ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ ᐱᓇᓱᐊᕐᐳᑦ ᓱᕐᕃᓂᖃᕐᓂᐊᑐᒥᒃ ᓯᓚᕐᔪᐊᓕᒫᒥ ᐅᒥᐊᕐᔪᐊᑎᒍᑦ ᐊᐅᓚᒍᑎᓕᕆᓂᕐᒥᒃ (IMO)

ᐃᓄᐃᑦ ᐱᓇᓱᐊᖃᑎᐅᒍᒪᔪᑦ ᓯᓚᕐᔪᐊᓕᒫᒥ ᐅᒥᐊᕐᔪᐊᑎᒍᑦ ᐊᐅᓚᒍᑎᓕᕆᓂᕐᒥᒃ ᑐᑭᑖᕐᓂᐅᖃᑦᑕᑐᓄᑦ – ᓱᕐᖁᐃᓯᓯᒪᑦᓯᐊᕋᓱᐊᕐᓱᑎᒃ ᓇᓪᓕᖁᐊᕆᔭᐅᔪᒥᒃ ᓄᖑᑐᐃᓐᓇᓂᐊᖕᖏᑐᒥᒃ ᐅᑭᐅᕐᑕᑐᖅ ᓯᕗᓂᑦᓴᖃᑦᓯᐊᖁᑦᓱᒍ

ᐊᓪᓕᕇᕐᑐᑦ, ᔭᓄᐊᕆ 22, 2024— ᓚᓐᑕᑦ, ᑕᕆᐅᕐᔪᐊᑉ ᐊᑭᐊᓂ— ᐊᐅᓚᑦᔭᕆᐊᓪᓚᕆᒍᑎᒋᑦᓱᒍ ᐅᖄᖃᑎᒌᓐᓂᐅᖃᑦᑕᑐᓂ ᓚᓐᑕᓐᒥ ᐃᑭᓪᓕᐅᒥᑎᑦᓯᒐᓱᐊᕐᓂᒧᑦ ᐃᒪᐅᑉ ᐃᕐᖃᖓᓂ ᓱᕐᕙᓛᔪᓂᒃ ᓯᓚᕐᔪᐊᓕᒫᒥ ᐅᒥᐊᕐᔪᐊᑎᒍᑦ ᐊᐅᓪᓚᑎᑦᓯᑲᑦᑕᓲᓂ, ᐃᓄᐃᑦ ᐅᑭᐅᕐᑕᑐᒥ ᑲᑎᖕᖓᔨᖏᑦ ᐅᓪᓗᒥ ᑐᓴᕐᑎᓯᒍᑎᖃᕐᑐᑦ ᐱᓇᓱᐊᕈᑎᐅᓂᐊᕐᑐᓂᒃ ᑐᑭᓯᓇᑦᓯᐊᑎᓪᓗᒋᑦ ᐃᓚᐅᕕᖃᕐᓂᐊᓂᕐᒥᓂᒃ ᐱᒐᓱᐊᕈᒪᓂᕐᒥᓂᓪᓗ ᑐᓴᕐᑎᓯᒍᑎᖃᕐᓱᑎᒃ ᓯᓚᕐᔪᐊᓕᒫᒥ ᑕᕆᐅᒃᑯᑦ ᐅᒥᐊᕐᔪᐊᑎᒍᑦ ᐊᐅᓪᓚᑎᑦᓯᑲᑕᓲᓂ (IMO). ᐃᓄᓐᓄᑦ 180,000 ᐅᖓᑖᓃᑦᑐᓄᑦ ᓂᐱᒋᔭᐅᑦᓱᑎᒃ ᐃᓄᐃᑦ ᓄᓇᖓᓐᓂ ᐊᓛᔅᑲᒥ, ᑲᓇᑕᒥ, ᑲᓛᓪᓖᑦ ᓄᓇᖓᓐᓂ ᓱᑯᑦᑲᒥᓗ, ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ ᐱᓇᓱᐊᕐᓂᐊᑐᑦ ᓄᓇᓕᑐᙯᑦ ᖃᐅᔨᒪᐅᓯᖏᑦ ᐊᑐᕐᓗᒋᑦ ᓯᓚᕐᔪᐊᓕᒫᒥ ᐅᒥᐊᕐᔪᐊᓕᕆᓂᕐᓂ ᒪᓕᒐᓕᐅᕈᑎᐅᓂᐊᕐᑐᓂᒃ. ᑖᒃᑯᐊ ᐱᓇᓱᐊᕈᑎᑦᓴᐅᓱᑎᒃ ᐸᕐᓇᑕᐅᓯᒪᔪᑦ ᐱᒋᐊᕐᕕᖃᕐᓯᒪᔪᑦ 2022-ᒥ ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᒪᓂᕆᓚᐅᔪᔭᖓᓂᑦ ᐅᖃᒻᒪᕆᒍᑎᓕᐅᓚᐅᔪᒻᒪᑕ ᐃᓗᓕᓴᒻᒦᓱᑎᒃ Ilulissat Declaration, ᑖᓐᓇ ᑎᓕᔨᒍᑎᐅᓚᐅᔪᔪᖅ ᑲᑎᖕᖓᒋᐊᕐᓯᒪᔪᓄᑦ ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᓐᓂ ᓂᕈᐊᕐᑕᐅᓯᒪᓂᕐᒥᓂ ᐱᓇᓱᐊᕐᓂᐊᑕᖓᓂ.

ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦᑕ ᐊᖓᔪᕐᖄᖓᑕ ᑐᖓᓕᖓ ᑐᑭᒧᐊᑦᑎᓯᔨᐅᑦᓱᓂᓗ ᓯᓚᕐᔪᐊᓕᒫᒥ ᐅᒥᐊᕐᔪᐊᑎᒍᑦ ᐊᐅᓪᓚᑎᑦᓯᑲᑕᓲᓄᑦ ᓖᓴ ᕿᓗᕐᕿ ᖁᐱᕐᕈᐊᓗᒃ ᐅᖃᓚᐅᔪᖅ, “ᑭᖑᕚᕇᑦ, ᓄᓇᓕᕗᑦ ᐅᑭᐅᕐᑕᑑᑉ ᐊᕙᑎᖓᓂᒃ ᑲᒪᒋᔭᖃᑦᓯᐊᑐᑦ. ᐊᓂᕐᕋᕆᒐᑦᑎᒍᑦ ᐊᑑᑎᓚᐅᕐᓯᒪᖕᖏᓯᐊᕐᑐᓂᓪᓗ ᐊᓯᑦᔨᑐᕐᓂᑕᖃᕐᓱᓂ, ᐱᒻᒪᕆᓪᓚᕆᐅᔪᖅ ᐃᓄᐃᑦ ᖃᐅᔨᒪᐅᓯᖏᑦ ᐱᓇᓱᐊᕈᓯᒋᓲᖏᓪᓗ ᐃᓚᐅᑎᑕᐅᓪᓚᕆᒋᐊᖃᕐᒪᑕ ᓯᓚᕐᔪᐊᒥ ᐅᒥᐊᕐᔪᐊᓕᕆᓂᕐᒥᒃ ᒪᓕᒐᓕᐅᕈᑎᖃᕐᑐᓄᑦ ᐊᒻᒪᓗ ᐊᐅᓚᑦᓯᒍᑎᖃᕐᑐᓄᑦ ᐃᓅᒍᓯᕗᑦ ᐱᕐᖁᓯᕗᑦ ᓴᐳᑎᔭᐅᓯᒪᑦᓯᐊᖁᓪᓗᒍ.”

ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ ᑕᓪᓕᒪᓗᐊᖕᖑᐊᓂᒃ ᐱᓇᓱᐊᕐᑕᖃᕐᑐᑦ ᑐᑭᓯᓇᑦᓯᐊᑎᓪᓗᒍ ᓱᕐᕃᓂᖃᕐᓂᐊᑎᓪᓗᒍ ᐱᓂᐊᕐᓂᕋᐅᑎᐅᔪᓂᒃ ᓯᓚᕐᔪᐊᓕᒫᒥ ᐅᒥᐊᕐᔪᐊᑎᒍᑦ ᐊᐅᓪᓚᑎᑦᓯᑲᑦᑕᓲᓄᑦ:

• ᐃᓄᐃᑦ ᑭᒡᒐᑐᕐᑎᙯᓐᓇᓂᐊᕐᑎᓗᒋᑦ ᓯᓚᕐᔪᐊᒥ ᐅᒥᐊᕐᔪᐊᑎᒍᑦ ᐊᐅᓚᒍᑎᓕᕆᔨᓂᒃ: ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ ᖃᐅᔨᒋᐊᕐᕕᐅᖃᑦᑕᕈᒪᔪᑦ ᓯᓚᕐᔪᐊᒥ ᐅᒥᐊᕐᔪᐊᑎᒍᑦ ᐊᐅᓚᒍᑎᓕᕆᔨᓂᒃ 2025-ᒥ, ᐃᓄᐃᑦ ᓂᐱᖓᑦ ᑐᓵᔭᐅᑦᓯᐊᖁᓪᓗᒍ ᑐᑭᑖᕋᓱᐊᕐᑐᓂᓪᓗ ᓂᐱᖃᖃᑎᐅᒍᓐᓇᓗᑎᒃ, ᐱᓗᐊᕐᑐᒥᓪᓗ ᓯᓚᕐᔪᐊᒥ ᐊᑑᑎᔭᐅᔪᑦ ᐅᑭᐅᕐᑕᑐᒥᐅᓂᒃ ᓱᕐᕃᓂᖃᓲᖑᒻᒪᑕ ᐃᓄᐃᑦ ᓄᓇᖓᓐᓂ ᐊᒻᒪᓗ ᑭᐳᖔᕐᑎᓗᒍ. ᖃᐅᔨᒋᐊᕐᕕᐅᖃᑦᑕᕈᑎᒃ ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ ᐃᑲᔪᕐᓯᒍᓐᓇᖃᑦᑕᓚᖓᔪᑦ ᑐᕃᓐᓇᑐᒥᒃ ᓯᓚᕐᔪᐊᒥ ᐅᒥᐊᕐᔪᐊᑎᒍᑦ ᐊᐅᓚᒍᑎᓕᕆᓂᕐᒥᒃ ᑐᑭᑖᕋᓱᐊᖃᑦᑕᓂᐊᕐᑐᓂᒃ ᒪᓕᒐᐅᓂᐊᕐᑐᓂᒃ, ᐃᓱᒪᑦᓴᓯᐅᕈᑎᖃᕐᓗᑎᓪᓗ ᐃᓄᐃᑦ ᑭᖕᖑᒪᒋᔭᖏᓐᓂᒃ ᑐᑭᓯᒪᔭᖏᓐᓂᓗ ᐃᓄᐃᑦ ᓄᓇᓕᖏᑦᑕ.

• ᓄᓇᓕᑐᙯᑦ ᖃᐅᔨᒪᐅᓯᖏᑦᑕ ᐊᑐᕐᑕᐅᓂᖓ: 2030-ᐅᓕᕐᐸᑦ, ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ ᑕᐅᑐᑦᑕᖃᕐᑐᑦ ᐃᓚᐅᑎᑕᐅᑦᓯᐊᕋᔭᕐᓂᒥᒃ ᐊᑐᕐᑕᐅᓗᑎᓪᓗ ᓄᓇᓕᑐᙯᑦ ᖃᐅᔨᒪᐅᓯᖏᑦ ᐱᓇᓱᐊᕐᑕᐅᔪᓕᒫᓂ ᓯᓚᕐᒧᐸᒥ ᐅᒥᐊᕐᔪᐊᑎᒍᑦ ᐊᐅᓚᑲᑦᑕᑐᓕᕆᔨᓄᑦ, ᓄᓇᓕᕐᔪᐊᖑᖃᑎᒌᑦ ᐅᖃᒻᒪᕆᐅᑎᖓᓄᑦ ᐱᑐᑦᓯᒪᑎᓪᓗᒍ. ᑕᒪᓐᓇ ᐊᑑᑎᒍᓐᓇᓯᓚᖓᔪᖅ ᐃᓄᐃᑦ ᖃᐅᔨᒪᐅᓯᖏᑦ ᑕᕆᐅᒥᒃ ᐊᕙᑎᒥᓂᓪᓗ ᐱᓇᓱᐊᕐᑕᐅᔪᓄᑦ ᐃᓚᐅᑎᑕᐅᖃᑦᑕᑎᓪᓗᒋᑦ.

• ᐱᔪᑦᓴᐅᔮᑦᓯᐊᑐᒥᒃ ᓯᓚᓕᕆᒍᑎᖃᕐᓂᖅ: ᓯᓚᐅᑉ ᐊᓯᑦᔨᐸᓪᓕᐊᓂᖓ ᐱᒻᒪᕆᐅᑎᓪᓗᒍ, ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ 50%-ᒧᑦ ᐳᒃᑭᓕᒋᐊᕐᑕᐅᖁᔨᔪᑦ ᐳᔪᕐᓗᓂᒃ ᐅᒥᐊᕐᔪᐊᑎᒎᕐᑐᓂᒃ 2030 ᐊᕐᕌᒍᖓ ᐊᑑᑎᖕᖏᓂᖓᓂ 2040 ᑕᒪᒃᑯᐊᓕᒫᑦ ᐊᑐᕐᑕᐅᒍᓐᓀᓚᕆᒐᔭᕐᑎᓗᒋᑦ. ᑕᒪᓐᓇ ᐱᒍᓐᓇᓯᐊᓚᖓᑉᐸᑦ, ᑖᒃᑯᐊ ᑐᕌᒐᓕᐊᖑᔪᑦ ᓴᐳᒻᒥᔭᐅᑦᓯᐊᕆᐊᖃᓚᖓᔪᑦ ᐱᓇᓱᒍᑎᓄᑦ ᐊᑦᔨᒌᖕᖏᑐᓄᑦ ᒪᑯᓄᖓ ᐊᓄᕆᒧᑦ ᐃᑯᒪᓕᐅᕈᑎᖃᕐᓂᖅ, ᐃᑯᒪᑐᑦᓯᐊᓂᕐᒥᒃ ᐱᓇᓱᐊᕐᓂᑎᒍᑦ ᐅᕐᓱᐊᓗᑦᑐᑐᓂᓪᓗ ᐊᑐᕐᑕᐅᑎᑦᓯᒍᓐᓀᓂᒃᑯᑦ.

• ᓴᓗᒣᓪᓕᑎᕆᔪᓂᒃ ᐃᑭᓪᓕᒋᐊᕆᓂᖅ ᓱᕐᕙᓛᓗᐊᕐᑐᓂᓪᓗ: ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ ᒪᓂᔨᓯᒪᔪᑦ ᐃᑭᓪᓕᒋᐊᕆᒍᑎᑦᓴᓂᒃ ᓄᖑᑎᑦᓯᒍᑎᐅᓗᑎᓪᓗ ᓴᓗᒣᓪᓕᑎᕆᔪᓂᒃ ᕿᕐᓂᑕᓂᒃ ᐳᔪᕐᑐᑦ ᐳᔪᕐᓗᐃᑦ ᓯᓚᐅᑉ ᐅᕐᖂᓯᕙᓪᓕᐊᓚᕿᐅᑎᒋᒻᒪᒋᑦ ᓯᑯᒥᓗ ᐊᐅᑎᑦᓯᕙᓪᓕᐊᓱᑎᒃ, ᐃᓚᐅᑎᓪᓗᒍ ᐅᒥᐊᕐᔪᐊᑉ ᑯᕕᕃᖃᑦᑕᓂᖓ ᐃᒪᕐᓗᒥᒃ ᐊᒻᒪᓗ ᕿᓱᐸᐅᑏᑦ ᐊᑐᕐᑕᐅᓲᑦ ᓱᒃᑯᓇᕐᑐᓂᒃ ᐃᕐᖃᑌᒍᑎᐅᑦᓱᑎᒃ ᐃᒪᕐᐱᒥ. ᐊᒻᒪᓗᒋᐊᓪᓚᒃ, ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ ᐱᓇᓱᐊᓚᖓᒻᒥᔪᑦ ᐃᒪᐅᑉ ᐃᕐᖃᖓᒍᑦ ᓱᕐᕙᓗᓂᒃ ᐃᑭᓪᓕᐅᒥᑎᑦᓯᒋᐊᕐᓂᒥᒃ 2030 ᐊᕐᕌᒍᖓ ᑎᑭᓪᓗᒍ, ᐃᓄᐃᑦ ᐃᓱᒫᓗᒍᑎᓪᓚᕆᖏᑦ ᑕᕆᐅᒥ ᖃᓄᐃᖕᖏᓯᐊᖁᔨᑦᓱᑎᒃ ᐃᓅᓯᕐᒥᓂᓪᓗ.

• ᐃᓄᐃᑦ ᓄᓇᖏᑦᑕ ᓴᐳᑎᔭᐅᓯᒪᓂᖏᑦ ᐱᕈᕐᑐᖏᑦᑕᓗ: ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ ᐃᓚᐅᖁᔨᓪᓚᕆᑦᑐᑦ ᐃᓄᐃᑦ ᓄᓇᖏᑦ ᓴᐳᑎᔭᐅᓯᒪᑦᓯᐊᖁᑦᓱᒋᑦ ᑖᒃᑯᓇᖕᖓᑦ ᐅᒥᐊᕐᔪᐊᓂᑦ ᐅᓯᑲᑦᑕᑎᐅᕙᑦᑐᓂᒃ. ᐃᓚᐅᑎᓪᓗᒍ ᐅᒥᐊᕐᔪᐊᑦ ᑭᓴᕆᐊᕐᑐᖃᑦᑕᑐᑦᓴᐅᖏᓐᓂᖓ ᐃᓄᐃᑦ ᓄᓇᖏᓐᓂ ᐊᒻᒪᓗ ᐊᑦᔨᒌᖕᖏᑐᓂᒃ ᐅᒪᔪᓂᒃ, ᐱᕈᕐᑐᓂᒃ ᖁᐱᕐᕈᓂᒃ ᑎᑭᐅᑦᔨᑎᑦᑌᓕᓗᒋᓪᓗ, ᓄᓇᑦᑕ ᐱᕈᕐᑐᖏᑦᑕ ᐊᑦᔨᐅᖏᑦᑑᓂᖏᑦ ᓴᐳᑎᓯᒪᓗᒋᑦ.

‘ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ ᐊᓪᓚᖑᕐᑎᓯᓯᒪᔪᑦ ᐱᓂᐊᕐᓂᕋᐅᑎᒥᓂᒃ ᐃᓄᐃᑦ ᓄᓇᓕᖏᑦ ᓴᐳᑎᔭᐅᓯᒪᑦᓯᐊᖁᓪᓗᒋᑦ ᑐᑭᑖᖃᑎᐅᒍᓐᓇᓗᑎᓪᓗ ᓂᐱᖃᑦᓯᐊᓗᑎᒃ ᓯᕗᓂᕐᒥ ᐅᑭᐅᕐᑕᑐᖅ ᓱᕐᕃᑑᑦᓯᐊᖏᓐᓇᖁᓪᓗᒍ’, ᐅᖃᓚᐅᔪᖅ ᐃᓄᐃᑦ ᐅᑭᐅᑕᑐᒥᐅᑦ ᑲᑎᖕᖓᔨᖏᑦᑕ ᐊᖓᔪᕐᖄᖓ ᓴᕋ ᐅᓪᓯᕕᒃ. “ᐅᖄᕕᖃᖃᑦᑕᕈᑦᑕ ᓯᓚᕐᔪᐊᓕᒫᒥ ᐅᒥᐊᕐᔪᐊᑯᑦ ᐊᐅᓚᒍᑎᓕᕆᔨᓄᑦ, ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ ᐱᒍᓐᓇᐅᑎᖏᓐᓂᒃ ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ ᐃᓄᐃᑦ, ᐱᒻᒪᕆᐅᓂᖓᓂᓪᓗ ᓄᓇᓕᑐᙯᑦ ᖃᐅᔨᒪᐅᓯᖏᑦᑕ ᓯᓚᕐᔪᐊᓕᒫᒥ ᐊᕙᑎᓕᕆᓂᕐᒥᒃ ᑐᑭᑖᕈᑎᖃᕐᑐᓄᑦ ᐃᓚᐅᒋᐊᖃᓪᓚᕆᓐᓂᖓᓂᒃ.’

ᓯᓚᕐᔪᐊᓕᒫᒥ ᐅᒥᐊᕐᔪᐊᑯᑦ ᐊᐅᓚᒍᑎᓕᕆᔩᑦ ᑲᑎᒪᓂᖃᓛᕐᑐᑦ ᓱᓕᓕᕐᑎᓯᒋᐊᓪᓚᓗᑎᒃ ᐱᓇᓱᐊᕈᑎᑦᓴᒥᓂᒃ ᐳᔪᕐᓗᓂᒃ ᓄᖑᑎᕆᒐᓱᐊᕐᓂᒧᑦ ᓯᓚᕐᔪᐊᒥᐅᓕᒫᑦ ᑲᑎᒪᓕᕐᐸᑕ ᔭᓄᐊᕆ 22-26 ᓚᓐᑕᓐᒥ ᑲᑎᒪᓂᖃᕐᑎᓗᒋᑦ. ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ ᓯᓚᕐᔪᐊᒥ ᐱᓇᓱᐊᕐᑐᓂᒃ ᑕᓯᐅᕐᓯᓂᕐᒧᑦ ᑲᑎᒪᓂᖅ MEPC.1/Circ.907 ᐅᒥᐊᕐᔪᐊᓄᑦ ᐃᓄᐃᑦ ᓄᓇᖏᓐᓃᐸᑦᑐᓄᑦ ᑐᓴᕐᑎᓯᒍᑎᐅᓚᐅᔪᑦ ᐆᒃᑑᐱᕆ 2023-ᖑᑎᓪᓗᒍ ᓯᓚᕐᔪᐊᓕᒫᒥ ᐅᒥᐊᕐᔪᐊᓕᕆᓂᕐᒥᒃ ᐱᓇᓱᐊᕐᐸᑐᓄᑦ. ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ ᐊᑐᓕᕐᑎᓯᒍᑎᐅᒐᔭᕐᑐᑦ ᐊᕙᓗᓕᕐᑕᐅᒍᑎᖏᓐᓂᒃ ᐱᑎᑕᐅᒍᒪᔪᖅ, ᐅᕝᕙᓗᓗᓐᓃᑦ ᖃᓄᐃᓘᕈᑎᑦᓴᓂᒃ ᐱᓇᓱᒍᑎᑦᓴᓕᐅᕐᓂᒧᑦ ‘how to’ protocol, ᐃᓂᓪᓚᑕᐅᖁᑦᓱᒋᑦ ᑖᒃᑯᐊ ᐊᐅᓪᓚᑲᑦᑕᑎᑦᓯᔩᑦ ᐊᑐᑦᓯᐊᖁᑦᓱᒋᑦ ᐃᓄᐃᑦ ᖃᐅᔨᒪᐅᓯᖏᓐᓂᒃ ᑐᑭᓯᒪᒍᓯᖓᓂᓪᓗ ᐱᓇᓱᐊᖃᑎᖃᑦᓯᐊᓗᑎᓪᓗ ᐅᑭᐅᕐᑕᑐᒥᐅᓂᒃ ᐳᔪᕐᓗᖅ ᓄᖑᑎᑕᐅᖁᓪᓗᒍ ᐊᐅᓪᓚᑲᑦᑕᑎᑦᓯᒍᑎᑎᒍᑦ.

ICC’s position paper can be downloaded here, and the Ilulissat Declaration here.

-30-

CONTACT