᔨᓂᕐᓄᑦ ᐃᑲᔪᖅᑐᓄᑦ ᐃᓄᐃᑦ ᐃᒻᒥᓄᑦ ᖃᓄᐃᑦᑐᒪᓂᕐᒥᓄᑦ.”
ᐅᖃᓕᒫᒐᖅ 5 ᐸᕐᓇᔅᓯᒪᔪᓂ ᐊᑎᓕᒃ ”ᑲᓇᑕᐅᑉ ᓯᕗᓪᓕᖅᑎᐅᓂᖓ ᓄᓇᕐᔪᐊᒥ.” “ᐅᔾᔨᕆᕙᕗᑦ $38.6 ᐱᓕᐊᓐ 20 ᐊᕐᕌᒍᓂ ᓴᙲᑦᑎᒋᐊᕐᓗᒋᑦ ᓴᐳᑎᖏᑦ ᐅᐊᓐᓇᐅᑉ ᐊᒥᐊᑭᒃᑲᐅᑉ ᐃᓗᐊᓂ ᓄᐊᕋᑦ, ᑐᕌᓪᓗᐊᑕᖅᑐᒥᒃ ᐅᖃᖅᓯᒪᓪᓗᓂ ᓴᐳᑎᓗᒋᑦ ᓄᓇᖃᕐᓃᑦ ᐅᑭᐅᖅᑕᖅᑐᒥ,” ᐅᖃᖅᑐᖅ ᖁᐱᕐᕈᐊᓗᒃ. “ᑖᓐᓇ ᑕᕝᕗᖓᑲᐅᑎᒋ ᐊᑦᑐᐊᔪᖅ ᑕᓪᓕᒪᑦᑎᓐᓄᑦ ᑎᓕᐅᕈᑎᑦᑎᓐᓄᑦ ᐊᖏᓪᓕᒋᐊᖁᓪᓗᒍ ᓄᓇᕐᔪᐊᕐᒥᐅᓄᑦ ᐅᑭᐅᖅᑕᖅᑐᒥ ᓄᓇᖃᖁᓪᓗᒋᑦ ᐃᓄᐃᓪᓗ ᓴᐳᔾᔭᐅᓯᒪᓗᑎᒃ ᐅᑭᐅᖅᑕᖅᑐᒥ. ᐃᓄᐃᑦ ᐃᑲᔪᖅᑐᖅᑐᑦ ᐅᑭᐅᖅᑕᖅᑐᖅ ᐃᓂᐅᓗᓂ ᐱᑦᑎᐊᖅᑐᓄᑦ ᐱᓕᕆᓂᐊᖅᑐᑎᓪᓗ ᐸᖅᑭᔭᐅᓂᕐᓂᒃ ᑐᑭᖃᕐᓗᑎᒃ ᐊᑦᑕᕐᓇᖏᑦᑐᒦᑦᑐᓂᒃ ᓄᓇᓕᓐᓂᒃ ᕿᑐᕐᖓᑦᑎᓐᓄᑦ, ᐊᕙᑎᓄᑦ ᓂᕐᔪᑎᓄᑦ ᐱᕕᔅᓴᓄᓪᓗ ᐃᓄᑦᑎᓐᓄᑦ.”
-30-
ᐅᖃᖃᑎᒋᒍᒃ:
ᐄᑉᐳ ᐱᒐᓚᒃ
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ᑲᓇᑕᒥ)
apigalak@inuitcircumpolar.com