ᔪᓚᐃ 7 2023 – ᓚᓐᑕᓐ, ᑕᕆᐅᑉ ᐊᑭᐊᓂ (ᔪᓇᐃᑕᑦ ᑭᖕᑕᒻ) – ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ ᐊᑐᐃᓐᓇᖃᖅᑎᑦᑎᒻᒪᑕ ᓄᓇᖃᖅᑳᖅᑐᒥᓂᕐᓂᑦ ᐱᖃᓯᐅᔾᔭᐅᖁᓪᓗᒋᑦ ᐸᕐᓇᐅᑎᓂᒃ ᓯᓚ ᐊᓯᔾᔨᐸᓪᓕᐊᓗᐊᖁᒍᓐᓃᖅᑐᒍ ᐅᒥᐊᕐᔪᐊᑦ ᐊᖅᑯᑎᖏᑦ ᐱᓪᓗᒋᑦ ᑕᒫᓂ ᑲᑎᒪᒍᒫᖅᑐᑦ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᖏᓐᓂ. ᑲᑎᒪᖃᑕᐅᔪᒫᖅᑐᑦ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ ᐃᓚᓕᐅᔾᔭᐅᖁᓪᓗᒋᑦ ᓄᓇᖃᖅᑳᖅᑐᒥᓃᑦ ᐊᒻᒪᓗ ᐃᓄᐃᑦ ᐃᓱᒪᒋᔭᖏᓐᓂ ᐊᓯᔾᔩᒍᒪᓐᓂᖅᑲᑕ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᖏᓐᓂ ᐸᕐᓇᐅᑎᖏᓐᓂ ᓄᖑᑉᐹᓪᓕᖁᓪᓗᒋᑦ ᐃᔅᓵᕿᔪᓂᒃ ᐊᓂᕐᓂᖃᕐᕕᑎᓐᓅᐸᑦᑐᓂᒃ ᐅᒥᐊᕐᔪᐊᒦᓐᖔᖅᑐᓂᒃ − ᑕᒪᒃᑯᐊ ᕿᓐᓂᖅᑖᕿᔪᖅ ᓱᕈᓐᓇᖅᑐᖅ ᑕᒫᓂᒻᒪᑕ 20% ᓯᓚᕐᔪᐊᒥ ᐊᑦᑐᐃᓂᖃᖅᑐᓂᒃ ᓯᓚᖓᓐᓂ.
“ᑭᓯᐊᓂᓕᑦᑕᐅ, ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᖏᓐᓂ ᐊᐃᕙᓂᖏᑦ ᓚᓐᑕᒥ ᐋᖅᑮᓚᐅᙱᒻᒪᑕ 1.5 ᓇᒦᓐᓂᖏᓐᓂ (ᐅᖅᑰᓂᖓ) ᐃᔅᓵᕿᔪᓂᒃ ᐊᓂᕐᓂᖃᕐᕕᑎᓐᓅᐸᓪᓕᐊᔪᓂᒃ ᐊᖅᑯᑕᐅᔪᓄᑦ ᓯᓚᕐᔪᐊᒥ ᐅᒥᐊᕐᔪᐊᒃᑯᑦ,” ᐅᖃᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ ᐃᔅᓯᕙᐅᑕᖓᑕ ᑐᖏᓕᖓ ᓖᓴ ᖁᐱᕐᕈᐊᓗᒃ. “ᓄᑖᕐᒥᑦ ᒥᑭᓪᓕᕚᓪᓕᑎᑦᑎᒍᑕᐅᒍᓐᓇᖅᑐᓂᒃ ᐱᑕᖃᕈᓐᓃᑎᐊᒻᒪᕆᓪᓗᒍᓗ ᑕᒫᓂᖃᐃ 2050−ᒥ ᐊᖏᕈᑎᖃᖅᑐᒍᑦ, ᐊᒻᒪᓗ 2030−ᒥ ᐊᒻᒪᓗ 2040−ᒥ “ᖃᐅᔨᓴᕐᓗᒋᑦ, ᑕᒪᒃᑯᐊ ᐆᑦᑐᖅᑕᐅᔪᓐᓇᖅᑐᓪᓗ ᓱᓕ ᓇᓗᓇᖃᑦᑕᕐᖓᑕ ᑐᑭᓯᔭᔅᓴᐅᑦᑎᐊᙱᑦᑐᑦ ᒪᓕᑦᑎᐊᕐᓇᑎᓪᓘᒻᒪᑕ.”
ᑭᓯᐊᓂᓕ ᐱᓇᓱᐊᕈᓯᖓᓐᓂ ᑲᔪᓯᓐᓂᓚᐅᙱᑦᑐᑦ ᐃᓄᐃᑦ ᑕᑯᕙᑦᑕᖏᓪᓗ ᐊᖏᖅᑕᐅᒋᐊᓖᑦ ᐃᒪᕕᒻᒥ ᓂᐱᖃᓗᐊᖅᑐᓄᑦ ᐊᑐᐊᒐᐃᑦ ᐊᑐᓕᖁᔭᐅᓯᒪᒻᒪᑕ ᐅᒥᐊᕐᔪᐊᖅᑕᖃᖃᑦᑕᑎᓪᓗᒍ ᐃᓄᐃᑦ ᓄᓇᖓᓐᓂ. ᐊᑐᐊᒐᐃᑦ ᐃᓗᓕᖃᖅᑐᖅ ᐃᓱᒪᒋᔭᐅᒋᐊᖃᖅᑐᑎᓪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂ ᐊᒻᒪᓗ ᐃᓄᐃᑦ ᐃᓱᒪᒋᔭᖏᓐᓂ ᐊᐅᓚᑦᑎᑎᓪᓗᒋᑦ ᐃᒪᕕᒻᒥ ᓂᐱᖃᓗᐊᖁᔨᓐᓇᑎᑦ ᐃᓄᐃᑦ ᓄᓇᖓᓐᓂ, ᐃᓄᐃᑦ ᐊᖏᕐᕋᖏᓐᓂ. ᐊᒻᒪᓗ, ᑐᔅᓯᕋᐅᑎ ᑲᓇᑕᒥ ᓴᖅᑮᒍᒪᓂᖏᓐᓂ ᐅᑭᐅᖅᑕᖅᑐᒥ ᓴᖅᑭᐸᑦᑐᓂ ᐃᔅᓵᕿᔪᓂᒃ ᐊᐅᓚᑕᐅᒋᐊᖃᕐᖓᑕ ᓇᓗᓇᐃᖅᑕᐅᓗᑎᑦ ᐱᓗᐊᖅᑐᖅ ᕿᓐᓂᖅᑕᑦ ᓱᕈᓐᓇᖅᑐᑦ ᓴᖅᑭᐸᑦᑐᑦ ᐅᒥᐊᕐᔪᐊᓃᓐᖔᖅᑐᑦ, ᑕᒪᒃᑯᐊ ᑐᙵᓱᑦᑎᑕᐅᓚᐅᖅᑐᑦ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ ᐊᒥᓱᓄᓪᓗ ᓄᓇᓕᕐᔪᐊᓄ ᐅᖃᐅᓯᐅᖁᔭᐅᓪᓗᑎᑦ.
2023−ᒥ ᓯᓚᕐᔪᐊᒥ ᑲᑎᒪᔨᖏᑦ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐱᖓᓲᔪᖅᑐᖓᓐᓂ ᖃᐅᔨᓴᖅᑕᐅᔪᖅ (AR6) ᐅᓂᒃᑳᓕᐅᓚᐅᖅᓯᒪᔪᑦ ᐃᓚᓕᐅᔾᔨᓪᓗᑎᑦ ᓯᓚᕐ ᐊᓯᔾᔨᐸᓪᓕᐊᔪᕐᔪᐊᕌᓘᓕᕐᓂᖓᓐᓂ ᓱᒃᑲᓕᔪᒥᓪᓗ ᐊᑦᑐᐃᓂᖃᖅᑐᓂ ᐃᓄᓐᓂᑦ, ᐱᓗᐊᖅᑐᒥ ᐃᓄᓐᓂᑦ ᐊᓯᖏᓐᓂᓪᓗ ᓄᓇᖃᖅᑳᖅᑐᒥᓂᕐᓂᑦ.
“ᐃᓄᐃᑦ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐅᖅᑰᔪᒧᑦ ᐊᑦᑐᖅᑕᐅᓕᕐᖓᑕ ᐱᖓᓱᐊᖅᑎ ᑎᓴᒪᕌᖅᑎᒻᒪᕆᑦᑐᓂᓪᓘᓐᓃᑦ ᐅᖅᑰᓂᖅᓴᐅᓕᖅᑐᖅ ᐃᓚᖏᓐᓂ ᓯᓚᕐᔪᐊᒥ,” ᐅᖃᓚᐅᖅᑐᖅ ᖁᐱᕐᕈᐊᓗᒃ. “ᐃᓄᐃᑦ ᓄᓇᓖᑦ ᐃᓕᑦᑐᐸᓪᓕᐊᒐᓱᐊᓕᖅᑐᑦ ᐋᖅᑭᔅᓱᐃᓇᓱᐊᖅᑐᑎᓪᓗ, ᑕᒪᒃᑯᓂᖓ ᓈᒻᒪᖏᑦᑐᓂ ᐊᑐᓚᐅᖅᓯᒪᙱᑕᖏᓐᓂ ᐅᓪᓗᒥᐅᓕᖅᑐᓪᓗ ᐱᖁᔭᔨᓕᐅᕐᓗᑎᑦ ᑭᓯᐊᓂᓕ ᐱᖃᑕᐅᑎᑕᐅᙱᑦᑎᐊᖅᑐᑎᑦ.”
“ᓯᓚᕐᔪᐊᒥ ᑲᑎᒪᔨᖏᑦ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐱᖓᓲᔪᖅᑕᖓᓐᓂ ᖃᐅᔨᓴᖅᑕᐅᔪᖅ (AR6) ᐅᓂᒃᑳᖓᓐᓂ ᐅᖃᖅᓯᒪᔪᖅ ᖃᐅᔨᒪᑦᑎᐊᖅᑐᑦ ᐱᑦᑕᐅᓕᒪᑎᑦᑎᓇᓱᐊᕐᓗᓂ ᐅᓗᕆᐊᓇᖅᑕᐃᓕᒪᑎᑦᑎᑲᓐᓂᕋᓱᐊᕐᓗᓂᓗ ᐊᑦᑐᖅᑕᐅᖁᓇᒋᑦ ᐅᑭᐅᖅᑕᖅᑐᖅ ᐊᔅᓱᕈᓪᓚᕆᑦᑐᐊᓘᓗᑎᑦ ᑭᓯᐊᓂ”, ᖁᐱᕐᕈᐊᓗᒃ ᐅᖃᖅᑐᓂ. “ᐃᓕᓴᖅᓯᓯᒪᔪᑦ ᐱᒻᒪᕆᐅᓂᖏᓐᓂ ᐃᓚᓕᐅᔾᔭᐅᒋᐊᖃᕐᖓᑕ ᓄᓇᖃᖅᑳᖅᑐᓱᒥᓃᑦ, ᓲᕐᓗ ᐃᓄᐃᑦ, ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐊᐅᓚᑦᑎᔾᔪᑎᔅᓴᓂᒃ ᓴᖅᑭᔮᖅᓯᑎᑦᑎᑲᓐᓂᕐᓗᑎᓪᓗ ᐱᓕᕆᖃᑕᐅᒋᐊᖃᕐᓂᖏᓐᓂ ᐊᔾᔨᐅᖏᒻᒪᑕ ᖃᐅᔨᒪᓂᖏᑦ ᐊᑐᖃᑦᑕᖅᑕᖏᑦ.”
“ᐃᓕᓴᕆᔭᐅᒻᒪᑕ ᑎᒍᔭᐅᓯᒪᔪᑦ ᐊᕙᓐᖔᓗᒃ ᐱᔪᓐᓇᐅᑎᖏᑦ ᓄᓇᖃᖅᑳᖅᑐᒥᓃᑦ ᓴᖅᑮᑲᓐᓂᕆᐊᖃᕐᓂᖏᓐᓂ, ᑕᐃᒪᐃᓪᓗᐊᖅᑎᑕᐅᓗᑎᑦ ᓯᕗᓂᑦᑎᓐᓂ ᑭᒃᑯᓕᒫᑦᑎᐊᕐᓄᑦ,” ᐅᖃᖅᑐᓂ ᓯᐊᕋ ᐅᓪᔅᕕᒡ, ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ ᓯᓚᕐᔪᐊᒥ ᐃᔅᓯᕙᐅᑕᕆᔭᐅᔪᖅ. “ᐊᒻᒪᓗᒃᑲᓐᓂᖅ ᐊᑐᓕᖅᑎᑦᑎᓗᑎᑦ ᓯᓚᕐᔪᐊᒥ ᑲᑐᔾᔨᔨᓂᒃ ᓇᓗᓇᐃᖅᑕᐅᓯᒪᓂᖏᓐᓂ ᐱᔪᓇᐅᑎᖏᑦ ᓄᓇᖃᖅᑳᖅᑐᒥᓃᑦ, ᐊᓯᔾᔨᖅᑕᐅᓯᒪᔪᖅ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᖏᓐᓂ ᐃᔅᓵᕿᔪᓂᒃ ᐊᓂᕐᓂᖃᕐᕕᑎᓐᓅᐸᓪᓕᐊᔪᓂᒃ ᒥᑭᓪᓕᕚᓪᓕᑎᑦᑎᓂᕐᒧᑦ ᐸᕐᓇᐅᑏᑦ ᐊᒻᒪᓗ ᐊᑐᓕᖅᑎᑕᐅᒋᐊᖃᓪᓚᕆᑦᑐᑎᑦ ᓄᓇᖃᖅᑳᖅᑐᒥᓃᑦ ᐃᓱᒪᒋᔭᖏᑦ, ᐊᑐᕐᓗᒋᑦ, ᐃᓱᒪᓕᐊᖏᑦ ᖃᐅᔨᒪᓂᖏᓪᓗ ᐃᓚᓕᐅᔾᔭᐅᓗᑎᒃ.”
ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ ᑲᑎᒪᑎᑦᑎᓚᐅᖅᓯᒪᒻᒪᑕ ᑕᐃᑲᓂ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᖏᓐᓂ ᑕᒫᓂ ᐱᓇᓱᐊᕈᓯᖓᓐᓂ ᖃᐃᖁᔨᓯᒪᓪᓗᑎᑦ ᓯᐅᕆᓕ ᕼᐊᐳᒥᑦ, ᑎᑎᕋᖅᑎᒻᒪᕆᒃ ᒪᕐᕉᓐᓂᒃ ᓯᓚᕐᔪᐊᒥ ᑲᑎᒪᔨᐅᔪᓂᒃ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐅᓂᒃᑳᓕᐅᖃᑦᑕᖅᑐᖅ, ᐅᖃᐅᓯᕆᓗᒋᑦ ᑖᒃᑯᐊ ᓯᓚᕐᔪᐊᒥ ᑲᑎᒪᔨᐅᔪᓂᒃ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐅᓂᒃᑳᖅ, ᐅᖃᐅᓯᕆᓗᒋᑦ ᖃᓄᖅ ᓯᓚᕐᔪᐊᒥ ᑲᑎᒪᔨᐅᔪᓂᒃ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐱᓕᕆᖃᑕᐅᔪᓐᓇᕐᒪᖔᑕ ᓄᓇᖃᖅᑳᖅᑐᒥᓃᑦ ᐊᒻᒪᓗ ᓄᓇᖃᖅᑳᖅᑐᒥᓃᑦ ᖃᐅᔨᒪᔭᑐᖃᖏᓐᓂ ᐱᓕᕆᓲᖑᓂᖏᓐᓂ ᐊᒻᒪᓗ ᐅᓂᒃᑳᖏᓐᓂ ᓯᓚ ᐊᓯᔾᔨᐸᓪᓕᐊᔪᑦ ᐊᑦᑐᐃᓂᖃᕐᓂᖓᓐᓂ.
“ᓯᓚᕐᔪᐊᒥ ᑲᑎᒪᔨᐅᔪᓂᒃ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐅᓂᒃᑳᓕᐅᖅᓯᒪᔪᑦ ᐃᓱᒪᒋᔭᐅᒐᔪᒻᒪᑕ “ᐱᐅᓂᖅᐹᑦᑎᐊᖅᑎᒍᑦ ᒪᓕᒋᐊᖃᕐᓂᖏᓐᓂ” ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᖃᐅᔨᓴᖅᑕᐅᓂᖏᓐᓂ, ᑐᑭᓯᒋᐊᕈᑎᓂᓪᓗ ᐊᑐᐃᓐᓇᖃᕐᓗᑎᑦ ᐃᑲᔪᖅᑐᐃᔾᔪᑎᐅᒐᔭᖅᑐᑦ ᓯᓚ ᐊᓯᔾᔨᐸᓕᐊᓂᖓᓐᓄᑦ ᐃᓱᒪᓕᐅᕋᓱᐊᕐᓂᖏᓐᓂ ᐊᒻᒪᓗ ᓯᓚᕐᔪᐊᒥ ᐊᐃᕙᔾᔪᑕᐅᒐᔭᖅᑐᓂᒃ, ᓲᕐᓗ ᑕᐃᒪᐃᒻᒪᑦ ᑕᒫᓂ ᐱᓇᓱᐊᕈᓯᕐᒥ.” ᐅᖃᖅᑐᓂ ᓲᕆᓕ ᕼᐊᐳ, ᑲᓇᑕᒥ ᖃᐅᔨᓴᖅᑎᒻᒪᕆᓐᓄᑦ ᐃᔅᓯᕙᐅᑕᖅ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐊᒻᒪᓗ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ, ᓯᓚᑦᑐᖅᓴᕐᕕᔾᔪᐊᒥ ᐊᐅᐴᑕᒥ. “ᐱᒻᒪᕆᐅᒻᒪᑦ ᖃᐅᔨᒪᒋᐊᖃᕋᑦᑕ ᓯᓚᕐᔪᐊᒥ ᑲᑎᒪᔨᐅᔪᓂᒃ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐅᓂᒃᑳᖅ ᓇᓗᓇᐃᖅᓯᓯᒪᑦᑎᐊᕐᓗᓂ ᓄᓇᖃᖅᑳᖅᑐᒥᓃᑦ ᖃᐅᔨᒪᓂᖏᓐᓂ ᐃᓕᖅᑯᓯᕆᖃᑦᑕᖅᑕᖏᓐᓂ ᐱᒻᒪᕆᐅᒻᒪᑕ ᑐᑭᓯᔭᐅᒋᐊᖃᕐᖓᑕ, ᑲᒪᒋᔭᐅᓗᑎᒃ, ᐊᐅᓚᑦᑎᔾᔪᑕᐅᓗᑎᓪᓗ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ. ᓇᓗᓇᙱᑎᑦᑎᒪᑕᑦᑕᐅ ᑲᒪᒋᔭᐅᒋᐊᖃᕐᓂᖏᓐᓂ ᐊᐅᓚᑦᑎᒐᓱᐊᕐᓂᖏᓐᓂ ᖃᓪᓗᓈᑦ ᐊᒻᒪᓗ ᑎᒍᒥᐊᖏᓐᓇᕋᓱᐊᕐᓂᖏᓐᓂᓪᓗ ᓄᓇᖃᖅᑳᖅᑐᒥᓃᑦ ᐱᔪᓐᓇᐅᑎᖏᓐᓂ ᐱᐅᓯᕚᓪᓕᑎᑦᑎᑲᓐᓂᕈᑎᐅᒍᓐᓇᕐᖓᑕ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐱᒋᐊᕈᑕᐅᓗᑎᑦ,’ ᕼᐊᐳ ᐅᖃᒃᑲᓂᖅᑐᓂ.
ᑐᑭᓯᒋᐊᕐᕕᐅᔪᓐᓇᖅᑐᑦ:
ᑲᓕ ᐃᓂᖑᔪᖅ
ICC (ᐊᓛᔅᑲ)
(907) 274-9058
kelly@iccalaska.org
ᑲᓪᓗᒃ ᓕᐳᕐᑦ
ICC (ᑲᓛᖡᑦ ᓄᓈᑦ)
299 34 22 25
kuluk@inuit.org
ᑲᓵᓐᑐᕋ ᐊᓕᐊᑦ
ICC (ᑲᓇᑕ)
613-407-2642
celliott@inuitcircumpolar.com