ᑐᐸᐃ (12 ᑎᓯᒻᐱᕆ 2023) – 28-ᖓᑦ ᑲᑎᓐᓂᖓᑦ ᐃᓚᐅᔪᓄᑦ (COP 28) ᐃᓗᐊᓂ ᑲᑐᔾᔨᔪᑦ ᒐᕙᒪᖃᑎᒌᖏᑦᑐᑦ ᑐᙵᕕᖓᑦ ᑲᑎᓐᓂᕐᒧᑦ ᓯᓚᐃᑦ ᐊᓯᔾᔨᕐᓂᖏᓐᓄᑦ ᐃᓱᓕᓚᐅᖅᐳᖅ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ICC) ᑕᑯᕙᐃᑦ ᖃᓄᐃᑦᑐᑦ ᐊᔾᔨᒌᖏᑦᑐᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ, ᐃᓄᖃᖅᑐᑎᒃ ᖃᐅᔨᒪᔨᑕᕐᓂᒃ, ᒪᒃᑯᒃᑐᓂᒃ, ᐃᖅᑲᓇᐃᔭᖅᑎᓂᒃ ᐃᔅᓯᕙᐅᑕᕐᒥᓪᓗ ᓯᐊᕋ ᐅᓪᔅᕕᒡ, ᐃᔅᓯᕙᐅᑕᐅᑉ ᑐᓪᓕᐊ ᓗ ᖁᐱᕐᕈᐊᓗᒃ, ᓂᐱᖃᖅᑎᑦᑎᓚᐅᖅᐳᑦ ᐃᓄᓐᓂᒃ ᓯᓚᓄᑦ ᐅᖃᓪᓚᑦᑐᓄᑦ.
“ᑐᓴᕈᒥᓇᖅᐳᖅ ᐊᐅᓚᔪᓐᓇᖅᓯᑎᒃᑲᑦᑎᒍᑦ ᓄᓇᓕᓐᓄᑦ ᓄᓇᖃᖅᑳᖅᑐᓄᓪᓗ ᐃᓄᐃᑦ ᑐᙵᕕᖓᑦ ᑕᓪᓕᒪᑲᓴᑦᓄᑦ ᐊᕐᕌᒍᓄᑦ ᐱᓕᕆᓪᓗᑎᒃ ᓄᓇᕐᔪᐊᕐᒥᐅᑦ ᓄᓇᖃᖅᑳᖅᑐᓪᓗ ᐃᓄᖏᑦ ,” ᐅᖃᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᐃᔅᓯᕙᐅᑕᐅᑉ ᑐᓪᓕᐊ ᓕᐊ ᖁᐱᕐᕈᐊᓗᒃ . “ᑐᙵᕕᒃ ᐃᒻᒥᓄᑦ ᓴᖅᑭᑦᑎᓂᐅᕗᖅ, ᓄᓇᖃᖅᑳᖅᑐᑦ ᖃᐅᔨᒪᔨᑕᖏᑦ ᐊᑐᑦᑎᐊᖅᐳᑦ ᐱᓕᕆᔾᔪᓯᕐᓂᒃ.” ᑕᒫᓂ ᐊᕐᕌᒍᒥ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓇᔅᓴᕈᓐᓇᓚᐅᖅᑐᑦ ᒪᕐᕉᓐᓂᒃ ᖃᐅᔨᒪᑕᐃᑦ ᓂᐱᖏᓐᓂᒃ ᑐᐸᐃᒧᑦ ᐃᓚᐅᓪᓗᑎᒃ ᑲᑎᑦᑐᓂ ᑐᙵᕕᐅᓪᓗ ᖃᐅᔨᒪᔭᓄᑦ ᐅᖃᐅᓯᖃᕐᓂᕐᓄᑦ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᐃᔅᓯᕙᐅᑕᖓ ᓯᐊᕋ ᐅᓪᔅᕕᒡᐅᑉ ᐅᖃᐅᓯᕆᓪᓗᓂᒋᑦ ᐃᓚᓕᐅᑎᔭᐅᓂᖏᑦ ᓄᓇᖃᖅᑳᖅᑐᑦ ᐃᓄᐃᑦ ᐃᓄᐃᓪᓗ ᐱᔪᓐᓇᐅᑎᖏᑦ ᑎᑎᕋᓄᑦ, ᐱᖃᓯᐅᖦᑐᒍ ᐃᓕᓴᕆᔭᐅᓂᖏᑦ ᓄᓇᖃᖅᑳᖅᑐᑦ ᐃᓄᐃᑦ ᖃᐅᔨᒪᔭᖏᑦ ᐱᕐᔪᐊᑐᑦ ᐱᓕᕆᔭᐅᓯᒪᔪᑐᑦ. ᐅᖃᕐᒥᓪᓗᓂ ᐃᒪᖏᑦ ᑎᑎᕋᖅᓯᒪᔪᑦ ᐊᕕᔅᓯᔪᑦ ᓄᓇᖃᖅᑳᖅᑐᓂᒃ ᐃᓄᓐᓂᒃ ᓄᓇᓕᓐᓂᑦ, ᐅᖃᐅᓯᕆᓗᐊᖅᑐᒍ ᑲᑎᑎᑦᑐᒋᑦ ᐱᔪᓐᓇᙱᑎᑦᑎᒻᒪᑕ ᑕᒪᒃᑮᖕᓂᒃ ᐊᔾᔨᐅᖏᑦᑐᓂᒃ ᐱᔪᓐᓇᐅᑎᖏᓐᓂᒃ ᓄᓇᖃᖅᑳᖅᑐᑦ ᐃᓄᐃᑦ ᐱᕐᔪᐊᖑᓂᖏᓐᓄᓪᓗ ᖃᐅᔨᒪᔭᖏᑕ ᓇᔅᓴᖅᑕᒥᓄᑦ ᕿᓂᖅᑐᓄᑦ ᖃᓄᖅᑑᕈᑎᔅᓴᓂᒃ ᓯᓇᓄᑦ ᖃᓄᐃᕐᔪᐊᖅᑐᓄᑦ.
ᐊᑕᐅᓯᖅ ᓴᖅᑭᔮᖅᑎᑦᑎᔪᖅ ᐊᑦᑐᐃᓂᖓᓂᒃ ᑎᑎᕋᓄᑦ ᓇᓂᔭᐅᕗᖅ ᑎᑎᕋᖅᓯᒪᔪᓂ ᐅᖃᖅᑐᓂ ᐱᑦᑎᐊᖅᑐᒃᑯᑦ ᓇᓕᒧᑦᑐᒃᑯᓪᓗ ᑲᑎᓐᓂᕐᓂᒃ ᓄᓇᖃᖅᑳᖅᑐᑦ ᐃᓄᓐᓂᒃ ᐊᑐᖅᑎᑕᐅᓂᖏᓐᓄᓪᓗ “ᖃᐅᔨᒪᔭᐅᔪᑦ, ᓯᓚᑐᓃᑦ ᐅᑉᐱᕆᔭᐅᔪᓪᓗ ᓄᓇᖃᖅᑳᖅᑐᓄᑦ ᐃᓄᓐᓄᑦ” ᐊᑐᓕᖅᑎᓪᓗᒋᑦ ᐋᖅᑭᒋᐊᕈᑎᓄᑦ ᑎᑭᑕᐅᓇᓱᑦᑐᓄᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᐃᔅᓯᕙᐅᑕᖓ ᐅᓪᔅᕕᒡ ᐅᖃᕐᒪᑦ, “ᐊᑑᑎᖃᑦᑎᐊᖅᑐᖅ ᓄᓇᖃᖅᑳᖅᑐᑦ ᐃᓄᐃᑦ ᐃᓚᒋᔭᐅᓗᑎᒃ ᐅᖃᖃᑎᒌᑦᑐᓄᑦ ᖃᓄᖅᑑᕈᑎᓂᓪᓗ ᑐᓂᓯᔪᓐᓇᕐᓗᑎᒃ ᑭᐳᒧᑦ. ᑭᓯᐊᓂ, ᐅᖃᒃᑲᓐᓂᕈᒪᕙᕗᑦ ᓇᔭᕗᑦ ᐊᓂᕗᓪᓗ ᒥᑭᑦᑐᒥ ᕿᑭᖅᑕᕐᒥ ᓴᓇᕙᓪᓕᐊᔪᓄᑦ ᓄᓇᓄᑦ ᐊᖏᖅᐳᒍᓪᓗ ᖃᓄᐃᓕᔪᑦ ᑐᐸᐃᒥ ᐊᓯᔾᔨᖅᐸᓪᓕᐊᕗᑦ ᐊᓯᔾᔩᓇᑎᓪᓗ. ᐅᖓᓯᑦᑐᒧᑦ ᓱᓕ ᐅᐸᒋᐊᖃᖅᐳᒍᑦ, — — ᐱᕕᖃᓗᐊᕋᑕᓗ.”
ᐊᖏᖃᑎᒌᒍᑎ ᓴᖅᑭᑦᑐᖅ ᐃᓄᐃᑦ ᑕᐅᑐᑦᑎᓪᓗᒋᑦ ᐃᒪᕐᓂᒃ ᓯᒡᔭᒥᐅᑕᓄᑦ ᓄᓇᓕᓐᓄᑦ ᐊᖏᕐᕋᒥᓂ ᐃᓄᐃᑦ ᓄᓇᖓᓂ. ᓯᑯᒐᔪᑦᑐᖅ ᓅᕕᒻᐱᕆᐅᑉ ᐱᒋᐊᕐᓂᖓᓂ ᐅᓄᖅᑐᓂ ᓄᓇᓂ, ᒫᓐᓇᐅᓕᖅᑎᓪᓗᒍᓗ ᐊᐅᓪᓚᕐᕕᔅᓴᐅᓪᓗᑎᒃ. ᑭᓯᐊᓂ ᑕᒫᓂ ᐊᕐᕌᒍᒥ, ᐅᖅᑰᓂᖅᓴᐅᓪᓗᓂ ᐅᑭᐊᒃᓵᒥ ᐃᓕᖅᑯᓯᐊᓂᑦ, ᓂᓪᓚᓱᖏᓐᓂᖅᓴᓄᑦ ᐅᑭᐅᓄᑦ, ᓴᙱᓗᐊᒪᔮᖅᑐᓄᓪᓗ ᐊᓄᕆᓄᑦ ᓯᑯᔪᓐᓇᖏᔾᔪᑕᐅᕗᑦ, ᐊᑦᑐᐃᓪᓗᑎᒃ ᐃᓄᐃᑦ ᐊᖑᓇᓱᑦᑎᖏᓐᓂᒃ ᐊᐅᓪᓚᕈᓐᓇᕐᓂᖏᓐᓄᑦ ᓂᕿᔅᓴᖅᑕᕐᓗᑎᒃ ᓂᕿᑦᑎᐊᕙᓂᒃ. “ᑐᙵᓂᕗᑦ ᑕᕆᐅᕐᓂᑦ ᐊᑐᒐᔅᓴᓄᑦ, ᐅᓪᔅᕕᒡ ᐅᖃᖅᑐᖅ, “ᐊᔪᕆᖅᓱᐃᕗᖅ ᐊᑦᑐᐃᓂᐅᑲᐅᑎᒋᓂᖏᓐᓂᒃ ᓯᓚᐃᑦ ᐊᓯᕐᔨᕐᓂᖏᓐᓂᑦ ᓂᕿᖃᕈᓐᓇᖅᑎᑦᑎᓐᓄᑦ, ᖃᓄᐃᖏᓐᓂᑦᑎᓐᓄᑦ ᐃᓕᖅᑯᓯᑐᖃᑦᑎᓐᓄᓪᓗ.”
ᐅᖃᐅᓯᖏᑦ ᓴᙲᒃᑲᓗᐊᖅᑐᑎᒃ, ᑕᓐᓇ ᓇᓗᓇᐃᖅᓯᕗᖅ ᓯᕗᓪᓕᖅᐹᒧᑦ ᓯᓚᐃᑦ ᐊᓯᔾᔨᕐᓂᖏᓐᓄᑦ ᐊᖏᖃᑎᒌᒍᑎᒧᑦ ᐅᖃᐅᓯᓕᓐᓄᑦ “ᐊᓯᓄᐊᕐᓂᕐᓄᑦ” ᐅᖅᓱᓂᑦ. ᑖᓐᓇ ᓇᓕᐊᓐᓄᑦ ᐊᖏᕈᑕᐅᓚᐅᖏᑦᑐᖅ ᑭᓂᖅᑐᓕᐅᖅᑏᑦ ᐅᖅᓱᓕᐅᖅᑏᓪᓗ ᒐᕙᒪᓂᑦ, ᐱᖃᓯᐅᑦᑐᒋᑦ ᖃᔅᓯᑕᐅᓴᑦ ᑭᓱᓕᐅᖅᑎᓄᑦ ᐃᑲᔪᖅᑎᓄᑦ ᐃᓚᐅᓚᐅᖅᑐᓄᑦ, ᐊᔅᓱᕈᓚᐅᖅᑐᑦ ᐅᖃᐅᓯᖃᖁᔨᓇᑎᒃ ᐅᖁᓱᓂᒃ – ᐃᑭᑕᐅᓂᖏᑦ ᓯᓚᓄᑦ ᐊᓯᔾᔪᕈᑕᐅᓪᓗᐊᑕᖅᑐᑦ- ᑭᖑᓪᓕᖅᐹᓂᑦ ᑎᑎᕋᓂᑦ.
ᑲᑎᓐᓂᖓᑦ ᐃᓚᐅᔪᓄᑦ 28 ᓯᕗᓪᓕᖅᐹᒧᑦ “ᓄᓇᕐᔪᐊᕐᒥᐅᓄᑦ ᐅᔾᔨᕈᓱᖕᓂᖅ” ᐃᓚᐅᔪᑦ ᑕᑯᓇᑦᑐᑎᒃ ᓯᕗᒧᐊᖅᐸᓪᓕᐊᔪᓂᒃ ᑎᑭᑕᐅᓇᓱᑦᑐᓄᑦ ᓄᓇᕐᔪᐊᑉ ᐅᖅᑰᒐᔪᓐᓂᖏᑦ ᑎᒫᓃᑎᓪᓗᒋᑦ 1.5 ᓯᐊᓪᓯᐊᔅᓄᑦ ᐋᖅᑭᑦᑕᐅᓪᓗᑎᒃ 2015ᒥ ᐱᐊᕆᔅᒥ ᐊᖏᖃᑎᒌᒍᑎᒧᑦ. ᑎᑎᕋᑦ ᐱᖃᓯᐅᔾᔨᔪᑦ ᐱᖏᖕᓇᓪᓚᑦᑖᖅᑐᒥᒃ ᓱᓕᔪᒥᒃ 2023 ᐅᖅᑰᓛᖑᓛᕐᒪᑦ ᐳᐃᒍᔾᔭᐃᖅᓯᒪᔭᐅᔪᓂᑦ, ᐊᑦᑐᐃᓃᓪᓗ ᓯᓚᐃᑦ ᐊᓯᔾᔨᕐᓂᖏᓐᓂᑦ ᑕᐃᒪᐃᑉᐸᓪᓕᐊᕗᑦ ᓱᒃᑲᓕᓂᖅᓴᐅᓪᓗᑎᒃ ᕿᒪᒃᑕᑦᑎᓐᓂᑦ. ᑎᑎᕋᑦ ᐅᖃᒃᑲᓂᕆᕗᑦ ᑐᐊᕕᕐᓗᓂ ᖃᓄᐃᒋᐊᕆᐊᖃᕐᓂᕐᓂᒃ ᑎᑭᑕᔅᓴᐅᖁᓪᓗᒍ 1.5 ᓯᐊᓪᓯᐊᔅᒧᑦ ᓵᓪᓗᒋᓪᓗ ᓯᓚᓄᑦ ᐊᔅᓱᕈᕐᔪᐊᕐᓃᑦ ᑕᒫᓂ ᐊᑑᑎᖃᑦᑎᐊᖅᑐᓂ 10 ᐊᕐᕌᒍᓂ.
“ᐊᖏᕐᕋᕗᑦ ᐅᖅᑰᓯᕙᓪᓕᐊᒻᒪᑦ ᑎᓴᒪᐃᖅᓱᖅᑐᓂ ᓱᒃᑲᓂᖅᓴᒥᒃ ᐊᓯᓂᑦ ᓄᓇᕐᔪᐊᕐᒥᐅᓂᑦ.’ ᖁᐱᕐᕈᐊᓗᒃ ᐅᖃᖅᑐᖅ. “ᐊᑐᖅᓯᒪᔭᕗᑦ ᑕᑯᓯᒪᔭᕗᓪᓗ ᑕᒪᒃᑮᓪᓗ ᑭᒡᓕᓯᓂᐊᕐᓂᒃᑯᑦ ᕿᒥᕈᓂᕐᓂᑦ, ᐅᖃᖅᐳᑦ ᐳᔫᖅᑎᑦᑎᔪᓐᓇᐃᓪᓕᒐᑦᑕ ᑲᐸᓐ ᑕᐃᐊᒃᓴᐃᑦᓂᒃ ᓯᓚᓄᑦ. ᑐᐊᕕᕐᓗᓂ ᐊᑐᕈᓐᓃᖅᑎᑦᑎᓂᖅ ᐊᑑᑎᖃᑦᑎᐊᖅᑐᖅ ᑎᑭᑦᑐᓐᓇᕐᓂᐊᕈᑦᑎᒍᑦ ᐱᐊᕆᔅᒥ ᐊᖏᖅᑕᐅᔪᑦ.”
ᐃᓚᒋᓪᓗᓂᐅᒃ ᐊᓯᓄᑦ ᐱᕐᔪᐊᓄᑦ ᖃᓄᐃᑦᑐᓄᑦ ᑲᑎᓐᓂᖓᓐᓂᕐᓄᑦ ᐃᓚᐅᔪᓄᑦ 28ᒧᑦ ᐊᐅᓚᔾᔭᒃᑕᐅᓂᖏᑦ ᐊᓯᐅᔪᓄᑦ ᓱᕋᑦᑐᓄᓪᓗ ᑮᓇᐅᔭᑦ, ᐅᖃᐅᓯᐅᓪᓗᑎᒃ ᓯᕗᓪᓕᖅᐹᒥ ᐅᓪᓗᕐᒥ ᑲᑎᑦᑐᓄᑦ. ᑭᓯᐊᓂ, ᐃᓄᐃᑦ ᐊᓰᓪᓗ ᐅᑭᐅᖅᑕᖅᑐᒥᐅᑦ ᓄᓇᖃᖅᑳᖅᑐᑦ ᐃᓄᐃᑦ ᐱᔪᓐᓇᖏᑦᑐᑦ ᓱᓕ ᓇᓕᐊᑐᐃᓐᓇᕐᓄᑦ ᑮᓇᐅᔭᖅᑖᕈᓯᓄᑦ ᑭᐳᒦᓚᐅᖅᑐᓄᑦ ᑐᐸᐃᒥ.
“ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᓱᓕᖁᔩᓐᓇᕐᓂᐊᖅᑐᑦ ᓱᓕᖏᑦᑐᒥᒃ ᑕᐃᒪᐃᑦᑎᑦᑎᔪᒥᒃ, ᐊᔪᖏᑦᑐᓄᑦ ᐊᔪᕈᓐᓃᓕᖅᑐᓄᓪᓗ ᒐᕙᒪᓄᑦ, ᐃᑲᔪᖅᑐᖁᔨᓗᑎᓪᓗ ᓄᓇᖃᖅᑳᖅᑐᓂᒃ ᐃᓄᓐᓂᒃ ᓄᓇᕐᔪᐊᑉ ᖁᑏᓐᓂᖅᓴᖏᓐᓂ, ᐱᖃᓯᐅᓪᓗᒋᑦ ᑕᒪᒃᑮᑦ ᓄᓇᖃᖅᑳᖅᑐᑦ ᐃᓄᐃᑦ, ᑕᕝᕗᖓᑲᐅᑎᒋᒧᑦ ᓇᓕᒧᑦᑐᒧᓪᓗ ᐱᔪᓐᓇᕐᓗᓂ ᑮᓇᐅᔭᖅᑖᕈᓯᕐᓄᑦ ᐊᖏᕈᑕᐅᔪᓄᑦ UNFCCCᑯᓂᑦ,” ᐅᓪᔅᕕᒡ ᐅᖃᖅᑐᖅ.
“ᑎᑭᑐᐃᓐᓇᖏᑦᑐᒍᑦ ᓯᓚᐃᑦ ᐊᓯᔾᔨᕐᓂᖏᑕ ᐊᓯᔾᔨᕈᓐᓇᕐᓂᖓᓄᑦ,” ᐅᓪᔅᕕᒡ ᐅᖃᒃᑲᓐᓂᖅᐳᖅ, “ᐃᓕᓴᕆᔭᐅᖏᓐᓂᖏᑦ ᐊᑦᑐᐃᓐᓂᓪᓚᖏᑦ ᓯᓚᐃᑦ ᐊᓯᔾᔨᕐᓂᖏᓐᓂᑦ ᐱᔪᓐᓇᐅᑎᖏᓐᓄᑦ ᓄᓇᖃᖅᑳᖅᑐᑦ ᐃᓄᐃᑦ ᑐᑭᖃᖅᐳᖅ ᐃᓄᐃᑦ ᐱᔪᓐᓇᐅᑎᖏᓐᓄᑦ ᐊᓯᔾᔨᕐᕕᒻᒧᐊᕈᑎᒍᑎᑦᑕᐅᖅ. ᑭᐳᒦᑦᑕᕆᐊᖃᖅᑐᒍᑦ ᑕᒪᒃᑮᓂ ᐊᖏᖃᑎᒌᒐᓱᑦᑐᓕᕆᓂᕐᓂ, ᓯᓚᐃᑦ ᐊᓯᔾᔨᕐᓂᖏᓐᓄᑐᐊᖑᖏᑦᑐᖅ ᑭᓯᐊᓂ ᓇᓕᐊᑐᐃᓐᓇᕐᓂ ᐊᓯᓂ ᓄᓇᕐᔪᐊᕐᒥ ᐱᓕᕆᔾᔪᓯᕐᓂ ᐊᑦᑐᐃᔪᓂᒃ ᐅᕙᑦᑎᓐᓂᒃ.”
ᑖᓐᓇ ᐃᓄᒋᐊᓛᖑᓚᐅᖅᑐᖅ ᓯᓚᐃᑦ ᐊᓯᔾᔨᕐᓂᖏᓐᓄᑦ ᑲᑎᑦᑐᓄᑦ ᖃᖓᓕᒫᒥᑦ, 100,000 ᑲᓴᑦ ᐃᓄᐃᑦ ᐅᐸᑦᑐᑎᒃ ᓄᑖᓛᒪᔮᓗᐊᒧᑦ ᑐᐸᐃᒧᑦ. ᐊᕐᕌᓂ ᑲᑎᓐᓂᖓᑦ ᐃᓚᐅᔪᓄᑦ 29 ᐸᑯ, ᐊᔪᐸᔭᓐᒦᓛᖅᑐᖅ.
-30-
CONTACT:
Ane Mette Andersen
ICC (Greenland)
299 34 22 25
anemette@inuit.org
Christina Fields
ICC (Alaska)
(907) 274-9058
christina@iccalaska.org
Cassandra Elliott
ICC (Canada)
613-407-3642
celliott@inuitcircumpolar.com