Press Releases

Documenting our Progress

Donate to ICC

ICC Alaska

ICC Greenland

ICC Chukotka

Home » Press Releases » 2023 » ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐅᐱᒍᓱᑉᐳᑦ ᐊᕕᔅᓯᒪᔪᓂᒃ ᐊᖏᕋᒥᒃ ᓄᓇᕐᔪᐊᕐᒥᐅᓄᑦ ᐊᖏᕈᑎᒥᒃ ᓴᐳᑎᓗᒋᑦ ᑕᕆᐅᑦ

ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐅᐱᒍᓱᑉᐳᑦ ᐊᕕᔅᓯᒪᔪᓂᒃ ᐊᖏᕋᒥᒃ ᓄᓇᕐᔪᐊᕐᒥᐅᓄᑦ ᐊᖏᕈᑎᒥᒃ ᓴᐳᑎᓗᒋᑦ ᑕᕆᐅᑦ

ᒫᔾᔨ 9, 2023 – ᓅᒃ, ᑲᓛᖦᖡᑦ ᓄᓈᑦ – ᐱᓇᓱᐊᕈᓯᐅᓚᐅᖅᑐᒥ ᐊᖏᕈᑕᐅᔪᖅ ᓴᐳᔾᔭᐅᓂᖏᓐᓄᑦ ᑲᔪᓰᓐᓇᕈᓐᓇᖅᑐᒃᑯᓪᓗ ᐊᑐᖅᑕᐅᓂᖏᓐᓄᑦ ᑕᕆᐅᓂ ᐃᓃᑦ ᐃᒪᐃᓐᓇᕐᓂ ᐊᑯᓂᐊᓗᒃ ᐊᒡᒋᓚᐅᖅᑐᖅ ᑭᓯᐊᓂ ᓯᕗᒧᐊᕈᑎᑦᑎᐊᕙᐅᓪᓗᓂ, ᒪᓕᑦᑐᒋᑦ ᐅᖃᖅᑕᖏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔾᔨᖏᑦ.

ᐊᓂᒍᓚᐅᖅᑎᓪᓗᒋᑦ ᐊᕐᕌᒍᓄᑦ ᐊᖏᖃᑎᒌᒐᓱᖕᓃᑦ, ᓄᑖᖅ ᓄᓇᕐᔪᐊᕐᒧᑦ ᐱᖁᔭᑎᒍᑦ ᒪᓕᒋᐊᓕᒃ ᐊᖏᖃᑎᒌᒍᑎ ᐃᑲᔪᕐᓂᐊᖅᑐᖅ ᓴᐳᔾᔭᐅᓪᓚᑦᑖᕐᓂᕐᓄᑦ ᒪᕐᕈᐃᑦ ᐱᖓᓱᓂᑦ ᓄᓇᕐᔪᐊᑉ ᑕᕆᐅᖏᓐᓂᒃ ᐅᖓᑖᓃᑦᑐᓄᑦ ᒐᕙᒪᖃᑎᒌᑦ ᐱᓕᕆᔪᓐᓇᖅᑕᖏᓐᓂᑦ.

“ᐃᓄᐃᑦ ᑕᑯᔭᕌᖓᒥᒃ ᑕᕆᐅᕐᒥᒃ, ᑕᑯᔪᒍᑦ ᑕᕆᐅᕐᒥᒃ ᑲᑎᑦᑎᔪᖅ ᐅᕙᑦᑎᓐᓂᒃ ᐊᕕᔅᓯᒪᑎᑦᑎᙱᖔᖅᑐᓂ,” ᐅᖃᖅᑐᖅ ᓯᐊᕋ ᐅᓪᔅᕕᒡ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᓄᓇᕐᔪᐊᕐᒧᑦ ᐃᔅᓯᕙᐅᑕᖓ. “ᑕᕆᐅᑦ ᐃᓅᓯᕆᔭᐅᔪᑦ ᐃᓄᓐᓄᑦ ᐃᓄᓕᒫᓄᓪᓗ ᓄᓇᕐᔪᐊᕐᒥ.”

“ᑕᕆᐅᕐᒥᐅᑦ ᓂᕐᔪᑏᑦ, ᐃᖃᓗᐃᑦ ᑎᖕᒥᐊᓪᓗ ᐅᐸᓲᑦ ᐅᑭᐅᖅᑕᖅᑐᒧᑦ, ᐃᓅᓯᕐᒥᒍᑦ ᓂᕿᖃᖅᑎᑉᐹᑎᒍᑦ ᐅᑭᐅᖅᑕᖅᑑᓪᓗ ᑕᕆᐅᖓ ᓂᕿᔅᓴᖃᑦᑎᐊᖅᑐᓂ ᕿᑐᕐᖏᐅᕐᕕᐅᕗᑦ ᐅᓄᖅᑐᓄᑦ ᓄᓇᕐᔪᐊᑉ ᐆᒪᔪᕈᓘᔭᖏᓐᓄᑦ,” ᐅᓪᔅᕕᒡ ᐅᖃᖅᑐᖅ. “ᐃᓄᐃᑦ ᑕᕆᐅᕐᒥᐅᑕᐅᓪᓗᑎᒃ ᐃᓅᔪᑦ – ᑐᙵᔪᒍᑦ ᓯᔾᔭᓄᑦ, ᑕᕆᐅᓄᑦ ᑕᕆᐅᓪᓗ ᓯᑯᐊᓄᑦ ᓂᕿᖃᕈᓐᓇᕐᓂᑦᑎᓐᓄᑦ, ᐃᓕᖅᑯᓯᑐᖃᑦᑎᓐᓄᑦ ᑮᓇᐅᔭᓄᓪᓗ. ᐃᓄᐃᑦ ᑕᐅᑐᑦᑕᖏᓐᓂᑦ, ᐃᓄᐃᑦ ᐱᔪᓐᓇᕐᓂᖏᑎᑐᑦ, ᐆᒪᔪᓕᒫᑦ ᐃᓚᒌᖃᑎᒌᑦᑐᑦ, ᐊᑐᓃᖓᔪᑦ – ᐊᑕᐅᖅᓯᖅ ᐊᑦᑐᖅᑕᐅᒍᓂ ᑕᒪᒃᑮᓕᒫᓄᑦ ᐊᑦᑐᐃᒻᒪᑦ ᐃᓗᐊᓂ ᑲᑎᙵᔪᑦ ᐆᒪᔫᖃᑎᒌᖏᑦᑐᓄᑦ ᓴᓇᓯᒪᔪᓄᑦ ᐆᒪᖏᑦᑐᓄᑦ, ᐆᒪᔪᓄᑦ ᐃᓕᖅᑯᓯᑐᖃᓄᑦ ᐃᓚᖏᓐᓄᑦ.”

ᓕᓴ ᖁᐱᕐᕈᐊᓗᒃ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ ᐊᖓᔪᖅᑳᖓ, ᐃᓚᐅᓚᐅᖅᑐᖅ ᐊᖏᖃᑎᒌᒐᓱᑦᑐᓂ ᓂᐱᖃᖁᓪᓗᒋᑦ ᐃᓄᐃᑦ ᑖᒃᑯᑎᒎᓇᖅ. “ᐃᑦᑕᕐᓂᑦ, ᑭᖑᕚᕇᓂᑦ ᖃᐅᔨᔭᐅᔪᑦ ᐃᓅᖃᑎᒋᑦᑎᐊᕐᓂᑦᑎᓐᓄᓪᓗ ᑕᕆᐅᕐᒥᐅᑦ ᐊᕙᑎᖏᑦ ᐱᕕᖃᖅᑎᑦᑎᓯᒪᕗᖅ ᐊᔾᔨᐅᖏᑦᑐᒥᒃ ᖃᐅᔨᒪᕝᕕᒻᒥᒃ ᐅᑭᐅᖅᑕᖅᑐᒥ ᑕᕆᐅᕐᓂ ᐆᒪᔫᖃᑎᒌᖏᑦᑐᓄᑦ, ᓯᔾᔭᓄᑦ, ᑕᕆᐅᕐᓄᑦ ᑕᕆᐅᓪᓗ ᓯᑯᖏᓐᓄᑦ ᐊᔾᔨᐅᓇᑎᒃ ᑕᐃᒪᐃᑦᑑᔪᑦ ᑕᒫᓂ.”

ᖁᐱᕐᕈᐊᓗᒃ ᐅᖃᓚᐅᖅᑐᖅ ᓄᓇᖃᖅᑳᖅᑐᑦ ᖃᐅᔨᒪᔭᖏᑦ ᐃᓚᓕᐅᓯᒪᒻᒪᑕ ᐃᓄᐃᑦ ᐅᖃᐅᓯᖏᓐᓄᑦ, ᐃᓕᖅᑯᓯᑐᖃᖏᓐᓄᑦ ᐅᑉᐱᕆᔭᖏᓐᓄᑦ ᐱᓕᕆᔾᔪᓯᖏᓐᓄᓪᓗ.  “ᐅᕙᑦᑎᓐᓂᒃ ᑕᐅᑐᑦᑐᒍᑦ ᐆᒪᔪᑎᑐᑦ ᓴᓂᐊᓂ ᐊᓰᑦ ᐆᒪᔪᑦ ᑕᕆᐅᕐᓂ ᓯᔾᔭᓂᓗ ᑕᕆᐅᕐᓂ,” ᖁᐱᕐᕈᐊᓗᒃ ᐅᖃᖅᐳᖅ. “ᐊᓯᔾᔨᓕᖅᑐᒥ ᓄᓇᕐᔪᐊᑦᑎᓐᓂ, ᓄᓇᖃᖅᑳᖅᑐᑦ ᖃᐅᔨᒪᔭᖏᑦ ᐱᕐᔪᐊᖑᔪᑦ ᐃᓄᓕᒫᓄᑦ, ᐃᓕᓴᕆᔭᐅᔭᕆᐊᓖᑦ ᐱᓪᓚᑦᑖᑎᑐᑦ, ᐊᓐᓂᕐᓇᖅᑐᑐᑦ ᑐᑭᓯᔭᐅᓗᑎᓪᓗ ᓴᓂᐊᓂ ᑭᒡᓕᓯᓂᐊᕐᓂᒃᑯᑦ ᖃᐅᔨᒪᔭᐅᔪᓄᑦ.”  

ᓄᓇᖃᖅᑳᖅᑐᑦ ᖃᐅᔨᒪᔭᖏᑦ ᐱᖃᓯᐅᔾᔭᐅᔪᑦ ᑕᕝᕙᓂ ᓄᑖᕐᒥ ᐊᖏᖃᑎᒌᒍᑎᒥ ᐃᓗᐊᓃᒃᑲᒥ 2018 ᕿᑎᐊᓂ ᐅᑭᐅᖅᑕᖅᑐᒥ ᑕᕆᐅᕐᒧᑦ ᐊᖏᖃᑎᒌᒍᑎᒥ ᐊᑐᓕᖅᑎᑦᑎᓚᐅᖅᑐᖅ 16 ᐊᕐᕌᒍᓄᑦ ᐃᖃᓗᒐᓱᒋᐊᖃᖏᓐᓂᕐᒥᒃ ᖁᑦᑎᑦᑐᒥ ᐅᑭᐅᖅᑕᖅᑐᒥ. ᑕᒪᒃᑮᒃ ᐊᖏᖃᑎᒌᒍᑏᒃ ᑎᒃᑯᐊᖅᓯᕘᒃ ᐱᓕᕆᐊᖏᓐᓂᒃ ᓄᓇᖃᖅᑳᖅᑐᑦ ᐃᓄᐃᑦ ᑲᑐᔾᔭᐅᓗᑎᒡᓗ ᓴᓇᔭᐅᓂᖏᑦ ᖃᐅᔨᒪᔭᐅᔪᓂᒃ.

“ᕿᑎᐊᓂ ᐅᑭᐅᖅᑕᖅᑐᒥ ᑕᕆᐅᖅ ᓄᓇᕐᔪᐊᒥᐅᓄᑦ ᑕᕆᐅᖑᕗᑦ ᐊᖏᖃᑎᒌᒍᑎᓗ ᓱᓕᒃᑲᓐᓂᐅᕗᖅ ᓄᓇᕐᔪᐊᒥᐅᓄᑦ ᐊᖏᖃᑎᒌᒍᑎ ᐃᓄᐃᑦ ᓂᐱᖃᕐᕕᒋᓪᓗᓂᐅᒃ ᐃᑲᔪᖅᑐᑎᓪᓗ ᖃᐅᔨᒪᓂᖅᑎᒍᑦ,” ᐅᖃᖅᑐᖅ ᖁᐱᕐᕈᐊᓗᒃ.

“ᑲᑐᔾᔭᐅᓗᑎᒃ ᓴᓇᔭᐅᓂᖏᑦ ᖃᐅᔨᒪᔭᐅᔪᓂᒃ ᓴᓇᔭᐅᔭᕆᐊᖃᖅᐳᑦ ᐱᖅᑯᓯᒃᑯᑦ ᒪᓕᑦᑐᓂᒃ ᐃᓄᓐᓄᑦ ᐊᓯᓄᓪᓗ ᓄᓇᖃᖅᑳᖅᑐᓄᑦ ᐃᓄᓐᓄᑦ ᐱᔪᓐᓇᐅᑎᖃᕋᒥᒃ – ᖃᐅᔨᒪᔨᑕᐅᓪᓗᑎᓪᓗ – ᓇᐅᒃᑯᓕᒫᖅ ᖃᐅᔨᓴᕐᓂᖅᑎᒍᑦ ᐊᑦᑐᐊᔪᓄᓪᓗ ᐱᓕᕆᔪᓄᑦ,” ᐅᖃᖅᑐᖅ ᐅᔅᓪᕕᒡ. “ᓄᓇᖃᖅᑳᖅᑐᑦ ᖃᐅᔨᒪᔭᖏᑦ ᐊᑐᕆᐊᓖᑦ ᓵᑦᑎᓂᕐᓄᑦ ᐊᑦᑐᐊᔪᓄᑦ ᑕᕆᐅᕐᓄᑦ, ᐆᒪᔫᖃᑎᒌᖏᑦᑐᓄᑦ ᐅᓄᕐᓂᖏᓐᓄᑦ ᓯᓚᐃᓪᓗ ᐊᓯᔾᔨᕐᓂᖏᓐᓂᑦ ᐊᔅᓱᕈᕐᔪᐊᖅᑐᓄᑦ.”

“ᐃᓄᐃᑦ ᓯᕗᓂᐊᓃᑦᑐᑦ ᐅᓄᖅᑐᓄᑦ ᓄᓇᕐᔪᐊᕐᒥ ᐊᔅᓱᕈᕐᔪᐊᖅᑐᓄᑦ ᓯᓚᐃᑦ ᐊᓯᔾᔨᕐᓂᖏᓐᓂᑦ, ᐆᒪᔫᖃᑎᒌᖏᑦᑐᓂᒃ ᐊᓯᐅᔨᓂᕐᓂᑦ ᓱᕈᓄᓪᓗ ᑕᐃᒪᐃᒻᒪᓪᓗ ᑕᑯᕙᕗᑦ ᑖᓐᓇ ᐊᖏᖃᑎᒌᒍᑎ ᑯᓐᓂᖕ-ᒪᓐᑐᕆᐊᓪᒥ ᓄᓇᕐᔪᐊᕐᒥ ᐆᒪᔫᖃᐃᑎᒌᖏᑦᑐᓄᑦ ᑐᙵᕕᓪᓗ ᐱᕐᔪᐊᑎᑐᑦ ᐱᓕᕆᓂᖅᑎᑐᑦ ᓯᕗᒧᑦ ᐃᕐᖑᑕᑦᑎᓐᓄᑦ.’ ᖁᐱᕐᕈᐊᓗᒃ ᐅᖃᑲᓐᓂᖅᑐᓂ. “ᓄᓇᕐᔪᐊᕐᒥ ᖃᓄᐃᑦᑎᐊᕆᐊᓖᑦ ᓴᐳᑎᓗᒍ ᐅᑭᐅᖅᑕᖅᑐᖅ ᐃᓄᓐᓂᓪᓗ ᐸᑦᑕᒃᑕᐅᕗᖅ ᑖᓐᓇ ᓯᕗᒧᐊᕐᓂᖅ.”

ᑖᓐᓇ ᐊᖏᖃᑎᒌᒍᑎ ᐃᑉᐱᒍᓱᑦᑐᖅ ᒐᕙᒪᖃᑎᒌᖏᑦᑐᑦ ᐅᖃᖅᑕᖓᓄᑦ ᐱᔪᓐᓇᕐᓂᖏᓐᓄᑦ ᓄᓇᖃᖅᑳᖅᑐᑦ ᐃᓄᐃᑦ ᐊᑭᖃᖏᑦᑐᒃᑯᓪᓗ ᓯᕗᓂᐊᓂ ᑐᓴᐅᒪᔪᓄᑦ ᐊᖏᕐᓂᕐᓄᑦ, ᐃᓕᓴᖅᓯᕗᖅ ᐊᑑᑎᖃᕐᓂᖏᓐᓂᒃ ᓄᓇᖃᖅᑳᖅᑐᑦ ᖃᐅᔨᒪᔭᖏᑦ ᐱᔪᓐᓇᕐᓂᖏᓐᓄᓪᓗ ᓄᓇᖃᖅᑳᖅᑐᑦ ᐃᓄᐃᑦ ᐃᓄᐃᓪᓗ ᑎᓕᐅᕆᕗᑦ ᑕᒪᒃᑮᓂᒃ ᒐᕙᒪᓂᒃ ᑖᓐᓇ ᐊᑐᓕᖅᑎᖁᓪᓗᒍ ᐊᖏᖃᑎᒌᒍᑎ ᐊᑐᓕᖅᑎᓪᓚᑦᑖᕐᓗᒍᓗ ᓄᑭᖃᕐᓗᓂ. ᑖᓐᓇ ᓄᓇᕐᔪᐊᖅ ᑐᙵᔪᖅ ᑖᔅᓱᒧᖓ.

-30-

ᐅᖃᖃᑎᒋᒍᒃ:

ᐊᐃᓖᓐ ᐊᑕᒻᔅ
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ
ᑲᑎᒪᔾᔨᖏᑦ (ᐊᓛᔅᑲ)
eilene@iccalaska.org

ᑐᑯᒻᒥᙳᐊᖅ ᓂᒃᔭᐃᕐ ᐅᓪᓴᓐ
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ
ᑲᑎᒪᔾᔨᖏᑦ (ᑲᓛᖦᖡᑦ ᓄᓈᑦ)
tukumminnguaq@inuit.org

ᐊᐳᕆᓪ ᐱᒐᓚᒃ
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ
ᑲᑎᒪᔾᔨᖏᑦ (ᑲᓇᑕ)
apigalak@inuitcircumpolar.com

                                 

The Inuit Circumpolar Council (ICC) is an Indigenous Peoples’ Organization (IPO), founded in 1977 to promote and celebrate the unity of 180,000 Inuit from Alaska (USA), Canada, Greenland, and Chukotka (Russia). ICC works to promote Inuit rights, safeguard the Arctic environment, and protect and promote the Inuit way of life. In regard to climate change, we believe that it is crucial for world leaders and governments to recognize, respect and fully implement the human rights of Inuit and all other Indigenous peoples across the globe.