ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᒥᔅᓵᓄᑦ

ᑲᑎᑎᑦᑎᖃᑦᑕᕐᓂᖏᑦ ᐃᓄᓐᓂᑦ 1977−ᒥᓂᑦ

ᐅᓂᒃᑳᕗᑦ

ᓴᖅᑭᖅᑕᐅᓚᐅᖅᓯᒪᔪᖅ 1977−ᒥ ᐃᓅᒍᓐᓃᖅᓯᒪᒻᒥᔪᒧᑦ ᐃᐸᓐ ᕼᐊᑉᓴᓐ ᐸᐅᕈᒥ, ᐊᓛᔅᑲ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᐅᓚᑕᐅᑦᑎᐊᖅᑐᓂᓗ ᐊᖏᔫᑎᓄᑦ ᓯᓚᕐᔪᐊᒥ ᒐᕙᒪᐅᙱᑦᑐᓄᑦ ᑲᑐᔾᔨᖃᑎᒌᓐᓄᒃ ᑭᒡᒐᖅᑐᐃᓪᓗᑎᓪᓗ ᑕᒫᓂ 180,000−ᓂᑦ ᐃᓄᓐᓂᑦ ᐊᓛᔅᑲᒥ, ᑲᓇᑕᒥ, ᑲᓛᖡᑦ ᓄᓈᓂ, ᐊᒻᒪᓗ ᓱᑳᑦᑲᒥ (ᐅᓛᓵᒥ). ᑲᑐᔾᔨᖃᑎᒌᑦ ᐱᓕᕆᖃᑦᑕᖅᑐᑦ ᐊᐃᑉᐸᖓᓐᓂ ᓯᓚᕐᔪᐊᒥ ᑲᑐᔾᔨᖃᑎᒌᓐᓄᑦ.

ᐱᕙᓪᓕᐊᓗᑎᑦ ᐅᑭᐅᖅᑕᖅᑐᒥ ᓄᓇᓕᖓᓐᓂ, ᐃᓄᐃᑦ ᑕᑯᓐᓇᓚᐅᖅᓯᒪᒻᒪᑕ ᐅᖃᖃᑎᖃᖃᑦᑕᕆᐊᕐᓂᖏᓐᓂ ᓂᐱᖃᖅᑎᐅᓗᑎᑦ ᓯᓚᕐᔪᐊᒥ ᐃᓱᒫᓘᑕᐅᕙᑦᑐᓂᑦ ᑲᑐᔾᔨᔪᓂᒃ ᐱᔪᒪᓯᒪᔪᓂᒃ ᐸᖅᑭᑦᑎᓗᑎᓪᓗ ᓴᖅᑭᔮᖅᑎᑦᑎᓗᑎᓪᓗ ᐃᓅᓯᖏᓐᓂ. ᑐᕌᒐᒋᓗᐊᓚᐅᖅᑕᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ, ᐃᒪᐃᑦᑑᓪᓗᑎᑦ, ᓴᙵᑎᑦᑎᑲᓐᓂᕋᓱᐊᕐᓗᑎᑦ ᑎᒥᐅᔪᓂᒃ ᐃᓄᓐᓂᑦ ᐅᑭᐅᖅᑕᖅᑐᒥ, ᓴᖅᑭᔮᖅᑎᑦᑎᑲᓐᓂᕐᓗᑎᑦ ᐃᓄᐃᑦ ᐱᔪᓐᓇᐅᑎᖏᓐᓂ ᐱᔪᒪᔭᖏᓐᓂᓪᓗ ᓯᓚᕐᔪᐊᒥ; ᐋᖅᑮᓗᑎᑦ ᐊᔭᐅᖅᑐᐃᓗᑎᓪᓗ ᐊᑯᓂ ᐱᖁᔭᐅᓂᐊᖅᑐᓂᒃ ᐅᑭᐅᖅᑕᖅᑑᑉ ᐊᕙᑎᖓᓐᓄ ᑐᕌᖓᔪᓂᒃ; ᐱᓕᕆᖃᑕᐅᑦᑎᐊᕋᓱᐊᖃᑦᑕᕐᓗᑎᓪᓗ ᐊᓯᖏᓐᓄ ᑲᑎᒪᔨᐅᔪᓄᑦ, ᒪᑭᒪᔾᔪᑎᔅᓴᓄᑦ ᐃᓄᓂᕆᕐᒧᓪᓗ ᐅᑭᐅᖅᑕᖅᑐᓂᑦ.

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᑎᑦᑎᕙᒻᒪᑕ ᐅᑭᐅᑦ ᑎᓴᒪᑦ ᐊᓂᒍᕋᐃᒻᒪᑕ ᑭᒡᒐᖅᑐᐃᔨᓂᒃ ᐅᑭᐅᖅᑕᖅᑐᒥ ᓂᕈᐊᖅᐸᑦᑐᑎᑦ ᓄᑖᕐᒥᑦ ᐃᔅᓯᕙᐅᑕᕐᒥᑦ ᓯᕗᓕᖅᑎᓂᓪᓗ ᑲᑎᒪᔨᐅᓂᐊᖅᑐᓂᒃ, ᐋᖅᑭᔅᓱᐃᕙᑦᑐᑎᑦ ᐱᖁᔭᕐᓂᑦ, ᑎᒍᓯᕙᑦᑐᑎᓪᓗ ᐱᖁᔨᕗᖔᕈᑎᓂᒃ ᐊᐅᓚᑦᑎᔾᔪᑎᒋᓂᐊᖅᑕᙱᓐᓂᑦ ᑭᖑᓪᓕᕐᒧᑦ ᑲᑎᒪᓂᐅᒐᔭᖅᑐᒧᑦ. ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓂᐅᔪᒥᑦ ᑐᙵᕕᓪᓚᕆᐅᕙᑉᐳᖅ ᑲᑐᔾᔨᖃᑎᒌᑦ, ᐱᕕᖃᖅᑎᑦᑎᓪᓗᑎᑦ ᐅᓂᒃᑳᖑᒍᒪᔪᓂᒃ ᑲᑐᔾᔨᓪᓗᑎᒃ, ᐅᖃᐅᓯᖃᖅᑐᑎᑦ ᐃᓱᒫᓘᑎᐅᔪᓂᒃ, ᐊᐃᕙᖃᑎᖃᖅᑐᑎᑦ, ᐱᓕᕆᖃᑎᒌᒃᑲᓐᓂᖅᐸᓪᓕᐊᕙᑦᑐᑎᓪᓗ ᐃᓄᐃᑦ. ᑭᒡᒐᖅᑐᐃᔪᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᐃᓅᓱᑦᑐᐃᑦ ᑲᑎᒪᔨᖏᑦ ᐊᒻᒪᓗ ᓯᓚᕐᔪᐊᒥ ᐃᓐᓇᕐᓄᑦ ᑲᑎᒪᔨᖏᑦ ᐱᖃᑕᐅᕙᑦᑐᑎᑦ, ᐅᖃᖃᑎᒌᒃᑲᓐᓂᓕᕈᓐᓇᖅᑐᑎᑦ ᐊᒻᒪᓗ ᐱᓕᕆᖃᑎᒌᓐᓂᖅᓴᐅᒃᑲᓐᓂᓕᖅᑐᑎᓪᓗ ᑲᑐᔾᔨᖃᑎᒌᑦ ᓇᑭᑐᐃᓐᓈᖅᓯᒪᔪᑦ.

2006−ᒥ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓚᐅᖅᓯᒪᔪᑦ, ᐸᐅᕈ, ᐊᓛᔅᑲᒥ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᑎᓕᓯᓚᐅᖅᓯᒪᔪᑦ “ᐊᕐᕌᒍᑕᒫᑦ ᓄᕖᐱᕆᒥ 7 ᐅᓪᓗᕆᓂᐊᖅᑐᓂᐅᒃ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᒋᐊᕐᕕᒥᓂᖓᓐᓂ ᐃᐸᑦ ᕼᐊᒻᓴᓐ, ᐊᖏᔪᖅᑎ, ᓯᓚᕐᔪᐊᒥ ᐃᓄᐃᑦ ᐅᓪᓗᕆᓪᓗᓂᐅᒃ, ᐊᒻᒪᓗ ᐃᓄᓕᒫᑦ ᒐᕙᒪᒃᑯᖏᑦ, ᑎᒥᐅᔪᓪᓗ ᓄᓇᓖᓪᓗᑦ ᐊᕐᕌᒍᑕᒫᑦ ᐃᓄᓐᓂᑦ ᐅᓪᓗᖃᖃᑦᑕᕐᓗᑎᑦ ᑕᕝᕙᓂ ᖁᕕᐊᓲᑎᖃᖃᑦᑕᕐᓗᑎᓪᓗ ᐃᓕᓴᖅᓯᖃᑦᑕᕐᓗᑎᓪᓗ.”