ᐄᑉᐳ 28, 2023– ᑕᐃᒪᐃᑦᑕᕆᐅᖅᑐᖅ ᖃᐅᔨᓴᕐᓂᕐᓄᑦ ᑮᓇᐅᔭᖃᖅᑎᑕᐅᓂᖅ ᒐᕙᒪᑐᖃᒃᑯᓐᓂᑦ ᐃᓂᖃᓕᖅᑎᑦᑎᓂᐊᖅᑐᖅ ᑲᓇᑕᒥᒃ ᐃᓄᓐᓂᓪᓗ ᓄᓇᕐᔪᖃᕐᒥ ᓯᕗᓕᖅᑎᓄᑦ ᑲᔪᓯᓐᓇᕈᓐᓇᖅᑐᓄᑦ ᐅᑭᐅᖅᑕᖅᓄᓂ ᐅᓯᑲᖅᑕᕐᓂᕐᓄᑦ.
ᒥᒧᐊᕆᐅᓪ ᓯᓚᑦᑐᖅᓴᕝᕕᔾᔪᐊᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥᒃᑯᓪᓗ (ICC) ᑲᑐᔾᔨᓪᓗᑎᒃ ᐊᐅᓚᑦᑎᔫᒃ ᓄᓇᕐᔪᐊᕐᒥᐅᑎᒍᑦ ᑲᑐᔾᔨᖃᑎᒌᓐᓂᕐᓂᒃ ᓵᖁᓪᓗᒋᑦ ᖃᓄᐃᒋᐊᕝᕕᒋᓗᒋᓪᓗ ᐅᓄᖅᓯᒋᐊᕐᓂᖏᑦ ᐅᒥᐊᕐᔪᐊᒃᑯᑦ ᐅᓯᑲᖅᑕᕐᓃᑦ, ᐊᑦᑐᐊᔪᓪᓗ ᐊᕙᑎᓂ ᐊᑦᑐᐃᔪᑦ ᐅᑭᐅᖅᑕᖅᑐᓂ ᓄᓇᓕᓐᓂᒃ ᐃᑲᔪᕐᓗᒋᓪᓗ ᐃᓄᐃᑦ ᓄᓇᓕᖏᑕ ᐊᑐᕆᐊᖃᕐᓂᖏᑦ ᐊᑦᑕᕐᓇᖏᑦᑐᓂᒃ ᐊᑭᓂᓪᓗ ᐊᑐᑦᑎᐊᖅᑐᓂᒃ ᓂᐅᕋᐃᓂᕐᓂᒃ.
ᐅᓪᓗᒥ, ᕗᕋᓐᓱᐊ-ᐱᓕᑉ ᓴᒻᐸᐃᖕ, ᒥᓂᔅᑕ ᐃᓱᒪᖕᓇᖏᑦᑐᓕᕆᓂᕐᓄᑦ, ᑭᒡᓕᓯᓂᐊᕐᓂᕐᓄᑦ ᑭᓱᓕᐅᖅᑎᓄᓪᓗ, ᐅᖃᐅᓯᖃᖅᐳᖅ ᑮᓇᐅᔭᖃᖅᑎᑦᑎᓂᕐᓂᒃ $91.6 ᒥᓕᐊᓐᓂᒃ ᐊᕐᕌᒍᑦ 7 ᐃᓗᐊᓂ ᐊᑐᕐᓗᒋᑦ ᑲᓇᑕ ᓯᕗᓪᓕᐅᓗᓂ ᖃᐅᔨᓴᑦᑎᐊᕐᓂᕐᓄᑦ ᑮᓇᐅᔭᓂᒃ (CFREF) ᐃᑲᔫᑕᐅᓗᑎᒃ ᓴᓇᔭᐅᓂᖏᓐᓄᑦ ᖃᓂᑦᑕᖅ ᓴᓗᒪᔪᓄᑦ ᐅᑭᐅᖅᑕᖅᑐᓂ ᐅᒥᐊᕐᔪᐊᒃᑯᑦ ᐅᓯᑲᖅᑕᕐᓂᕐᓄᑦ ᐱᒋᐊᕈᑎᐅᑉ.
ᐅᓄᓛᖑᓪᓗᑎᒃ ᑮᓇᐅᔭᑦ ᑐᓂᔭᐅᓯᒪᔪᓂᑦ ᑕᒪᒃᑮᓐᓄᑦ ᒥᒧᐊᕆᐅᓪᒧᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥᒃᑯᓐᓄᓪᓘᓐᓃᑦ, ᑖᒃᑯᐊ ᐃᑲᔫᑎᓪᓚᑦ ᓴᙲᑦᑎᑦᑎᓂᐊᖅᑐᑦ ᐃᓕᓴᐃᓂᖅᑎᒍᑦ ᓄᓇᖃᖅᑳᖅᑐᓄᓪᓗ ᑲᑐᔾᔨᓂᕐᓂᒃ. ᑖᓐᓇ ᐱᒋᐊᕈᑎ ᑕᒪᒃᑮᓐᓄᑦ ᖃᓄᐃᑕᐅᓇᓱᑦᑕᖃᖅᑐᖅ ᓴᓇᓗᑎᒃ ᐃᓚᐅᑎᑦᑎᔪᒥᒃ ᓄᓇᕐᔪᐊᕐᒥᐅᓄᓪᓗ ᐊᑐᖅᑐᓂᒃ ᐃᓄᓐᓄᑦ ᐊᐅᓚᑕᐅᔪᓄᑦ ᖃᐅᔨᓴᕐᓂᓕᕆᔪᓂᒃ.
ᖃᓂᑦᑕᖅ ᓴᓗᒪᔪᓄᑦ ᐅᑭᐅᖅᑕᖅᑐᓂ ᐅᒥᐊᕐᔪᐊᒃᑯᑦ ᐅᓯᑲᖅᑕᕐᓂᕐᓄᑦ ᐱᒋᐊᕈᑎ ᑲᑎᔾᔪᑕᐅᓂᐊᖅᑐᖅ ᐃᓄᐃᑦ ᓄᓇᓕᖏᓐᓄᑦ ᐱᓕᕆᖃᑎᒥᓄᓪᓗ ᓯᕗᓕᖅᑎᓄᑦ ᒐᕙᒪᖃᑎᒋᓄᑦ ᓄᓇᕐᔪᐊᕐᒥᐅᓂᓪᓗ ᐃᓕᓴᐃᓂᕐᓄᑦ, ᒐᕙᒪᓄᑦ ᑭᓱᓕᐅᖅᑎᓄᓪᓗ ᓴᓇᓗᑎᒃ ᓴᙱᔪᓂᒃ ᐃᓱᒪᓇᖏᑦᑐᓂᓪᓗ ᐅᒥᐊᕐᔪᐊᑦ ᐋᖅᑭᔅᓯᒪᓂᖏᓐᓄᑦ ᐊᐅᓚᓂᕐᓄᓪᓗ ᓴᓇᐅᒐᓄᑦ, ᐊᑐᖅᑕᓕᒫᖏᓐᓄᑦ ᐊᑐᐊᒐᑦ ᐊᐅᓚᑦᑎᓃᓪᓗ, ᐱᕈᖅᓴᐃᓂᕐᓄᓪᓗ ᓄᓇᓕᓐᓂ ᐃᓚᐅᔪᓐᓇᕐᓗᑎᒃ ᓯᕗᓕᖅᑎᐅᓗᑎᓪᓗ ᓯᕗᓂᕐᓂ ᐅᑭᐅᖅᑕᖅᑐᓂ ᐅᒥᐊᕐᔪᐊᑯᑦ ᐅᓯᑲᖅᑕᕐᓂᕐᓂ.
ᐱᓕᕆᓂᐅᑉ ᐊᑎᖓ ᐋᖅᑭᔅᓯᒪᓂᖓᓗ ᓴᖅᑭᔮᖅᑎᑦᑎᕘᒃ ᐃᓄᐃᑦ ᐃᓅᓯᒃᑯᑦ ᐅᑉᐱᕆᔭᖏᓐᓂᒃ ᖃᐅᔨᒪᓂᖏᓐᓂᓪᓗ ᑐᙵᕕᓕᐅᖅᓯᒪᓪᓗᑎᓪᓗ ᐃᑉᐱᒍᓱᑦᑐᒃᑯᑦ ᑲᑐᔾᔨᓂᕐᓄᑦ ᐊᑐᕐᓗᑎᒃ ᐊᑐᒐᔅᓴᓂᒃ, ᐃᓄᐃᑦ ᖃᐅᔨᒪᔭᖏᓐᓂᒃ, ᐱᓕᕆᖃᑎᒌᓂᒃ ᓴᓇᓯᒪᔪᓄᓪᓗ ᓇᓂᓯᔾᔪᑎᒋᓗᒋᑦ ᐱᐅᓛᑎᒍᑦ ᑲᑐᔾᔨᓂᒃᑯᑦ ᖃᓄᖅᑑᕈᑎᓂᒃ ᐊᔅᓱᕈᕐᓇᖅᑐᓄᑦ ᐅᑭᐅᖅᑕᖅᑐᓄᑦ ᓵᙵᔪᓄᑦ.
“ᐅᐱᑦᑐᒍᑦ ᑲᑎᔾᔨᖃᑎᖃᕋᑦᑕ ᒥᒧᐊᕆᐅᓪ ᓯᓚᑦᑐᖅᓴᕝᕕᔾᔪᐊᖓᓂᒃ ᑖᒃᑯᓄᖓ ᐊᑑᑎᖃᑦᑎᐊᖅᑐᓄᑦ ᖃᐅᔨᓴᕐᓂᕐᓄᑦ ᐱᒋᐊᕈᑎᒧᑦ ᐊᑦᑐᐊᔪᓄᑦ ᐅᑭᐅᖅᑕᖅᑐᓂ ᐅᒥᐊᕐᔪᐊᒃᑯᑦ ᐅᓯᑲᖅᑕᕐᓂᕐᓄᑦ,” ᐅᖃᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥᒃᑯᑦ ᐊᖓᔪᖅᑳᖓ ᓕᓴ ᖁᐱᕐᕈᐊᓗᒃ. “ᑕᐃᒪᐃᑉᐳᖅ ᓄᓇᕐᔪᐊᕐᒥᐅᓄᑦ ᑕᐅᑐᑦᑕᐅᓪᓚᑦᑎᓪᓗᒍ ᐅᑭᐅᖅᑕᖅᑐᓂ ᐅᒥᐊᕐᔪᐊᒃᑯᑦ ᐅᓯᑲᖅᑕᕐᓂᕐᓂᖅ, ᐃᓱᒪᒋᓪᓗᒋᑦ ᐊᑦᑐᐃᓂᖏᑦ ᓯᓚᐃᑦ ᐊᓯᔾᔨᕐᓂᖏᑕ ᐅᓄᖅᓯᔪᓄᑦ ᐅᒥᐊᕐᔪᐊᒃᑯᑦ ᐅᓯᑲᖅᑕᕐᓂᕐᓂᑦ, ᖃᓄᐃᓐᓂᖏᓐᓄᓪᓗ ᐅᑭᐅᖅᑕᖅᑐᓄᑦ ᐊᕙᑎᓄᑦ. ᐃᓄᓐᓄᑦ ᐃᓕᖅᑯᓯᓄᑦ ᐊᓯᔾᔨᐅᑕᐅᓂᐊᖅᑐᖅ ᐃᑲᔪᕐᓗᓂᓗ ᐃᓂᖃᕐᓂᑦᑎᓐᓄᑦ ᓯᕗᓕᖅᑎᐅᓂᕐᓄᑦ ᑖᒃᑯᓂᖓ ᐱᓕᕆᔪᓄᑦ.”
ᖃᓄᐃᓕᐅᕋᓱᑦᑕᖏᑦ ᖃᓂᑦᑕᖅ ᓴᓗᒪᔪᓄᑦ ᐅᑭᐅᖅᑕᖅᑐᓂ ᐅᒥᐊᕐᔪᐊᒃᑯᑦ ᐅᓯᑲᖅᑕᕐᓂᕐᓄᑦ ᐱᒋᐊᕈᑎᐅᑉ ᐅᑯᐊᖑᕗᑦ:
- ᖃᐅᔨᒪᔭᐅᔪᓄᑦ ᑐᙵᕕᓕᐅᕐᓗᓂ ᓵᖁᓪᓗᒋᑦ ᐃᓄᐃᑦ ᐅᒥᐊᕐᔪᐊᒃᑯᑦ ᐅᓯᑲᖅᑕᕐᓂᕐᓄᑦ ᐊᔅᓱᕉᑎᖏᑦ, ᑐᓴᐅᒪᔭᐅᑎᓪᓗᒋᑦ ᐊᑦᑕᕐᓇᖏᓐᓂᖏᑦ ᐅᒥᐊᕐᔪᐊᑦ ᐊᐅᓚᔪᑦ ᐅᑭᐅᖅᑕᖅᑐᓂ ᓴᐳᑎᓗᒋᓪᓗ ᑕᐃᒃᑯᐊ ᐊᕙᑏᑦ;
- ᓴᓇᕐᕈᑎᓕᐅᕐᓗᓂ ᖃᓄᖅᑑᕈᑎᓂᓪᓗ ᐊᑐᕆᐊᓕᓐᓂᒃ ᐱᐅᓯᒋᐊᕈᑕᐅᓗᑎᒃ ᐊᑭᖏᓐᓄᑦ, ᑲᔪᓯᔪᓐᓇᕐᓂᖏᓐᓄᑦ ᐱᓕᕆᑦᑎᐊᕐᓂᖏᓐᓄᓪᓗ ᐅᑭᐅᖅᑕᖅᑐᓂ ᐅᒥᐊᕐᔪᐊᑦ; ᐊᒻᒪᓗ
- ᑐᓂᓗᒋᑦ ᖃᐅᔨᒪᔭᐅᔪᑦ ᐊᑐᕆᐊᓖᑦ ᐊᐅᓚᔾᔭᐅᑕᐅᓗᑎᒃ ᒐᕙᒪᖃᑎᒌᓂ ᓄᓇᕐᔪᐊᕐᒥᐅᑎᒍᓪᓗ ᐊᑐᐊᒐᓄᑦ ᐊᓯᔾᔩᓂᕐᓄᑦ ᐅᒥᐊᕐᔪᐊᓄᑦ ᐊᐅᓚᔪᓄᑦ ᐅᑭᐅᖅᑕᖅᑐᓂ.
“ᐊᑐᕐᓗᓂ ᐃᑉᐱᒍᓱᑦᑐᓂᒃ ᑐᑭᖃᑦᑎᐊᖅᑐᓂᓪᓗ ᑲᑐᔾᔨᖃᑎᒌᓐᓂᕐᓂᒃ ᐅᓄᖅᑐᓄᑦ ᐱᓕᕆᖃᑎᒌᓄᑦ ᖃᔅᓯᑲᓪᓚᓄᑦ ᒐᕙᒪᖃᑎᒌᖏᑐᓄᑦ, ᒥᒧᐊᕆᐅᓪ ᓯᓚᑦᑐᖅᓴᕝᕕᔾᔪᐊᖓᑦ ᐃᓄᐃᑦ ᐅᑭᐅᖅᑕᖅᑑᖃᑎᒌᓂ ᑲᑎᒪᔨᖏᑦ ᑲᓇᑕᒥᒃᑯᓪᓗ ᐊᐅᓚᔾᔭᐃᔪᑦ ᐊᔪᖏᑦᑐᓪᓚᓐᓂᒃ ᑲᑐᔾᔨᖃᑎᒌᓂᒃ ᓵᖁᓪᓗᒋᑦ ᐊᔅᓱᕈᕐᓇᑦᑎᐊᖅᑐᑦ ᐊᑲᐅᙱᓕᐅᕈᑏᑦ ᓵᑕᐅᔪᓄᑦ ᐅᑭᐅᖅᑕᖅᑐᓄᑦ,” ᐅᖃᖅᑐᖅ ᓘᒃᑖᖅ ᓂᐅᓪ ᐳᔅ, ᐊᖓᔪᖅᑳᖅ ᑐᒡᓕᐊᓗ ᓇᓕᒧᑦᑐᒃᑯᑦ ᐃᖅᑲᖅᑐᐃᔨᐅᓚᐅᑲᑦᑐᖅ.
“ᐱᒋᐊᕐᓂᖓᓂᑦ, ᒥᒧᐊᕆᐅᓪ ᓯᓚᑦᑐᖅᓴᕝᕕᔾᔪᐊᖓᑦ ᐅᐱᓯᒪᓪᓚᑦᑐᑦ ᐱᓕᕆᖃᑎᖃᕆᐊᔅᓴᖅ ᓴᓂᓕᕆᓗᒋᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥᒃᑯᑦ, ᓄᓇᖃᖅᑳᖅᑐᑦ ᑲᑐᔾᔨᖃᑕᐅᔪᑦ ᐃᑲᔪᖃᑕᐅᔪᓪᓗ ᐃᓄᐃᑦ ᐊᔅᓱᕉᑎᖏᑦ ᐊᑑᑎᖃᓗᐊᖅᑎᓪᓗᒋᑦ ᑎᑭᑕᐅᓇᓱᓪᓗᑎᒃ ᑖᔅᓱᒪᓂ ᐊᓯᔾᔩᔪᒧᑦ ᐱᒋᐊᕈᑎᒧᑦ, ᐱᕈᖅᓴᐃᓗᑕᓗ ᓯᓚᑦᑐᖅᓴᕝᕕᔾᔪᐊᑦᑕ ᓄᓇᕐᔪᐊᕐᒥᐅᑎᒍᑦ ᖃᐅᔨᒪᔭᐅᓂᖓᓂᒃ ᓂᓪᓕᓇᖅᑐᓄᑦ ᑕᕆᐅᓄᑦ ᐃᓱᒪᕈᓘᔭᕈᓐᓇᕐᓂᕐᓄᑦ.”
ᒥᒧᐊᕆᐅᓪ ᐃᓂᖃᑦᑎᐊᖅᑐᖅ ᐃᓕᓴᐃᓂᕐᓄᑦ ᓯᕗᓕᖅᑎᐅᓪᓗᑎᒃ ᐱᓕᕆᓂᕐᒧᑦ. ᐃᓚᒋᔭᐅᓪᓗᑎᒃ ᑲᓇᑕᒥ 20ᓂᑦ ᖃᐅᔨᓴᕐᓂᕐᓄᑦ ᓯᓚᑦᑐᖅᓴᕝᕕᔾᔪᐊᓂᑦ, ᖁᑦᑎᓐᓂᖅᓴᓄᑦ ᐃᓕᓐᓂᐊᕝᕕᑐᐊᖑᔪᖅ ᑲᓇᑕᒥ ᐃᒻᒥᓄᑐᐊᖅ ᑕᕆᐅᕐᓄᑦ ᑕᕆᐅᒃᑰᕐᓂᕐᓄᓪᓗ ᑭᓱᓕᐅᕐᓂᕐᓄᑦ ᐱᓕᕆᓂᓕᒃ ᓴᖅᑭᔮᖅᑎᑦᑎᓯᒪᓪᓗᑎᓪᓗ ᖃᐅᔨᓴᕐᓂᕐᓄᑦ ᐊᔪᖏᓐᓂᕐᓂᒃ ᐊᔾᔨᒌᙱᕈᓘᔭᖅᑐᓂ ᑭᓱᓕᕆᕈᓘᔭᖅᑐᓄᑦ, ᐱᖃᓯᐅᑦᑐᒋᑦ ᓄᓇᓂᑦ ᐊᑐᒐᔅᓴᑦ, ᓯᓚᐃᑦ ᐊᓯᔾᔨᕐᓂᖏᓐᓄᑦ ᑭᒡᓕᓯᓂᐊᕐᓃᑦ ᓴᓇᐅᒐᑎᒍᓪᓗ.
ᖃᓂᑦᑕᖅ ᓴᓗᒪᔪᓄᑦ ᐅᑭᐅᖅᑕᖅᑐᓂ ᐅᒥᐊᕐᔪᐊᒃᑯᑦ ᐅᓯᑲᖅᑕᕐᓂᕐᓄᑦ ᐱᒋᐊᕈᑎ ᑲᑐᔾᔭᐅᓪᓗᓂ ᓴᓇᔭᐅᔪᖅ ᐃᓄᐃᑦ ᑎᒥᖏᓐᓄᑦ ᑐᓴᕝᕕᖃᖅᑐᑎᓪᓗ ᐃᓄᓐᓂᑦ ᖃᐅᔨᒪᔨᑕᕐᓂᑦ ᐅᑭᐅᖅᑕᖅᑐᓂᑦ, ᐃᑲᔪᕐᓂᐊᖅᑐᑎᓪᓗ ᖃᐅᔨᓴᕐᓂᕐᓂᒃ ᐃᓚᐅᖃᑕᐅᓗᑎᒃ ᐊᔾᔨᒌᖏᑦᑐᓄᑦ ᐃᓕᓴᐃᓂᕐᓂᑦ ᖃᐅᔨᒪᔨᑕᓄᑦ ᑲᑐᔾᔨᔪᓄᓪᓗ ᑐᙵᔪᓄᑦ ᑲᓇᑕᒥᐅᓂᑦ ᖁᑦᑎᓐᓂᖅᓴᓄᑦ ᐃᓕᓐᓂᐊᕝᕕᓐᓂᑦ ᐱᖃᓯᐅᓪᓗᒍ ᒥᒧᐊᕆᐊᓪ ᐃᓚᐅᓗᑎᓪᓗ ᓯᓚᑦᑐᖅᓴᕝᕕᔾᔪᐊᖓ ᐋᑐᐋ, ᑕᓪᕼᐅᓯ ᓯᓚᑦᑐᖅᓴᕝᕕᔾᔪᐊᖓ, ᓯᓚᑦᑐᖅᓴᕝᕕᔾᔪᐊᖓ ᒪᓐᑐᕆᐊᓪᑉ ᓯᓚᑦᑐᖅᓴᕝᕕᔾᔪᐊᖓᓗ ᐳᕆᑎᔅ ᑲᓚᒻᐱᐊᑉ.
ᐃᓄᐃᑦ ᑲᑐᔾᔨᖃᑕᐅᔪᑦ ᐱᖃᓯᐅᔾᔨᔪᑦ ᐃᓄᕕᐊᓗᐃᑦ ᐊᕕᔅᓯᒪᔪᓄᑦ ᑯᐊᐳᕇᓴᖓᓂᒃ, ᓄᓇᑦᓯᐊᕗᑦ ᒐᕙᒪᖓᓂᒃ, ᒪᑭᕝᕕᒃ ᑯᐊᐳᕇᓴᖓᖓᓂᒃ, ᓄᓇᕗᑦ ᑐᙵᕕᒃ ᐃᓐᑯᐊᐳᕇᑕᒃᑯᓐᓂᓪᓗ, ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᒐᕙᒪᖃᑎᒌᓂᓗ ᐃᓄᐃᑦ ᒪᒃᑯᑦᑐᑦ ᑲᑎᒪᔨᖏᓐᓂᑦ.
ᐅᓄᒐᓚᑦᑐᑦ ᐊᑑᑎᖃᑦᑎᐊᖅᑐᑦ ᐃᓄᓕᒫᓂᑦ, ᓇᒻᒥᓂᓕᓐᓂᑦ ᐊᐅᓚᑦᑎᓂᕐᓂᓪᓗ ᑲᑐᔾᔨᖃᑕᐅᔪᑦ ᐃᑲᔪᕐᒥᔪᑦ ᐱᓕᕆᓂᕐᒧᑦ.
ᐱᒋᐊᕈᑎ ᑐᕌᖅᑎᑕᐅᓂᐊᖅᑐᖅ ᐋᖅᑭᕈᓘᔭᖅᓯᒪᔪᓄᑦ ᐊᐅᓚᔾᔪᓯᕐᓄᑦ ᐊᐅᓚᑦᑎᓄᕐᓄᓪᓗ ᑐᙵᕕᓐᓄᑦ ᐱᖃᓯᐅᔾᔨᔪᒧᑦ ᑭᒡᒐᖅᑐᐃᓂᕐᓂᒃ ᐃᓄᓐᓂᑦ ᑲᑐᔾᔨᖃᑕᐅᔪᓂᑦ, ᓯᓚᑦᑐᖅᓴᕝᕕᒻᒥᐅᓂᑦ, ᒐᕙᒪᓂᑦ ᑭᓱᓕᐅᖅᑎᓂᓪᓗ.
ᖃᓂᑦᑕᖅ ᓴᓗᒪᔪᓄᑦ ᐅᑭᐅᖅᑕᖅᑐᓂ ᐅᒥᐊᕐᔪᐊᒃᑯᑦ ᐅᓯᑲᖅᑕᕐᓂᕐᓄᑦ ᐱᒋᐊᕈᑎ ᑐᙵᓂᐊᖅᑐᖅ ᓴᐃᓐᑦ ᔮᓐᔅ ᐃᓕᓐᓂᐊᕝᕕᒃᑯᕕᖏᓐᓂ ᒥᒧᐊᕆᐅᓪ ᓯᓚᑦᑐᖅᓴᕝᕕᔾᔪᐊᕐᒥ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥᒃᑯᓐᓂᓗ ᐋᑐᐋ, ᐊᓐᑎᐊᕆᐅᒥ. ᐃᓕᒃᑲᓐᓂᕆᑦ ᐱᒋᐊᕈᑎᒧᑦ, ᑲᑐᔾᔨᖃᑎᒌᖏᓐᓄᑦ ᖃᐅᔨᓴᖅᑕᖏᓐᓄᓪᓗ, ᐅᕙᓂ ᐃᓐᑐᓂᐊᑦᑯᑦ: https://www.qanittaq.ca/.
ᑲᓇᑕ ᓯᕗᓪᓕᐅᓗᓂ ᖃᐅᔨᓴᑦᑎᐊᕐᓂᕐᓄᑦ ᑮᓇᐅᔭᑦ ᒥᔅᓵᓄᑦ
ᑲᓇᑕ ᓯᕗᓪᓕᐅᓗᓂ ᖃᐅᔨᓴᑦᑎᐊᕐᓂᕐᓄᑦ ᑮᓇᐅᔭᑦ ᐃᑲᔪᓲᑦ ᐊᑭᑦᑐᕋᐅᑎᔪᑎᒍᑦ ᓂᕈᐊᖅᑕᐅᔪᓄᑦ ᑲᓇᑕᒥᑦ ᖁᑦᑎᓐᓂᖅᓴᓄᑦ ᐃᓕᓐᓂᐊᕝᕕᓐᓂᑦ ᐊᔪᙱᓗᐊᖅᑕᒥᓄᑦ ᓴᙱᓂᕐᒥᓂᒃ ᓄᓇᕐᔪᐊᒥ ᓯᕗᓕᖅᑎᙳᖅᑎᓪᓗᒋᑦ ᐊᔪᙱᑕᒥᒍᑦ. ᑮᓇᐅᔭᑦ ᐱᖓᓱᓄᑦ ᑎᒥᓄᑦ ᐱᒋᐊᕈᑕᐅᔪᑦ ᐃᓅᓯᕐᓄᑦ ᑭᒡᓕᓯᓂᐊᕐᓂᕐᓄᑦ ᐃᓅᖃᑎᒌᓄᓪᓗ ᖃᐅᔨᓴᕐᓂᕐᓄᑦ ᑲᑎᒪᔨᖏᓐᓂᑦ (SSHRC), ᓄᓇᒥᐅᓄᑦ ᑭᒡᓕᓯᓂᐊᕐᓂᕐᓄᑦ ᑭᓱᓕᐅᖅᑎᐅᓂᕐᓄᓪᓗ ᖃᐅᔨᓴᕐᓂᕐᓄᑦ ᑲᑎᒪᔨᖏᓐᓂᑦ (NSERC), ᑲᓇᑕᒥ ᑎᒦᑦ ᖃᓄᐃᖏᓐᓂᕐᓄᑦ ᖃᐅᔨᓴᕐᓂᕐᓂᓪᓗ (CIHR).
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥᒃᑯᑦ ᒥᔅᓵᓄᑦ
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥᒃᑯᑦ (ICC) ᓄᓇᖃᖅᑖᖅᑐᑦ ᐃᓄᐃᑦ ᑎᒥᒋᕙᐅᒃ (IPO), ᓴᓇᔭᐅᔪᖅ 1977ᒥ ᐱᕈᖅᑎᓐᓇᓱᓪᓗᒋᑦ ᖁᕕᐊᓲᑎᒋᓗᒋᓪᓗ ᑲᑎᓐᓂᖏᑦ 180,000 ᐃᓄᐃᑦ ᐊᓛᔅᑲᒥᑦ (ᐊᒥᐊᓕᒃᑲᑦ), ᑲᓇᑕᒥᑦ, ᑲᓛᔅᖡᑦ ᓄᓈᓐᓂᑦ, ᓱᑯᑦᑲᒥᓪᓗ (ᕋᓯᐊ). ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᓕᕆᕗᑦ ᐱᕈᖅᑎᓐᓇᓱᑦᑐᒋᑦ ᐃᓄᐃᑦ ᐱᔪᓐᓇᐅᑎᖏᑦ, ᓴᐳᑎᓗᒋᑦ ᐅᑭᐅᖅᑕᖅᑐᓂ ᐊᕙᑏᑦ, ᓴᐳᑎᓗᒋᓪᓗ ᑐᓴᐅᒪᔭᐅᑎᓪᓗᒋᓪᓗ ᐃᓄᐃᑦ ᐃᓅᔾᔪᓯᖏᑦ. ᓯᓚᐃᑦ ᐊᓯᔾᔨᕐᓂᖏᓐᓄᑦ, ᐅᑉᐱᕈᓱᑦᑐᒍᑦ ᐊᑑᑎᖃᑦᑎᐊᕋᓱᒋᓪᓗᒍ ᓄᓇᕐᔪᐊᕐᒥ ᓯᕗᓕᖅᑎᓄᑦ ᒐᕙᒪᓄᓪᓗ ᐃᓕᓴᕆᔭᐅᓗᑎᒃ, ᐃᑉᐱᒋᓗᒋᑦ ᐊᑐᓕᖅᑎᑦᑎᐊᕐᓗᒋᓪᓗ ᐃᓄᓐᓄᑦ ᐱᔪᓐᓇᐅᑎᖏᑦ ᐃᓄᐃᑦ ᐊᓯᓕᒫᓪᓗ ᓄᓇᖃᖅᑳᖅᑐᑦ ᐃᓄᐃᑦ ᓄᓇᕐᔪᐊᒥ.
ᒥᒧᐊᕆᐅᓪ ᓯᓚᑦᑐᖅᓴᕝᕕᔾᔪᑉ ᒥᔅᓵᓄᑦ
ᒥᒧᐊᕆᐅᓪ ᓯᓚᑦᑐᖅᓴᕝᕕᔾᔪᐊᖓ ᐊᑕᐅᓯᐅᖏᑦᑐᒥ ᐃᓕᓐᓂᐊᕝᕕᓐᓂ, ᑭᓱᕈᓘᔭᓄᑦ ᐃᓕᓴᒐᔅᓴᓄᑦ ᓯᓚᑦᑐᖅᓴᕝᕕᔾᔪᐊᖑᔪᖅ ᑐᕌᖓᔪᖅ ᑭᓱᕈᓘᔭᓕᐅᕐᓂᕐᓄᑦ, ᐃᓱᒪᓇᖏᑦᑐᓕᕆᓂᕐᓄᑦ ᐱᑦᑎᐊᓪᓚᓐᓂᕐᓄᓪᓗ ᐃᓕᓴᐃᓂᕐᓂ ᐃᓕᓐᓂᕐᓂᓗ, ᖃᐅᔨᓴᕐᓂᕐᓄᑦ, ᐃᓕᓐᓂᐊᕐᓂᒃᑯᑦ ᐃᓕᓴᕆᔭᐅᓂᕐᓄᑦ ᐃᓄᓕᒫᑎᒍᓪᓗ ᑲᑎᓐᓂᕐᓄᑦ. ᐃᓕᓐᓂᐊᕝᕕᖃᖅᑐᑎᒃ ᓴᐃᓐᑦ ᔭᓐᔅᒥ, ᑯᐊᓄ ᐳᕈᒃᒥ ᕼᐊᐱ ᕙᓕ ᒎᔅ ᐸᐃᒥᓗ, ᓂᐅᕙᐅᓐᓚᓐᒥ, ᕼᐊᕐᓗ, ᐃᐊᓯᒃᔅᒥᓗ, ᔪᓇᐃᑕᑦ ᑭᖕᑕᒻᒥ, ᒥᒧᐊᕆᐊᓪ ᓯᓚᑦᑐᖅᓴᕝᕕᔾᔪᐊᖅ ᑐᙵᓴᐃᔪᖅ ᐃᓕᓐᓂᐊᖅᑎᓂᒃ ᐃᓕᓴᓯᒪᕐᔪᐊᑐᓂᓪᓗ ᓄᓇᕐᔪᐊᕐᒥᐅᓕᒫᓂᑦ, ᐱᖃᓯᐅᑦᑐᒋᑦ ᐅᖓᑖᓂ 19,000 ᐃᓕᓐᓂᐊᖅᑐᑦ 115ᓂᑦ ᒐᕙᒪᖃᑎᒌᖏᑦᑐᓂᑦ. ᒥᒧᐊᕆᐅᓪ ᐃᓚᐅᑎᑦᑎᔪᑦ ᓄᓇᓕᖃᑎᒌᖏᑦ ᐊᖏᖅᓯᒪᔪᑦ ᐱᕈᖅᓴᐃᔪᒪᓪᓗᑎᒃ ᑐᓴᐅᒪᔭᐅᑎᑦᑎᓗᑎᓪᓗ ᐃᓱᒪᓇᖏᑦᑐᓕᕆᓂᕐᓂᒃ ᐃᑲᔪᕐᓂᕐᒥᓂ ᖃᐅᔨᒪᔭᐅᔪᓄᑦ ᐊᔪᙱᓗᐊᖅᑐᓄᓪᓗ ᓄᓇᓕᓐᓂ, ᒐᕙᒪᖃᑎᒌᓂ ᓄᓇᕐᔪᐊᕐᒥᐅᓂᓗ.
ᓴᓇᔭᐅᓪᓗᓂ ᐃᓅᓗᓂ ᐳᐃᒍᔾᔭᐃᒃᑯᑕᐅᓗᓂ ᐃᓄᖁᑎᑦᑎᓐᓄᑦ ᑐᖁᓚᐅᖅᑐᓄᑦ ᓯᕗᓪᓕᖅᐹᒥ ᓄᓇᕐᔪᐊᕐᒥᐅᑦ ᐅᓇᑕᕕᔾᔪᐊᖅᑎᓪᓗᒋᑦ, ᒥᒧᐊᕆᐅᓪ ᓯᓚᑦᑐᖅᓴᕝᕕᔾᔪᐊᖓ ᐊᑐᐃᓐᓇᖏᑦᑐᒥᒃ ᐊᖏᖅᓯᒪᕗᖅ ᐃᓄᖏᓐᓄᑦ ᓂᐅᕙᐅᓐᓚᓐ ᓚᐸᑐᐊᓪᓗ ᖃᓄᐃᒋᐊᖅᐸᑦᑐᓂᓗ ᐃᖅᑲᓇᐃᔮᒥᑎᒍᑦ ᐃᒻᒥᓄᓪᓗ ᐱᔪᒪᔭᒥᓄᑦ. ᑕᑯᑦᑎᐊᒃᑲᓐᓂᕈᒪᓗᒋᑦ ᒥᒧᐊᕆᐅᓪᒃᑯᑦ, ᑕᑯᒍᒃ www.mun.ca.
-30-
ᐱᕙᓪᓕᐊᔪᓕᕆᔨᓄᑦ ᐅᖃᖃᑎᔅᓴᑦ:
ᑲᓴᓐᑐᕋ ᐃᐊᓕᐊᑦ
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥᒃᑯᑦ ᑐᓴᐅᒪᖃᑎᒌᓐᓂᕐᓄᑦ ᑎᓕᐅᕆᔨᖓᑦ
celliott@inuitcircumpolar.com
613-407-2642
ᔨᐊᕝ ᒍᕆᓐ
ᐊᐅᓚᑦᑎᔨ, ᑐᓴᐅᒪᖃᑎᒌᖕᓃᑦ, ᑎᑎᕋᕝᕕᖓ ᑐᒡᓕᐊᑕ (ᖃᐅᔨᓴᕐᓃᑦ), ᒥᒧᐊᕆᐅᓪ ᓯᓚᑦᑐᖅᓴᕝᕕᔾᔪᐊᖓ
jeffg@mun.ca
709-864-4073, 709-687-9243