ᔪᓚᐃ 19, 2014 – ᐃᓅᕕᒃ, ᓄᓇᑦᓯᐊᖅ – ᑖᒃᑯᐊ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ, ᑲᓇᑕᒥ ᖁᕕᐊᓱᓪᓗᑎᒃ ᐅᖃᐅᓯᖃᖅᐳᑦ ᑖᓐᓇ ᕼᐆᑉ ᓇᑭᒪᔭᒃ ᓂᕈᐊᖅᑕᐅᓂᕐᒪᑦ ᑐᒡᓕᐅᓂᐊᕐᓗᓂ ᐊᖓᔪᖅᑳᒧᑦ – ᓄᓇᕐᔪᐊᒥ ᐅᓪᓗᒥ ᐊᕐᕌᒍᑕᒫᖅᓯᐅᑎᒥᓐᓂᒃ ᑲᑎᒪᓂᐊᖅᑎᓪᓗᒋᑦ ᐃᓅᕕᒻᒥ. ᒥᔅᑕ ᑐᐊᐃᓐ ᓯᒥᔅ ᖁᕕᐊᒋᔭᐅᒃᑲᓐᓂᖅᑐᒥᓂᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᐊᖓᔪᖅᑳᖑᓂᕐᒧᑦ ᐃᓕᓂᖓ ᓂᕈᐊᕋᑦᓴᓕᐅᕐᓂᖅ ᒪᑐᔭᒥᓂᐅᑎᓪᓗᒍ ᔪᓚᐃ 23, 2014−ᖑᑎᓪᓗᒍ.
ᑖᓐᓇ ᓯᒥᔅᓯᐅᑉ ᓯᑕᒪᒋᓕᖅᑕᖓ ᑲᑎᒪᔨᐅᓂᕐᒥᒃ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᐊᖓᔪᖅᑳᖑᓪᓗᓂ ᓯᕗᓪᓕᖅᐹᒥ ᓂᕈᐊᖅᑕᒥᓂᐅᓪᓗᓂ ᔫᓂ 2002−ᖑᑎᓪᓗᒍ. ᐊᖓᔪᖅᑳᕆᔭᐅᓪᓗᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᑲᓇᑕᒥ, ᓯᒥᔅ ᑐᒡᓕᕆᔭᐅᓪᓗᓂ−ᐊᖓᔪᖅᑳᖑᒻᒥᔪᖅ ᑲᓇᑕᒥ ᐃᓄᖕᓄᑦ ᑎᒥᖁᑎᒋᔭᐅᔪᒧᑦ, ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓄᑦ. ᓯᒥᔅ ᐱᓕᕆᖃᑕᐅᖏᓐᓇᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᑲᓇᑕᒥ 1998−ᒥᓂᒃ.
ᒪᕐᕉᓐᓂᒃ ᓂᕈᐊᕋᑦᓴᓕᐊᖑᔾᔪᑏᒃ ᑐᒡᓕᕆᔭᐅᓪᓗᓂ−ᐊᖓᔪᖅᑳᖑᓂᕐᒧᑦ ᓄᓇᕐᔪᐊᒥ ᐱᔾᔪᑕᐅᔪᑦ ᐱᓪᓗᒋᑦ ᓯᕗᕐᖓᓂ ᔪᓚᐃ 23, 2014 ᐃᓱᓕᕝᕕᐅᑎᑕᐅᔪᖅ ᑎᑭᓚᐅᖅᑎᓐᓇᒍ ᑐᓂᔭᒥᓂᐅᓪᓗᑎᒃ: ᕘᕐᓇᓐ. ᐊᐃᒧᔅ ᐊᒻᒪᓗ ᕼᐆᑉ ᓇᑭᒪᔭᒃ, ᑖᒃᑯᐊ ᑕᒪᒃᑮᒃ ᐃᓄᕕᐊᓗᖕᒥᐅᑖᒃ.
ᕼᐆᑉ ᓇᑭᒪᔭᒃ ᓂᕈᐊᖅᑕᒥᓂᖅ ᑲᑎᒪᔭᖅᑐᖅᓯᒪᔪᓄᑦ ᑖᒃᑯᓇᖔᖅᓯᒪᔪᓄᑦ ᓯᑕᒪᓂᒃ ᓄᓇᓕᐅᔪᓂᒃ ᐃᓄᐃᑦ ᓄᓇᖓᓐᓂᒃ. ᐸᐅᓚᑐᒃᒥᐅᒃᓴᔭ, ᓄᓇᑦᓯᐊᒥ, ᓇᑭᒪᔭᒃ ᐊᑐᖃᑦᑕᖅᓯᒪᔭᒥᒍᑦ ᖃᐅᔨᒪᓂᖃᑦᓯᐊᖅᐳᖅ ᐃᖅᑲᓇᐃᔭᖃᑦᑕᖅᓯᒪᓂᕐᒧᑦ ᑲᓇᑕᒥ ᕿᓂᖅᑐᓕᕆᔨᒃᑯᓐᓄᑦ ᐊᒻᒪᓗ ᐊᑐᖅᑕᐅᒍᓐᓇᖅᑐᑦ ᓄᓇᔭᐃᑦ ᐱᐅᖅᓱᐊᖅᑕᐅᒋᐊᖃᕐᓂᖏᓐᓄᑦ ᐊᒻᒪᓗ ᐱᕙᓪᓕᐊᑦᓯᐊᖅᑐᒥ ᐃᖅᑲᓇᐃᔭᕐᕕᖕᒥ ᐱᓕᕆᓯᒪᓂᑰᓪᓗᓂ. ᑖᓐᓇ ᓴᙱᔪᒥᒃ ᓂᐱᖃᖅᑎᑦᓯᓂᐊᖅᑐᖅ ᐃᓄᖕᓂᑦ, ᐱᓗᐊᖅᑐᒥ ᐃᓅᓱᑦᑐᓂᒃ.
“ᐅᐱᒍᓱᑉᐳᖓ ᑐᙵᓱᑦᑎᒋᐊᖓ ᕼᐆᑉ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ−ᑲᓇᑕᒥ, ᑭᒡᒐᖅᑐᐃᔨᐅᓂᐊᕐᒪᑦ ᐱᔪᒪᔭᖏᓐᓂᒃ ᑲᓇᑕᒥᐅᑕᐃᑦ ᐃᓄᐃᑦ ᐱᓕᕆᓂᕐᒥᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᐊᒻᒪᓗ ᓄᓇᕐᔪᐊᒥ,” ᐅᖃᖅᑐᒥᓂᖅ ᓯᒥᔅ. “ᑕᕝᕙᓂ ᐊᖓᔪᖅᑳᖑᓂᕐᒦᓯᒪᓕᖅᑎᓪᓗᖓ ᐅᑭᐅᑦ ᖁᓕᑦ ᐅᖓᑖᓂ ᐱᒋᐊᕈᑕᐅᓯᒪᒻᒪᑦ ᐱᒻᒪᕆᐅᔪᒧᑦ ᑲᔪᓰᓐᓇᕆᐊᓕᒻᒧᑦ ᑲᒪᒋᑦᓯᐊᕆᐊᖃᕐᒪᓪᓗ ᓯᕕᑐᔪᒧᑦ−ᐊᑑᑎᓕᒃ ᐱᓕᕆᖃᑎᖃᕐᓂᖅ ᐃᓄᖕᓂᑦ ᓇᒻᒥᓂᖃᖃᑎᑦᑎᓐᓂᑦ ᐅᑭᐅᖅᑕᖅᑐᒥ ᓄᓇᓕᐅᔪᓂᒃ. ᑲᔪᓯᑎᒃᑲᓂᕐᓂᐊᕆᐊᖓ ᑕᒪᓐᓇ ᖁᕕᐊᓱᑉᐳᖓ ᐃᖅᑲᓇᐃᔮᕆᓂᐊᕋᒃᑯᑦ ᐊᕐᕌᒍᓂᒃ ᐊᒡᒋᖅᑐᓂᒃ.”
“ᖁᕕᐊᓱᑉᐳᖓ ᓂᕈᐊᖅᑕᐅᓐᓂᕋᒪ ᑐᒡᓕᕆᔭᐅᓂᕐᒧᑦ−ᐊᖓᔪᖅᑳᖑᓂᕐᒧᑦ – ᓄᓇᕐᔪᐊᒥ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓄᑦ ᑲᓇᑕᒥ,” ᐅᖃᖅᑐᒥᓂᖅ ᕼᐆᑉ ᓇᑭᒪᔭᒃ. “ᐱᔪᒃᓴᐅᔮᕐᓂᖃᖅᐳᖓ ᐃᖅᑲᓇᐃᔭᖃᑎᖃᕐᓂᐊᓂᕐᒥᒃ ᐱᓕᕆᓂᖃᑦᓯᐊᖅᑐᓄᑦ ᑖᒃᑯᓄᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᐱᓕᕆᔨᐅᔪᓄᑦ ᐊᒻᒪᓗ ᐱᔨᑦᓯᕐᓗᒋᑦ ᐃᓄᐃᑦ ᑕᕝᕘᓇ ᐱᓇᓱᐊᕐᕕᒋᓂᐊᖅᑕᒃᑯᑦ. ᖁᔭᒋᕙᒃᑲ ᑕᐃᒃᑯᐊ ᐅᕙᓐᓂᒃ ᐃᑲᔪᖅᑐᐃᖃᑦᑕᖅᓯᒪᔪᑦ ᑕᕝᕙᓂ ᐱᓕᕆᓂᐊᖅᑎᓪᓗᖓ.”
ᑖᓐᓇ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ ᑮᓇᐅᔭᓕᐅᕋᓱᐊᖅᑎᐅᒐᓂ ᑎᒥᐅᔪᖅ ᓯᕗᓕᖅᑕᐅᓪᓗᓂ ᑲᑎᒪᔨᓄᑦ ᑖᒃᑯᐊ ᑲᑎᒪᔩᑦ ᓂᕈᐊᖅᑕᐅᓯᒪᓪᓗᑎᒃ ᓯᕗᓕᖅᑏᑦ ᑖᒃᑯᓇᖔᖅᓯᒪᔪᑦ ᓄᓇᑖᖅᓯᒪᓂᕐᒧᑦ ᐊᑎᓕᐅᖅᓯᒪᔪᓄᑦ ᓄᓇᓕᐅᔪᓄᑦ: ᐃᓄᕕᐊᓗᐃᑦ, ᓄᓇᑦᓯᐊᕗᑦ, ᓄᓇᕕᒃ, ᐊᒻᒪᓗ ᓄᓇᕗᑦ. ᓂᕈᐊᖅᑕᐅᓯᒪᔪᖅ ᐊᐅᓚᑦᓯᔨ, ᐊᖓᔪᖅᑳᖅ, ᒪᕐᕉᒃ ᑐᒡᓕᐅᓪᓗᑎᒃ−ᐊᖓᔪᖅᑳᒃ, ᐊᒻᒪᓗ ᑎᑎᕋᖅᑎ-ᑮᓇᐅᔭᓕᕆᔨ, ᐊᐅᓚᑦᓯᕙᑦᑐᑦ ᑎᒥᐅᔪᒥᒃ.
Hᐆᑉ ᓇᑭᒪᔭᐅᑉ ᒥᒃᓵᓄᑦ:
Hᐆᑉ ᐃᓅᓂᑯ ᐃᓅᕕᒻᒥ ᐱᕈᖅᓴᓂᑰᓪᓗᓂ ᐸᐅᓚᒃᑐᒥ, ᓄᓇᑦᓯᐊᒥ. ᐱᕈᖅᓴᓂᕐᒥᓂ ᐱᖅᑯᓯᑐᖃᖅ ᐊᑐᖅᓱᒍ ᐱᕈᖅᓴᔪᒥᓂᖅ ᐊᖑᓇᓱᐊᖅᐸᑦᓱᓂ, ᐃᑲᓗᒐᓱᐊᖅᐸᑦᓱᓂ ᐊᒻᒪᓗ ᒥᑭᒋᐊᕐᓂᐊᐸᑦᓱᓂ. ᐅᑭᐅᖃᓕᕋᒥ 12−ᓂᒃ, ᕼᐆᑉ ᐃᓕᓐᓂᐊᕈᓐᓇᖅᑐᒥᓂᖅ ᐃᓅᓯᖃᕋᓗᐊᖅᓱᓂ ᓇᐹᖅᑐᓕᒻᒥ ᐃᓕᓐᓂᐊᕐᕕᖃᖅᓱᓂ ᐊᑖᑕᒥᓂᒃ, ᔫᓇᒥᒃ, ᐊᒻᒪᓗ ᐃᓄᑐᖃᕐᒥᒃ, ᐱᓕ ᕉᐸᓐᒥᒃ.
Hᐆᑉ ᐃᖅᑲᓇᐃᔭᖅᓯᒪᔪᖅ ᒥᕐᖑᐃᓯᕐᕕᓕᕆᔨᒃᑯᓐᓄᑦ ᑲᓇᑕᒥ ᓯᑕᒪᐅᔪᖏᒐᖅᑐᑦ ᑲᓇᑕᒥ ᒥᕐᖑᐃᓯᕐᑯᖕᓂ ᓄᓇᐅᑉ ᐊᑐᖅᑕᐅᒍᓐᓇᕐᓂᖓ ᐱᐅᖅᓱᐊᖅᑕᐅᒋᐊᖃᕐᓂᖓ ᐃᖅᑲᓇᐃᔮᕆᖃᓯᐅᑎᑦᓱᒍ, ᕿᓂᖅᑐᓕᕆᔨᒃᑯᓐᓄᑦ ᐊᒻᒪᓗ ᐃᓕᓐᓂᐊᑎᑦᓯᓂᕐᒥᒍᑦ ᓂᐱᖃᖅᑎᑦᓯᓂᕐᒥᒍᓪᓗ ᓄᓇᖃᖅᑳᖅᓯᒪᔪᓄᑦ ᑐᕌᖓᔪᓄᑦ ᐱᖃᑕᐅᓂᕐᒥᓂ.
Hᐆᑉ ᐃᖅᑲᓇᐃᔭᖃᑎᖃᖃᑦᑕᖅᓯᒪᔪᖅ ᐃᓄᖕᓂᑦ ᐅᐊᓕᓂᕐᒥᐅᓂᒃ ᐅᑭᐅᖅᑕᖅᑐᒥ, ᓄᓇᕗᑦ ᐊᒻᒪᓗ ᓛᒐᑐᐊᒥ ᐃᓄᐃᑦ ᐃᓗᓯᖓ ᐱᓪᓗᒍ ᖃᐅᔨᓴᕐᓂᒃᑯᑦ ᓄᓇᒥ ᐱᓕᕆᔨᐅᖃᑕᐅᓪᓗᓂ ᖃᐅᔨᓴᖅᑐᓕᕆᓂᕐᒧᓪᓗ ᐃᑲᔪᖅᑎᐅᓪᓗᓂ. ᐅᖃᐅᔾᔨᒋᐊᖅᑎᐅᖃᑕᐅᓐᓂᕐᒥᔪᖅ ᐃᑲᔪᕐᕕᖃᖅᓯᒪᓪᓗᓂᓗ ᐱᕙᓪᓕᐊᔭᐅᓂᖓᓂᒃ ᑎᑎᕋᖅᑕᐅᓯᒪᓂᖏᑦ ᖃᓄᖅᑑᓂᖅ. (ᓇᓂᓯᓂᖅ ᑐᙵᕕᖃᑦᓯᐊᕈᓐᓇᕐᓂᖓᓂ ᐃᓅᓯᐅᑉ) “ᖃᓄᐃᑉᐱᑕ ᐊᖑᑕᐅᓪᓗᑕ” ᐃᑲᕐᕌᒃ ᒪᕐᕉᒃ ᑕᑯᓐᓇᒐᒃᓴᖅ ᐊᐃᐲᑏᓂᐊᒃᑯᑦ− APTN ᐃᓄᐃᑦ ᐊᖑᑏᑦ ᐃᓗᓯᖏᑕ ᐊᒻᒪᓗ ᖃᓄᐃᖏᑦᓯᐊᕈᓐᓇᕐᓂᐅᑉ−ᒥᒃᓵᓄᑦ ᐊᒻᒪᓗ ᐅᓇ “ᐃᓅᓱᑦᑑᔪᖓ, ᐅᐱᒍᓱᑦᑐᖓ” ᑕᑯᑦᓴᐅᑦᓴᐅᑎᒋᖏᔪᑦ ᑕᑯᓐᓇᒐᒃᓴᐃᑦ ᐊᐃᐲᑏᓂᐊᒃᑯᑦ ᐃᓄᐃᑦ ᐃᓅᓱᑦᑐᑦ ᒥᒃᓵᓐᓄᑦ, ᐅᖃᖃᑎᖃᕈᓐᓇᕐᓂᖅ ᓇᓗᓇᐃᔭᕈᓐᓇᕐᓂᖅ ᐊᒻᒪᓗ ᐱᖃᑕᐅᒍᓐᓇᕐᓂᐅᑉ ᒥᒃᓵᓄᑦ.
Hᐆᑉ ᐱᔨᑦᓯᖃᑦᑕᖅᓯᒪᔪᖅ ᑐᑭᒧᐊᒃᑎᑦᓯᓂᒃᑯᑦ ᐊᒻᒪᓗ ᖃᐅᔨᓴᖅᑐᓕᕆᓂᕐᒧᑦ ᐃᑲᔪᖅᑎᐅᓂᒃᑯᑦ ᐅᑭᐅᖅᑕᖅᑐᒥ ᐅᐊᖕᓇᒥ ᑐᑭᓯᒋᐊᕐᕕᑦᓴᓄᑦ “ᖃᓄᐃᒋᐊᕈᑎᖃᕈᓐᓇᓂᖅ ᓯᓚᐅᑉ ᐊᓯᔾᔨᕐᓂᖓᓂᒃ” ᐃᓕᓐᓂᐊᓯᓐᓈᑦ ᑲᑎᒪᖃᑦᑕᓂᒃᑯᑦ ᐸᐅᓚᒃᑐᒥ, ᓄᓇᑦᓯᐊᕗᒻᒥ ᐊᒻᒪᓗ ᐋᑐᐋᒥ, ᐋᓐᑎᐅᕆᔪᒥ. ᑐᑭᒧᐊᒃᑎᑦᓯᔪᒥᓂᖅ ᖃᐅᔨᓴᕐᓂᖓᓂᒃ ᓯᓚᑦᑐᓴᕐᕕᔾᔪᐊᖅ ᑯᐸᐃᒃᒥ ᐸᐅᓚᒃᑐᒥ ᐊᑐᖅᑕᐅᕙᓐᓂᖏᑕ ᓱᕐᕋᓯᒪᓇᖅᑐᑦ ᐊᒻᒪᓗ ᐃᒥᐊᓗᒃ ᐊᐱᖅᓱᖅᑕᐅᑎᓪᓗᒋᑦ ᐃᓕᓐᓂᐊᖅᑏᑦ, ᐃᓕᓴᐃᔩᑦ ᐊᒻᒪᓗ ᓄᓇᓕᖕᒥ ᓯᕗᓕᖅᑏᑦ ᓄᐊᑕᑉᐅᓂᐊᖅᑎᓪᓗᒋᑦ ᖃᐅᔨᓴᕐᓂᕐᒥ ᐅᖃᐅᓯᐅᔪᑦ ᐃᓄᖕᓄᑦ ᐊᑐᖅᑕᐅᔪᒃᓴᒫᖑᑎᓪᓗᒋᑦ ᓄᓇᓕᖕᒥᓐᓂ ᑕᑐᒧᖓᓕᖓᔪᑦ ᐱᓪᓗᒋᑦ.
Hᐆᑉ ᒫᓐᓇᐅᔪᒥ ᐃᖅᑲᓇᐃᔭᖅᑐᖅ ᕋᐃᖦᓕᐊᓐᑯᓐᓄᑦ ᑲᓇᑕᒥ ᑭᓪᓕᓕᐅᕆᔪᓄᑦ ᐊᖓᔪᖅᑳᖑᓪᓗᓂ ᐊᐅᓚᑦᓯᔨ ᖁᓕᓪᓗ ᐊᑕᐅᓯᓪᓗᓂᒃ ᖃᐅᔨᓴᐅᑎᓄᑦ ᐃᓂᒋᔭᐅᔪᓂᒃ ᐃᓅᕕᒻᒥ, ᓄᓇᑦᓯᐊᕗᒻᒥ. ᐸᕐᓇᐃᓂᕐᒧᑦ ᐱᓕᕆᐊᑎᒍᑦ ᐊᒻᒪᓗ ᐃᖅᑲᓇᐃᔭᖅᑎᑖᕐᓂᕐᒧᑦ ᐃᓄᖕᓂᑦ ᑲᓇᑕᒥ ᓯᕗᓪᓕᐅᑎᓯᒪᔭᖓ ᑖᒃᓱᒪ ᕼᐆᑉ ᐊᒻᒪᓗ ᓱᓕ ᓯᕗᓪᓕᐅᑎᑦᓱᒍ ᑐᕌᒐᕆᓪᓗᒍ. ᑐᕌᖅᑕᖓ ᐱᖃᓯᐅᔾᔨᓂᖅ ᐊᒻᒪᓗ ᒪᑭᒋᐊᒃᑲᓐᓂᑎᓪᓗᒍ ᐃᓄᐃᑦ ᐱᖃᑕᐅᕙᓐᓂᖓᑦ ᐃᖅᑲᓇᐃᔮᓂ ᐱᓕᕆᖃᑕᐅᓂᒃᑯᑦ, ᐃᖅᑲᓇᐃᔭᖅᑎᑖᕐᓂᒃᑯᑦ, ᐱᓕᕆᖃᑎᖃᕐᓂᒃᑯᑦ, ᓯᕗᓕᕐᓂᒃᑯᑦ ᐊᒻᒪᓗ ᐃᓕᓐᓂᐊᑎᓪᓗᒋᑦ ᓇᖕᒥᓂᖃᖃᑕᐅᔪᑦ ᑕᒪᑐᒧᖓ.
Hᐆᑉ ᐃᓚᒋᔭᐅᖃᑦᑕᖅᓯᒪᔪᖅ ᓄᓇᓕᖕᒥ ᐊᒻᒪᓗ ᓄᓇᐃᑦ ᐊᕕᑦᑐᖅᑕᐅᓯᒪᓂᖏᑎᒍᑦ ᑎᒥᖁᑕᐅᔪᓄᑦ ᓲᕐᓗ ᕼᐊᒻᓚᒃᑯᖏᓐᓄᑦ ᐸᐅᓚᒃᑑᑉ ᑲᑎᒪᔨᐅᖃᑕᐅᓪᓗᓂ ᐊᒻᒪᓗ ᐃᑲᔪᖅᑐᒥᓂᐅᓪᓗᓂ ᓴᖅᑭᑎᑕᐅᓂᖓᓂ ᐸᐅᓚᑐᒃ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᖏᓐᓄᑦ ᐱᓕᕆᖃᑎᖃᖅᓱᓂ ᐃᓄᕕᐊᓗᐃᑦ ᓄᓇᓕᖏᓐᓄᑦ ᑯᐊᐳᕇᓴᒃᑯᓐᓄᑦ. ᑐᑭᒧᐊᒃᑎᑦᓯᔨᐅᖃᑦᑕᖅᓯᒪᔪᖅ ᐊᒻᒪᓗ ᐱᖃᑕᐅᕕᒋᓪᓗᒍ ᐊᔪᖅᓴᖏᓐᓂᖅ−ᓂᕿᖃᕆᐊᖃᕐᓂᕐᒧᑦ ᐱᒋᐊᖅᑎᑦᓯᒍᒍᑕᐅᔪᑎᒍᑦ ᐊᒻᒪᓗ ᖃᑎᒪᑎᑦᓯᓂᒃᑯᑦ ᓄᓇᑦᓯᐊᕗᒻᒥ ᐊᒻᒪᓗ ᓄᓇᕗᒻᒥ.
ᑐᓂᓯᒪᓂᖃᖅᐳᖅ ᑲᔪᓯᑎᑦᓯᓂᕐᒥᒃ ᐱᖅᑯᓯᑐᖃᖅᑎᒍᑦ ᐱᐅᓯᕆᔭᐅᔪᓂᒃ ᐃᓅᓯᕐᒥ ᐅᓂᒃᑳᖏᑎᒍᑦ ᐃᓄᑐᖃᐃᑦ ᐊᒻᒪᓗ ᐊᖑᓇᓱᐊᖅᑏᑦ ᒥᑭᒋᐊᕐᓂᐊᖅᑏᓪᓗ ᐱᖃᓯᐅᑎᓪᓗᒍᓗ ᑲᔪᓯᑎᑦᓯᓂᕐᒥᒍᑦ “ᓄᓇᒥ ᐊᓯᓂ” ᐱᓕᕆᐊᖑᔪᑎᒍᑦ ᐃᓄᑐᖃᕐᓄᑦ ᐊᒻᒪᓗ ᐃᓅᓱᑦᑐᓄᑦ ᑐᕌᖓᔪᓄᑦ. ᐅᐸᒍᑎᖃᑦᑕᖅᓯᒪᔪᖅ ᐊᒥᓱᓄᑦ ᓯᕗᓕᖅᑎᐅᓂᕐᒧᑦ ᑲᑎᒪᔪᓄᑦ ᐊᒻᒪᓗ ᐃᓕᓐᓂᐊᑲᓐᓂᖅᓯᒪᑦᓱᓂ ᓲᕐᓗ ᔮᓐ ᒫᒃᓯᕕᐅᔅ ᐅᐱᕐᖓᓵᒃᑯᑦ ᓯᕗᓕᖅᑎᐅᓂᕐᒧᑦ ᓯᐳᑲᐃᓐᒥ, ᐅᐊᓯᖕᑕᓐᒥ ᐊᒻᒪᓗ ᐊᓪᒑᓐᑯᐃᓐ ᓯᓚᑦᑐᓴᕐᕕᔾᔪᐊᖓᓂ ᐋᓐᑎᐅᕆᔪᒥ.
ᐃᖅᑲᓇᐃᔭᙱᒐᐃᒐᒥ ᐊᒻᒪᓗ ᓄᓇᓕᒻᒧᑦ ᐱᖃᑕᐅᙱᑲᐃᓐᓇᕋᐃᒐᒥ, Hᐆᑉ ᓚᓐᑕᓐ, ᐋᓐᑎᐅᕆᔪᒦᑲᐃᓐᓇᐸᑦᑐᖅ ᐸᓂᖏᒃ ᒫᑕᓚᐃᓐ ᐊᒻᒪᓗ ᒍᕋᐃᔅ ᐊᒻᒪᓗ ᐃᓕᓐᓂᐊᕆᐊᖃᑦᑕᕐᒪᑎᒃ ᓄᓇᓕᒻᒥᓐᓂ. ᒫᓐᓇᐅᔪᖅ ᐊᑦᒪᑕᒥᐅᑕ, ᐊᓪᐴᑕᒥ, ᐃᖅᑲᓇᐃᔮᖃᖅᓱᓂ ᐱᓇᓱᐊᕈᓯᕐᓂᒃ ᐊᕐᕕᓂᓕᓐᓂᒃ ᐃᖅᑲᓇᐃᔭᖅᐸᑦᓱᓂ ᐊᒻᒪᓗ ᐱᓇᓱᐊᕈᓯᕐᓂᒃ ᐊᕐᕕᓂᓕᓐᓂᒃ ᓄᖅᑲᖓᕙᑦᓱᓂ, ᐱᕕᖃᕐᕕᒋᓪᓗᓂᐅᒃ ᑕᒪᓐᓇ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᐊᖓᔪᖅᑳᖑᓂᖅ – ᓄᓇᕐᔪᐊᒥ.
Hᐆᑉ ᐃᖅᑲᓇᐃᔮᕆᖃᑦᑕᖅᓯᒪᓂᑯᖏᑦ ᐊᒻᒪᓗ ᓇᖕᒥᓂᖅ ᐊᑐᖅᓯᒪᔭᖏᑦ ᐱᓪᓗᒋᑦ ᐱᔪᓐᓇᖅᓯᓯᒪᑦᓯᐊᕈᑎᒋᕙᖏᑦ ᐊᑑᑎᖃᖅᑐᒃᑯᑦ ᐱᒋᐊᖅᑎᑦᓯᒍᑕᐅᓯᒪᔪᖅ ᐊᑐᓕᖅᑎᑕᐅᖁᓪᓗᒋᑦ ᐱᓕᕆᐊᒃᓴᐃᑦ ᐃᑲᔪᕐᓂᓖᑦ ᐃᓄᖕᓂᒃ.