ᔫᓂ 16, 2021 – ᐋᓐᑯᕆᑦ, ᐊᓛᔅᑲ – ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᕿᒥᕐᕈᓯᒪᔪᖅ ᒪᓕᒐᔅᓴᒥᑦ C-15−ᒥᑦ ᑲᓇᑕᒥ ᐊᑐᓕᖅᑎᑕᐅᒋᐊᓖᑦ ᓯᓚᕐᔪᐊᒥ ᑲᑐᔾᔨᖃᑎᒌᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖏᑦᑕ ᓄᓇᖃᖅᑳᖅᑐᒥᓃᑦ, ᐱᒋᐊᕈᑕᐅᓗᓂ ᐃᑲᔪᖅᑐᐃᔾᔪᑎ ᐊᔾᔨᐅᖏᑦᑑᓂᖏᓐᓂ ᐃᓄᐃᑦ ᐱᔪᓐᓇᐅᑎᖏᑦ ᓄᓇᖃᖅᑳᖅᑐᒥᓂᑦ ᑲᓇᑕᒥ ᓯᓚᕐᔪᐊᒥᓗ.
“ᑕᑯᓐᓇᖅᑐᒋᑦ ᓯᓚᕐᔪᐊᒥ ᐃᓄᐃᑦ ᐱᔪᓐᓇᐅᑎᖏᑦ, ᑲᓇᑕᒧᑦ ᑎᑎᕋᖅᓯᒪᔪᑦ ᒪᓕᒐᕐᓂᑦ ᐊᑐᓕᖅᑎᑕᐅᒋᐊᖃᕐᓂᖓ ᓯᓚᕐᔪᐊᒥ ᑲᑐᔾᔨᖃᑎᒌᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖏᑦᑕ ᓄᓇᖃᖅᑳᖅᑐᒥᓃᑦ ᑲᓇᑕᐅᑉ ᐃᓗᐊᓂ ᑐᓴᖅᑎᑦᑎᒋᐊᖃᕐᖓᑕ ᓯᓚᕐᔪᐊᒥ ᑕᒪᓐᓇ ᐱᒻᒪᕆᐅᓂᖓᓐᓂ ᓄᓇᖃᖅᑳᖅᑐᒥᓃᑦ ᐱᔪᓐᓇᐅᑎᖏᑦ, ᓴᖅᑭᕐᓗᑎᑦ ᐱᔪᓐᓇᐅᑎᕗᑦ ᓯᓚᕐᔪᐊᒥ ᐃᓕᓴᕆᔭᐅᓕᕐᓗᑎᒃ, ᐊᑐᓕᖅᑎᑕᐅᒋᐊᖃᕐᓂᖏᓐᓂ ᐊᑦᑐᐊᔪᓄᑦ ᐃᓅᖃᑎᒌᓐᓂᕐᒥᑦ,” ᐅᖃᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᐃᔅᓯᕙᐅᑕᖓ ᑕᓕ ᓵᒻᐳ ᑐᕈ. “ᐱᕙᓪᓕᐊᔭᐅᒋᐊᖃᕐᓂᖓ ᓯᓚᕐᔪᐊᒥ ᑲᑐᔾᔨᖃᑎᒌᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖏᑦᑕ ᓄᓇᖃᖅᑳᖅᑐᒥᓃᑦ ᐊᑯᓂᕐᔪᐊᕌᓗᒃ ᐊᕐᕌᒍᓄᑦ ᖁᓕᓄᑦ ᑲᒪᒋᔭᐅᓕᖅᑐᖅ ᐊᒻᒪᓗ ᑐᕌᒐᖏᓐᓂ ᑎᒍᓯᒻᒥᓗᑎᒃ ᓯᓚᕐᔪᐊᑉ ᑲᑐᔾᔨᖃᑎᒌᖏᑕ ᑲᑎᒪᓂᕐᔪᐊᖏᓐᓂ 2007−ᒥ. ᑲᓇᑕ ᑎᒍᓯᓚᐅᖅᑐᖅ ᑕᐃᔅᓱᒪᓂ ᐊᑐᓕᖅᑎᑕᐅᑦᑎᐊᖅᑐᑎᓪᓗ ᓯᓚᕐᔪᐊᒥ ᑲᑐᔾᔨᖃᑎᒌᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖏᑦᑕ ᓄᓇᖃᖅᑳᖅᑐᒥᓃᑦ ᓄᕕᐱᕆᒥ 2010−ᖑᑎᓪᓗᒍ. ᑖᓐᓇ ᑎᑎᕋᖅᓯᒪᔪᖅ ᒪᓕᒐᔅᓴᖅ C-15 ᓇᓗᓇᐃᖅᓯᔪᖅ ᐊᔾᔨᐅᖏᑦᑐᒥᑦ ᐃᓄᓐᓄᑦ ᐱᔪᓐᓇᐅᑎᖏᓐᓂᓪᓗ. ᐱᒻᒪᕆᐊᓗᒃ ᐱᒋᐊᖅᐸᓪᓕᐊᓗᓂ ᐅᐱᒋᑦᑎᐊᕐᓗᒋᑦ ᐱᓕᕆᐊᖑᔭᕆᐊᖃᖅᑐᑦ ᑲᓇᑕᒥ ᐊᒻᒪᓗ ᐱᒋᐊᕈᑎᖃᕐᓗᑎᑦ ᓈᒪᑦᑎᐊᖅᑐᓂᑦ ᐊᑐᓕᖅᑎᑦᑎᓗᑎᑦ ᓯᓚᕐᔪᐊᒥ ᑲᑐᔾᔨᖃᑎᒌᒃᑯᓂᓪᓗ ᓇᓗᓇᐃᖅᑕᐅᓗᑎᑦ.”
ᓯᓚᕐᔪᐊᒥ ᑲᑐᔾᔨᖃᑎᒌᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖏᑦᑕ ᓄᓇᖃᖅᑳᖅᑐᒥᓃᑦ ᓯᓚᕐᔪᐊᒥ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᑦ ᑎᒍᔭᐅᓚᐅᖅᓯᒪᔪᖅ ᓯᓚᕐᔪᐊᒥ ᑲᑐᔾᔨᖃᑎᒌᓐᓄᑦ ᓯᑎᐱᕆᒥ 13, 2007, ᓇᓗᓇᐃᕐᓗᒋᑦ ᐱᔪᓐᓇᐅᑏᑦ ᒪᓕᒐᖅᑕᓕᒃ ᐊᖏᓗᐊᓐᖏᑦᑐᒥᑦ ᐊᓐᓇᐅᒪᓇᓱᐊᕐᓂᕐᒧᑦ, ᓇᒻᒥᓂᖅ ᐃᑉᐱᒋᔭᕆᐊᖃᕐᓂᖏᓐᓂ ᐃᓅᓇᓱᐊᑦᑎᐊᕐᓂᒧᓪᓗ ᓄᓇᖃᖅᑳᖅᑐᒥᓃᑦ ᓯᓚᕐᔪᐊᒥ. ᐃᓗᓕᖃᖅᑐᖅ 46−ᓂᒃ ᑎᑎᕋᖅᓯᒪᔪᓂᒃ ᐸᖅᑭᑦᑎᔾᔪᑎᐅᔪᑦ ᐱᔪᓐᓇᐅᑎᖏᓐᓂ ᑲᒪᑐᐃᓐᓇᖏᑦᑐᕐᓕ ᐊᓯᖏᓐᓂ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓂ ᑭᓯᐊᓂᓕ ᐃᒻᒥᒃᑰᖅᑐᑦ ᐱᔪᓐᓇᐅᑎᖏᓐᓂ, ᐊᒻᒪᓗ ᐊᑦᑕᓇᐃᖅᓯᒪᖁᓪᓗᒋᑦ ᐃᒻᒥᒃᑰᖅᑐᑦ ᐱᔪᓐᓇᐅᑎᖏᑦ ᓄᓇᖃᖅᑳᖅᑐᒥᓃᑦ.
ᑲᓇᑕᒥ ᒪᓕᒐᔅᓴᖓ C-15 ᒪᓕᑦᑎᐊᕐᓂᐊᖅᑐᖅ ᐃᓂᓪᓚᑦᑎᑦᑎᑦᑎᐊᕐᓗᓂ ᑲᓇᑕᐅᑉ ᒪᓕᒐᖓᓃᑦᑐᒥᑦ ᓯᓚᕐᔪᐊᒥ ᑲᑐᔾᔨᖃᑎᒌᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖏᑦᑕ ᓄᓇᖃᖅᑳᖅᑐᒥᓃᑦ. ᑖᓐᓇ ᒪᓕᒐᔅᓴᖅ ᓇᐃᓈᖅᓯᒪᓪᓗᒍ ᐃᒫᒃ ᐅᖃᖅᑐᖅ “ᐊᑐᐃᓐᓇᐅᑎᑦᑎᓗᓂ ᑲᓇᑕᐅᑉ ᒐᕙᒪᒃᑯᖏᓐᓄᑦ ᖃᓄᖅᑑᖏᓐᓇᕆᐊᓖᑦ ᑕᒪᒃᑯᐊ ᒪᓕᒐᖅᑎᒍᑦ ᑲᓇᑕᒥ ᒪᓕᑦᑎᐊᕋᓗᐊᕐᒪᖔᑕ ᓯᓚᕐᔪᐊᑉ ᑲᑐᔾᔨᖃᑎᒌᖏᑦᑕ ᓇᓗᓇᐃᖅᓯᒪᔭᖏᓐᓂ ᐱᔪᓐᓇᐅᑎᓕᕆᔨᒥᑦ ᓄᓇᖃᖅᑳᖅᑐᒥᓂᕐᓄᑦ, ᐸᕐᓇᑦᑎᐊᕐᓗᑎᑦ ᐊᑐᓕᖅᑎᑦᑎᓗᑎᓪᓗ ᐱᒋᐊᕈᑕᐅᔭᕆᐊᓕᓐᓂᒃ ᐸᕐᓈᖑᓯᒪᔪᓂᒃ ᑕᒪᒃᑯᐊ ᑲᔪᓯᑎᖁᓪᓗᒋᑦ ᑐᕌᒐᐃᑦ ᓇᓗᓇᐃᖅᑕᐅᒋᐊᓕᑦ.”
ᒫᓐᓇᕈᓗᒃ ᐅᑭᐅᖅᑕᖅᑐᒥ ᑲᑎᒪᑎᓪᓗᒋᑦ 12−ᖓᓐᓂ ᒥᓂᔅᑕᐃᑦ ᑲᑎᒪᑎᓪᓗᒋᑦ ᕋᐃᑭᔭᕕᒃᒥ, ᐊᐃᔅᓚᒥ ᓇᓗᓇᐃᖅᓯᓚᐅᕐᓂᖏᓐᓂ ᐱᖃᓯᐅᔾᔨᔾᔪᑦ ᐃᑲᔪᖅᑐᐃᓪᓗᑎᓪᓗ ᓯᓚᕐᔪᐊᒥ ᑲᑐᔾᔨᖃᑎᒌᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖏᑦᑕ ᓄᓇᖃᖅᑳᖅᑐᒥᓃᑦ. “ᐃᓕᓴᕆᔭᐅᓪᓗᑎᑦ ᐱᔪᓐᓇᐅᑏᑦ ᐊᔾᔨᐅᖏᑦᑐᓂᓪᓗ ᓄᓇᖃᖅᑳᖅᑐᒥᓂᕐᓅᖓᔪᓂᒃ ᐊᒻᒪᓗ ᐊᔾᔨᐅᖏᑦᑐᓂᑦ ᐱᖃᑕᐅᖏᓐᓇᕐᓂᐊᕐᓂᖏᓐᓂ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ ᐊᒻᒪᓗ ᑖᒃᑯᐊ ᑲᑐᔾᔨᖃᑎᒌᑦ ᓇᓗᓇᐃᖅᓯᓯᒪᓂᖏᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᑐᒥᓃᑦ.” ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᓂᓪᓕᐊᔾᔪᑎᖃᐃᓐᓇᖅᑐᑦ ᐃᓚᓕᐅᔾᔨᖁᔨᓪᓗᑎᑦ ᓄᓇᖃᖅᑳᖅᑐᒥᓂᕐᓂᑦ ᐃᓱᒪᓕᐅᖅᑕᐅᕙᑦᑐᓂᒃ ᐅᑭᐅᖅᑖᖅᑑᑉ ᑲᑎᒪᔨᖏᓐᓄᑦ.
“ᑲᔪᓯᑎᑕᐅᓂᖏᑦ ᒪᓕᒐᖅᑎᒍᑦ ᑐᑭᖃᖅᑐᖅ ᓂᕆᐅᒋᔭᖃᕐᓇᖅᑐᖅ ᓄᓇᖃᖅᑳᖅᑐᒥᓃᑦ ᐱᓕᕆᖃᑕᐅᑦᑎᐊᓂᐊᕐᓂᖏᓐᓂ ᒐᕙᒪᑐᖃᒃᑯᓐᓂ ᐸᕐᓇᓪᓗᑎᑦ ᐱᒋᐊᕈᑎᔅᓴᖏᓐᓂ ᐃᓱᓕᓪᓗᓂᓗ ᑕᒪᓐᓈᓗᒃ ᓈᒻᒪᖏᑦᑐᖅ, ᐃᓛᐃᓐᓈᕆᖃᑦᑕᕐᓂᖅ, ᐃᓚᓕᐅᔾᔨᓯᒪᓐᖏᓐᓂᖅ ᖃᓄᐃᑦᑐᑐᐃᓐᓇᖅᑎᒍᑦ ᓂᖓᕐᓂᑯᓪᓗ ᐃᓚᐃᓐᓈᖅᓯᖃᑦᑕᓂᕐᓗ ᓄᓇᖃᖅᑳᖅᑐᒥᓂᕐᓂᑦ,” ᐅᖃᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᓇᑕᒥ ᐊᖏᔪᖅᑲᖅ ᒪᓂᑲ ᐃᐅᓪ-ᑲᓇᔪᖅ, “ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖏᑦ ᐅᖃᐅᓯᖃᓚᐅᕐᒥᔪᑦ ᒪᓕᒐᔅᓴᒥᑦ C-15−ᒥ, ᑕᐃᒫᔅᓴᐃᓐᓇᖅᑕᐅ ᐱᖁᔨᔪᑦ ᑲᑎᒪᔨᖏᑦ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᓇᑕᒥ. ᖃᐅᔨᒪᔪᒍᑦ ᑕᒪᓐᓇ ᒪᓕᒐᖅ ᐊᕗᖔᓘᖓᓐᖏᒻᒪᑦ ᑕᑯᔪᒪᔭᑦᑎᓐᓂ, ᐱᖃᓯᐅᔾᔨᖏᑦᑐᖅᑕᐅ ᐊᓯᔾᔨᖅᑕᐅᒋᐊᓕᓐᓂᒃ ᐃᓄᓐᓂᑦ ᑐᓂᓯᒪᔭᖏᓐᓂ. ᑭᓯᐊᓂᓕ ᐱᓕᕆᐊᕆᓂᐊᕐᒥᔭᕗᑦ ᑕᒪᓐᓇ, ᓂᓪᓕᐊᔨᐅᖏᓐᓇᕐᓗᑕᓗ ᐊᑐᓕᖅᑎᑕᐅᒋᐊᖃᕐᓂᖏᓐᓂ ᑲᑎᒪᔨᓄᑦ ᑕᒪᒃᑯᐊ.”
ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᓚᖡᑦ ᓄᓈᓂ ᐊᖏᔪᖅᑲᖓ ᕼᐊᔭᓪᒪᕐ ᑕᓪ ᐅᖃᓚᐅᖅᑐᖅ, “ᐱᐅᔫᓪᓗᓂ ᐱᕙᓪᓕᐊᑦᑎᐊᖅᑐᖅ ᑲᓇᑕᒥ ᓯᕗᒧᐊᑉᐸᓪᓕᐊᔪᖅ ᒪᓕᒐᐃᑦ ᑲᓇᑕᒥ ᒪᓕᔾᔫᒥᖁᓪᓗᒋᑦ ᓯᓚᕐᔪᐊᒥ ᑲᑐᔾᔨᖃᑎᒌᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖏᑦᑕ ᓄᓇᖃᖅᑳᖅᑐᒥᓃᑦ – ᐱᖃᓯᐅᑎᓗᒋᓪᓗ ᐅᖃᐅᓰᑦ ᐃᑲᔪᖅᑐᖅᑕᐅᒋᐊᖃᕐᓂᖏᑦ ᓯᓚᕐᔪᐊᑉ ᑲᑐᔨᖃᑎᒌᖏᑕ ᓇᓗᓇᐃᖅᓯᒪᔭᖏᓐᓂ ᕋᐃᔭᐃᕕᒃ ᒥᓂᔅᑕᓂᑦ ᐱᐅᔪᓂᑦ ᓂᓪᓕᐊᔾᔪᑎᓖᒃ ᓇᒻᒥᓂᖅᓱᕆᐊᖃᕐᓂᑎᓐᓂ ᑕᒪᑐᒥᖓ ᐱᖃᑕᐅᑦᑎᐊᕐᓗᑕᓗ ᐅᑭᐅᖅᑕᖅᑑᑉ ᑲᑎᒪᔨᖏᓐᓄᑦ. ᐱᕙᓪᓕᐊᑦᑎᐊᕐᓗᑎᑦ.”
ᐱᔭᕇᔭᕐᓗᒍ, ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᐊᓛᔅᑲᒥ ᐊᖏᔪᖅᑳᖅ ᔨᒥ ᓯᑖᑦ ᐅᖃᓚᐅᖅᑐᖅ, “ᑲᓇᑕᐅᑉ ᒐᕙᒪᒃᑯᖏᑦ ᓴᖅᑮᑦᑎᐊᕐᓂᖏᓐᓂ ᐆᑦᑑᑎᑦᑎᐊᔭᐅᓂᐊᖅᑐᖅ ᓯᓚᕐᔪᐊᒧᑦ ᐱᔪᓐᓇᐅᑎᓕᕆᔪᒥᑦ ᑕᒪᒃᑯᓂᖓ ᓄᓇᖃᖅᑳᖅᑐᒥᓂᕐᓅᖓᔪᓂᒃ ᑲᓇᑕᒥ. ᓂᕆᐅᒋᔭᖃᖅᑐᒍᑦ ᓯᕗᓂᑦᑎᓐᓂ ᒥᐊᓕᒐᐃᑦ ᓄᓇᖓᓐᓂ ᑕᐃᒫᔅᓴᐃᓐᓇᖅᑕᐅ ᐱᒋᐊᕐᓂᐊᕐᓂᖏᓐᓂ.”
-30-
ᑐᑭᓯᒋᐊᕐᕕᒋᔪᓐᓇᖅᑕᐃᑦ:
ᑲᓕ ᐃᓂᒍᕙᒃ ICC (ᐊᓛᔅᑲ) kelly@iccalaska.org 907-274-9058
ᑐᑯᒻᒥᓐᖑᐊᖅ ᓂᔾᔮᕐ ᐋᓪᓴᓐ ICC (ᑲᓛᖡᑦ ᓄᓈ) tukumminnguaq@inuit.org
ᓯᑏᕙᓐ ᕼᐊᕆ ICC (ᑲᓇᑕᒥ) type88@post.com
613 668 1923