ᓯᑎᐱᕆ 22, 2021 – ᐋᑐᐋ, ᐊᓐᑕᐅᕆᔪ – ICC-ᒃᑯᑦ ᑲᓇᑕᒥ ᐅᐱᒋᔭᖃᖅᐳᑦ ᑲᓇᑕᐅᑉ ᐊᖓᔪᖅᑳᕐᔪᐊᖓᓂᒃ ᓄᑖᙳᕆᐊᖅᑕᐅᒻᒪ ᑎᓕᔭᐅᔾᔪᑎᖓ ᑖᒃᑯᐊ ᓂᕈᐊᖅᑕᐅᓕᖅᑭᑎᓪᓗᒋᑦ ᒐᕙᒪᒃᑯᑦ ᐊᔾᔨᒌᒡᔫᒥᔪᓂᒃ ᐱᑎᑦᑎᓂᐊᖅᐳᑦ ᐱᔾᔪᑕᐅᓪᓗᐊᑕᖅᑐᓂᒃ ᐃᓄᖕᓄᑦ ᓄᓇᕐᔪᐊᓕᒫᒥ ᓲᕐᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ, ᐅᑭᐅᖅᑕᖅᑐᒥ ᑲᑎᒪᔨᕐᔪᐊᑦ, ᓄᓇᕐᔪᐊᕐᒥ ᑲᑐᔾᔨᖃᑎᒌᑦ ᑲᑎᒪᕐᔪᐊᕐᓂᕆᔭᖓᑦ, ᐊᒻᒪ ᓄᓇᖅᑲᑎᒌᑦ ᐱᔾᔪᑎᖃᕐᓗᑎᒃ ᐋᖅᑭᒋᐊᕈᑎᖃᕐᓂᕐᒥᒃ.
ᐅᑭᐅᖅᑕᖅᑐᒥ ᓂᕈᐊᕋᒃᓴᐅᔪᓂ, ᖁᕕᐊᓲᑎᒋᕙᕗᑦ ᓘᕆ ᐃᓪᓚᐅᖅ ᓵᓚᖃᓚᐅᕐᓂᖓᓄᑦ ᓄᓇᕗᒻᒥ ᓄᑖᒧᑦ ᐃᓱᒪᖅᓱᕈᓐᓇᕐᓂᕐᒧᑦ ᐱᓕᕆᖃᑎᒌᓄᑦ (NDP). ᐃᕚᓐ ᔫᓐᔅ ᓂᕈᐊᖅᑕᐅᓕᖅᑭᓚᐅᖅᑐᖅ ᓕᐳᕈ ᐹᑎᒃᑯᓐᓄᑦ ᓛᐸᑐᐊᒥ, ᑭᒡᒐᖅᑐᐃᓪᓗᓂ ᐃᓄᐃᑦ ᓄᓇᓕᖏᓐᓂᒃ ᓄᓇᑦᓯᐊᕗᒻᒥ. ᐸᓛᒃ-ᑯᐸᒃᑯᐊᖑᓂᕋᖅᑕᐅᔪᖅ ᓯᐅᓪᕕᐊ ᐴᕈᐱ, ᓵᓚᒃᓴᓚᐅᖅᑐᖅ ᐃᒃᓯᕚᕐᕕᒋᓂᐊᖅᑕᕐᒥᓂᒃ ᓄᓇᕕᖕᒥ ᓂᕈᐊᖅᑕᐅᕕᒋᓯᒪᔭᖓᓂ ᐊᐱᑎᐱ-ᐸᐃ-ᔭᐃᒻᔅ-ᓄᓇᕕᒃ−ᐄᔪᒥ.
“ᑕᑯᓐᓇᖅᑕᕗᑦ ᖃᓄᐃᓐᓂᐅᔪᑦ ᐱᐅᔪᒃᑯᑦ ᐃᓱᒫᓘᑕᐅᔪᓄᑦ ᐅᖃᐅᓯᕆᖃᑦᑕᖅᑕᑎᓐᓄᑦ ᓄᓇᕐᔪᐊᕐᒥᑦ ᐃᓄᓐᓄᑦ”, ᐅᖃᖅᑐᖅ ᒫᓂᑲ ᐃᐅᓪ-ᑲᓇᔪᖅ, ᐊᖓᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ. “ᐱᓕᕆᖃᑎᖃᐃᓐᓇᕐᓂᐊᖅᐳᒍᑦ ᒐᕙᒪᒃᑯᓐᓂᒃ, ᐱᓕᕆᖃᑎᖃᕐᓗᑕᓗ ᐊᓯᖏᓐᓂᒃ ᐱᓕᕆᖃᑎᒌᓂᒃ, ᓇᓗᙱᑦᑎᐊᕈᒪᓂᕐᒧᑦ ᐃᓱᒪᒋᔭᒃᓴᐃᑦ ᐅᖃᐅᓯᕆᕙᒃᑕᕗᑦ ᑭᒡᒐᖅᑐᖅᑐᒋᑦ ᐃᓄᐃᑦ ᑐᑭᓯᐅᒪᔭᐅᒐᓗᐊᕐᒪᖔᑕ, ᓄᓇᕐᔪᐊᕐᒥ ᑲᑐᔾᔨᖃᑎᒌᓂ, ᐅᑭᐅᖅᑕᖅᑐᒥ ᑲᑎᒪᔨᓂ, ᐊᒻᒪᓗ UNFCCC ᑲᔪᓯᓂᕆᕙᒃᑕᖓᓂᒃ, ᑕᐃᓯᔪᒪᓪᓗᑎᒃ ᖃᔅᓯᐊᕐᔪᖕᓂᒃ. ᑭᖑᓪᓕᕐᒥ ᓄᓇᕐᔪᐊᕐᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑲᑎᒪᓂᖅ − COP 26 – ᐱᒋᐊᓛᖅᑐᖅ ᓄᕕᐱᕆ 1-ᒥ ᒐᓛᔅᒎ, ᓯᑳᑦᓚᓐᒥ. ᑲᓇᑕ ᐱᖃᑕᐅᖃᑦᑕᖁᕙᕗᑦ ᐱᓪᓗᒍ ᖁᕝᕙᓯᑦᑐᒻᒪᕆᐅᒻᒪᑕ ᐅᕙᑦᑎᓐᓄᓕᒫᖅ. ᓂᕆᐅᒃᐳᖓ ᓄᑖᒥᒃ ᒥᓂᔅᑕᐅᖃᑎᒌᑦ ᐊᑎᖃᓕᕐᓂᐊᕐᓂᖏᓐᓂᒃ ᒫᓐᓇᕈᓗᒃ ᓄᑖᒥᒃ ᐊᕙᑎᓕᕆᓂᕐᒧᑦ ᒥᓂᔅᑕᒥᒃ ᓈᒻᒪᓈᑦᑎᐊᖁᓪᓗᒍ ᑕᒪᑐᒧᖓ ᐱᒻᒪᕆᐊᓗᖕᒧᑦ ᓄᓇᕐᔪᐊᓕᒫᒥ ᑲᑎᒪᓂᕆᔭᐅᔪᒧᑦ.”
-30-
ᖃᐅᔨᒋᐊᕐᕕᒋᒍᒃ:
ᓯᑏᕙᓐ Hᐊᓐᑐᕆ ICC (ᑲᓇᑕ) +1 613 668-1923 type88@post.com