ᑲᑐᔾᔨᓪᓗᑎᒃ ᐅᖃᖅᑐᑦ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕ / ᓄᓇᕗᑦ ᑐᙵᕕᒃᑯᑦ ᑎᒥᖓᑦ
(ᕖᕝᕗᐊᕆ 18, 2020) ᐃᓄᐃᑦ ᓂᓪᓕᐊᓚᐅᖅᑐᑦ ᓯᕗᓂᖓᓂ ᑕᑯᔅᓴᐅᔪᑦ ᑕᒪᒃᑯᐊ ᓯᓚ ᐊᓯᔾᔨᐸᓪᓕᐊᓕᕐᓂᖓᓐᓂ ᐅᑭᐅᒐᓵᓗᓐᓄᑦ, ᓴᖅᑭᔮᓚᐅᖅᑎᓐᓇᒋᑦ ᑕᒪᒃᑯᐊ ᖃᐅᔨᓴᖅᑎᒻᒪᕇᑦ ᓯᓚᕐᔪᐊᒥ ᖃᐅᔨᒪᓚᐅᖅᑎᓐᓇᒋᓪᓕ. ᑕᐃᑲᓂ, ᒫᓐᓇᓗ, ᐃᓄᐃᑦ ᑕᑯᖃᑦᑕᖅᓯᒪᔪᑦ ᐊᓯᔾᔨᐸᓪᓕᐊᔪᓂᒃ ᐅᑭᐅᖅᑕᖅᑐᒥ ᓄᓇᓕᖏᓐᓂᓪᓗ. ᐅᒥᐊᕐᔪᐊᖅᑕᖃᕐᓂᖅᓴᐅᖃᑦᑕᓕᖅᑐᓂᓗ ᐅᑭᐅᖅᑕᖅᑐ − ᓯᓚᕐᔪᐊᓪᓗ ᓯᓚᖓ ᐊᓯᔾᔨᐸᓪᓕᐊᓕᖅᑐᓂ, ᓯᑯᕙᓪᓕᐊᖏᓂᖅᓴᐅᓕᖅᑐᓂ, ᐊᐅᓚᓂᖅᓴᐅᖃᑦᑕᓕᖅᑐᓕᓗ. ᐃᓄᐃᑦ ᐃᓚᒋᔭᐅᒋᐊᖃᕐᖓᑕ ᐃᒪᕐᒥ ᐊᐅᓚᑦᑎᓂᐊᖅᑎᓪᓗᒋᑦ ᐱᓕᕆᖃᑎᖃᕐᓗᑎᑦ ᓴᓇᔨᓂᒃ ᒐᕙᒪᒃᑯᓂᓪᓗ ᐸᖅᑭᔭᐅᖁᓪᓗᒋᑦ ᒪᑭᒪᔾᔪᑎᔅᓴᐃᑦ ᐱᕈᖅᑐᑦ ᐅᓪᓗᒥᐅᔪᖅ ᓯᕗᓂᑦᑎᓂᓪᓗ ᐊᑐᖅᑕᐅᔭᕆᐊᖃᓪᓚᕆᓛᕐᒥᒻᒪᑕ.
“ᐃᓅᓪᓗᑕ, ᐱᓯᒪᑦᑎᔨᐅᒐᑦᑕ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂᒃ ᐅᑎᖅᑎᑦᑎᕙᑦᑐᑎᑦ, ᐱᔭᕆᐊᓕᑦᑎᓐᓂ, ᒫᓐᓇᓗ ᓯᕗᓂᑦᑎᓄᓪᓗ. ᑕᑎᑲᐃᓐᓇᓕᒫᕋᑦᑕ ᐃᒪᕐᒥᐅᑕᑦᑎᓐᓂ; ᓯᔾᔭᒥᐅᑕᐅᒐᑦᑕ, ᐃᒪᕕᒻᒥ ᑕᑎᒌᓐᓇᖅᑕᕗᑦ ᓯᑯᓗ.”
– ᐊᓗᑭ ᑰᑦᑎᖅ, ᐊᖏᔪᖅᑳᖅ, ᓄᓇᕗᑦ ᑐᙵᕕᒃᑯᑦ ᑎᒥᖓᑦ
ᐃᓄᐃᑦ ᓄᓇᓕᖏᓐᓂ ᑕᑎᖃᖃᑦᑕᕐᖓᑕ ᓂᐅᕐᕈᑎᒋᔭᐅᕙᑦᑐᓂᒃ ᖃᓪᓗᓈᓃᓐᖔᖅᑐᓂᒃ ᐊᒥᓱᓂᑦ ᓱᓇᒃᑯᑖᕐᓂᑦ, ᑭᓯᐊᓂᓕ ᑕᐃᒪᐃᒻᒥᔪᖅ ᐃᓄᐃᑦ ᓄᓇᓕᖏᓐᓂ ᑕᑎᖃᐃᓐᓇᕐᒥᔪᑦ ᓄᓇᖓᓐᓂ ᓄᓇᒥᐅᑕᓂᑦ ᐃᒪᕐᒥᐅᑕᓂᓪᓗ. ᑕᒪᒃᑯᓂᖓ, ᐊᑦᑕᓇᐃᕆᐊᖃᕋᑦᑎᒍ ᒪᑭᒪᔾᔪᑎᒋᓪᓗᑎᒋᓪᓗ ᒪᑯᐊ ᐅᒥᐊᕐᔪᐊᑦ ᐃᖏᕐᕋᕙᑦᑐᑦ ᐊᖅᑯᑕᐅᕙᑦᑐᓪᓗ ᓱᓇᒃᑯᑖᕐᓂᑦ ᐅᓯᖃᑦᑕᖅᑐᑦ ᐊᒻᒪᓗ ᓄᓇᑦᑎᓅᖅᑲᐃᔪᑦ ᐊᖏᖅᓴᐃᓐᓇᕐᓗᑎᒍᑦ ᑭᓯᐊᓂᐅᒻᒪᑦ. ᐋᖅᑮᖔᕆᐊᖃᕋᓗᐊᕋᑦᑕ ᑲᒪᑦᑎᐊᕐᓗᑕ ᑕᐃᒪᐃᑦᑐᓕᕆᔪᓂᒃ.
ᑕᒪᓐᓇᓕ ᐃᓱᒫᓘᑕᐅᔪᖅ ᐊᑦᑐᐊᔪᓄᑦ ᐊᑐᖅᑕᐅᖃᑦᑕᕐᓂᖏᑦ ᐅᖅᓱᐊᓗᐃᑦ ᐅᒥᐊᕐᔪᐊᓄᑦ ᓱᕈᓐᓇᕐᖓᑕ ᐃᓄᓐᓄᑦ ᓄᓇᓕᓐᓄᓪᓗ ᑯᕕᔪᐊᓘᓐᓂᖅᑲᑕ, ᒫᓐᓇᓗ ᑕᒪᒃᑯᐊ ᐅᖅᓱᐊᓗᐃᑦ ᑯᕕᑎᓪᓗᒋᑦ ᓈᒻᒪᑦᑐᒥᑦ ᑲᒪᒐᓲᑎᔅᓴᖅᑕᖃᓐᖏᒻᒪᑦ ᐅᑭᐅᖅᑕᖅᑐᒥ, ᐊᑦᑐᖅᑕᐅᓕᖅᑐᑎᓪᓗ ᕿᓐᓂᖅᑐᐊᓗᒻᒥᑦ ᓱᕈᓐᓇᖅᑐᒥᑦ ᓴᖅᑭᖅᑐᖃᖅᑲᑦ. ᑕᐃᒪᐃᒪᓐᓂᖓᓐᓄᑦ, ᐅᖓᑖᓄᑦ 15 ᐅᑭᐅᑦ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐅᖃᖃᑎᖃᖃᑦᑕᕐᖓᑕ ᐊᑦᑕᓇᖅᑐᒦᖁᓇᒋᑦ ᐅᑭᐅᖅᑕᖅᑐᕐᒧ ᐅᒥᐊᕐᔪᐊᖅᑕᐅᕙᑦᑐᓂᒃ ᐅᑭᐅᖅᑕᖅᑐᒥ ᑲᑎᒪᓂᐅᔪᒥᑦ ᐅᖃᐅᓯᐅᖃᑦᑕᖅᓯᒪᓪᓗᑎᑦ ᐊᒻᒪᓗ ᒫᓐᓇᕈᓗᒃ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ.
2006−ᒥᓂᑦ, ᐅᒥᐊᕐᔪᐊᖅᑕᖃᖃᑦᑕᕐᓂᖏᑦ ᓄᓇᕗᑦ ᐃᒪᖏᓐᓂ ᐊᒥᓲᓂᖅᓴᐅᓕᕐᖓᑕ 63%−ᒪᕆᐊᓗᒻᒥᑦ. ᑕᒪᓐᓇ ᓇᓗᓇᓐᖏᑦᑐᖅ ᐊᔅᓱᕈᓐᓇᖅᑐᖅ ᐃᒪᕐᒥᐅᑕᕐᓄᑦ ᐃᓄᐃᓪᓗ ᐃᓅᓯᖏᓐᓂ. ᖃᐅᔨᓴᑦᑎᐊᒃᑲᓐᓂᕈᒪᓪᓗᒋᑦ ᑕᒪᒃᑯᐊ ᐃᖏᕐᕋᕙᑦᑐᑦ, ᑐᙵᕕᒃᑯᑦ 2017−ᒥ ᐋᖅᑮᓚᐅᖅᓯᒪᔪᑦ ᐃᓄᓐᓂᑦ ᐃᒪᕐᒥᐅᑕᕐᓂᑦ ᖃᐅᔨᓴᖅᑎᒥᑦ ᐱᓕᕆᐊᖑᓂᐊᖅᑐᓂ ᓄᐊᑦᑎᓗᑎᑦ ᐃᒪᒃᑯᑦ ᐃᖏᕐᕋᖃᑦᑕᖅᑐᓂᑦ ᐊᑎᖏᓐᓂ, ᐋᖅᑮᓇᓱᐊᕐᓗᑎᑦ ᐊᑐᖅᑕᐅᓇᓱᐊᕐᓗᑎᓪᓗ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᑐᓐᖓᕕᒃᑯᓐᓂ ᐊᓯᖏᓐᓂᓪᓗ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐅᓂᒃᑳᕈᓐᓇᕐᓗᑎᑦ ᖃᐅᔨᔭᒥᓂᖏᓐᓂ ᐊᑐᖅᑕᐅᔪᓐᓇᖁᓪᓗᒋᓪᓗ ᐸᕐᓇᑦᑐᖃᓕᕐᓂᖅᑲᑦ. ᐊᒻᒪᓗᒃᑲᓐᓂᖅ, 2009−ᒥᓂᑦ ᐃᓄᐃᑦ ᑎᓴᒪᓂᒃ ᐊᕕᑦᑐᖅᓯᒪᔪᓂᒃ ᐃᑲᔪᖃᑦᑕᖅᓯᒪᔪᑦ ᐊᑐᓕᖁᔭᒥᓂᒃ ᐅᑭᐅᖅᑕᖅᑐᒥ ᑲᑎᒪᔨᓄᑦ ᐃᒪᕐᒥᐅᑕᕐᓂᑦ ᐅᒥᐊᕐᔪᐊᒃᑰᖃᑦᑕᖅᑐᓂᒃ ᖃᐅᔨᓴᖁᔨᓪᓗᑎᒃ, ᐱᓗᐊᖅᑐᒥᑦ ᐅᖅᓱᐊᓗᒻᒥ ᑯᕕᑎᑦᑎᑦᑕᐃᓕᒪᒃᑲᓐᓂᕋᓱᐊᕐᓂᕐᒥᑦ ᐊᒻᒪᓗ ᓴᖅᑮᑲᓐᓂᕐᓗᑎᑦ ᐊᕙᑎᑦᑎᓐᓄᑦ ᒪᓕᒐᔅᓴᐅᔪᓂᒃ ᑕᒪᒃᑯᐊ ᐱᔾᔪᑎᒋᓪᓗᒋᑦ ᕿᓐᓂᖅᑐᐊᓗᐃᑦ ᓴᖅᑭᖃᑦᑕᕐᓂᖏᑦ ᓱᕈᓐᓇᖅᑐᑦ, ᐊᓯᖏᓪᓗ ᐃᓚᔅᓴᓂᑦ ᓲᕐᓗ ᓵᕗ ᑎᐊᒃᓴᐃᑦ ᐊᒻᒪᓗ ᓂᑦᕈᔅ ᐊᒃᓴᐃᑦ.
2018−ᒥ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᑎᓪᓗᒋᑦ ᐅᑦᕿᐊᕕᒻᒥ ᐊᑐᓕᖁᔨᓚᐅᖅᓯᒪᔪᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ, “ᓂᓪᓕᐊᔨᐅᓗᑎᑦ ᐊᔭᐅᖅᑐᐃᓗᑎᑦ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᓐᓂᒃ. ᐅᑭᐅᖅᑕᖅᑐᒥ ᒪᓕᒐᕐᓂᑦ, ᐊᓯᖏᓐᓂᓪᓗ ᓯᓚᕐᔪᐊᒥ ᑭᓪᓕᖃᖅᑐᓂᓪᓗ ᓄᓇᓕᕐᔪᐊᓂᑦ ᒪᓕᒐᕐᓂᑦ, ᑐᐊᕕᕐᓇᖅᑐᑕᖃᓕᕐᓂᖅᑲᓪᓗ ᑲᒪᒍᓐᓇᕋᔭᕐᓂᖏᓐᓂ, ᐊᒻᒪᓗ ᐅᖅᓱᐊᓗᑦᑕᖅᑏᑦ ᐊᑯᑦᑐᔫᒥᖃᑦᑕᕐᓗᑎᑦ ᐃᖏᕐᕋᓂᖏᑦ ᐊᑦᑐᐃᓂᖃᖁᓇᒋᑦ ᐃᒪᕐᒥᐅᑕᕐᓂᑦ ᐆᒪᔪᓂᒃ ᐃᖃᓗᓐᓂᓪᓗ ᓄᖅᑲᑎᑦᑎᑦᑕᐃᓕᒪᖁᓪᓗᒋᓪᓗ ᐊᓯᕙᖃᑦᑕᖅᑐᓂᑦ ᓯᓚ ᒪᓕᑦᑐᒍ, ᐊᒻᒪᓗ ᐊᑦᑕᓇᖅᑐᒦᖁᓇᒋᑦ ᐊᕙᑎᒍᓪᓗ ᐸᖅᑭᔭᐅᑦᑎᐊᖁᓪᓗᒋᑦ.”
ᐃᖏᕐᕋᔪᓕᕆᔨᒃᑯᑦ ᑲᓇᑕᒥ ᒫᓐᓇᕈᓗᒃ ᐅᖃᓚᐅᖅᑐᑦ ᐃᑲᔪᖅᑐᐃᓂᕐᒥᓂᒃ ᐅᖅᓱᐊᓗᓐᓂ ᐃᓚᓯᒪᓐᖏᑦᑐᓂᑦ ᓄᖅᑲᖓᑎᑦᑎᓂᖏᓐᓂ ᐅᑭᐅᖅᑕᖅᑐᒥ ᑕᑯᓐᓇᖅᑕᐅᔪᓂᒃ ᓯᕗᓕᖅᑎᓂᓪᓗ ᐊᒻᒪᓗ ᑕᒪᓐᓇ ᐊᑐᕈᒪᑦᑎᐊᖅᑐᓂ. ᑲᓇᑕᐅᑉ ᒐᕙᒪᒃᑯᖏᑦ ᐅᓯᑲᑦᑕᖃᑦᑕᖅᑐᓪᓗ ᐃᑲᔪᖅᑐᐃᓂᕋᖅᑐᑦ ᑕᒪᒃᑯᓂᖓ ᐅᑭᐅᖅᑕᖅᑐᒥ ᓱᓇᒃᑯᑖᕐᓂᑦ, ᐱᖃᓯᐅᑎᓪᓗᒋᑦ ᐅᓯᖃᑦᑕᖃᑦᑕᖅᑐᑦ, ᓯᓚᕐᔪᐊᒥᓗ ᓯᕗᒃᑲᖅᑕᐃᓗᑎᑦ ᑕᒪᒃᑯᓂᖓ ᐅᓯᑲᑦᑕᓂᕐᒥᑦ ᓄᓇᓕᓐᓄᑦ ᐊᒻᒪᓗ ᐅᒥᐊᕐᔪᐊᑦ ᐅᑭᐅᖅᑕᖅᑐᒨᖅᑐᑦ ᒪᓕᒐᕐᓂᑦ ᐊᑐᖃᑦᑕᖅᑎᐊᕐᓗᑎᑦ ᐊᕙᑎᓕᕆᓂᕐᒨᖓᔪᓂᒃ, ᑕᐃᒪᐃᒃᑯᑦᑕ ᐃᑲᔪᖅᑎᒌᑦᑎᐊᖅᑐᐃᓐᓇᐅᓂᐊᖅᑐᒍᑦ. ᐸᕐᓇᓪᓗᑕ ᐊᑦᑕᓇᖅᑐᒦᑎᑦᑎᑦᑕᐃᓕᒪᓂᕐᒥᑦ, ᑲᒪᒋᐊᖃᕐᓂᕐᒥᓪᓗ ᐅᒥᐊᕐᔪᐊᓂᑦ ᐅᑭᐅᖅᑕᖅᑐᒨᖃᑦᑕᖅᑐᓂᑦ ᐃᒪᖏᓐᓄᑦ, ᑲᓇᑕᐅᑉ ᒐᕙᒪᒃᑯᖏᑦ (ᐊᒻᒪᓗ ᐊᓯᖏᑦ ᒐᕙᒪᐅᔪᑦ) ᐅᑎᖅᑎᑦᑎᒋᐊᖓ ᑮᓇᐅᔭᓂᑦ ᐃᓱᒪᒋᐊᖃᖅᑯᑦ, ᓲᕐᓗ ᑖᒃᓯᑎᒍᑦ, ᐃᑲᔫᑎᑎᒍᓪᓗ ᐅᕝᕙᓘᓐᓃᑦ ᐊᓯᖏᓐᓂ ᐅᒥᐊᕐᔪᐊᑦ ᐊᑭᓖᑎᑕᐅᒍᓐᓇᕐᓗᑎᑦ ᖁᑦᑎᓂᖅᐹᖅᑎᒍᓪᓗ ᒪᓕᒐᖃᕐᓗᑎᑦ ᐅᑭᐅᖅᑕᖅᑐᑦ ᐃᒪᖏᑦ ᐸᖅᑭᔭᐅᖁᓪᓗᒋᑦ, ᐅᑭᐅᖅᑕᖅᑐᒥ ᓄᓇᓕᑐᐊᕐᓄᑦ ᑕᒪᓐᓇ ᑲᒪᒋᔭᐅᓂᐊᓐᖏᒻᒪᑦ. ᐸᖅᑭᓐᖏᒋᐊᖃᓐᖏᓇᑦᑎᒍ ᐊᕙᑎᕗᑦ ᐃᓱᒪᓇᓐᖏᒻᒪᕆᑦᑐᖅ ᑕᐃᒫᒃ, ᐊᑭᖏᓪᓗ ᐊᕙᑎᑦᑎᓐᓂ ᐸᖅᑭᑦᑎᓂᕐᒧᑦ ᓄᓇᓕᓐᓅᖓᔪᑑᒋᐊᖃᓐᖏᓚᑦ. ᐊᑐᓕᖅᑎᑕᐅᓂᖓᓐᓂ ᐅᖅᓱᐊᓗᓐᓂ ᐃᓚᖃᓐᖏᑦᑐᓂᒃ ᐊᑐᖅᑕᐅᒋᐊᖃᓐᖏᓐᓂᖏᓐᓂ ᐱᐅᓂᖅᐹᖑᕗᖅ ᐊᒻᒪᓗ ᖁᔭᒋᔭᕗᑦ ᑲᓇᑕᒥᐅᑦ ᑕᒪᒃᑯᓂ ᐊᓯᖏᓐᓂ ᐱᖃᑕᐅᒻᒪᑕ ᐅᑭᐅᖅᑕᖅᑐᓕᕆᖃᑦᑕᖅᑐᒥᑦ ᐊᒻᒪᓗ ᓇᓗᓇᐃᖅᓯᓚᐅᖅᑐᑎᑦ ᐃᑲᔪᖅᑐᕐᓂᖏᓐᓂ ᐃᓯᒋᐊᖃᖏᓐᓂᖏᓐᓂ ᑕᒪᒃᑯᓂᖓ ᐊᓯᖏᓐᓂ. ᐃᓯᖅᑎᑕᐅᒋᐊᖃᓐᖏᑦᑐᑦ ᐅᖅᓱᐊᓗᓐᓂ ᐃᓚᖃᓐᖏᑦᑐᓂᒃ, ᐊᒻᒪᓗ ᒥᑭᓪᓕᕚᓪᓕᑎᑦᑎᑲᓐᓂᕋᓱᐊᕐᓗᓂ ᓱᕈᓐᓇᖅᑐᓂᑦ ᕿᓐᓂᖅᑐᐊᓗᓐᓂ ᐱᓗᐊᖅᑐᒥᓪᓗ ᐊᓯᖏᓐᓂ ᐊᑯᓂᐊᓗ ᐱᐅᓐᖏᔾᔪᑕᐅᔪᓐᓇᖅᑐᓂᑦ ᐊᕙᑎᑦᑎᓐᓄᑦ.
“ᑕᒪᒃᑯᐊ ᐱᔭᕆᐊᑐᒻᒪᑕ ᑲᒪᒋᔭᓇᓱᐊᕐᓗᒋᑦ ᐃᒪᕐᒥᐅᑕᐃᑦ, ᑭᓯᐊᓂᓕ ᐸᖅᑭᔭᐅᒋᐊᖃᖅᑐᑎᑦ ᐅᑭᐅᖅᑕᖅᑑᑉ ᐃᒪᖏᑦ ᐊᒻᒪᓗ ᐆᒪᔪᖏᑦ, ᐊᒻᒪᓗ ᐊᓯᐊᒍᑦ ᐅᖃᐅᔾᔭᐅᓪᓗᑕ ᐸᖅᑭᔭᕆᐊᖃᕋᑦᑎᒍ ᑭᓯᐊᓂ ᑭᓱᑐᐃᓐᓇᐃᑦ ᐊᑭᑦᑐᕆᐊᕋᔭᖅᑐᑎᑦ ᑭᓱᑐᐃᓐᓇᐃᓪᓗ ᐊᑭᑐᔪᐊᓘᒌᖅᑐᑎᑦ, ᐱᔭᕆᐊᓕᕗᑦ. ᐱᓕᕆᖃᑎᒌᓪᓗᑕ, ᐃᑲᔪᖅᑎᒌᖃᑦᑕᕐᓂᐊᖅᑐᒍᑦ ᐅᓯᑲᑦᑕᖃᑦᑕᖅᑐᓂᑦ, ᐸᖅᑭᓗᑎᒍ ᐊᕙᑎᒍᑦ ᑎᒍᓯᑦᑎᐊᕐᓗᑕᓗ ᑲᒪᑦᑎᐊᕋᓱᐊᕐᓂᕐᒥᑦ ᓄᓇᓕᓐᓂ ᐱᕙᓪᓕᐊᓂᖏᓐᓂ.”
– ᓖᓴ ᖁᐱᕐᕈᐊᓗᒃ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ, ᐊᖏᔪᖅᑳᑉ ᑐᖏᓕᖓ ᓯᓚᕐᔪᐊᒧᑦ