Viivvuari 25, 2020 – Aatuaa, Kanata – Inuit Ukiuqtaqtumiuqatigiit Katimajingit katimaqataulauqsimajut Silarjuami Imarmiutalirinirmut Katujjiqatigiinnit katimajiralaanguqataujut suruqtailimatittinirmut kamagiaqarninginnullu (PPR7) katimaniujumit Lantan, Inglanmi nunanganit pinasuarusirilauqtatinni. Inuit Ukiuqtaqtumiuqatigiit Katimajingit assurulauqtut paqqittigumallutit ukiuqtaqtuup imanganni ammalu uqausiqattaniqtutit maligalianginni uqsualunni atuqtauqattaqtunit. Kingulliqpaami isumaliamininganni, Inuit Ukiuqtaqtumiuqatigiit Katimajingit suli qaujikkaiqattarniaqtut sanajinik gavamakkunillu piliriqatigiiqullugit paqqijauqullugillu imarmiutait piruqtut kinguvaattinnut atuqtaujunnaqullugit sivunialuttinnut.
Ullimilisait ungasittumiutat nunaliit ukiuqtaqtumi ningurrutissaujunit qallunaaniinngaaqtunik tatiqaqattarngata amisunit sunakkutaarnit. Tamakkuangutillugit attanaqtailimagiaqarninginni makimajjutissauninginnillu usikattattaqtauvattunik ingirrajulirinirmillu aqqutauvattunit inunnit sunakkutaanullu tamaunngaqtunit silataanuuqqaqtunillu, isiqtaugajunniqsaulirngat, sikunnginiqsauvaliqtunilu. Inuit ukiuqtaqtumiuqatigiit katimajingit nalunanngittuq piliriarijarialinga − tamakkua attanaqtailimajumiitigiaqaqtavut ukiuqtaqtumi usikaqtarviuvattut nunalinnut inunnut assuruutauqunagillu.
Assurunnaqtukkuulauqtut aivaqatiqaqtutit, takulauqtugu manituinnangittunit asinginni avittuqsimajunik nunalirjuani pijjutigillugit maligangit qangakkuuningillu atuqtauqattarningit uqsualuit ukiuqtaqtumi usikattatillugit, nuqqangatittigiaqalilauqsimajugut kisianili ukiunut qulinut tamanna pinasugasunniaqtutigu. Asingittau pijariatulaurmijut attanaqtailimajumiiqujiniq ukiuqtaqtumi usikattaqattanirmi takunnaqtauttiariaqarninginni ammalu piliriqatiqainnalutit kuvijuqarniqqat qanuq kamagijaugajarmangaata nunalinnit, umiarjuamiinngaaqtunik, angijuutiit imarmiinngaaqtut, nipiqaluaqtut imavinnit, attanaqtailimagiaqarningillu aqqutauvattut umiarjuakkut.
“Inuit Ukiuqtaqtumiuqatigiit Katimajingit ajauqtuikannirumagatta tamatuminga nuqqangatittikannirluta atuqtaunirivattanginni usikattarninginnillu uqsualunnit ukiuqtaqtuup imanginni aaqqigiarasungaarlutigullu. Kisianili, isumaaluutiqallarittugut tamatuminga attuiniqakammanniarninganni “piqasiujjingittunit” nunalivullu inuusivullu ulurianaqtumiilirlutit. Nillianginnarniaqtugu tamatuminga nuqqangatittinasuarluta tamatuminga uqsualunni ilaqanngittunik ammalu paqqilutigu nunalivut avativullu, “Uqalauqtuq Liisa Qupirrualuk,Angijuqqaap Tungilinga Inuit Ukiuqtaqtumiuqatigiit Katimajinginni Kanatami.
Piliriqatiqainnarniaqtugit ilagijaujunit avittuqsimajunik silarjuami, iqqanaijarvialunnik avittuqsimajunillu Inuit Katujjiqatigiinginni paqqigumallugit ukiuqtaqtumi imavut inuillu nunalingit.
Inuit Ukiuqtaqtumiuqatigiit Katimajingit tunisisimammijut tussirautimit piliriqatiqarniarnirmit Silarjuami Imalirinirmut Katujjiqatigiinnik taakkua Inuit Ukiuqtaqtumiuqatigiit Katimajingikkut piqatauqullugit tavvungallarik immikkullu nilliagunnarlutit isumaaluutaujunik inunnut, nipivullu tusaqtauqullugit tamakkununga pimmariujunik uqausiriqattarlutigu asinginnullu isumaqatigijattinni Silarjuami Imalirinirmut Katujjiqatigiinnik.
“Tamakkiik pigiarutiit attuammatik,” Uqaqtuni Inuit Ukiuqtaqtumiuqatigiit Katimajingit Issivautanga Tali Sampu Turu Alaaskami. “inuit ukiuqtaqtumiuqatigiit katimajingit kiggaqtuijingit katimaqataulauqsimajut Silarjuami Imalirinirmut Katujjiqatigiinnik, malittut asinginnillu gavamaunngittunit katujjiqatigiinnik kamagijauqullugit silarjuami imalirinirmut katujjiqatigiinnik. Kisianili, namminiq kiggaqturumaqattaqtugut pijunnarmigatta taimaak. Uvagut inuulluta, namminiq nilliagunnarniqaratta tamakkuninga isumagijattinni imarmiutalirinirmit. Kammalukkanniq, attanaqtumiiqunagit ukiuqtaqtumi amiarjuakkuupattunik ammalu “akuttujuutaujuumilutillu uqsualuttarniq” ukiuqtaqtumi taimak uqausiusimammata Utqiavimmi Nalunaiqtausimajumit, kajusititaulauqsimajuq Inunnut 2018−mi Arraagutamaaqsiutinganni Katimatillugit Alaaskami Julaingutillugu, 2018−mi. ”
Maligaq 18 Utqiavik Nalunaiqtausimajunit piliriaqariaqarngata Inuit Ukiuqtaqtumiuqatigiit Katimajinginni “nilliagunnarlutit ajauqtuilutillu Ukiuqtaqtumi Maligarmit, asinginnillu silarjuami avittuqsimajunillu nunalirjuarnit maliganginni, tuavirnaqtumit kamattautigijunnarlutit, akuttujuumitigiarlugullu uqsualuliriniq attuiniqaluaqunagit imarmiutarnit iqalunnillu pijauqattaqtunit iqalugasuttinut iqalliarnami, ammalu attunaqtumiiqunagit avativut paqqittiarlugu. ”
Liisa Kupirrualuk, Inuit Ukiuqtaqtumiuqatigiit Katimajingit Kanatami angijuqqaap tungilinga (silarjuamut), assurullarilauqsimaju Inuit pijunnautinginnut ammalu tamatuminga tilijausimajumit lantami Silarjuami Imalirinirmut Katujjiqatigiinnik katimatillugit, ilisarijaullutillu Kanataup Gavamakkungit ikajuqtuininginni nuqqatittinirmut uqsualunni ilaqanngittunik. “quviappugut kanata nalunaiqsisimammat ikajuqtuillunilu nuqqangatittinirmit ullumiujuq tavvani katimaniujumit, amisunillu ukiuqtaqtumi uqausiusimajunik nuqqatittinirmit 7−nit tisamaujuqtuniittunit. Ullumiujuq inuunasuaratta ukiuqtaqtumi tigumiarnatalu nunaqaqqaaqtuminirnit nunalinni ulurianaqtumiitittigiaqarngata akialunginni kisutuinnait. Attanaiqsinasutuinnaqtugut ukiuqtaqtumi imanginni, uumajunik avatittinillu − atuni attuaniqaqattarngata amisutigut uvagullu ajjiungittuujugut inuulluta.”
Taakkua Silarjuami Imalirinirmut Katujjiqatigiinnik Asingit Katimajiralaangit Sururnaqtitittailimanirmit Kamagiaqarnimillu Kamaqattarngata taimaittulimaanit suruqtittitailimanirmit kamagiaqarninginnullu tigumiaqtaugajarngat Silarjuami Imalirinirmut Katujjiqatigiinnik pilirianginnut. Katimalauqtut PPR7 Viivvuarimi 17-21, 2020.