ᓯᑎᐱᕆ 20, 2021 – ᐋᓐᑯᕆᔾ, ᐊᓛᔅᑲ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ICC) ᐊᓕᐊᓇᐃᒍᓱᒃᐳᑦ ᑐᓴᖅᑎᑦᑎᔭᕆᐊᒃᓴᖅ ᖃᕆᑕᐅᔭᒃᑯᑦ ᐃᓄᐃᑦ ᖃᓄᐃᙱᑦᑎᐊᕆᐊᖃᕐᓂᖏᓐᓄᑦ ᑲᑎᒪᓂᖕᒥᑦ ᓯᑎᐱᕆ 20−ᒥᑦ ᐅᑐᐱᕆ 26, 2021−ᒧᑦ. ᐅᑭᐅᖅᑕᖅᑐᒥᐅᑦ ᐃᓄᐃᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᔭᐅᖅᑎᑦ ᑲᑎᒪᔨᕋᓛᖏᑦ (CIHSC) ᐸᕐᓇᐃᓯᒪᓕᖅᑐᑦ ᑖᔅᓱᒥᖓ ᑲᑎᒪᓂᐅᓂᐊᖅᑐᒥᒃ ᐊᕐᕌᒎᒃ ᒪᕐᕉᒃ ᐅᖓᑖᓄᑦ.
ᐃᓅᓪᓗᑕ, ᖃᐅᔨᒪᔪᒍᑦ ᐃᓕᖅᑯᓯᑐᖃᖅᑎᒍᑦ ᑲᔪᓯᑎᑦᑎᓂᖅ ᓴᐳᔾᔨᓯᒪᓂᕐᒧᑦ ᐱᔾᔪᑕᐅᕙᖕᓂᖓᓂᒃ ᐃᒻᒥᓃᖏᓚᕿᓂᕐᒧᑦ,” ᑕᐃᒪᓐᓇ ICC−ᑯᑦ ᐃᒃᓯᕙᐅᑕᖓᑦ ᑎᓖ ᓵᒻᐳ ᑑᕈ. “ᐃᓄᐃᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᑎᒪᓂᖅ ᐃᓂᐅᕗᖅ ᒪᒃᑯᒃᑐᑦ ᐅᖃᖃᑎᒌᒍᓐᓇᖅᑐᑎᒃ ᐃᑲᔪᖅᑐᐃᕙᒃᑐᑦ ᐃᑲᔪᖅᑐᐃᒋᑦᑐᒡᓗ ᐱᓪᓗᒋᑦ ᐊᒃᑐᐊᓂᕆᔭᖏᑦ ᐃᓕᖅᑯᓯᖕᒧᑦ ᐃᑲᔪᖅᓯᔪᑦ ᐃᓂᖃᖅᑎᑕᐅᓂᕐᒧᑦ ᑐᙵᕕᒋᒍᓐᓇᕐᓗᒍ. ᒪᒃᑯᒃᑐᑦ ᐃᓚᐅᑎᑕᐅᕗᑦ ᐃᓐᓇᕐᓂᑦ ᖁᑦᑎᒃᑐᒦᓐᓂᖅᓴᓂᒡᓗ ᐃᓄᖕᓂᑦ ᓯᕗᓕᖅᑎᒋᔭᐅᔪᓂᑦ ᑐᓴᕈᒪᓪᓚᕆᒃᐸᒃᑐᑎᒃ ᑕᐅᑐᖅᑰᖅᑕᒥᓂᒃ ᐃᑲᔪᖅᑐᕈᒪᓪᓗᒋᓪᓗ ᑕᒪᑐᒧᖓ ᓇᒧᙵᐅᕙᓪᓕᐊᓂᕆᔭᐅᔪᒧᑦ ᑲᔪᓯᑎᑦᑎᔪᒪᓪᓗᑎᒃ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ ᓯᕗᒻᒧᐊᖅᑎᑦᑐᒪᓪᓗᒋᑦ ᑲᑐᔾᔨᓪᓗᑕ ᖃᓄᐃᙱᑦᑎᐊᕈᓐᓇᕐᓂᑦᑎᓐᓄᑦ. ᐱᒃᑯᒋᕙᒃᑲ ᐋᖅᑭᒃᓱᐃᓚᐅᖅᑐᑦ ᑕᒪᑐᒪᓂ ᑲᑎᒪᓂᕐᒥ ᐃᓱᒪᒃᓴᖅᓯᐅᑦᑎᐊᖅᓯᒪᓂᖏᓐᓄᑦ ᐱᓇᔪᐃᓐᓇᖅᐸᖕᓂᖏᓐᓄᓪᓗ ᑲᔪᓯᑎᑦᑎᓪᓗᑎᒃ 2021−ᒥ ICC−ᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᑎᒪᕐᔪᐊᕐᓂᕆᔭᐅᔪᒥᒃ.
2021−ᒥ ICC−ᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᑎᒪᓂᕐᒥᑦ ᐅᓪᓗᒥ ᐱᒋᐊᖅᐳᖅ 50 ᐅᖓᑖᓃᑦᑐᓂᒃ ᐃᓄᖕᓂᒃ ᓇᑭᑐᐃᓐᓇᖅ ᐃᓄᐃᑦ ᓄᓇᖓᓐᓂᙶᖅᑐᓂᒃ (ᐊᓛᔅᑲ, ᑲᓇᑕ, ᓱᑯᑕ, ᑲᓛᖦᖡᑦ ᓄᓈᓐᓂ). ᐱᖃᑕᐅᑎᑦᑎᕗᑦ ᒪᒃᑯᒃᑐᓂᑦ, ᐃᓐᓇᐃᑦ, CIHSC-ᑯᓐᓄᑦ ᐃᓚᒋᔭᐅᔪᑦ, ᐊᒻᒪ ICC−ᑯᑦ ᓯᕗᓕᖅᑎᖏᑦ. ᐅᖃᐅᓯᖅᑕᖏᑦ ᓂᐱᓕᐅᖅᑕᐅᑦᑎᐊᖃᑦᑕᕐᓂᐊᖅᑐᑦ ᐊᒥᖅᑳᕈᑕᐅᔪᓐᓇᕐᓂᐊᕐᒪᑕ ᐃᑲᔪᕐᓗᑎᒡᓗ ᖃᐅᔨᒪᔨᑕᕆᔭᐅᓗᑎᒃ ᐊᑐᐊᒐᓕᐅᖅᑎᓄᑦ, ᐱᓕᕆᐊᒃᓴᓄᑦ ᐊᐅᓚᑦᑎᔨᓄᑦ ᐊᓯᖏᓐᓄᓪᓗ ᓯᕗᓕᖅᑎᓄᑦ ᐃᓱᒪᒃᑯᑦ ᖃᓄᐃᙱᑦᑎᐊᖅᑐᓕᕆᔨᓄᑦ.
“ᓂᕆᐅᒃᐳᖓ ᑐᙵᓱᒃᑎᑦᑎᓛᕐᓂᓐᓂᒃ ᐃᓚᐅᔪᓕᒫᓂᒃ 2021−ᒥ ICC ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᑎᒪᕐᔪᐊᕐᓂᕐᒥ,” ᐅᖃᖅᑐᖅ CIHSC ᐃᒃᓯᕙᐅᑕᖅ ᒥᓂ ᒍᕆ. “ᑕᖅᑮᑦ 18 ᐊᓂᒍᖅᓯᒪᓕᖅᑐᑦ ᓄᑖᓂᓪᓗ ᓇᓂᓯᓯᒪᓕᖅᑐᒍᑦ ᐃᓄᓐᓂᒃ ᑲᑎᑎᕆᔾᔪᑎᔅᓴᓂᒃ ᐊᔾᔨᒌᓐᖏᑦᑐᓂᒃ ᓄᓇᓕᓐᓂ. ᑖᓐᓇ ᖃᕆᑕᐅᔭᒃᑯᑦ ᐋᖅᑭᒃᓯᒪᔪᖅ ᐊᑑᑎᖃᑦᑎᐊᕐᓂᖓᓂᒃ ᓄᓇᓕᖕᒥ ᓄᓇᕐᔪᐊᒥ ᖃᕆᑕᐅᔭᒃᑯᑦ ᖃᐅᔨᒪᓂᕐᓂ ᖃᐅᔨᒪᓂᖃᐅᖅᑐᖅ ᐅᖃᖃᑎᒋᔭᐅᑎᓪᓗᒋᑦ ᖃᕆᑕᐅᔭᒃᑯᑦ ᕕᕗᐊᕆᒥ ᒫᑦᓯᒥᓗ 2021. ᐱᓇᓱᐊᕈᓯᐅᓂᐊᖅᑐᓂᑦ ᑲᑎᒪᖃᑕᐅᔪᑦ ᓂᕆᐅᒍᓐᓇᖅᓯᓂᐊᖅᐳᑦ ᑲᑎᒪᕐᔪᐊᕐᓂᐅᓂᐊᖅᑐᒥᒃ ᐋᖅᑭᒃᓱᖅᑕᐅᓯᒪᔪᒥᒃ ᐃᓄᐃᑦ ᐱᔭᕆᐊᓕᖏᓐᓂᒃ ᐊᒻᒪ ᐃᓕᖅᑯᓯᕐᒧᑦ ᐱᒻᒪᕆᐅᒋᔭᖏᓐᓂᒃ.”
ᐱᖓᓱᑦ ᑲᑎᙵᔪᑦ 18−ᖑᓪᓗᑎᒃ ᐃᓄᐃᑦ ᐃᓚᐅᓛᖅᑐᑦ ᐊᕐᕕᓂᓕᖕᓂ ᐃᓕᓐᓂᐊᕐᓇᓂᒃ ᓯᑎᐱᕆ 20−ᒥ ᐅᑐᐱᕆ 26,2021−ᒧᑦ. ᐃᑲᕐᕋᓄᑦ ᐱᖓᓱᓄᑦ ᐃᓕᓐᓂᐊᕐᓇᐅᓛᖅᑐᖅ Zoom−ᒥ. ᑲᑎᒪᓂᖅ ᐊᑐᐃᓐᓇᐅᔪᖅ ᑲᓛᖦᖡᑦ ᓄᓈᓐᓂ, ᐃᓄᒃᑎᑐᑦ, ᐅᓛᓴᒃᑯᑦ, ᐊᒻᒪ ᖃᓪᓗᓈᑐᑦ ᐅᖃᓪᓚᓲᓄᑦ. ᑭᖑᓪᓕᖅᐹᖅ ᑲᑎᒪᓂᖅ ᐅᑐᐱᕆ 26−ᒥ ᑲᑎᑎᑦᑎᓂᐊᖅᐳᖅ ᑭᒃᑯᑐᐃᓐᓇᓂᒃ ᐃᓕᖅᑯᓯᑐᖃᕐᓄᑦ ᖁᕕᐊᓲᑎᖃᕐᓂᕐᒥᒃ ᐅᖃᖃᑎᒌᖕᓂᕐᒥᒡᓗ ᑭᖑᓪᓕᕐᒥ ᐱᓕᕆᐊᖑᔪᒃᓴᓂᒃ.
ᑲᑎᒪᓂᕐᒥ ᑕᑯᓂᐊᖅᑐᖅ ᐃᓚᒋᔭᐅᔪᓂᑦ ᓱᓕᕆᓂᐅᔪᓂᑦ ᓲᕐᓗ “ᓇᐹᖅᑐᖅ ᐃᓅᓯᖃᕐᓇᖅᑐᖅ”, “ᐃᓕᖅᑯᓯᕆᔭᖅ ᐱᖃᓗᔭᖅ”, “ᐱᕈᖅᓴᐃᓂᖅ ᐊᖓᔪᖅᑳᖑᓂᒃᑯᑦ ᐃᓄᐃᑦ ᐱᔾᔪᓯᖓᑎᒍᑦ ᐱᒻᒪᕆᐅᒋᔭᖏᓐᓂᑦ”, “ᐃᓕᖅᑯᓯᕐᒥᑦ ᐅᑎᖅᑎᑦᓯᓂᕐᒥᑦ”, ᖃᓄᐃᓕᐅᕈᑕᐅᔪᓐᓇᖅᑐᓂᓪᓗ ᐃᓅᓯᕐᒥᑦ ᑭᐱᓯᑎᑦᓯᑦᑕᐃᓕᒪᓂᕐᒧᑦ.
ᑖᓐᓇ ᑲᑎᒪᓂᖅ ᐱᔾᔪᑎᖃᖅᑐᖅ 2018−ᒥᑦ ᐅᑦᕿᐊᒡᕕᒃ ᓱᓕᓂᕋᕈᑎᒥᑦ, ᑎᓕᔭᐅᓯᒪᓪᓗᑎᒃ ICC−ᑯᑦ “ᑲᑎᒪᑎᑦᑎᓗᑎᒃ ᐅᑭᐅᖅᑕᖅᑐᒥᑦ ᐃᓄᐃᑦ ᑲᑎᒪᕕᒡᔪᐊᖕᓂᖏᓐᓂᑦ ᐋᓐᓂᐊᖃᖕᓇᙱᑦᑐᓕᕆᓂᖕᒧᑦ ᖃᓄᐃᙱᑦᑎᐊᖕᓂᖕᒧᓪᓗ ᐱᓕᕆᐊᖃᕐᓗᑎᒃ ᐱᓇᔪᖕᓂᖕᓂᑦ ᐱᒋᐊᖅᑕᓂᒡᓗ ᒥᑭᒡᓕᒋᐊᖅᑎᑦᑎᓇᓱᒃᑐᑎᒃ ᓄᖑᑎᕆᓇᓱᖕᓂᖕᒥᓪᓗ ᐋᓐᓂᐊᖃᖕᓇᙱᑦᑐᓕᕆᓂᖕᒧᑦ ᐊᔾᔨᒌᙱᑦᑑᑎᓂᑦ ᐋᓐᓂᕈᑕᐅᕙᒃᑐᓂᑦ ᐃᓚᒌᓄᑦ ᓯᕗᓪᓕᐅᔾᔭᒃᓴᓄᓪᓗ ᐃᓱᒪᒧᑦ ᖃᓄᐃᙱᑦᑎᐊᖕᓂᖕᒧᑦ, ᐅᐃᕆᓯᒪᓂᖕᒧᑦ, ᐃᒻᒥᓃᖅᑕᐃᓕᒪᑎᑦᑎᓂᖕᒧᓪᓗ.”
-30-
ᖃᐅᔨᒋᐊᕐᕕᒃᓴᑦ:
ᑭᐊᓕ ᐃᓂᖑᕗᒃ
ICC (ᐊᓛᔅᑲ)
+1 907-274-9058
kelly@iccalaska.org
ᑐᑯᒻᒥᙳᐊᖅ ᓇᐃᒃᔭᐃ ᐆᓪᓴᓐ
ICC (ᑲᓛᖦᖡᑦ ᓄᓈ)
+299 323632
tukumminnguaq@inuit.org
ᓯᑏᕙᓐ ᕼᐃᐊᓐᑐᕆ
ICC (ᑲᓇᑕ)
+1 613 668-1923
type88@post.com