ᑎᓯᐱᕆ 1, 2015 – ᐱᐅᕆᔅ, ᕗᕌᓐᔅ – ᐅᑲᓕᖅ ᐃᔨᑦᓯᐊᖅ, ᐃᒃᓯᕙᐅᑕᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᐅᖃᐅᓯᓕᒥᓃᑦ ᓄᓇᕐᔪᐊᒥ ᓄᓇᖃᖅᑳᖅᓯᒪᔪᑦ ᒥᒃᓵᓄᑦ, ᓄᓇᕐᔪᐊᒥ ᓯᕗᓕᖅᑏᑦ, ᐃᓄᖃᐅᖅᑐᖅ ᑭᒃᑯᑐᐃᓐᓇᕐᓂᑦ ᐊᒻᒪᓗ ᖃᐃᖁᔭᐅᓯᒪᔪᓂᒃ ᒪᑐᐃᖅᑕᐅᑎᓪᓗᒍ ᓄᓇᕐᔪᐊᒥ ᓄᓇᖃᖅᑳᖅᓯᒪᔪᑦ ᑲᑎᒪᖃᑕᐅᕕᖓᓂ UNFCCC COP 21−ᒥᐱᐅᕆᔅᒥ ᐱᐅᕆᔅᒥ. ᐃᔨᑦᓯᐊᖅ ᐊᒻᒪᓗ ᐊᐃᓪ ᔭᕗ, ᐊᖓᔪᖅᑳᖓ ᓵᒥ ᑲᑎᒪᔩᑦ ᐃᒃᓯᕙᐅᑕᖃᑦᑕᖅᑑᒃ ᐅᑭᐅᖅᑕᖅᑐᒥ ᓄᓇᕐᔪᐊᒥ ᓄᓇᖃᖅᑳᖅᓯᒪᔪᑦ ᐱᓪᓗᒋᑦ ᑲᑎᒪᓂᕐᒥ ᓯᓚᐅᑉ ᐊᓯᔾᔨᕐᓂᖓᑕ ᒥᒃᓵᓄᑦ.
(ᐋᕗᕆᑲ, ᐅᑭᐅᖅᑕᖅᑐᖅ, ᐊᐃᓴ, ᐅᐊᖕᓇᖅᐸᓯᐊ ᐊᒥᐅᕆᑲᐅᑉ, ᓛᑎᓐ ᐊᒥᐅᕆᑲ ᐊᒻᒪᓗ ᑭᐅᕐᕋᐲᐊᓐ, ᑕᕆᐅᑉ ᐊᑭᐊ ᐊᒻᒪ ᕋᓴ ᐊᒻᒪᓗ ᑲᓇᓐᓇᖅᐸᓯᐊ ᐃᐅᕈᑉ) ᑭᒡᒐᖅᑐᐃᔩᓪᓗ ᐱᐅᕆᔅᒦᑦᑐᑦ ᖃᐅᔨᒃᑲᐃᔭᖅᑐᖅᓯᒪᑦᓱᑎᒃ ᐊᑦᑐᐃᓂᕐᓗᒍᑕᐅᔪᑦ ᓯᓚᐅᑉ ᐊᓯᔾᔨᕐᓂᖓᓄᑦ ᓄᓇᖁᑎᑦᓯᓂ ᖃᐅᔨᒪᒋᐊᑦᓯᐊᕈᒪᓪᓗᑎᓪᓗ ᐊᖏᖃᑎᒌᒍᑦ ᐋᔩᖃᑎᒌᖑᑕᐅᓂᖓ ᐊᔪᐃᓐᓇᕐᓂᖃᕋᓗᐊᕐᒪᖔᖅ ᐊᑑᑎᖃᕐᓗᓂᓗ ᓄᖑᑉᐹᓪᓕᖁᓪᓗᒍ ᓄᓇᕐᔪᐊᒥ ᐳᔪᕐᓗᒃ CO2 ᓯᐊᒻᒪᐸᑦᑐᑦ ᐊᒻᒪᓗ ᓯᓚᐅᑉ ᓂᓪᓚᓱᓐᓂᖓ ᖁᕝᕙᕆᐊᖁᓪᓗᒍ 2 ᓂᓪᓚᓱᓐᓂᕐᒧᑦ ᓯᓚᓐᓂᐅᑎᑎᒍᑦ.
ᐃᔨᑦᓯᐊᖅ ᐅᖃᖅᑐᒥᓂᖅ, “ᐃᓗᓯᖓ ᐊᒻᒪᓗ ᖃᓄᐃᖏᑦᓯᐊᓂᖓ ᐃᓄᐃᑦ ᐊᒻᒪᓗ ᓵᒥᒥᐅᑦ ᐊᑕᓂᖃᕐᓂᐅᓴᑐᐃᓐᓇᕐᒪᑕ ᐅᑭᐅᖅᑕᖅᑑᑉ ᐊᕙᑎᖓᓄᑦ ᐱᓗᐊᖅᑐᒥ ᓄᓇᒧᑦ, ᐃᒪᕐᒥᐅᑕᐃᑦ ᐊᕙᑎᖓᓄᑦ ᐊᐳᒻᒧᑦ ᓯᑯᒧᓪᓗ. ᐃᓄᐃᑦ ᐊᒻᒪᓗ ᓵᒥᒥᐅᑦ ᐃᓱᒫᓘᑎᖃᓪᓚᕆᒻᒪᑕ ᐊᑐᓕᖅᑐᒥᒃ ᐊᑦᑐᐃᓂᕐᓗᒍᓐᓇᖅᑐᓂᓪᓗ ᓯᓚᐅᑉ ᐊᓯᔾᔨᕐᓂᖓᓄᑦ ᐱᖅᑯᓯᓂ ᐱᓪᓗᒍ, ᐃᓅᖃᑎᒌᓐᓂᖓ ᐊᒻᒪᓗ ᒪᑭᒪᔾᔪᑎᑎᒍᑦ ᖃᓄᐃᖏᑦᓯᐊᓂᖏᑦ ᑎᑎᕋᖅᓯᒪᔪᑎᒍᓪᓗ ᑎᒥᓕᓐᓄᑦ ᐃᓄᓐᓄᑦ ᐱᔪᓐᓇᐅᑎᓂᑦ. ᑏᓴᕝᕙ 8−ᖑᓕᖅᐸᑦ ᐊᐅᓚᑦᓯᓛᖅᑐᒍᖑᑦ ᐅᑭᐅᖅᑕᖅᑐᒥ ᐅᓪᓗᕆᑎᑕᐅᔪᒥᒃ ᑐᙵᓱᑦᑎᑉᐸᑦᓯᓗ ᐃᓘᓐᓇᓯ” ᐃᔨᑦᓯᐊᖅ ᐃᓚᓕᐅᔾᔨᓪᓗᓂ, “ᓄᓇᖃᖅᑳᖅᓯᒪᔪᑦ ᐊᑦᑐᐊᓂᖃᐃᓐᓇᕐᒪᑕ ᓄᓇᒧᑦ ᐃᓘᓐᓇᐃᓂ ᓄᓇᓕᒻᒥᓐᓂ ᓄᓇᕐᔪᐊᒥ. ᐊᖑᓇᓱᐊᖅᑎᐅᔪᒍ , ᐃᖃᓗᒐᓱᐊᖅᑏᑦ, ᓄᓇᔭᑐᖅᑎᐅᓪᓗᑕᓗ. ᐃᓅᓯᖃᖅᑐᒍᖑᑦ ᓯᑯᓕᒻᒥ, ᐊᐳᑎᓕᒻᒥ, ᓄᓇᑐᔪᒥ, ᓯᔾᔭᖏᓐᓂ, ᓇᐹᖅᑐᓕᓐᓂ, ᖃᖅᑲᓕᓐᓂ, ᓯᐅᕋᓕᓐᓂ, ᓄᓇᕋᓕᓐᓂᓗ.”
ᐊᐃᓪ ᔭᕗ, ᓵᒥᒦᙶᖅᓯᒪᔪᖅ ᑲᑎᒪᔨᖏᑕ ᐊᖓᔪᖅᑳᖓ ᐃᖅᑲᐅᒪᒋᖏᔭᓕᒃ ᒪᑐᒥᖓ, “ᐅᓪᓗᒥ ᐊᑐᖅᑕᐅᕙᑦᑐᑦ ᓲᕐᓗ ᑐᒃᑐᓂᑦ ᐊᐅᓪᓚᑎᖃᓲᑦ, ᐃᖃᓗᒐᓱᐊᓲᑦ, ᐊᖑᓇᓱᐊᓲᑦ ᑲᑎᖅᓱᐃᕙᑦᓱᑎᓪᓗ ᐊᓐᓇᐅᒪᔾᔪᑎᒃᓴᓂᑦ ᐆᒪᔪᓂᑦ ᓵᒥᒥᐅᑦ ᐱᖅᑯᓯᖓ. ᐱᖅᑯᓯᑐᖃᒃᑯᑦ ᐆᒪᓇᓱᐊᕈᓐᓇᕐᓃᑦ ᑐᙵᕕᒋᓪᓚᕆᑉᐸᐅᑉ ᓵᒥᒥ ᐱᖅᑯᓯᖏᑎᒍᑦ ᑕᒪᓐᓇᑑᓪᓗᓂᓗ ᐃᓅᓯᖓ ᓵᒥᒥᐅᓄᑦ ᐊᒥᓱᓄᑦ. ᐅᑭᐅᖅᑕᖅᑐᖅ, ᐱᖃᑕᐅᓪᓗᓂ ᐱᖅᑯᓯᑐᖃᕐᒥᒍᑦ ᓵᒥᒥ ᐃᓅᓯᓖᑦ, ᓱᑲᑦᑐᒥᒃ ᐊᓯᔾᔨᐸᓪᓕᐊᔪᓂᒃ ᑕᑯᒻᒪᑕ ᑕᐃᒪᐃᓚᐅᖅᓯᒪᖏᑦᑐᓂᒃ.”
ᐅᑲᓕᖅ ᐃᔨᑦᓯᐊᖅ ᐅᖃᓕᒪᑦᓱᓂ ᐃᓄᒃᑎᑐᑦ ᐊᒻᒪᓗ ᖁᔭᓐᓇᒦᖅᓱᒋᑦ ᐃᓘᓐᓇᑎᒃ ᓄᓇᖃᖅᑳᖅᓯᒪᔪᑦ ᐱᓕᕆᖃᑦᑕᖅᓯᒪᔪᑦ ᐊᒃᓱᕈᖅᓱᑎᒃ ᐱᐅᕆᔅᒥ ᐅᖃᐅᓯᖃᕈᒪᓪᓗᑎᒃ ᑕᐃᒃᑯᓂᖓ ᖃᐅᑕᒫᑦ ᐃᓅᓇᓱᐊᖅᑐᓂᑦ ᐊᑦᑐᓂᕐᓗᑕᐅᓯᒪᓕᖅᑐᓂᒃ ᓯᓚᐅᑉ ᐊᓯᔾᔨᕐᓂᖓᓄᑦ. ᐃᔨᑦᓯᐊᖅ ᓇᓗᓇᐃᖅᓯᔪᒥᓂᖅ ᐃᒪᐃᒻᒪᑦ, “ᓄᓇᖃᖅᑳᖅᓯᒪᔪᑦ ᑕᒫᓃᒻᒪᑕ ᐱᔾᔪᑎᖃᖅᓱᑎᒃ ᐊᔾᔨᒌᓐᓂᓕᓐᓂᒃ ᐃᓱᒫᓘᑎᒥᓐᓂᒃ”. ᓄᓇᖃᖅᑳᖅᓯᒪᔪᑦ ᑐᓴᖅᑎᑦᓯᔭᖅᑐᖅᓯᒪᒻᒪᑕ ᑐᓛᕙᑦᑐᑦ ᐊᒻᒪᓗ ᐊᓯᐊᓂᒃ ᐃᓂᑖᖅᓯᒪᓕᖅᑐᓂᑦ ᐆᒪᔪᓂᒃ, ᓄᓇᒥ ᐱᕈᖅᑐᖅᑕᖃᐃᕈᑦᑐᒥᒃ, ᓇᐹᖅᑐᐃᕈᑎᓕᖅᑐᒥᒃ, ᑕᕆᐅᑉ ᐆᑎᕐᓇᖅᑐᖃᐅᓕᕐᓂᖓᓂᒃ ᐊᒻᒪᓗ ᓂᕈᒥᑦᓯᕙᓪᓕᐊᑐᐃᓐᓇᖅᑐᒥᒃ, ᑕᕆᐅᖅ ᐃᒪᖅᑐᓯᕙᓪᓕᐊᓂᖓᓂᒃ, ᓯᓚᐅᑉ ᐊᐅᓚᓂᕐᒥᒍᑦ ᐊᓯᔾᔨᕐᓂᖃᓪᓚᕆᓐᓂᖓᓂᒃ , ᓯᒃᑯᖃᑦᑕᕈᓐᓃᖅᑐᒥᒃ ᐊᓯᔾᔨᖅᑐᓂᓪᓗ ᐆᒪᔪᖃᐅᖅᑐᓂ−ᐱᔾᔪᑕᐅᓪᓗᓂ ᓯᓚᐅᑉ ᐊᓯᔾᔨᕐᓂᖓ.
ᐃᔨᑦᓯᐊᖅ ᖃᐅᔨᒃᑲᐃᔪᒥᓂᖅ ᓄᓇᖃᖅᑳᖅᓯᒪᔪᑦ ᐃᓚᒋᔭᐅᖃᑦᑕᕆᐊᖃᕐᒪᑕ ᐋᖅᑭᐅᒥᒍᑕᐅᒍᓐᓇᖅᑐᓂᒃ ᑲᒪᔪᖃᓕᕋᐃᑉᐸᑦ,” ᒐᕙᒪᒧᑦ ᓯᕗᓕᖅᑏᑦ ᓄᓇᖃᖅᑳᖅᓯᒪᔪᑦ, ᐃᖅᑲᓇᐃᔭᕐᕕᒻᒦᙶᖅᓯᒪᔪᑦ ᐊᒻᒪᓗ NGO−ᑯᑦ ᐱᓕᕆᖃᑎᒌᒋᐊᖃᕐᒪᑕ ᓄᓇᓕᒃ ᒪᓕᓪᓗᒍ ᓯᕗᓕᖅᑎᓄᑦ ᓄᓇᓕᔾᔪᐊᒦᙶᖅᓯᒪᔪᓄᑦ. ᓯᓚᐅᑉ ᐊᓯᔾᔨᕐᓂᖓ ᐊᕕᑎᑦᓯᖏᑦᑐᖅ ᐅᕙᑦᑎᓐᓂᒃ— ᐊᑕᐅᓯᐅᖃᑎᒌᓕᖅᑎᑦᓯᔪᖅ ᓯᕗᓂᖃᖅᑐᒍᑦ ᐃᓄᐃᑦ ᓄᓇᒥᓐᓂ ᐃᓅᓇᓱᐊᑦᓯᐊᖁᓪᓗᒋᑦ, ᐃᑲᔪᕐᓗᓂᒋᑦ ᕿᑐᕐᖓᓂ ᓄᓇᕐᔪᐊᕐᓗ ᐊᑲᐅᓂᖅᓴᐅᖁᓪᓗᒍ ᐃᓅᓯᖃᕐᕕᒋᓗᒍ.”
ᐃᔨᑦᓯᐊᖅ ᓯᕗᓕᖅᑎᒋᔭᐅᔪᖅ ICC−ᑯᓐᓄᑦ ᑲᑎᒪᔭᖅᑐᖅᓯᒪᖃᑕᐅᓪᓗᓂ ᐋᔩᖃᑎᒌᖕᓂᕐᓄᑦ ᐱᐅᕆᔅᒥ ᑲᑎᓯᔪᒥᓂᐅᓪᓗᓂᓗ ᒥᐊᓕᒐᐃ ᓄᓇᖓᑕ ᑎᑎᕋᖅᑎᖓᓂᒃ, ᓵᓕ ᔨᐅᕗᓪᒥ ᓄᕕᐱᕆ 30−ᐅᑎᓪᓗᒍ, ᑲᑎᖃᑎᖃᖅᑐᒥᓂᐅᓪᓗᓂᓗ ᑲᓇᑕᒥ ᒥᓂᔅᑕᖓᓂᒃ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑉ ᐊᓯᔾᔨᕐᓂᖓᓄᑦ ᑳᑐᕆᓐ ᒪᑲᓇᒥᒃ ᐅᓪᓗᒥᐅᖅᑲᐅᔪᖅ, ᑲᑎᖃᑎᖃᕈᒫᕐᓂᐊᖅᓱᓂᓗ ᐅᐃᕕᒃᑯᑦ ᐊᖓᔪᖅᑳᖓᓂᒃ, ᕗᕌᓐᓱᐊ ᕼᐊᓪᓚᓐᑎ ᒥᒃ ᑎᓯᐱᕆ 2−ᒥ. ᕿᒥᕐᕈᓇᕐᓂᐊᕐᓗᒍ ᐅᓇ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ COP 21 ᓯᓚᐅᑉ ᐊᓯᔾᔨᕐᓂᖓᓄᑦ ᐃᓂᓪᓚᑦᓴᐃᒍᑎ ᐸᐃᑉᐹᖅ, ᑕᑯᓗᒍ ᐅᕙᓂ www.inuitcircumpolar.com. ᓄᓇᕐᔪᐊᒥ ᓄᓇᖃᖅᑳᖅᓯᒪᔪᑦ ᐱᕕᖃᖅᑎᑕᐅᕕᖓ ᑕᕝᕘᓇ ᐅᕝᕙᓘᓐᓃᑦ ᑐᑭᓯᒋᐊᒃᑲᓂᕐᕕᑦᓴᖅ ᐱᓕᕆᐊᑉ ᒥᒃᓵᓄᑦ ᓄᓇᖃᖅᑳᖅᓯᒪᔪᑦ ᒥᒃᓵᓄᑦ ᑕᑯᓗᒍ ᐅᓇ http://www.iipfcc.org/cop21/