ᑕᖅᑮᑦ 12 ᐃᓗᐊᓂ 2022 ᐅᓪᓗᖅᓯᐅᑎᒥᑦ, ᐅᐱᒍᓱᒃᐳᒍᑦ ᐊᔾᔨᙳᐊᓂᑦ ᑐᓴᖅᑎᑦᑎᔪᓐᓇᕋᑦᑕ ᓇᒃᓯᐅᑎᓚᐅᖅᑕᕐᓂᑦ ᐱᒻᒪᕆᐅᓂᖓᓂ ᓂᕐᔪᑏᑦ ᐊᑐᖅᑕᐅᖏᓐᓇᕈᓐᓇᖕᓂᖏᑦ, ᓂᕿᓪᓚᑦᑖᑦ, ᓂᕿᒃᓴᖃᑦᑎᐊᖕᓂᖅ, ᖃᓄᐃᙱᑦᑎᐊᖕᓂᖏᓪᓗ ᐃᓄᐃᑦ ᑕᐅᑐᒃᑕᖏᑎᒍᑦ. ᐋᒡᒌᓯ 2021−ᒥ ᐊᔾᔨᓕᐅᖅᑕᑎᑦ ᐊᐅᓪᓚᖅᑎᖁᓚᐅᖅᐸᕗᑦ ᓄᓇᒥ − ᐊᖑᓇᓱᖕᓂᖅ ᐊᒻᒪ ᐃᖃᓪᓕᐊᕐᓂᖅ ᐅᑭᐅᓕᒫᖅ, ᐊᕝᕗᕐᓂᖅ ᐸᐅᕐᖓᕐᓂᒃ ᐊᐅᔭᒃᑯᑦ, ᐊᒻᒪ ᓂᕿᓕᕆᓂᖅ ᐊᖑᑕᒥᓂᕐᓂᖅ.
ᐊᓕᐊᓇᐃᒍᓱᑦᑎᐊᓚᐅᖅᑐᒍᑦ ᐊᔾᔨᙳᐊᓂᒃ ᐱᓚᐅᖅᑕᑦᑎᓐᓂ, ᐅᓄᖅᑐᑦ ᑕᑯᒃᓴᐅᑎᑦᑎᔪᑦ ᒪᒃᑯᒃᑐᓂᒃ ᓄᑕᖅᑲᓂᒡᓗ ᐅᐱᒍᓱᒃᖢᑎᒃ ᓯᕗᓪᓕᕐᒥ ᐊᖑᔭᒥᓂᒃ! ᐃᐅᓪᓯ ᕼᐃᐅᕋᓐ ᐊᔾᔨᓕᐅᕆᓚᐅᖅᑐᖅ ᐱᔅᓯᓂᑦ ᐃᓚᖏᑕ ᐱᔅᓯᓕᐊᒥᓂᖏᓐᓂᑦ, ᐊᕿᐊᕈᕐᓇᕐᒥ ᓴᓪᓕᐅᑉ ᐅᐊᖕᓇᖓᓂ, ᓄᓇᕗᒻᒥ, ᔪᓚᐃ 2021 ᓄᙳᐊᓂ.
ᐱᓕᕆᑎᓪᓗᑕ ᓴᐳᔾᔨᓂᕐᒥ ᐊᑐᖅᑕᐅᓕᕐᓗᑎᓪᓗ ᐃᓄᐃᑦ ᐱᔪᓐᓇᐅᑎᖏᑦ ᐊᖑᓇᓱᓐᓂᕐᒧᑦ ᓄᓇᕐᔪᐊᕐᒥᑦ ᑲᑎᒪᓂᐅᔪᓂᑦ, ᑭᒡᒐᖅᑐᐃᖏᓐᓇᕐᓂᕐᒥᓪᓗ ᐱᐅᓂᖅᓴᒥᑦ ᓂᕿᖃᑦᓯᐊᕐᓂᕐᒥᑦ, ᖁᔭᓕᔪᒍᑦ ᑖᒃᑯᓇᖓᑦ ᐊᔾᔨᙳᐊᓂᑦ ᑕᑯᑦᓴᐅᑎᑦᓯᒻᒪᑕ ᐱᓕᕆᐊᕆᔭᑦᑎᓐᓂᑦ.
ᖁᔭᓐᓇᒦᒃ ᐃᑦᑕᕐᓂᓴᓕᕆᔨᒃᑯᑦ ᑲᓇᑕᒥ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᐃᓗᓕᖏᑦ ᑮᓇᐅᔭᖃᖅᑎᑕᐅᓂᖏᓐᓄᑦ ᑖᔅᓱᒧᖓ ᐅᓪᓗᖅᓯᐅᑎᒧᑦ.
