ᕖᕝᕗᐊᕆ 25, 2020 – ᐋᑐᐋ, ᑲᓇᑕ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᑎᒪᖃᑕᐅᓚᐅᖅᓯᒪᔪᑦ ᓯᓚᕐᔪᐊᒥ ᐃᒪᕐᒥᐅᑕᓕᕆᓂᕐᒧᑦ ᑲᑐᔾᔨᖃᑎᒌᓐᓂᑦ ᑲᑎᒪᔨᕋᓛᖑᖃᑕᐅᔪᑦ ᓱᕈᖅᑕᐃᓕᒪᑎᑦᑎᓂᕐᒧᑦ ᑲᒪᒋᐊᖃᕐᓂᖏᓐᓄᓪᓗ (PPR7) ᑲᑎᒪᓂᐅᔪᒥᑦ ᓚᓐᑕᓐ, ᐃᖕᓚᓐᒥ ᓄᓇᖓᓂᑦ ᐱᓇᓱᐊᕈᓯᕆᓚᐅᖅᑕᑎᓐᓂ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᔅᓱᕈᓚᐅᖅᑐᑦ ᐸᖅᑭᑦᑎᒍᒪᓪᓗᑎᑦ ᐅᑭᐅᖅᑕᖅᑑᑉ ᐃᒪᖓᓐᓂ ᐊᒻᒪᓗ ᐅᖃᐅᓯᖃᑦᑕᓂᖅᑐᑎᑦ ᒪᓕᒐᓕᐊᖏᓐᓂ ᐅᖅᓱᐊᓗᓐᓂ ᐊᑐᖅᑕᐅᖃᑦᑕᖅᑐᓂᑦ. ᑭᖑᓪᓕᖅᐹᒥ ᐃᓱᒪᓕᐊᒥᓂᖓᓐᓂ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓱᓕ ᖃᐅᔨᒃᑲᐃᖃᑦᑕᕐᓂᐊᖅᑐᑦ ᓴᓇᔨᓂᒃ ᒐᕙᒪᒃᑯᓂᓪᓗ ᐱᓕᕆᖃᑎᒌᖁᓪᓗᒋᑦ ᐸᖅᑭᔭᐅᖁᓪᓗᒋᓪᓗ ᐃᒪᕐᒥᐅᑕᐃᑦ ᐱᕈᖅᑐᑦ ᑭᖑᕚᑦᑎᓐᓄᑦ ᐊᑐᖅᑕᐅᔪᓐᓇᖁᓪᓗᒋᑦ ᓯᕗᓂᐊᓗᑦᑎᓐᓄᑦ.
ᐅᓪᓕᒥᓕᓴᐃᑦ ᐅᖓᓯᑦᑐᒥᐅᑕᑦ ᓄᓇᓖᑦ ᐅᑭᐅᖅᑕᖅᑐᒥ ᓂᖑᕐᕈᑎᔅᓴᐅᔪᓂᑦ ᖃᓪᓗᓈᓃᓐᖔᖅᑐᓂᒃ ᑕᑎᖃᖃᑦᑕᕐᖓᑕ ᐊᒥᓱᓂᑦ ᓱᓇᒃᑯᑖᕐᓂᑦ. ᑕᒪᒃᑯᐊᖑᑎᓪᓗᒋᑦ ᐊᑦᑕᓇᖅᑕᐃᓕᒪᒋᐊᖃᕐᓂᖏᓐᓂ ᒪᑭᒪᔾᔪᑎᔅᓴᐅᓂᖏᓐᓂᓪᓗ ᐅᓯᑲᑦᑕᑦᑕᖅᑕᐅᕙᑦᑐᓂᒃ ᐃᖏᕐᕋᔪᓕᕆᓂᕐᒥᓪᓗ ᐊᖅᑯᑕᐅᕙᑦᑐᓂᑦ ᐃᓄᓐᓂᑦ ᓱᓇᒃᑯᑖᓄᓪᓗ ᑕᒪᐅᓐᖓᖅᑐᓂᑦ ᓯᓚᑖᓅᖅᑲᖅᑐᓂᓪᓗ, ᐃᓯᖅᑕᐅᒐᔪᓐᓂᖅᓴᐅᓕᕐᖓᑦ, ᓯᑯᓐᖏᓂᖅᓴᐅᕙᓕᖅᑐᓂᓗ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓇᓗᓇᓐᖏᑦᑐᖅ ᐱᓕᕆᐊᕆᔭᕆᐊᓕᖓ − ᑕᒪᒃᑯᐊ ᐊᑦᑕᓇᖅᑕᐃᓕᒪᔪᒦᑎᒋᐊᖃᖅᑕᕗᑦ ᐅᑭᐅᖅᑕᖅᑐᒥ ᐅᓯᑲᖅᑕᕐᕕᐅᕙᑦᑐᑦ ᓄᓇᓕᓐᓄᑦ ᐃᓄᓐᓄᑦ ᐊᔅᓱᕉᑕᐅᖁᓇᒋᓪᓗ.
ᐊᔅᓱᕈᓐᓇᖅᑐᒃᑰᓚᐅᖅᑐᑦ ᐊᐃᕙᖃᑎᖃᖅᑐᑎᑦ, ᑕᑯᓚᐅᖅᑐᒍ ᒪᓂᑐᐃᓐᓇᖏᑦᑐᓂᑦ ᐊᓯᖏᓐᓂ ᐊᕕᑦᑐᖅᓯᒪᔪᓂᒃ ᓄᓇᓕᕐᔪᐊᓂ ᐱᔾᔪᑎᒋᓪᓗᒋᑦ ᒪᓕᒐᖏᑦ ᖃᖓᒃᑰᓂᖏᓪᓗ ᐊᑐᖅᑕᐅᖃᑦᑕᕐᓂᖏᑦ ᐅᖅᓱᐊᓗᐃᑦ ᐅᑭᐅᖅᑕᖅᑐᒥ ᐅᓯᑲᑦᑕᑎᓪᓗᒋᑦ, ᓄᖅᑲᖓᑎᑦᑎᒋᐊᖃᓕᓚᐅᖅᓯᒪᔪᒍᑦ ᑭᓯᐊᓂᓕ ᐅᑭᐅᓄᑦ ᖁᓕᓄᑦ ᑕᒪᓐᓇ ᐱᓇᓱᒐᓱᓐᓂᐊᖅᑐᑎᒍ. ᐊᓯᖏᑦᑕᐅ ᐱᔭᕆᐊᑐᓚᐅᕐᒥᔪᑦ ᐊᑦᑕᓇᖅᑕᐃᓕᒪᔪᒦᖁᔨᓂᖅ ᐅᑭᐅᖅᑕᖅᑐᒥ ᐅᓯᑲᑦᑕᖃᑦᑕᓂᕐᒥ ᑕᑯᓐᓇᖅᑕᐅᑦᑎᐊᕆᐊᖃᕐᓂᖏᓐᓂ ᐊᒻᒪᓗ ᐱᓕᕆᖃᑎᖃᐃᓐᓇᓗᑎᑦ ᑯᕕᔪᖃᕐᓂᖅᑲᑦ ᖃᓄᖅ ᑲᒪᒋᔭᐅᒐᔭᕐᒪᖔᑕ ᓄᓇᓕᓐᓂᑦ, ᐅᒥᐊᕐᔪᐊᒦᓐᖔᖅᑐᓂᒃ, ᐊᖏᔫᑏᑦ ᐃᒪᕐᒦᓐᖔᖅᑐᑦ, ᓂᐱᖃᓗᐊᖅᑐᑦ ᐃᒪᕕᓐᓂᑦ, ᐊᑦᑕᓇᖅᑕᐃᓕᒪᒋᐊᖃᕐᓂᖏᓪᓗ ᐊᖅᑯᑕᐅᕙᑦᑐᑦ ᐅᒥᐊᕐᔪᐊᒃᑯᑦ.
“ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᔭᐅᖅᑐᐃᑲᓐᓂᕈᒪᒐᑦᑕ ᑕᒪᑐᒥᖓ ᓄᖅᑲᖓᑎᑦᑎᑲᓐᓂᕐᓗᑕ ᐊᑐᖅᑕᐅᓂᕆᕙᑦᑕᖏᓐᓂ ᐅᓯᑲᑦᑕᕐᓂᖏᓐᓂᓪᓗ ᐅᖅᓱᐊᓗᓐᓂᑦ ᐅᑭᐅᖅᑕᖅᑑᑉ ᐃᒪᖏᓐᓂ ᐋᖅᑭᒋᐊᕋᓱᖔᕐᓗᑎᒍᓪᓗ. ᑭᓯᐊᓂᓕ, ᐃᓱᒫᓘᑎᖃᓪᓚᕆᑦᑐᒍᑦ ᑕᒪᑐᒥᖓ ᐊᑦᑐᐃᓂᖃᑲᒻᒪᓐᓂᐊᕐᓂᖓᓐᓂ “ᐱᖃᓯᐅᔾᔨᖏᑦᑐᓂᑦ” ᓄᓇᓕᕗᓪᓗ ᐃᓅᓯᕗᓪᓗ ᐅᓗᕆᐊᓇᖅᑐᒦᓕᕐᓗᑎᑦ. ᓂᓪᓕᐊᖏᓐᓇᕐᓂᐊᖅᑐᒍ ᑕᒪᑐᒥᖓ ᓄᖅᑲᖓᑎᑦᑎᓇᓱᐊᕐᓗᑕ ᑕᒪᑐᒥᖓ ᐅᖅᓱᐊᓗᓐᓂ ᐃᓚᖃᓐᖏᑦᑐᓂᒃ ᐊᒻᒪᓗ ᐸᖅᑭᓗᑎᒍ ᓄᓇᓕᕗᑦ ᐊᕙᑎᕗᓪᓗ,” ᐅᖃᓚᐅᖅᑐᖅ ᓖᓴ ᖁᐱᕐᕈᐊᓗᒃ, ᐊᖏᔪᖅᑳᑉ ᑐᖏᓕᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ.
ᐱᓕᕆᖃᑎᖃᐃᓐᓇᕐᓂᐊᖅᑐᒋᑦ ᐃᓚᒋᔭᐅᔪᓂᑦ ᐊᕕᑦᑐᖅᓯᒪᔪᓂᒃ ᓯᓚᕐᔪᐊᒥ, ᐃᖅᑲᓇᐃᔭᕐᕕᐊᓗᓐᓂᒃ ᐊᕕᑦᑐᖅᓯᒪᔪᓂᓪᓗ ᐃᓄᐃᑦ ᑲᑐᔾᔨᖃᑎᒌᖏᓐᓂ ᐸᖅᑭᒍᒪᓪᓗᒋᑦ ᐅᑭᐅᖅᑕᖅᑐᒥ ᐃᒪᕗᑦ ᐃᓄᐃᓪᓗ ᓄᓇᓕᖏᑦ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑐᓂᓯᓯᒪᒻᒥᔪᑦ ᑐᔅᓯᕋᐅᑎᒥᑦ ᐱᓕᕆᖃᑎᖃᕐᓂᐊᕐᓂᕐᒥᑦ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ ᑖᒃᑯᐊ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐱᖃᑕᐅᖁᓪᓗᒋᑦ ᑕᕝᕗᖓᓪᓚᕆᒃ ᐃᒻᒥᒃᑯᓪᓗ ᓂᓪᓕᐊᒍᓐᓇᕐᓗᑎᑦ ᐃᓱᒫᓘᑕᐅᔪᓂᒃ ᐃᓄᓐᓄᑦ, ᓂᐱᕗᓪᓗ ᑐᓴᖅᑕᐅᖁᓪᓗᒋᑦ ᑕᒪᒃᑯᓄᖓ ᐱᒻᒪᕆᐅᔪᓂᒃ ᐅᖃᐅᓯᕆᖃᑦᑕᕐᓗᑎᒍ ᐊᓯᖏᓐᓄᓪᓗ ᐃᓱᒪᖃᑎᒋᔭᑦᑎᓐᓂ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ.
“ᑕᒪᒃᑮᒃ ᐱᒋᐊᕈᑏᑦ ᐊᑦᑐᐊᒻᒪᑎᒃ,” ᐅᖃᖅᑐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᔅᓯᕙᐅᑕᖓ ᑕᓕ ᓴᒻᐳ ᑐᕈ ᐊᓛᔅᑲᒥ. “ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑭᒡᒐᖅᑐᐃᔨᖏᑦ ᑲᑎᒪᖃᑕᐅᓚᐅᖅᓯᒪᔪᑦ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ, ᒪᓕᑦᑐᑦ ᐊᓯᖏᓐᓂᓪᓗ ᒐᕙᒪᐅᓐᖏᑦᑐᓂᑦ ᑲᑐᔾᔨᖃᑎᒌᓐᓂᒃ ᑲᒪᒋᔭᐅᖁᓪᓗᒋᑦ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ. ᑭᓯᐊᓂᓕ, ᓇᒻᒥᓂᖅ ᑭᒡᒐᖅᑐᕈᒪᖃᑦᑕᖅᑐᒍᑦ ᐱᔪᓐᓇᕐᒥᒐᑦᑕ ᑕᐃᒫᒃ. ᐅᕙᒍᑦ ᐃᓅᓪᓗᑕ, ᓇᒻᒥᓂᖅ ᓂᓪᓕᐊᒍᓐᓇᕐᓂᖃᕋᑦᑕ ᑕᒪᒃᑯᓂᖓ ᐃᓱᒪᒋᔭᑦᑎᓐᓂ ᐃᒪᕐᒥᐅᑕᓕᕆᓂᕐᒥᑦ. ᑲᒻᒪᓗᒃᑲᓐᓂᖅ, ᐊᑦᑕᓇᖅᑐᒦᖁᓇᒋᑦ ᐅᑭᐅᖅᑕᖅᑐᒥ ᐊᒥᐊᕐᔪᐊᒃᑰᐸᑦᑐᓂᒃ ᐊᒻᒪᓗ “ᐊᑯᑦᑐᔫᑕᐅᔫᒥᓗᑎᓪᓗ ᐅᖅᓱᐊᓗᑦᑕᕐᓂᖅ” ᐅᑭᐅᖅᑕᖅᑐᒥ ᑕᐃᒪᒃ ᐅᖃᐅᓯᐅᓯᒪᒻᒪᑕ ᐅᑦᕿᐊᕕᒻᒥ ᓇᓗᓇᐃᖅᑕᐅᓯᒪᔪᒥᑦ, ᑲᔪᓯᑎᑕᐅᓚᐅᖅᓯᒪᔪᖅ ᐃᓄᓐᓄᑦ 2018−ᒥ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᑎᓪᓗᒋᑦ ᐊᓛᔅᑲᒥ ᔪᓚᐃᖑᑎᓪᓗᒍ, 2018−ᒥ.”
ᒪᓕᒐᖅ 18 ᐅᑦᕿᐊᕕᒃ ᓇᓗᓇᐃᖅᑕᐅᓯᒪᔪᓂᑦ ᐱᓕᕆᐊᖃᕆᐊᖃᕐᖓᑕ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ “ᓂᓪᓕᐊᒍᓐᓇᕐᓗᑎᑦ ᐊᔭᐅᖅᑐᐃᓗᑎᓪᓗ Polar Code−ᒥᑦ, ᐊᓯᖏᓐᓂᓪᓗ ᓯᓚᕐᔪᐊᒥ ᐊᕕᑦᑐᖅᓯᒪᔪᓂᓪᓗ ᓄᓇᓕᕐᔪᐊᕐᓂᑦ ᒪᓕᒐᖏᓐᓂ, ᑐᐊᕕᕐᓇᖅᑐᒥᑦ ᑲᒪᑦᑕᐅᑎᒋᔪᓐᓇᕐᓗᑎᑦ, ᐊᑯᑦᑐᔫᒥᑎᒋᐊᕐᓗᒍᓪᓗ ᐅᖅᓱᐊᓗᓕᕆᓂᖅ ᐊᑦᑐᐃᓂᖃᓗᐊᖁᓇᒋᑦ ᐃᒪᕐᒥᐅᑕᕐᓂᑦ ᐃᖃᓗᓐᓂᓪᓗ ᐱᔭᐅᖃᑦᑕᖅᑐᓂᑦ ᐃᖃᓗᒐᓱᑦᑎᓄᑦ ᐃᖃᓪᓕᐊᕐᓇᒥ, ᐊᒻᒪᓗ ᐊᑦᑐᓇᖅᑐᒦᖁᓇᒋᑦ ᐊᕙᑎᕗᑦ ᐸᖅᑭᑦᑎᐊᕐᓗᒍ.”
ᓖᓴ ᑯᐱᕐᕈᐊᓗᒃ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ ᐊᖏᔪᖅᑳᑉ ᑐᖏᓕᖓ (ᓯᓚᕐᔪᐊᒧᑦ), ᐊᔅᓱᕈᓪᓚᕆᓚᐅᖅᓯᒪᔪ ᐃᓄᐃᑦ ᐱᔪᓐᓇᐅᑎᖏᓐᓄᑦ ᐊᒻᒪᓗ ᑕᒪᑐᒥᖓ ᑎᓕᔭᐅᓯᒪᔪᒥᑦ ᓚᓐᑕᒥ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ ᑲᑎᒪᑎᓪᓗᒋᑦ, ᐃᓕᓴᕆᔭᐅᓪᓗᑎᓪᓗ ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᑐᐃᓂᖏᓐᓂ ᓄᖅᑲᑎᑦᑎᓂᕐᒧᑦ ᐅᖅᓱᐊᓗᓐᓂ ᐃᓚᖃᓐᖏᑦᑐᓂᒃ. “ᖁᕕᐊᑉᐳᒍᑦ ᑲᓇᑕ ᓇᓗᓇᐃᖅᓯᓯᒪᒻᒪᑦ ᐃᑲᔪᖅᑐᐃᓪᓗᓂᓗ ᓄᖅᑲᖓᑎᑦᑎᓂᕐᒥᑦ ᐅᓪᓗᒥᐅᔪᖅ ᑕᕝᕙᓂ ᑲᑎᒪᓂᐅᔪᒥᑦ, ᐊᒥᓱᓂᓪᓗ ᐅᑭᐅᖅᑕᖅᑐᒥ ᐅᖃᐅᓯᐅᓯᒪᔪᓂᒃ ᓄᖅᑲᑎᑦᑎᓂᕐᒥᑦ 7−ᓂᑦ ᑎᓴᒪᐅᔪᖅᑐᓃᑦᑐᓂᑦ. ᐅᓪᓗᒥᐅᔪᖅ ᐃᓅᓇᓱᐊᕋᑦᑕ ᐅᑭᐅᖅᑕᖅᑐᒥ ᑎᒍᒥᐊᕐᓇᑕᓗ ᓄᓇᖃᖅᑳᖅᑐᒥᓂᕐᓂᑦ ᓄᓇᓕᓐᓂ ᐅᓗᕆᐊᓇᖅᑐᒦᑎᑦᑎᒋᐊᖃᕐᖓᑕ ᐊᑭᐊᓗᖏᓐᓂ ᑭᓱᑐᐃᓐᓇᐃᑦ. ᐊᑦᑕᓇᐃᖅᓯᓇᓱᑐᐃᓐᓇᖅᑐᒍᑦ ᐅᑭᐅᖅᑕᖅᑐᒥ ᐃᒪᖏᓐᓂ, ᐆᒪᔪᓂᒃ ᐊᕙᑎᑦᑎᓂᓪᓗ − ᐊᑐᓂ ᐊᑦᑐᐊᓂᖃᖃᑦᑕᕐᖓᑕ ᐊᒥᓱᑎᒍᑦ ᐅᕙᒍᓪᓗ ᐊᔾᔨᐅᖏᑦᑑᔪᒍᑦ ᐃᓅᓪᓗᑕ.”
ᑖᒃᑯᐊ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ ᐊᓯᖏᑦ ᑲᑎᒪᔨᕋᓛᖏᑦ ᓱᕈᕐᓇᖅᑎᑎᑦᑕᐃᓕᒪᓂᕐᒥᑦ ᑲᒪᒋᐊᖃᕐᓂᒥᓪᓗ ᑲᒪᖃᑦᑕᕐᖓᑕ ᑕᐃᒪᐃᑦᑐᓕᒫᓂᑦ ᓱᕈᖅᑎᑦᑎᑕᐃᓕᒪᓂᕐᒥᑦ ᑲᒪᒋᐊᖃᕐᓂᖏᓐᓄᓪᓗ ᑎᒍᒥᐊᖅᑕᐅᒐᔭᕐᖓᑦ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ ᐱᓕᕆᐊᖏᓐᓄᑦ. ᑲᑎᒪᓚᐅᖅᑐᑦ PPR7 ᕖᕝᕗᐊᕆᒥ 17-21, 2020.