ᕖᕝᕗᐊᕆ 10, 2015 – ᐋᑐᐋ, ᑲᓇᑕ – ᐋᖤᐹᓯᑲᐃᓐ, ᐃᓄᐃᑦ, ᓵᒥ, ᐊᓕᐅᑦ, ᒍᕕ’ᓯᓐ, ᐃᓚᒋᔭᐅᓪᓗᑎᒃ ᓄᓇᖃᖅᑳᖅᓯᒪᔪᓄᑦ ᑭᒡᒐᖅᑐᐃᔩᑦ ᕋᓴᒦᙶᖅᓯᒪᔪᑦ ᑲᑎᒪᔪᑦ ᐋᑐᐋᒥ ᑕᕝᕙᓂ ᐱᓇᓱᐊᕈᓯᕐᒥ ᐃᓚᒋᓪᓗᓂᐅᒃ ᐊᖏᓂᖅᐸᐅᐊᖃᓯᐅᑎᑎᓪᓗᒍ ᐅᑭᐅᖅᑕᖅᑐᒥ ᑲᑎᒪᔩᑦ ᐱᓇᓱᐊᒐᖓᑕ ᖃᐅᔨᔭᐅᑦᓯᐊᖁᓪᓗᒋᑦ ᐊᑐᖅᐸᑦᑕᖓᑦ ᐆᒻᒪᕆᑦᑐᑦ ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ. ᑖᒃᑯᐊ ᐱᖃᑕᐅᔪᑦ ᐅᖃᐅᓯᓕᕆᔩᑦ, ᐊᑐᐊᒐᓕᕆᓂᕐᒧᑦ ᖃᐅᔨᒪᓕᑕᐃᑦ, ᐊᒻᒪᓗ ᐊᓯᖏᑦ ᓄᓇᖃᖅᑳᖅᓯᓚᒧᑦ ᐃᓄᐃᑦ ᐅᖃᐅᓯᓕᕆᕙᑦᑐᑦ.
ᑖᒃᑯᐊ ᑲᒪᔨᐅᑎᓪᓗᒋᑦ ᑲᑎᒪᓂᕐᒥ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᓚᖃᖃᓯᐅᑎᓪᓗᑎᒃ ᑕᓪᓕᒪᓂᒃ ᓄᓇᖃᖅᑳᖅᓯᒪᔪᓂᒃ ᐃᓄᖕᓄᑦ ᑎᒥᖁᑕᐅᔪᓂᒃ ᑖᒃᑯᓄᖓ ᐃᓚᒋᔭᐅᙱᓐᓇᕐᓂᐊᓕᕐᓗᑎᒃ ᐱᕕᖃᑕᐅᑎᑕᐅᔪᓄᑦ ᐅᑭᐅᖅᑕᖅᑐᒥ ᑲᑎᒪᔨᓄᑦ, ᐱᖓᓱᓄᑦ−ᐅᓪᓗᓄᑦ ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᑦ ᐅᖃᐅᓯᖅ ᐱᓪᓗᒍ ᖃᐅᔨᓴᕐᓂᕐᒧᑦ ᑲᑎᒪᓂᖅ ᐱᕕᖃᖅᑎᑦᓯᕗᖅ ᑐᙵᕕᒋᔭᐅᓪᓗᓂ ᑕᒪᒃᑮᓐᓄᑦ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᙱᓐᓄᑦ ᖃᐅᔨᓴᖅᑎᓄᓪᓗ ᕿᒥᕐᕈᓇᓐᓂᐊᕐᒪᑕ ᖁᑦᓯᑐᒥ−ᐅᑭᐅᖅᑕᑕᖅᑐᒥ ᖃᐅᔨᓴᐅᑎᒋᓗᒋᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᑦ, ᐊᒻᒪᓗ ᐊᒥᖅᑲᐅᑎᖃᕐᓗᑎᒃ ᐊᑐᖅᓯᒪᔭᕐᒥᓐᓂᑦ ᐊᒻᒪᓗ ᐊᑐᖅᑕᐅᒍᓐᓇᖅᑐᓂᑦ ᖃᐅᔨᔭᐅᑎᑦᓯᐊᕐᓗᒍ ᐆᒻᒪᕆᖕᓂᖓ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐊᑐᖅᑕᐅᕙᑦᑐᖅ ᐅᑭᐅᖅᑕᖅᑐᒥ
“ᐅᖃᐅᓯᕗᑦ ᑭᓇᐅᓂᑦᑎᓐᓂᑦ ᓇᓗᓇᐃᖅᓯᒻᒪᑦ – ᐱᖅᑯᓯᑦᑎᓐᓂᑦ, ᓇᑭᙶᖅᓯᒪᓂᑦᑎᓐᓂᑦ ᐊᒻᒪᓗ ᓯᕗᓂᒃᓴᑎᓐᓂᑦ,” ᐅᖃᖅᑐᒥᓂᖅ ᐅᑲᓕᖅ ᐃᔨᑦᓯᐊᖅ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐃᒃᓯᕙᐅᑕᖓᑕ ᒪᑐᐃᖅᓯᒍᑎᒥᓐᓂᒃ ᐅᖃᐅᓯᒥᓂᖏᑦ “ᑕᒪᒃᑯᐊ ᓯᕗᓕᖅᑎᓐᓃᙶᖅᒪᑕ ᕿᑐᕐᖓᑎᓐᓄᑦ ᐊᑐᖅᑕᐅᓪᓗᑎᒃ, ᐊᒻᒪᓗ ᕿᑐᕐᖓᑕ ᕿᑐᕐᖓᒋᓐᓄᑦ.”
ᒐᓐ ᐳᕆᑦ ᕆᐊᑦᑐ ᓵᒥᒃᑯᑦ ᓵᒥᒃᑯᑦ ᑲᑎᒪᔨᖏᓐᓃᖔᖅᓯᒪᔪᖅ ᐅᖃᖅᑐᒥᓂᖅ, “ᑖᓐᓇ ᑲᑎᒪᓂᖅ ᑐᙵᕕᒋᓕᐅᑎᓂᐊᖅᑐᖅ ᓈᒻᒪᓂᖅᓴᐅᖁᓇᖅᑐᖅ ᖃᐅᔨᓴᕈᑕᐅᓂᖓᑕ ᓵᒦᑦ ᐅᖃᐅᓯᖓᓐᓂᒃ ᕕᓐᓚᒻᒥ, ᓄᐊᐅᐃ, ᓱᕖᑕᓐ, ᐊᒻᒪᓗ ᕋᓴ ᖃᐅᔨᓴᖅᑕᐅᒍᒫᕐᓂᐊᖅᑐᑦ ᐅᖃᐅᓯᖏᑦ, ᐃᑲᔪᖅᓯᒐᔭᖅᑎᓪᓗᒋᑦ ᓯᕗᓂᖃᕈᑕᐅᓂᐊᖅᑐᑦ ᐊᑐᕋᑦᓴᐃᑦ ᐊᑐᖅᑕᐅᑲᓐᓂᕐᓂᐊᕐᒪᑕ ᐅᖃᐅᓯᖏᑕ ᐆᒻᒪᕆᖕᓂᖓ.”
ᐃᖅᑲᒋᔭᐅᑦᓯᐊᖅᑐᖅ ᓕᐅᓇ ᐊᒡᓘᑲᖅ, ᑲᓇᑕᒥ ᒥᓂᔅᑕ ᐊᕙᑎᓕᕆᓂᕐᒧᑦ, ᒥᓂᔅᑕ ᑲᓇᑕᒥ ᐅᑭᐅᖅᑕᖅᑐᒥ ᑮᓇᐅᔭᓕᐅᕋᓱᐊᕐᓂᖅ ᐱᕙᓪᓕᐊᑎᑕᐅᓂᖓᑕ ᐱᓕᕆᕕᖓᑕ ᐊᒻᒪᓗ ᒥᓂᔅᑕ ᐅᑭᐅᖅᑕᖅᑐᒥ ᑲᑎᒪᔨᓄᑦ, ᐅᖃᖅᑐᒥᓂᖅ ᑲᑎᒪᓂᖅ ᒪᑐᐃᖅᑕᐅᑎᓪᓗᒍ ᐃᒪᐃᓕᓪᓗᓂ: “ᑲᓇᑕᒧᑦ ᐊᕐᕌᒎᓐᓄᑦ−ᒪᕐᕉᓐᓄᑦ ᐅᑭᐅᖅᑕᖅᑐᒥ ᑲᑎᒪᔨᓄᑦ ᐃᒃᓯᕙᐅᑕᕆᔭᐅᓪᓗᖓ, ᐃᓕᖃᓯᐅᑎᓯᒪᔭᕗᑦ ᖃᓄᐃᖏᓯᐊᕐᓂᕐᒨᖓᔪᖅ ᐊᒻᒪᓗ ᐊᔪᖅᓴᕈᓐᓃᖁᓪᓗᒋᑦ ᐅᑭᐅᖅᑕᖅᑐᒥᐅᑕᐃᑦ ᓯᕗᓪᓕᐅᑎᓪᓗᒍ ᑕᑯᓐᓇᒐᕆᓪᓗᒍ ᐱᕙᓪᓕᐊᓂᖓᑦ ᐃᓄᐃᑦ ᐅᑭᐅᖅᑕᖅᑐᒥᐅᑕᐃᑦ. ᐅᑭᐅᖅᑕᖅᑐᒥ ᑲᑎᒪᔩᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᑦ ᐱᓕᕆᐊᖅ ᐃᑲᔪᖅᑐᐃᕗᖅ ᐊᒻᒪᓗ ᐱᕚᓪᓕᑎᑦᓯᑲᓐᓂᖅᐳᖅ ᐅᑭᐅᖅᑕᖅᑐᒥ ᓄᓇᓕᐅᔪᓂᑦ.”
ᑲᑎᒪᓂᕐᒥ ᐃᓅᓱᑦᑐᑦ ᐱᖃᑕᐅᓂᖓ ᓴᙱᔫᓂᖃᖅᐳᖅ. ᐃᓅᓱᑦᑐᑦ ᑭᒡᒐᖅᑐᐃᔩᑦ ᐅᑭᐅᖅᑕᑐᒦᙶᖅᓯᒪᔪᑦ ᑲᑎᑉᐳᑦ ᐅᓪᓛᖅ, ᐊᒻᒪᓗ ᐅᖃᐅᓯᒍᒫᕐᓂᐊᖅᑐᑦ ᐊᑕᖏᖅᑎᓪᓗᒍ ᐅᓪᓗᓗᒥᒃᑲᓐᓂᖅ.
ᐊᑐᓕᖁᔭᓕᐊᑦ ᓴᖅᑭᓂᐊᕐᒥᔪᑦ ᑲᑎᒪᓂᕐᒥ ᐃᑲᔪᖅᓯᓂᐊᖅᑐᑦ ᐋᖅᑭᓱᐃᒍᑎᒋᓗᒋᑦ ᓯᕗᒧᐊᒍᑎᑦᓴᐅᓂᐊᖅᑐᓂᒃ ᑖᒃᓱᒧᖓ ᐱᒋᐊᖅᑕᐅᒍᒪᔪᒧᑦ ᓂᕆᐅᒋᔭᐅᔪᖅ ᑲᔪᓯᓂᖃᕐᓂᐊᕐᓂᖓᑦ ᐅᑭᐅᖅᑕᖅᑐᒥ ᑲᑎᒪᔩᑦ ᐃᑲᔪᖅᑐᐃᓂᖓ, ᑭᖑᓂᖓᓂ ᒥᐊᓕᒐᐃᑦ ᓄᓇᖓᓂ ᑎᑎᕋᖅᑎ ᔮᓐ ᑭᐅᕆ, ᑭᖑᕝᕕᐅᑎᑉᐸᑦ ᐃᒃᓯᕙᐅᑕᐅᓂᕐᒧᑦ.