ᓄᕕᐱᕆ 24, 2020 – ᐋᑐᐋ, ᑲᓇᑕ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᖃᑕᐅᓚᐅᖅᓯᒪᔪᑦ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ ᐃᒪᓕᕆᓂᕐᒧᑦ ᐊᕙᑎᑦᑎᓐᓂ ᐸᖅᑭᑦᑎᓂᕐᒧᑦ ᑲᑎᒪᔨᕋᓛᖏᓐᓄᑦ 75-ᒥ ᑕᑯᔅᓴᒃᑯᑦ ᑏᕖᒃᑯᑦ ᑲᑎᒪᓪᓗᑎᑦ, ᓄᕕᐱᕆ 2020 16ᒥ-20ᒧ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑕᕝᕗᖓᓪᓚᕆᒃ ᓴᙱᓂᖃᕐᖓᑦ ᐃᓚᖃᕈᒪᓪᓗᑎᑦ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ ᐅᖃᐅᓯᖃᕐᓗᑎᑦ ᐅᑭᐅᖅᑕᖅᑐᒥ ᐅᓯᑲᑦᑕᖃᑦᑕᖅᑐᓂᑦ ᐅᒥᐊᕐᔪᐊᒃᑯᑦ ᐊᒻᒪᓗ ᐱᓕᕆᖃᑎᖃᖅᑐᑎᑦ ᓴᓇᔨᓂᒃ ᐊᒻᒪᓗ ᒪᓕᒐᓕᕆᖃᑦᑕᖅᑐᓂᒃ ᑕᒪᒃᑯᐊ ᐊᑦᑕᓇᖅᑐᒦᖁᓇᒋᑦ ᐅᑭᐅᖅᑕᖅᑐᒥ ᐅᓯᑲᖅᑕᕐᓂᐅᕙᑦᑐᓄᑦ ᐊᑐᖅᑕᐅᕙᑦᑐᑦ, ᐅᓗᕆᐊᓇᖅᑐᒦᑎᑦᑎᒻᒪᑕ ᑯᕕᔪᖃᑐᐃᓐᓇᕆᐊᖃᕐᓂᖓᓐᓄ ᓱᕈᓐᓇᖅᑐᓂᓪᓗ ᕿᕐᓂᖅᑕᐅᔪᓂᑦ, ᐊᒻᒪᓗ ᐅᑭᐅᖅᑕᖅᑐᒥ ᓄᓇᓖᑦ ᐱᕈᖅᑐᓪᓗ ᖃᓄᐃᖁᓇᒋᑦ. ᐅᑭᐅᖅᑕᖅᑐᒥ ᐃᒪᖓ ᐊᑐᖅᑕᐅᕙᑦᑐᖅ ᐊᕕᑦᑐᖅᓯᒪᒧᓂᒃ ᒪᑭᒪᔾᔪᑎᔅᓴᓄᖓᔪᓂᒃ, ᓄᓇᓕᓐᓅᖅᑲᐃᕙᑦᑐᑎᑦ ᐊᒻᒪᓗ ᓱᓇᒃᑯᑖᕐᓂᑦ ᐱᔨᑦᑎᕋᐅᑎᓂᓪᓗ ᐅᖓᓯᑦᑐᒨᕈᔾᔨᖃᑦᑕᖅᑐᑎᑦ. ᑕᓖ ᓴᒻᐳ ᑕᕈ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᔅᓯᕙᐅᑕᖅ ᐅᖃᓚᐅᖅᑐᖅ, “ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐅᑉᐱᕆᔭᖃᕐᖓᑕ ᐱᓕᕆᖃᑎᖃᕆᐊᖃᕐᓂᖏᓐᓂ ᐅᑯᓂᖓ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ , ᐸᖅᑭᑦᑎᓪᓗᑎᑦ ᐅᑭᐅᖅᑕᖅᑑᑉ ᐃᒪᖓᓐᓂ ᐅᓯᑲᑦᑕᖃᑦᑕᖅᑐᓄᑦ ᒪᓕᒐᖃᕐᓗᑎᑦ ᐸᖅᑭᔭᐅᖁᓪᓗᒋᑦ ᐃᓄᐃᑦ ᓂᕿᒋᕙᑦᑕᖏᑦ, ᓴᓇᔨᖏᑦ, ᐊᒻᒪᓗ ᒪᑭᒪᔾᔪᑎᔅᓴᓂᑦ ᑕᑯᔪᒪᔪᓂᒃ ᐊᑐᖅᐸᑦᑐᓂᒃ ᐅᑭᐅᖅᑕᖅᑐᒥ ᐃᒪᓕᕆᓂᕐᒥᑦ.”
“ᒫᓐᓇ ᐅᖅᓱᐊᓗᓐᓂ ᐃᓚᖃᙱᑦᑐᓂᒃ ᒪᓕᒐᐃᑦ ᑲᔪᓯᑎᑕᐅᓯᒪᔪᑦ ᑭᓯᐊᓂᓕ ᐸᖅᑭᑦᑎᓪᓚᕆᑦᑐᑯᓘᙱᑦᑐᑦ ᐅᑭᐅᖅᑕᖅᑐᒥ ᐅᖅᓱᐊᓗᓐᓂᑦ ᐅᑭᐅᒐᓴᐅᓂᐊᖅᑐᓂᒃ, ᑭᓯᐊᓂᓕ ᓇᓗᓇᐃᖅᑕᐅᓯᒪᔫᒐᓗᐊᑦ ᐱᑕᖃᕆᐊᖃᕈᓐᓃᕐᓂᖏᓐᓂ. ᒪᓕᒐᐃᑦ ᑎᑎᕋᖅᓯᒪᔪᑦ ᒪᓕᖃᑦᑕᐅᑎᓐᖏᓗᐊᕐᖓᑕ ᐊᕙᑦᑎᑦᑎᓐᓂ ᐸᖅᑭᑦᑎᓂᕐᒨᖓᔪᓂᒃ ᐅᑭᐅᖅᑕᖅᑐᒥ ᓯᓚᕐᔪᐊᓪᓗ ᐃᒪᖏᓐᓂ ᐊᒻᒪᓗ ᓇᑭᑐᐃᓐᓇᖅ ᐃᖏᕐᕋᔪᓂᒃ ᑭᓪᓕᖃᑎᒌᙱᑦᑐᓃᙶᖅᐸᓪᓕᐊᒻᒪᑕ ᓱᕈᓐᓇᖅᑐᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᖁᓅᒻᒥᓪᓚᕆᖅᑐᖅ ᑕᒪᓐᓇ ᓈᒪᓗᓂ ᐅᖃᐅᓯᐅᓯᒪᙱᒻᒪᑦ ᑎᑎᕋᖅᓯᒪᔪᓂᒃ ᐅᖅᓱᐊᓗᓐᓂ ᐃᓚᖃᙱᑦᑐᓂᒃ ᐱᑕᖃᕆᐊᖃᓐᖏᓐᓂᖏᓐᓂ ᐊᒻᒪᓗ ᐃᓱᖃᖅᑎᑕᐅᒻᒪᑕ ᐅᖃᐅᓯᐅᔪᓐᓇᖅᑐᑦ ᑕᒪᑐᒥᒪᓂ ᐃᒪᓕᕆᓂᕐᒧᑦ ᐊᕙᑎᑦᑎᓐᓂ ᐸᖅᑭᑦᑎᓂᕐᒧᑦ 75-ᒥ. ᑭᓯᐊᓂᓕ, ᐱᖃᑕᐅᔪᒪᓪᓚᕆᓐᓂᑎᓐᓄᑦ ᑲᑎᒪᓂᐅᔪᓂᒃ, ᐱᕕᖃᖅᑎᑕᐅᒋᐊᖓ ᕿᓚᓈᑦᑎᐊᖅᑐᒍᑦ ᐅᑉᐱᕆᔭᐅᓂᖏᓐᓂᓪᓗ ᑕᒪᒃᑯᐊ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ ᒪᓕᒐᓕᕆᓂᕐᒥᑦ ᐱᐅᓯᕚᓪᓕᖁᓪᓗᒋᑦ ᑕᒪᒃᑯᐊ ᐃᓱᒫᓗᒋᔭᐅᒋᐊᖃᕐᓂᖏᓐᓂ ᐃᒪᓕᕆᓂᕐᒧᑦ ᐊᕙᑎᑦᑎᓐᓂ ᐸᖅᑭᑦᑎᓂᕐᒧᑦ 76-ᒥ 2021−ᖑᓕᖅᑲᑦ,” ᐅᖃᓚᐅᖅᑐᖅ ᓖᓴ ᖁᐱᕐᕈᐊᓗᒃ, ᐊᖏᔪᖅᑳᑉ ᑐᖏᓕᖓ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒧᑦ.
ᐸᖅᑭᔭᐅᓂᖏᑦ ᐊᑐᕆᐊᓕᑕᐃᓐᓇᖅᑑᔮᓲᑦ ᖁᓖᑦ ᐅᑭᐅᑦ ᐊᓂᒍᕋᐃᒻᒪᑕ ᑭᓯᐊᓂ ᑕᕝᕙᑦᑕᐅᑎᒋ ᐊᑦᑐᐃᓂᖃᖃᑦᑕᖏᑦᑐᑦ ᐅᓗᕆᐊᓇᖅᑐᒦᑎᑦᑎᓕᖅᑐᑎᑦ ᑕᒪᒃᑯᐊ ᐅᖅᓱᐊᓗᓐᓂ ᐃᓚᖃᙱᑦᑐᓂᒃ ᑯᕕᔪᒥᓂᕐᓂᑦ ᓯᓚᓗ ᐊᓯᔾᔨᐸᓪᓕᐊᓂᖓᓐᓂ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᓱᒪᖃᕐᒥᒻᒪᑕ ᑕᒪᒃᑯᓂᖓ ᐋᖅᑭᐅᒪᔾᔪᑎᑦᑎᐊᕙᐅᓂᖅᐹᖑᒐᔭᖅᑐᖅ ᓯᓚ ᐊᓯᔾᔨᐸᓪᓕᐊᓂᖓᓐᓂ ᓴᖅᑮᙱᓂᖅᓴᐅᖃᑦᑕᓕᕐᓗᑎᑦ ᓱᕈᓐᓇᖅᑐᓂᒃ ᕿᕐᓕᖅᑕᐅᕗᓕᑦ, ᐅᖅᓱᐊᓗᓐᓃᙶᖅᑐᓂᒃ, ᑭᓪᓕᖃᖅᑐᓂᒃ. ᓈᒻᒪᓂᖅᓴᐅᒐᔭᖅᑐᕐᓕ ᐅᖅᓱᐊᓗᓐᓂ ᐃᓚᖃᙱᑦᑐᓂᒃ ᓄᖅᑲᖅᑎᑕᐅᓂᖏᓐᓂ ᐃᓕᓴᖅᓯᓯᒪᔪᓂᒃ ᐊᒻᒪᓗ ᐊᑐᓕᖅᑎᑦᑎᓗᑎᑦ ᐸᖅᑭᑦᑎᔾᔪᑎᔅᓴᓂᒃ ᐅᖅᓱᐊᓗᓐᓂᒃ ᑯᕕᑦᑕᐃᓕᒪᓂᕐᒥᑦ ᐊᒻᒪᓗ ᐊᑦᑐᐃᓂᖃᑲᒻᒪᔾᔪᐊᖃᑦᑕᕈᓐᓇᕐᓂᖏᓐᓂ ᐅᑭᐅᖅᑕᖅᑐᐃᑦ ᐃᒪᖏᓐᓂ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐅᓪᓕᐊᖃᑦᑕᕈᒪᒐᓗᐊᖅᑐᑦ ᐃᒪᓕᕆᓂᕐᒧᑦ ᐊᕙᑎᑦᑎᓐᓂ ᐸᖅᑭᑦᑎᓂᕐᒧᑦ 75-ᒥ ᓴᙵᑎᑦᑎᑲᓐᓂᓂᕐᒥᑦ ᑕᒪᑐᒥᖓ ᒪᓕᒐᓕᐊᖑᔪᒪᔪᒥᑦ ᓄᖅᑲᑎᑦᑎᓂᕐᒥᑦ ᐊᒻᒪᓗ ᐊᑐᖅᑕᐅᖃᑦᑕᖏᓐᓂᕐᒥᑦ ᐅᑭᐅᖅᑕᖅᑐᒥ. ᑐᔅᓯᕋᐅᑎᐅᔪᖅ ᖁᓕᓄᑦ ᐅᑭᐅᓄᑦ ᐃᓚᓯᒪᔪᓂᒃ ᐅᖅᓱᐊᓗᓐᓂᒃ ᑕᐃᒪᐃᑦᑐᑕᖃᕆᐊᓕᒃ ᐅᑭᐅᖅᑕᖅᑐᒥ ᐊᑦᑐᐃᓂᖃᕐᒥᒻᒪᑕ ᑕᒪᒃᑯᓇᙶᖓᔪᓂᒃ ᐅᖅᓱᐊᓗᓐᓂ ᐃᓚᖃᙱᑦᑐᓂᒃ ᑯᕕᔪᓂᒃ ᓱᓕ ᓱᕈᓐᓇᖅᑐᑕᖃᕐᓂᖏᓐᓄᑦ ᕿᕐᓂᖅᑕᐅᔪᓂᑦ ᓴᖅᑭᖃᑦᑕᖅᑐᓂᒃ, ᒫᓐᓇ ᐅᑭᐅᒐᓴᐅᓂᐊᖅᑐᓄᓪᓗ. ᖁᓅᒻᒥᓇᖅᑐᖅ ᑕᐃᔅᓱᒪᓂ ᐅᖃᐅᓯᐅᒐᓱᓐᓂᐅᔪᔫᒐᓗᐊᑦ ᐃᒪᓕᕆᓂᕐᒧᑦ ᐊᕙᑎᑦᑎᓐᓂ ᐸᖅᑭᑦᑎᓂᕐᒧᑦ 75-ᒥ ᑲᑎᒪᓂᕐᒥᑦ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᔪᓰᑎᑦᑏᓐᓇᕐᓂᐊᖅᑐᑦ ᑕᒪᑐᒥᖓ ᐅᖅᓱᐊᓗᓐᓂ ᐃᓚᖃᙱᑦᑐᓂᒃ ᐱᑕᖃᕆᐊᖃᕈᓐᓃᕐᓂᖏᓐᓂ ᑖᒃᑯᓂᖓ ᐱᓕᕆᖃᑎᖃᕐᓗᑎᑦ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ, ᐊᖅᑯᑎᖃᕐᓗᑎᑦ ᐅᑭᐅᖅᑕᖅᑐᒥ ᑲᑎᒪᔨᓂᒃ ᐱᓕᕆᖃᑕᐅᔪᓂᓪᓗ, ᑭᓪᓕᓕᓐᓂᑦ ᑎᒍᒥᐊᖅᑎᓂᓪᓗ, ᐅᑭᐅᖅᑕᖅᑐᒥᓗ ᐱᖃᑕᐅᔪᓂᒃ ᑐᐊᕕᕐᓇᕐᓗᑎᑦ ᐸᖅᑭᑦᑎᒐᓱᒋᐊᖃᓕᖅᑐᑦ ᓄᓇᓕᓐᓂ ᑕᒪᒃᑯᓂᖓ ᐱᑕᖃᑐᐃᓐᓇᕆᐊᖃᕐᓂᖏᓐᓂ ᐅᖅᓱᐊᓗᓐᓂ ᐃᓚᖃᙱᑦᑐᓂᒃ ᑯᕕᔪᖃᕈᓐᓇᕐᓂᖓᓐᓂ ᐊᒻᒪᓗ ᓱᕈᓐᓇᖅᑐᓂᑦ ᕿᕐᓕᖅᑕᐅᔪᓂᑦ ᓴᖅᑭᖃᑦᑕᕐᓂᖓᓐᓂ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᐅᑭᐅᖅᑕᖅᑐᒥ. ᓯᕗᒧᐊᑉᐸᓪᓕᐊᖃᑎᖃᕈᒪᒐᑦᑕ ᑎᒥᐅᔪᓂᒃ ᓴᓇᔨᓂᒃ, ᒪᓕᒐᓕᐅᖅᐸᑦᑐᓂᒃ ᐊᓯᖏᓐᓂᓪᓗ ᑕᒪᑐᒧᖓ.
ᑐᑭᓯᒋᐊᕐᕕᔅᓴᖅ:
Kelly Eningowuk
ICC (Alaska)
(907) 274-9058
kelly@iccalaska.org
ᑭᐅᕈ ᓴᐃᒪᓐ
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ᑲᓇᑕ)
(613) 563-2642
CSimon@inuitcircumpolar.com