Inuit Ukiuqtaqtumiuqatigiit Katimajingit Missaanut

Katitittiqattarningit Inunnit 1977−minit

Unikkaavut

Saqqiqtaulauqsimajuq 1977−mi inuugunniiqsimammijumut Ipan ᕼapsan Paurumi, Alaaska, Inuit Ukiuqtaqtumiuqatigiit Katimajingit aulatauttiaqtunilu angijuutinut silarjuami gavamaunngittunut katujjiqatigiinnuk kiggaqtuillutillu tamaani 180,000−nit Inunnit Alaaskami, Kanatami, Kalaałliit Nunaani, ammalu Sukuutkami (Ulaasaami). Katujjiqatigiit piliriqattaqtut aippanganni Silarjuami Katujjiqatigiinnut.

Pivallialutit ukiuqtaqtumi nunalinganni, Inuit takunnalauqsimammata uqaqatiqaqattariarninginni nipiqaqtiulutit silarjuami isumaaluutauvattunit katujjijunik pijumasimajunik paqqittilutillu saqqijaaqtittilutillu inuusinginni. Turaagagilualauqtanga Inuit Ukiuqtaqtumiuqatigiit Katimajingit, imaittuullutit, sanngatittikannirasuarlutit timiujunik Inunnit ukiuqtaqtumi, saqqijaaqtittikannirlutit Inuit pijunnautinginni pijumajanginnillu silarjuami; aaqqiilutit ajauqtuilutillu akuni piqujauniaqtunik ukiuqtaqtuup avatingannu turaangajunik; piliriqatauttiarasuaqattarlutillu asinginnu katimajiujunut, makimajjutissanut inunirirmullu ukiuqtaqtunit.

Inuit Ukiuqtaqtumiuqatigiit Katimajingit arraagutamaaqsiutinganni katimatittivammata ukiut tisamat aniguraimmata kiggaqtuijinik ukiuqtaqtumi niruaqpattutit nutaarmit Issivautarmit sivuliqtinillu katimajiuniaqtunik, aaqqissuivattutit piqujarnit, tigusivattutillu piqujivungaarutinik aulattijjutiginiaqtannginnit kingullirmut katimaniugajaqtumut. Arraagutamaaqsiutinganni Katimaniujumit tunngavillariuvappuq katujjiqatigiit, piviqaqtittillutit unikkaangugumajunik katujjillutik, uqausiqaqtutit isumaaluutiujunik, aivaqatiqaqtutit, piliriqatigiikkanniqpalliavattutillu Inuit. Kiggaqtuijut Inuit Ukiuqtaqtumiuqatigiit Inuusuttuit Katimajingit ammalu Silarjuami Innarnut Katimajingit piqatauvattutit, uqaqatigiikkannilirunnaqtutit ammalu piliriqatigiinniqsaukkanniliqtutillu katujjiqatigiit nakituinnaaqsimajut.

2006−mi Inuit Ukiuqtaqtumiuqatigiit Katimajingikkut arraagutamaaqsiutinganni katimalauqsimajut, Pauru, Alaaskami, Inuit Ukiuqtaqtumiuqatigiit Katimajingikkut tilisilauqsimajut “arraagutamaat Nuviipirimi 7 ulluriniaqtuniuk Inuit Ukiuqtaqtumiuqatigiit Katimajingit pigiarvimininganni Ipat ᕼamsan, Angijuqti, silarjuami Inuit Ullurilluniuk, ammalu Inulimaat gavamakkungit, timiujullu nunaliillut arraagutamaat inunnit ulluqaqattarlutit tavvani quviasuutiqaqattarlutillu ilisaqsiqattarlutillu. ”