ᓯᑎᐱᕆ 14, 2012 – ᐋᑐᔮ, ᐋᓐᑎᐅᕆᔪ – ᑭᖑᓂᖓᓂ ᐃᒃᐸᒃᓴᖅ ᖁᕕᐊᓲᑎᖃᓚᐅᖅᑎᓪᓗᑕ ᑲᓇᑕᒥ ᑕᑯᔭᒐᖃᕐᕕᐅᑉ ᐱᕙᓪᓕᐊᓂᖏᓐᓂᑦ ᑕᓪᓕᒪᒋᓕᖅᓱᓂᐅᒃ ᓇᓪᓕᐅᓂᖅᓯᐅᖅᑕᐅᓂᖓᑕ ᑲᑐᔾᔨᖃᑎᒌᑦᑐᑦ ᐊᑕᐅᓯᐅᖃᑎᒌᑦᓱᑎᒃ ᐊᖏᕈᑎᒋᓯᒪᔭᖓᑦ ᐱᔪᓐᓇᐅᑎᖏᓐᓄᑦ ᓄᓇᖃᖅᑳᖅᓯᒪᔪᑦ, ᐊᖓᔪᖅᑳᖓ ᑲᓇᑕᒥ ᐱᒋᐊᕐᓂᐅᑉ ᑕᒪᑐᒧᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ (ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᑲᓇᑕ) ᑐᒃᓯᕋᕐᒪᑕ “ᐱᓂᐊᕐᓂᖃᕐᓗᓂ” ᐱᔪᓐᓇᐅᑎᐅᔪᒧᑦ.
“ᑕᑯᒍᒪᒐᒃᑯ ᑲᓇᑕ ᐱᓕᕆᖃᑎᖃᖅᑎᓪᓗᒍ ᐃᓄᖕᓂᑦ ᐊᒻᒪ ᐊᓯᖏᓐᓂᑦ ᓄᓇᖃᖅᑳᖅᓯᒪᔪᓂᒃ ᓱᓕᔪᒥᒃ ᐊᑐᓕᖅᑎᑦᓯᓗᑎᒃ ᐊᖏᕈᑕᐅᓯᒪᔪᒥᒃ,” ᒥᔅᑕ ᓯᒥᔅ ᐅᖃᖅᑐᒥᓂᖅ. “ᐃᑉᐸᒃᓴᖅ ᐱᒻᒪᕆᐅᔪᒥᒃ ᖁᕕᐊᓲᑎᖃᓇᐅᖅᐳᒍᑦ ᐊᖏᕈᑎᒥᒃ ᐃᓕᑕᖅᓯᔪᒥᒃ ᓄᓇᑦᑎᓐᓂᒃ, ᓄᓇᐃᑦ ᐊᕕᑦᑐᖅᑕᐅᓯᒪᔪᓂᒃ, ᐊᑐᕈᓐᓇᖅᑐᓂᒃ ᓄᓇᒦᖔᖅᑐᓂᒃ, ᐊᒻᒪᓗ ᖃᐅᔨᒪᓂᕐᒥᒃ, ᐊᒻᒪᓗ ᐱᔪᓐᓴᐅᑎᑦᑎᓐᓂᑦ ᑖᒃᑯᓄᖓ ᐃᓕᑕᕆᔭᐅᔪᓂᒃ. ᐅᓪᓗᒥ ᐊᖏᕈᑕᐅᓯᒪᔪᒥᒃ ᓱᓕᓕᖅᑎᑦᓯᒋᐊᖃᕋᑦᑕ.”
ᖁᕕᐊᓲᑎᖃᖅᑎᓪᓗᒋᑦ, ᑎᐅᕆ ᐊᐅᓪᓚ, ᐊᖓᔪᖅᑳᖓ ᐃᓄᐃᑦ ᑕᐱᕇᑦ ᑲᓇᑕᒥ, ᑲᓇᑕᐅᑉ ᓄᓇᕐᔪᐊᒥ ᐃᓄᐃᑦ ᑎᒥᖁᑎᖓᓂᒃ ᑭᒡᒐᖅᑐᐃᔪᖅ, ᐅᖃᓕᒪᔪᒥᓂᖅ ᐅᐸᒃᓯᒪᔪᓄᑦ. “ᐃᓄᐃᑦ ᖃᐅᔨᒪᒻᒪᑕ ᓄᓇᖃᖅᑳᖅᓯᒪᔪᑦ ᓄᓇᕐᔪᐊᒥ ᐊᑐᖅᑐᓂᒃ ᐊᒥᓱᓂᒃ ᐊᒃᓱᕈᕈᑎᖃᖅᓱᑎᒃ ᐅᖃᕆᑦᓴᐅᑎᒋᕙᕗᓪᓗ ᑲᔪᓯᔪᒥᒃ ᐊᑕᐅᓯᐅᖃᑎᖃᕐᓂᕗᑦ ᑖᒃᑯᓇᖓᑦ.”
ᖁᕕᐊᓲᑎᖃᕆᐊᖅᑐᖅᓯᒪᔪᑦ ᑐᓴᕐᕕᖃᖃᓯᐅᑎᓐᓂᕐᒥᔪᑦ ᖃᐃᖁᔭᐅᓯᒪᔪᒥᒃ, ᓘᐃᔅ ᐃᐊᕕᓕᔅ ᐋᓐᑐᕌᑦ ᑲᓴᒪ, ᐊᖓᔪᖅᑳᖅ ᑲᑎᒪᔨᖏᓐᓄᑦ ᑲᓇᑕᒥ ᓄᓇᖃᖅᑳᖅᓯᒪᔪᑦ ᑎᒥᖁᑎᖓᓄᑦ ᑲᓚᒻᐱᐊᑉ ᐅᖃᐅᓯᖃᖅᑎᓪᓗᒍ ᖃᓄᖅ ᓄᓇᖃᖅᑳᖅᓯᒪᔪᑦ ᓄᓇᓕᖓᓂ ᖃᓄᐃᒻᒪᖔᑕ ᓇᓗᓇᙱᒍᑕᐅᓪᓗᓂ ᑐᐊᕕᕆᔭᐅᔭᕆᐊᖃᓕᕐᓂᖓᓂᒃ ᐊᑐᓕᖅᑎᑕᐅᓂᖓᑕ ᐊᖏᕈᑎᐅᑉ ᒫᓐᓇᐅᔪᒥᒃ. “ᓂᕆᐅᑦᑐᒍᖑᑦ ᐅᔭᕋᕐᓂᐊᕐᕖᑦ ᑲᒻᐸᓂᖏᑦ ᐊᓯᖏᓪᓗ ᓄᓇᓕᒋᔭᐅᔪᓂ ᐱᓕᕆᓂᖃᕈᒪᔪᑦ ᐅᔾᔨᕆᔭᐅᕙᓐᓂᐊᕐᓴᑕ ᑲᑐᔾᔨᖃᑎᒌᑦᑐᓄᑦ ᓄᓇᓕᐅᖃᑎᒌᓄᑦ ᐊᖏᕈᑎᓕᐊᖑᓯᒪᔪᖅ,”ᒥᔅᑕ ᓯᒥᔅ ᐅᖃᖅᑐᒥᓂᖅ. “ᐃᖅᑲᓇᐃᔭᖃᑎᖃᑦᓯᐊᕈᒪᒐᑦᑕ ᑲᓇᑕᒥ ᒐᕙᒪᐅᔪᓂᒃ ᐊᒻᒪᓗ ᐱᓕᕆᕕᐅᔪᓂᒃ ᐊᑦᓱᕈᕐᓇᖅᑐᑦ ᑲᒪᒋᓗᒋᑦ ᐊᑦᑐᐊᓂᓖᑦ ᑐᐊᕕᖅᑑᔮᖅᑐᑎᑐᑦ ᐅᑭᐅᖅᑕᖅᑐᒥ, ᑕᐃᒪᐃᒻᒪᑦ ᓂᕆᐅᑦᑐᒍᑦ ᑲᓚᒻᐱᐊ ᐊᒻᒪᓗ ᐅᔭᕋᕐᓂᐊᕐᕖᑦ ᐃᒃᓯᕚᖃᑎᒌᓪᓗᑎᒃ ᐅᖃᐅᓯᖃᕐᓂᐊᕐᓂᖏᓐᓂᒃ ᑲᓚᒻᐱᐊᒥ ᓄᓇᖃᖅᑳᖅᓯᒪᔪᓂᒃ ᐃᓗᓕᕆᔭᐅᖃᓯᐅᑎᔪᓗᑎᒃ ᐊᖏᕈᑎᒥ ᑭᖑᓪᓕᐅᓂᐊᖅᑐᒥᒃ.”
ᑖᒃᑯᐊ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑭᒡᒐᖅᑐᐃᔪᑦ ᐃᓄᖕᓂᑦ ᕋᓴᒥ, ᐊᓛᔅᑲᒥ, ᑲᓇᑕᒥ ᐊᒻᒪᓗ ᑲᓛᖡᑦ ᓄᓈᓂ ᐱᔾᔪᑎᓕᓐᓂᒃ ᓄᓇᕐᔪᐊᒥ ᐱᒻᒪᕆᐅᔪᓂᒃ ᐃᑲᔪᖅᑐᕐᓗᒋᓪᓗ ᐊᒻᒪᓗ ᖁᕕᐊᒋᓗᒍ ᐊᑕᐅᓯᐅᖃᑎᒌᓐᓂᖓᑦ ᐃᓄᐃᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ ᐱᔨᑦᓯᖅᑐᑦ ᑲᓇᑕᒥᐅᓄᑦ ᐃᓄᖕᓄᑦ ᓂᐱᒋᔭᐅᓪᓗᑎᒃ ᓄᓇᕐᔪᐊᒥ ᐱᔾᔪᑕᐅᔪᓂᑦ.