ᑎᓯᐱᕆ 13, 2015 –ᐋᑐᐋ – ᑖᓐᓇ ᓯᓚᐅᑉ ᐊᓯᔾᔨᕐᓂᖓᓄᑦ ᐊᖏᖃᑎᒌᒍᑦ ᐃᖅᑲᓇᐃᖅᑕᐅᒋᐊᖅᐳᖅ ᐅᓪᓗᒥ ᐱᐅᕆᔅᒥ “ᐊᑐᖅᑕᐅᓚᐅᖅᓯᒪᔪᓂ ᐊᑐᖅᓯᒪᓂᐊᓕᕐᒥᔪᖅ,” ᐅᖃᖅᑐᒥᓂᖅ ᐅᑲᓕᖅ ᐃᔨᑦᓯᐊᖅ, ᐃᒃᓯᕙᐅᑕᖓᑦ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ “ᐃᓕᑕᕆᒐᓗᐊᖅᑕᕗᑦ ᑐᑭᓯᓪᓗᒍ ᑲᑐᔾᔨᖃᑎᒌᒍᑕᐅᓂᖓᑕ ᑎᑎᕋᖅᑕᐅᓯᒪᔪᑦ.” ᐅᖃᓕᖅ ᓯᕗᓕᖅᑐᒥᓂᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔭᖅᑐᖅᓯᒪᔪᑦ ᑲᑎᒪᓂᖓᓂ ᑲᑐᔾᔨᖃᑎᒌᑦᑐᑦ ᓄᓇᓕᐅᖃᑎᒌᑦ ᐊᑐᕋᑦᓴᖓᓂᒃ ᑲᑎᒪᓂᕐᒥ ᓯᓚᐅᕐ ᐊᓯᔾᔨᕐᓂᖓ ᐱᓪᓗᒍ COP 21 ᐅᖃᖃᑎᒌᒍᑕᐅᑎᓪᓗᒍ ᐱᐅᕆᔅᒥ ᐊᒃᓱᕈᖅᓱᑎᓪᓗ ᐃᖅᑲᓇᐃᔮᖃᖅᓯᒪᓂᖓ ᑲᑎᒪᔭᖅᑐᖅᓯᒪᔪᓕᒫᑦ ᓂᐱᖃᖅᑎᑦᓯᔪᑦ ᐃᓅᖃᑎᒥᖕᓂᑦ.
“ᑕᒪᒃᑯᐊ ᐋᔩᖃᑎᒌᖕᓂᐅᔪᑦ ᐊᔪᕐᓇᕐᒪᕆᑦᓯᒪᔪᑦ ᑭᓯᐊᓂ ᓄᖑᖏᓐᓂ ᐱᕚᓪᓕᖃᑦᑕᖅᑐᒍᑦ.,” ᐅᖃᖅᑐᒥᓂᖅ. “ᑭᓯᐊᓂᓕ ᐆᑦᑐᖅᑕᐅᓂᕐᓚᕆᐅᓂᐊᖅᑐᖅ ᑐᓂᓯᒪᓂᖃᕐᓂᖏᑎᒍᑦ ᐱᔪᓐᓇᐅᑎᖏᓐᓄᑦ ᓄᓇᖃᖅᑳᖅᓯᒪᔪᑦ, ᐅᖃᐅᓯᖃᕐᓗᓂ ᑲᒪᒋᔭᐅᖁᓪᓗᒍ ᓯᓚᐅᑉ ᐊᓯᔾᔨᕐᓂᖓ ᐊᑦᑐᐃᓂᕐᓗᓐᓂᕆᔭᖏᓪᓗ ᐱᓪᓚᕆᑦᑐᑦ ᐅᑭᐅᖅᑕᖅᑐᒥ ᓄᓇᓕᐅᔪᓂ”. “ᑲᓇᑕ ᑕᑯᑦᓴᐅᑎᑦᓯᔪᒥᓂᖅ ᓯᕗᓕᕐᓂᕐᒥᓐᓂᒃ ᐃᑲᔪᖅᑐᖅᑕᐅᓂᕐᒥᓂᓪᓗ ᐅᑭᐅᖅᑕᖅᑐᒥ ᐃᓱᒫᓘᑕᐅᔪᑦ ᐅᖃᖃᑎᒌᒍᑕᐅᓂᖏᓐᓂ.” ᐃᔨᑦᓯᐊᖅ ᐅᖃᐅᓯᖃᕆᓪᓗᓂ, “ᐃᖅᑲᓇᐃᔭᖃᑎᒋᓂᐊᖅᑕᕗᑦ ᑲᓇᑕ, ᑲᓛᖡᑦ ᓄᓈᑦ, ᐊᓛᔅᑲ ᐊᒻᒪᓗ ᓱᑯᑦᑲ ᑎᑭᐅᑎᖁᓪᓗᑕ ᑲᔪᓯᑎᑦᓯᐊᕐᓗᑎᒍᓗ ᑐᓂᓯᒪᓂᖃᕐᕕᕗᑦ, ᐃᑲᔪᖅᑐᐃᓂᖅ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᒃ ᐅᑭᐅᖅᑕᖅᑐᓗ ᓂᒡᓚᓱᐃᓐᓇᖅᑎᓪᓗᑎᒍ.”
ᐃᓕᑕᕆᔭᖃᕐᓂᖅ ᐱᔪᓐᓇᐅᑎᖏᓐᓂᒃ ᓄᓇᖃᖅᑳᖅᓯᒪᔪᑦ ᐱᒻᒪᕆᐅᓪᓗᓂ ᐱᔾᔪᑕᐅᒻᒪᑦ ᑕᒪᓐᓇᓗ ᐱᐅᕆᔅᒥ ᐊᑕᐅᓯᐅᖃᑎᒌᒍᑕᐅᓪᓗᓂ ᓇᓗᓇᙱᒍᑕᐅᒻᒪᑦ ᐱᓇᓱᐊᖃᑎᒌᖕᓂᖏᓐᓂᑦ ᓄᓇᕐᔪᐊᒥ ᓄᓇᖃᖅᑳᖅᓯᒪᔪᑦ ᐅᖃᖃᑎᒌᑎᓪᓗᒋᑦ. “ᑲᔪᓯᑦᓯᐊᕈᑎᒋᓂᐊᖅᑕᑎᓐᓂᒃ ᕿᓂᖅᓯᒪᐅᔭᖅᐳᒍᑦ ᑐᙵᕕᐅᓂᐊᖅᑐᒥᒃ ᐊᖏᖃᑎᒌᒍᑎᒧᑦ, ᒪᓕᒐᓕᕆᓂᖅᑎᒎᖅᓯᒪᓂᐊᖅᑐᒥᒃ. ᕿᓱᐊᓂ ᐅᖃᐅᓯᖅ ᐱᖃᓯᐅᔾᔭᐅᑎᑕᐅᕗᖅ ᑕᒪᒃᑮᓐᓂ ᐊᖏᖃᑎᒌᒍᑕᐅᓂᐊᖅᑑᓂᒃ ᐃᓱᒪᓕᐅᕈᑕᐅᓂᐊᖅᑐᒥ ᑎᑎᕋᖅᓯᒪᔪᒥ ᐊᒻᒪᓗ ᐊᖏᖃᑎᒌᒍᑦ ᐃᖅᑲᒋᔭᖃᕐᓗᓂ ᐊᔾᔨᒌᙱᓐᓂᖃᐅᖅᑐᓂᒃ ᐊᒻᒪᓗ ᐊᔾᔨᒌᖏᑦᑐᓂᒃ ᐱᔪᓐᓇᐅᑎᖃᕐᓂᖏᓐᓂᒃ ᓄᓇᖃᖅᑳᖅᓯᒪᔪᑦ ᐃᓄᐃᑦ. ᑲᖔᕈᑎᕗᑦ ᒪᔾᔭ ᐅᖃᐅᓯᐅᑉ ᐱᓕᕆᔾᔪᑕᐅᓕᖏᓐᓂᖓᑕ ᑎᑎᕋᖅᓯᒪᓂᖓᒍᑦ ᐊᖏᖃᑎᒌᒍᑎᐅᑉ. ᐱᔭᕆᐊᖃᓪᓚᕆᖕᒪᑦ ᐱᔪᓐᓇᐅᑎᖏᑎᒍᑦ ᓄᓇᖃᖅᑳᖅᓯᒪᑦ ᐃᓕᑕᕆᔭᐅᓯᒪᓂᖓ, ᓴᐳᑎᔭᐅᓯᒪᓂᖓ ᐊᒻᒪᓗ ᐃᖅᑲᒋᔭᐅᑦᓯᐊᕐᓂᖏᑕ ᐊᒥᓲᓂᖅᓴᓄᑦ ᑎᒥᓖᑦ ᐃᓄᐃᑦ ᐱᓪᓗᒋᑦ ᐱᔪᓐᓇᐅᑎᖏᓐᓂ ᐊᑐᖅᑕᐅᒍᒪᓂᖏᑕ ᐊᖏᖃᑎᒌᒍᑎᒥ,” ᐅᖃᖅᑐᒥᓂᖅ ᐃᔨᑦᓯᐊᖅ.
ICC−ᑯᑦ ᓂᓪᓕᐊᒍᑎᖃᕐᓂᕆᕗᑦᑕᐅᖅ ᑮᓇᐅᔭᓕᕆᓂᕐᒥᒃ ᓯᓚᒧᑦ ᐃᓕᑦᑐᓂᕐᒧᑦ ᑲᒪᔾᔪᑎᓅᖓᔪᓪᓗ ᐱᓕᕆᐊᒃᓴᓄᑦ ᐊᒻᒪᓗ ᐃᓕᑕᕆᔭᐅᓂᖓᑕ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖓᑕ. ᐱᐅᕆᔅᒥ ᐊᖏᖃᑎᒌᒍᑎᓕᐊᖅ ᐅᖃᖅᓯᒪᕗᖅ, “ᑲᑐᔾᔨᖃᑕᐅᔪᑦ ᐃᓕᑕᖅᓯᓂᖓᑦ ᐃᓕᑦᑐᕐᓂᕐᒧᑦ ᐊᐅᓚᔾᔭᒋᐊᕈᑎᑦ ᒪᓕᒋᐊᖃᕐᓂᖏᓐᓂᒃ… ᓯᕗᓕᖅᑕᐅᓗᑎᓪᓗ ᐊᑐᐃᓐᓇᐅᔪᓄᑦ ᓈᒻᒪᓂᖅᐹᓄᑦ ᖃᐅᔨᓴᖅᑐᓕᕆᓂᒃᑯᑦ ᑭᓪᓕᓯᓂᐊᕐᓂᒃᑯᑦ, ᐊᒻᒪᓗ, ᓈᒻᒪᒐᐃᑉᐸᑦ, ᐱᖅᑯᓯᑐᖃᒃᑯᑦ ᖃᐅᔨᓴᒪᓂᖅ, ᖃᐅᔨᒪᓂᖏᑦ ᓄᓇᖃᖅᑳᖅᓯᒪᔪᑦ….”
ICC−ᑯᑦ ᑲᒪᔨᐅᒍᒪᖃᑦᑕᖅᓯᒪᕗᑦ ᐊᒥᓱᐊᖅᑎᖅᓱᑎᒃ ᐱᔪᑎᒋᓪᓗᒍ ᐃᓱᒫᓗᑕᐅᓂᖓ ᐃᑲᔪᖅᓯᔭᐅᖁᓪᓗᒍ ᓄᓇᕐᔪᐊᒥ ᓯᓚᓐᓂᐅᑎᑎᒍᑦ ᓯᓚ ᓂᒡᓚᓱᓐᓂᖓ ᐅᕙᓂᓕᖁᓪᓗᒍ 1.5°C ᐅᓇᐅᖏᖔᖅᑎᓪᓗᒍ ᓄᓇᕐᔪᐊᒥᐅᓄᑦ ᐊᖏᖅᑕᐅᓂᖅᓴᖅ 2.0°C ᓯᓚᓐᓂᐅᑎᑎᒍᑦ. ᑭᖑᓪᓕᖅᐹᖑᓗᓂ ᑎᑎᕋᖅᑕᐅᓯᒪᓂᖏᑕ ᐅᖃᖅᓯᒪᓂᖏᑦ ᓄᓇᓕᐅᖃᑎᒌᑦ ᑐᓂᓯᒪᓂᖃᖅᑐᑦ“…ᑎᒍᒥᐊᕐᓂᐊᕐᓗᓂᔾᔪᒃ ᓄᓇᕐᔪᐊᒥ ᓯᓚᓐᓂᐅᑎᑎᒍᑦ ᑎᑭᐅᑎᔭᐅᒍᒪᔪᖅ ᐊᑖᓃᒋᐊᕐᓗᓂ 2 °C ᓯᓚᓐᓂᐅᑎᑎᒍᑦ ᖁᑦᓯᓂᖅᓴᒐᓛᒃ ᓯᕗᓪᓕᕐᓄᑦ−ᐃᖅᑲᓇᐃᔭᕐᕕᐅᔪᓄᑦᑎᑭᐅᑎᕙᑦᑕᖓᑕ ᐊᒻᒪᓗ ᐱᓇᓱᐊᕐᓃᑦ ᑭᓪᓕᖃᖅᑎᒍᒪᓪᓗᒍ ᓂᒡᓚᓱᓐᓂᖅ 1.5 °C−ᒥᒃ ᓯᓚᓐᓂᐅᑎᑎᒍᑦ.”
“ᐃᓄᐃᑦ ᓂᓪᓕᐊᒍᑎᖏᑦ ᑐᓴᖅᑕᐅᒻᒪᑕ ᐋᔩᖃᑎᒌᓐᓂᐅᔪᓂ ᐃᓪᓗᕈᓯᕐᓂ, ᑐᓴᖅᑕᐅᔪᑦ ᓱᓪᓗᑯᑖᖃᖅᑐᓂ, ᐊᒥᓱᓂ, ᐅᐸᒍᑎᓯᒪᔪᓄᑦ ᑕᒪᑐᒧᖓᓕᖓᔪᓕᕆᔪᓂ, ᐊᖅᑯᑎᖏᓐᓂ ᐱᐅᕆᔅ. ᐃᓄᐃᑦ ᓂᓪᓕᐊᓂᖏᑦ ᑐᓴᖅᑕᐅᕗᑦ ᐊᒥᓱᓂ ᑲᑐᔾᔨᖃᑎᒌᖕᓂᕐᒦᑦᑐᓂ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᐃᑲᔪᖃᑎᒌᑦᑐᓄᑦ ᐃᖕᒥᓐᓄᑦ ᐊᔪᐃᓐᓇᕈᑎᒋᓪᓗᒍᓗ ᐊᑕᐅᓯᕈᖅᑎᑕᐅᓯᒪᓂᕆᔭᕆᐊᓕᖓ ᐱᔪᓐᓇᐅᑎᖏᑕ ᓄᓇᖃᖅᑳᖅᓯᒪᔪᑦ, ᐊᑑᑎᖃᓪᓚᕆᖕᓂᖏᑕ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ, ᑭᖒᒪᔭᐅᓂᖏᑕᓗ ᐃᓕᑦᑐᕆᐊᖃᕐᓂᕐᒧᑦ ᐊᒻᒪᓗ ᓱᕐᕋᐃᖅᑑᑎᑦᓯᓂᕐᒧᑦ ᐊᐅᓚᔾᔭᐃᓂᐅᖁᔭᐅᔪᑦ ᐃᖅᑲᓇᐃᔮᕆᓗᒍ ᑎᑭᐅᑎᔭᕆᐊᖃᕋᓱᐊᕐᓂᖅ ᑕᕝᕗᖓ 1.5°C ᓯᓚᓐᓂᐅᑎᑎᒍᑦ.”
“ᐱᕚᓪᓕᕐᓂᖃᖅᓯᒪᔫᒐᓗᐊᖅ, ᑭᓯᐊᓂ ᓱᓕ ᐱᓕᕆᐊᒃᓴᖅᑕᖃᕐᒪᑦ ᐃᖅᑲᓇᐃᔮᕆᔭᕆᐊᓕᖕᓂᒃ ᓇᐅᑦᓯᑐᑦᓯᐊᕐᓂᐊᕐᓗᒍ ᐅᑭᐅᖅᑕᖅᑑᑉ ᐊᕙᑎᖓ ᐃᓄᐃᓪᓗ ᐱᖅᑯᓯᖓ” ᐃᔨᑦᓯᐊᖅ ᐅᖃᖅᑐᒥᓂᖅ. “ᐃᓄᐃᑦ ᓇᐅᑦᓯᖅᑐᕆᐊᖃᓪᓚᕆᒻᒪᑕ ᐊᔪᐃᓐᓇᕐᕕᖃᕐᓗᑎᓪᓗ ᐃᑲᔪᖅᑐᐃᖃᑕᐅᒍᒪᓂᕐᒥᓐᓂᒃ ᓄᓇᕐᔪᐊᒥ ᐱᓇᓱᐊᕐᓂᐅᔪᓂ ᐃᑯᓪᓚᖁᓪᓗᒋᑦ ᐳᔪᕐᓗᐃᑦ ᓄᐊᑉᐸᓪᓕᐊᓂᖏᑦ, ᑮᓇᐅᔭᖃᖅᑎᑦᓯᒍᑕᐅᔪᓂᒃ ᐊᑐᐃᓐᓇᖅᑕᖃᑦᓯᐊᕐᓗᓂ ᐅᑭᐅᖅᑕᖅᑐᒥ ᓯᓚᓕᕆᓂᕐᒨᖓᔪᓂᒃ ᐱᓕᕆᐊᓅᖓᔪᓄᑦ ᐊᒻᒪᓗ ᐃᓄᐃᑦ ᐃᓚᒋᔭᐅᕕᖃᕐᓗᑎᒃ ᓯᓚᐅᑉ ᐊᓯᔾᔨᕐᓂᖓ ᐃᑯᓪᓚᐅᒥᑎᑕᐅᒐᓱᐊᖅᑎᓪᓗᒍ.”