Nuvipiri 24, 2020 – Aatuaa, Kanata – Inuit Ukiuqtaqtumiuqatigiit Katimajingit piqataulauqsimajut Silarjuami Imalirinirmut Katujjiqatigiinnik Imalirinirmut Avatittinni Paqqittinirmut Katimajiralaanginnut 75-mi takussakkut tiiviikkut katimallutit, Nuvipiri 2020 16mi – 20mu.
Inuit Ukiuqtaqtumiuqatigiit Katimajingit tavvungallarik sangiiniqarngat ilaqarumallutit Silarjuami Imalirinirmut Katujjiqatigiinnik uqausiqarlutit ukiuqtaqtumi usikattaqattaqtunit umiarjuakkut ammalu piliriqatiqaqtutit sanajinik ammalu maligaliriqattaqtunik tamakkua attanaqtumiiqunagit ukiuqtaqtumi usikaqtarniuvattunut atuqtauvattut, ulurianaqtumiitittimmata kuvijuqatuinnariaqarningannu surunnaqtunillu qirniqtaujunit, ammalu ukiuqtaqtumi nunaliit piruqtullu qanuiqunagit. Ukiuqtaqtumi imanga atuqtauvattuq avittuqsimamunik makimajjutissanungajunik, nunalinnuuqqaivattutit ammalu sunakkutaarnit pijittirautinillu ungasittumuurujjiqattaqtutit. Talii Sampu Taru, Inuit Ukiuqtaqtumiuqatigiit Katimajingit issivautaq uqalauqtuq, “Inuit Ukiuqtaqtumiuqatigiit Katimajingit uppirijaqarngata piliriqatiqariaqarninginni ukuninga Silarjuami Imalirinirmut Katujjiqatigiinnik, paqqittillutit ukiuqtaqtuup imanganni usikattaqattaqtunut maligaqarlutit paqqijauqullugit inuit niqigivattangit, sanajingit, ammalu makimajjutissanit takujumajunik atuqpattunik ukiuqtaqtumi imalirinirmit. ”
“Maanna Uqsualunni ilaqangiittunik maligait kajusititausimajut kisianili paqqittillarittukuluungiittut ukiuqtaqtumi Uqsualunnit ukiugasauniaqtunik, kisianili nalunaiqtausimajuugaluat pitaqariaqarunniirninginni. Maligait titiraqsimajut maliqattautinngiluarngata avattittinni paqqittinirmuungajunik ukiuqtaqtumi silarjuallu imanginni ammalu nakituinnaq ingirrajunik killiqatigiingiittuniinngaaqpalliammata surunnaqtut Inuit Ukiuqtaqtumiuqatigiit Katimajingit qunuummillariqtuq tamanna naamaluni uqausiusimangiimmat titiraqsimajunik uqsualunni ilaqangiittunik pitaqariaqannginninginni ammalu isuqaqtitaummata uqausiujunnaqtut tamatumimani Imalirinirmut Avatittinni Paqqittinirmut Katimajiralaanginnut 75-mi. Kisianili, piqataujumallarinnitinnut katimaniujunik, piviqaqtitaugianga qilanaattiaqtugut uppirijauninginnillu tamakkua Silarjuami Imalirinirmut Katujjiqatigiinnik maligalirinirmit piusivaalliqullugit tamakkua isumaalugijaugiaqarninginni Imalirinirmut Avatittinni Paqqittinirmut Katimajiralaanginnut 76-mi 2021−nguliqqat,” uqalauqtuq Liisa Qupirrualuk, Angijuqqaap Tungilinga, Inuit Ukiuqtaqtumiuqatigiit Katimajingit Kanatamut.
Paqqijauningit aturialitainnaqtuujaasuut quliit ukiut aniguraimmata kisiani tavvattautigi attuiniqaqattangittut ulurianaqtumiitittiliqtutit tamakkua Uqsualunni ilaqanngittunik kuvijuminirnit silalu asijjipallianinganni. Inuit Ukiuqtaqtumiuqatigiit Katimajingit isumaqarmimmata tamakkuninga aaqqiumajjutittiavauniqpaangugajaqtuq sila asijjipallianinganni saqqiinnginiqsauqattalirlutit surunnaqtunik qirliqtauvulit, Uqsualunniingaaqtunik, killiqaqtunik. Naammaniqsaugajaqturli Uqsualunni ilaqanngittunik nuqqaqtitauninginni ilisaqsisimajunik ammalu atuliqtittilutit paqqittijjutissanik uqsualunnik kuvittailimanirmit ammalu attuiniqakammajjuaqattarunnarninginni ukiuqtaqtuit imanginni.
Inuit ukiuqtaqtumiuqatigiit katimajingit ulliaqattarumagaluaqtut Imalirinirmut Avatittinni Paqqittinirmut Katimajiralaanginnut 75-mi sanngatittikanninirmit tamatuminga maligaliangujumajumit nuqqatittinirmit ammalu atuqtauqattanginnirmit ukiuqtaqtumi. Tussirautiujuq qulinut ukiunut ilasimajunik uqsualunnik taimaittutaqarialik ukiuqtaqtumi attuiniqarmimmata tamakkunanngaangajunik uqsualunni ilaqanngittunik kuvijunik suli surunnaqtutaqarninginnut qirniqtaujunit saqqiqattaqtunik, maanna ukiugasauniaqtunullu. Qunuumminaqtuq taissumani uqausiugasunniujujuugaluat Imalirinirmut Avatittinni Paqqittinirmut Katimajiralaanginnut 75-mi katimanirmit.
Inuit Ukiuqtaqtumiuqatigiit Katimajingit kajusiitittiinnarniaqtut tamatuminga Uqsualunni ilaqanngittunik pitaqariaqarunniirninginni taakkuninga piliriqatiqarlutit Silarjuami Imalirinirmut Katujjiqatigiinnik, aqqutiqarlutit Ukiuqtaqtumi Katimajinik piliriqataujunillu, killilinnit tigumiaqtinillu, ukiuqtaqtumilu piqataujunik tuavirnarlutit paqqittigasugiaqaliqtut nunalinni tamakkuninga pitaqatuinnariaqarninginni Uqsualunni ilaqanngittunik kuvijuqarunnarninganni ammalu surunnaqtunit qirliqtaujunit saqqiqattarninganni sila asijjipallianingannut ukiuqtaqtumi. Sivumuappalliaqatiqarumagatta timiujunik sanajinik, maligaliuqpattunik asinginnillu tamatumunga.
Tukisigiarvissaq:
Kelly Eningowuk
ICC (Alaska)
(907) 274-9058
kelly@iccalaska.org
Kiuru Saiman
Inuit Ukiuqtaqtumiuqatigiit Katimajingit (Kanata)
613-563-2642
CSimon@inuitcircumpolar.com