ᒪᐃ 7, 2019 – ᕈᕙᓂᒥ, ᐱᓐᓚᓐ – ᒥᐊᓕᒐᐃᑦ ᓄᓇᖓᓐᓂ ᐊᖏᓚᐅᓐᖏᑦᑐᑦ ᐊᖏᖃᑎᒌᒍᑎᑦᑎᓐᓂ ᐱᐅᖅᓱᐊᖅᑕᐅᖁᓪᓗᒋᑦ ᐅᖃᐅᓯᓕᕆᓂᖅ ᑕᐃᒫᒃ ᐅᑭᐅᖅᑕᖅᑐᒥ ᑲᑎᒪᔨᖏᑦ ᕕᓂᔅᒥᐅᑦ ᐃᔅᓯᕙᐅᑕᖓᓐᓂ ᓴᖅᑭᖅᑕᐅᓚᐅᖅᑐᖅ ᐅᓂᒃᑳᕐᓂᑦ, ᐅᓛᓯᐊᒥ.
“ᐊᖏᓐᖏᑦᑐᑦ ᐅᖃᐅᓯᕐᒥᑦ “ᓯᓚ ᐊᓯᔾᔨᐊᓪᓕᐊᓂᖓᓐᓂ” ᓇᓗᓇᐃᖅᑕᐅᓂᖓᓐᓄᑦ ᑲᔪᓯᑎᑕᐅᓐᖏᒻᒪᑦ,” ᐅᖃᖅᑐᓂ ᑕᓕ ᓵᒻᐳ ᑐᕈ ᓯᓚᕐᔪᐊᒧᑦ ᐃᔅᓯᕙᐅᑕᕆᔭᐅᔪᖅ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᓐᓄᑦ ᑲᑎᒪᔨᖏᓐᓄᑦ, ᑭᒡᒐᖅᑐᐃᓪᓗᑎᑦ 165,000−ᓂᒃ ᐃᓄᓐᓂᑦ ᑲᓛᖡᑦ ᓄᓈᓂ, ᑲᓇᑕᒥ, ᐊᓛᔅᑲ ᓯᑳᑦᑕᒥᓗ.
“ᑕᒪᓐᓇ ᓯᕗᓪᓕᖅᐹᑦᑎᐊᖅ ᐅᑭᐅᖅᑕᖅᑐᒥ ᑲᑎᒪᔩᑦ ᑲᔪᓯᓐᖏᑦᑐᑦ ᓇᓗᓇᐃᖅᓯᓂᖏᓐᓂ ᐊᕐᕌᒎᒃ ᒪᕐᕉᒃ ᐃᔅᓯᕙᐅᑕᐅᑎᓪᓗᒍ, ᐊᒻᒪᓗ ᓄᖅᑲᖅᑎᑖᓗᑐᐃᓐᓇᖅ ᓯᕗᓂᑦᑎᓐᓂ ᐊᖏᖃᑎᒌᒍᒪᔭᕗᑦ ᐱᔾᔪᑎᒋᓪᓗᒋᑦ ᐃᓗᓕᖏᑦ,” ᓵᒻᐳ ᑐᕉ ᐅᖃᖅᑐᓂ. “ᐃᓄᐃᑦ ᐊᑦᑐᖅᑕᐅᓪᓚᕆᒻᒪᑕ ᓯᓚ ᐊᓯᔾᔨᕐᓂᖓᓐᓄᑦ ᖃᐅᑕᒫᑦᑎᐊᖅ.”
“ᒥᐊᓕᒐᐃᑦ ᓄᓇᖓᓐᓃᑦᑐᑦ ᒐᕙᒪᒃᑯᑦ ᐃᓱᒫᓘᑎᖃᕐᒥᒻᒪ ᓇᒻᒥᓂ ᖃᐅᔨᓴᕈᒪᓂᖏᓐᓂ, ᐅᖃᐅᓯᖏᓐᓂ ᓈᒻᒪᓴᓐᖏᑦᑐᐊᓘᓪᓗᑎᑦ, ᐃᓄᖁᑎᕗᑦ ᑕᑯᓐᓇᖅᓯᒪᒻᒪᑕ ᐊᔾᔨᐅᖏᑦᑐᓂᑦ ᐊᑦᑐᖅᑕᐅᓂᖏᓐᓂ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ. ᐅᕙᒍᓪᓕᑭᐊᖅ ᐅᓪᓗᒥᐅᔪᕐᓗ ᑕᑯᕙᑦᑕᕗᑦ?”
ᐊᐃᕙᓚᐅᖅᑎᓪᓗᒋᑦ ᐱᔭᕇᕐᓂᐊᓚᐅᖅᓯᒪᔪᑦ ᕉᕙᓐᐊᒥ ᓇᓗᓇᐃᖅᑕᐅᓂᖏᓐᓂ, ᒥᐊᓕᒐᕐᓂᑦ ᐊᖏᖃᑦᑕᓚᐅᓐᖏᒻᒪᑕ ᐅᖃᐅᓯᕐᒥᑦ ᐅᖃᖅᓯᒪᓂᖓᓐᓂ ᐱᒋᐊᕈᑎᖃᕆᐊᖃᓪᓚᕆᑦᑎᓪᓗᑕ ᓯᓚ ᐊᓯᔾᔨᐸᓪᓕᐊᓂᖓᓐᓂ, ᐊᑦᑐᐃᓂᖃᓕᕇᖅᑐᒥᑦ ᐃᓄᓐᓂᑦ ᐊᓯᖏᓐᓂᓪᓗ ᓄᓇᖃᖅᑳᖅᑐᒥᓂᕐᓂᑦ ᓄᓇᓕᓐᓂ ᐅᑭᐅᖅᑕᖅᑐᒥ.
ᓇᓗᓇᐃᖅᓯᓐᖏᓐᖔᕐᓗᑎᖅᑲᐃ, ᒥᓂᔅᑕᐃ ᐊᖏᖃᑎᒌᒍᓐᓇᖅᑐᑦ ᓴᖅᑭᖅᑕᐅᓗᓂ 7−ᖓᓃᑦᑐᖅ ᑎᑎᕋᖅᓯᒪᔪᖅ ᑲᑐᔾᔨᖃᑎᒌᓪᓗᑎᑦ ᐅᖃᐅᓯᖃᓐᖏᑦᑐᒥᑦ ᐅᓗᕆᐊᓇᕐᓂᕋᐃᔪᒥᑦ ᐊᔅᓱᕉᑕᐅᔪᓂᓪᓘᓐᓃᑦ ᐅᑭᐅᑦᑕᖅᑐᒥ. ᑭᓯᐊᓂᓕ, ᑎᑎᕋᖅᓯᒪᔪᖅ ᕕᓂᔅ ᐃᔅᓯᕙᐅᑕᖓᓐᓂ ᓴᖅᑭᕐᓗᒍ ᐃᓱᐊᓂ ᑲᑎᒪᒌᕐᖓᑕ ᐅᖃᓚᐅᖅᑐᖅ “ᐊᒥᓲᓂᖅᓴᐅᔪᒍᑦ ᑕᒪᑐᒥᖓ ᓯᓚᐊ ᐊᓯᔾᔨᕐᓂᖓᓐᓂ ᐊᔅᓱᕉᑎᖃᖅᑐᐃᓐᓇᐅᒐᑦᑕ ᐅᑭᐅᖅᑕᖅᑐᒥ,” ᐅᖃᖅᑐᓂᓗ “ᑕᒪᓐᓇ ᑐᐊᕕᕐᓇᖅᓯᓂᕋᖅᑐᓂᐅᒃ” ᑲᒪᒋᔭᕆᐊᖃᓕᕋᑦᑎᒍ.
“ᑕᒪᓐᓇ ᑲᒪᒋᔭᐅᒐᓱᓐᓂᖓ ᒥᐊᓕᒐᕐᓄᑦ ᐊᓪᓚᕕᓕᕆᓂᖏᓐᓄ ᑕᐃᑲᓂ 2017−ᒥ ᕕᐅᐹᒃᔅᒥ ᓇᓗᓇᐃᓯᓯᒪᒐᓗᐊᖅᓪᓗᒋᑦ ᐃᓱᐊᓂ ᒥᐊᓕᒐᐃᑦ ᐃᔅᓯᕙᐅᑕᖓ ᐅᖃᓚᐅᖅᓯᒪᔪᖅ ᐊᑦᑐᖅᑕᐅᓂᖏᓐᓄᑦ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐅᑭᐅᖅᑕᖅᑐᒦᑦᑐᖅ ᐊᒻᒪᓗ “ᐱᒋᐊᕆᐊᕈᑎᖃᕆᐊᖃᓕᕋᑦᑕ,” ᐅᖃᓚᐅᖅᑐᖅ ᒫᓂᑲ ᐃᐅᓪ-ᑲᓇᔪᖅ, ᐊᖏᔪᖅᑲᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ. ᖁᓅᕐᒥᓇᖅᑑᒐᓗᐊᖅ ᓇᓗᓇᐃᖅᓯᖏᓐᓂᖏᓐᓂ ᑭᓯᐊᓂᓕ ᐃᔅᓯᕙᐅᑕᖓ ᐃᓕᓴᖅᓯᓯᒪᔫᒐᓗᐊᖅ ᑐᐊᕕᕐᓇᓕᕐᓂᖓᓐᓂ ᑕᒪᓐᓇ ᓯᓚ ᐊᓯᔾᔨᕐᓂᖓᓐᓄᑦ ᑲᒪᒋᔭᐅᒋᐊᖃᕐᓂᖓᓐᓂ.”
ᐱᑕᖃᔅᓴᐃᓐᓇᕆᐊᖃᓐᖏᓐᓂᖓᓐᓂ ᐃᔅᓯᕙᐅᑕᐅᑉ ᐅᖃᐅᓯᖓᓐᓂ ᐅᖃᓚᐅᕐᒥᔪᖅ ᐱᒻᒪᕆᐅᓂᖓᓐᓂ 2018−ᒥ ᒐᕙᒪᒃᑯᑦ ᐃᓗᐊᓂ ᑲᑎᒪᔨᓂᑦ ᓯᓚ ᐊᓯᔾᔨᐸᓪᓕᐊᓂᕐᓂᖓᓐᓂ ᐅᓂᒃᑳᕐᒥᑦ ᐱᖃᑕᐅᓇᓱᓐᖏᓐᓂᖏᓐᓂ ᑕᒪᒃᑯᓂᖓ ᓯᓚᕐᔪᐊᑉ ᐆᓇᖅᓯᕙᓪᓕᐊᓕᕐᓂᖓᓐᓂ 1.5−ᓴᐃᓪᓯᐊᔅᒥᑦ.
“ᐅᖃᐅᓯᐅᓚᐅᖅᓯᒪᒐᓗᐊᖅᑎᓪᓗᒋᑦ ᑕᐃᑲᓂ ᒥᐊᓕᒐᕐᓂᑦ ᐊᓪᓚᕕᓕᕆᔨᖏᓐᓂ ᓯᓚ ᐊᓯᔾᔨᐸᓪᓕᐊᓂᕐᓂᖓᓐᓂ “ᓱᓕᓐᖏᑦᑐᐊᓗᒃ” ᓴᐃᓇᒃᑯᓐᓄ ᑕᐃᒪᐃᓕᔭᒥᓂᐅᓂᕋᖅᑐᓂ, ᐃᓄᐃᑦ ᑕᑯᕙᑦᑐᓪᓕ ᐊᓯᔾᔨᖅᑐᓂᑦ ᓯᓚᒥ ᖃᐅᑕᒫᑦᑎᐊᖅ,” ᔭᐃᒻᔅ ᓯᑳᑦᔅ ᐅᖃᖅᑐᓂ, ᐊᖏᔪᖅᑲᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ (ICC) ᐊᓛᔅᑲ. “ᐊᒻᒪᓗ ᑕᒪᒃᑯᐊ ᓄᓇᓕᓂ ᐊᔅᓱᕈᑎᖃᖃᑦᑕᖅᑐᑦ ᐊᓐᓇᐅᒪᓇᓱᐊᖅᑐᑎᑦ ᑕᒪᓐᓇ ᐱᔾᔪᑎᒋᓪᓗᒍ.”
“ᐃᓱᒫᓗᒃᑲᑦᑕ ᐃᓱᒫᓗᒋᔭᐅᓐᖏᓗᐊᕐᓂᖏᓐᓂ ᐅᑭᐅᖅᑕᖅᑐᒥ ᑲᑎᒪᔨᖏᑦᑕ ᐱᔪᓐᓇᕐᓂᖏᑦ ᑕᐃᑲᓂ ᓯᕗᓕᖅᑎᖃᖅᑎᓪᓗᒋᑦ ᓴᓐᖏᔪᐊᓗᓐᓂᓪᓗ ᐅᖃᐅᓯᖃᕆᐊᖃᖅᑎᓪᓗᒋᑦ,” ᐅᖃᓚᐅᖅᑐᖅ ᕼᐊᔭᒪᕐ ᑕᓪ, ᐊᖏᔪᖅᑲᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓛᖡᑦ ᓄᓈᓂ. “ᐅᖃᐅᓯᑐᐃᓐᓇᕐᒥᑦ ᑕᒪᓐᓇ ᐱᓐᖏᒻᒪᑦ − ᐊᑯᓂᒧᑦ ᑕᒪᓐᓇ ᐊᓐᓇᐅᒪᓇᓱᐊᕐᓂᐅᒻᒪᑦ ᐱᖅᑯᓯᕗᑦ ᓄᓇᓖᓪᓗ,” ᐅᖃᓚᐅᖅᑐᖅ ᓕᐅᐸᑉ ᑕᐃᖓᓐ, ᐊᖏᔪᖅᑳᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐅᓛᓵᒧᑦ. “ᐱᖅᑯᓯᕗᑦ ᐃᓅᓪᓗᑕ ᑲᒪᒻᒪᑦ 40%−ᒥᑦ ᐅᑭᐅᖅᑕᖅᑐᒥ ᐊᒻᒪᓗ ᐱᔭᕆᐊᖃᓪᓚᕆᑦᑕᑎᓐᓂ ᒐᕙᒪᒃᑯᓐᓪᓂ ᐱᓕᕆᖃᑎᖃᕐᓗᑎᒃ ᐅᕙᑦᑎᓐᓂ ᑕᒪᑐᒥᖓ ᐅᓗᕆᐊᓇᖅᑐᒥ ᓯᓚ ᐊᓯᔾᔨᐸᓪᓕᐊᓂᖓᓐᓂ ᐃᓄᐃᑦ ᓄᓇᖓᓐᓂ, ᐅᑭᐅᖅᑕᖅᑐᒥᓪᓗ ᐊᖏᕐᕋᑎᓐᓂ.”
ᓯᓚ ᐊᓯᔾᔨᐸᓪᓕᐊᑎᓪᓗᒍ ᐱᔾᔪᑎᑑᓐᖏᒻᒪᑦ ᑕᒪᓐᓇ ᐃᓄᓐᓃᑦᑐᑦ ᐅᑭᐅᖅᑕᖅᑐᒥ. ᒥᓂᔅᑕᐃᑦ ᑲᑎᒪᑎᓪᓗᒋᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑕᐃᔭᐅᔪᖅ ᐅᑭᐅᖅᑕᖅᑐᒥ ᑲᑎᒪᔩᑦ “ᑲᒪᓚᐅᖅᑐᑦ ᐃᓚᖏᓐᓂ ᐱᒻᒪᕆᐅᔪᑦ ᐅᕙᑦᑎᓐᓄᑦ: ᓂᕐᔪᑎᓂᑦ ᐊᐅᓚᑦᑎᓂᖅ ᓂᕿᔅᓴᖃᑦᑎᐊᕐᓂᓪᓗ; ᐃᓗᖁᑏᑦ ᐃᓄᓕᕆᓂᕐᒧᓪᓗ ᐱᔨᑦᑎᕋᐅᑏᑦ ᐱᑕᖃᓐᖏᓗᐊᖅᑐᑦ; ᑎᒥᑦᑎᒍᑦ ᐊᕙᑎᑦᑎᒍᓪᓗ ᐃᓱᒫᓘᑏᑦ, ᒪᑯᐊᓗ ᐃᒻᒥᓃᖃᑦᑕᖅᑐᑦ; ᐊᒻᒪᓗ ᐱᖅᑯᓯᕗᑦ ᐅᖃᐅᓯᕗᓪᓗ ᐸᖅᑭᔭᐅᔭᕆᐊᖃᕐᓂᖏᓐᓂ.
“ᑕᒪᒃᑯᐊ ᐊᑲᐅᓐᖏᓕᐅᕈᑎᐅᔪᑦ ᑲᒪᒋᔭᕆᐊᖃᓕᕋᑦᑎᒍ ᐅᑭᐅᖅᑕᖅᑐᒦᑦᑐᑦ ᓄᓇᖃᖅᑳᖅᑐᒥᓃᑦ ᓄᓇᓕᖏᓐᓂ.” ᐅᖃᖅᑐᓂ ᔭᐃᒻᔅ ᓯᑳᑦᔅ ᐊᓛᔅᑲᒥ. “ᑕᒪᒃᑯᐊ ᓈᓚᒋᐊᖃᓪᓚᕆᓕᕋᑦᑎᒍ ᐋᖅᑭᒐᓱᐊᕐᓗᒋᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐊᒻᒪᓗ ᐊᓯᖏᓐᓄ ᐱᖃᑕᐅᖏᓐᓇᖅᑐᓄᑦ ᑲᒪᒋᔭᐅᓕᕐᓗᑎᑦ. ᐊᑐᕆᐊᖃᓕᖅᑕᕗᑦ ᓄᓇᖃᖅᑳᖅᑐᒥᓃᑦ ᖃᐅᔨᒪᓂᖏᑦ ᑕᐃᒫᒃ ᓯᕗᓪᓕᖅᐹᒥ ᐱᖁᔨᓚᐅᖅᓯᒪᒻᒪ ᐅᑭᐅᖅᑕᖅᑐᒥ ᑲᑎᒪᔨᖏᑦ.”
ᐃᓄᐃᑦ ᓯᕗᓕᖅᑏᑦ ᐅᖃᓚᐅᕐᖓᑕ ᐊᖏᖃᑎᒌᑦᑐᐃᓐᓇᐅᓪᓗᑎᑦ ᑕᒪᑐᒥᖓ ᐊᔅᓱᕉᑕᐅᔪᓂᒃ, ᒫᓐᓇᓗ ᐊᑕᐅᓯᐅᓗᑕ ᑲᒪᒋᔭᕆᐊᖃᓕᕋᑦᑎᒍ ᐅᓗᕆᐊᓇᖅᓯᒻᒪᑦ ᓯᓚ ᐊᓯᔾᔨᐸᓪᓕᐊᓂᖓᓐᓂ ᐊᒻᒪᓗ ᐅᐃᔾᔮᕐᓂᖓᓪᓗ ᐊᓯᖏᓐᓄ ᐃᖏᕐᕋᕙᓪᓕᐊᓕᕐᓂᖓᓐᓄᑦ. ᑕᒪᓐᓇ ᓇᓗᓇᐃᖅᑕᐅᔭᕆᐊᖃᓪᓚᕆᑦᑐᖅ ᐅᑦᕿᐊᕕᒃ ᓇᓗᓇᐃᖅᑕᐅᓯᒪᔪᓂᒃ ᑲᔪᓯᑎᑕᐅᓚᐅᖅᑐᓂᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᑎᒪᔭᖅᑐᖅᓯᒪᔪᓄᑦ ᐊᓛᔅᑲᒥ ᔪᓚᐃᖑᓚᐅᖅᑐᒥ 13−ᖓᓐᓂ ᑲᑎᒪᕕᔾᔪᐊᑎᓪᓗᒋᑦ. ᑕᒪᓐᓇ ᐊᑕᐅᓯᐅᓂᖅ ᐱᒻᒪᕆᐅᒻᒪᑦ ᐃᓄᓐᓄᑦ ᐃᓄᓕᒫᓄᓪᓗ ᐅᑭᐅᖅᑕᖅᑐᒦᑦᑐᓄᑦ, ᐊᒻᒪᓗ ᐊᓯᖏᓐᓄᑦ ᓯᓚᕐᔪᐊᒧᑦ.
ᓯᓚ ᐊᓯᔾᔨᐸᓪᓕᐊᓂᖓᓅᖓᑎᓪᓗᒍ, ᐃᓄᐃᑦ ᓯᕗᓕᖅᑏᑦ ᐅᖃᖃᑦᑕᕐᖓᑕ, ᐅᑭᐅᖅᑕᖅᑐᒥ ᐊᑦᑐᐃᓂᖃᕐᓂᐅᓴᑐᐃᓐᓇᕐᖓᑦ ᓇᒥᑐᐃᓐᓇᑦᑎᐊ ᓯᓚᕐᔪᐊᓕᒫᒥ.