ᓄᕕᐱᕆ 28, 2019 – ᐃᓗᓕᔅᓴᑦ, ᑲᓛᖡᑦ ᓄᓈ – ᓯᕗᓕᖅᑏᑦ ᑲᑎᒪᔨᖏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ (ᑲᑎᒪᑦᑎᐊᖅᑐᐊᓘᓚᐅᖅᑐᑦ ᐃᓗᓕᔅᓴᕐᒥ, ᑲᓛᖡᑦ ᓄᓈᓂ ᓄᕕᐱᕆᒥ 23-25. ᑲᑎᒪᖃᑎᖃᖅᑐᑎᓪᓗ ᕼᐊᒻᒪᓚᒃᑯᑦ ᑲᑎᒪᔨᖏᓐᓂ ᐊᕙᓈᑕ ᑯᒻᒧᓂᐊᒥᑦ ᐊᒻᒪᓗ ᒪᐃᔭᒥ ᐸᓕ ᔫᕆᒥᐊᓴᓐᒥᑦ ᓈᓚᑦᑐᑎᑦ ᓄᓇᓕᓐᓂ ᐸᕐᓇᓐᓂᖏᓐᓂ ᑲᑎᒪᓂᕐᔪᐊᖑᓛᖅᑐᒥᑦ 14−ᖓᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᔪᓚᐃᒥ, 2022.
ᒪᐃᔭ ᐸᓕ ᔪᕆᒥᐊᓴᓐ ᐊᒻᒪᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐃᔅᓯᕙᐅᑕᖓ ᑕᓕ ᓵᒻᐳ ᑐᕈ ᐊᑎᓕᐅᓚᐅᖅᑐᑦ ᐊᖏᕈᑎᒥᒃ ᑲᑎᒪᔾᔪᑎᒋᓛᖅᑕᖏᓐᓂ 14−ᖓᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ (ICC) ᑲᑎᒪᕕᔾᔪᐊᓕᖅᑲᑕ ᔪᓚᐃᒥ 2022−ᒥ ᐱᖃᑕᐅᓗᑎᑦ ᕼᐊᒻᒪᓚᒃᑯᑦ ᑲᑎᒪᔨᖏᑦ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᓯᕗᓕᖅᑏᑦ ᑲᑎᒪᔨᖏᑦ, ᐊᒻᒪᓗ ᐃᓅᓱᑦᑐᓂ ᑭᒡᒐᖅᑐᐃᓕᖃᐅᕐᓗᑎᑦ ᐃᓄᐃᑦ ᓄᓇᖓᓐᓃᓐᖔᖅᓯᒪᔪᓂᑦ.
“ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓛᖡᑦ ᓄᓈ ᑲᑎᒪᑎᑦᑎᒍᒪᑦᑎᐊᖅᑐᑦ ᐱᓕᕆᖃᑎᖃᕐᓗᑎᑦ ᐃᓄᓐᓂᑦ ᐊᕙᑖᑕ ᑯᒻᒧᓂᐊᓂ ᐊᒻᒪᓗ ᐃᓗᓕᔅᓴᕐᓂᑦ” ᐅᖃᓚᐅᖅᑐᖅ ᕼᐊᔭᒪᕐ ᑕᓪ, ᐊᖏᔪᖅᑲᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓛᖡᑦ ᓄᓈᓄᑦ. “ᓄᓇᓕᓐᓂ ᑲᑎᒪᔨᕋᓛᑦᑕᖃᓕᖅᑐᖅ ᐸᕐᓇᓛᖅᑐᓂ ᑲᑎᒪᓂᐅᓛᖅᑐᒥ ᐃᓗᓕᔅᓴᒻᒥ, ᐊᒥᓱᓂᓪᓗ ᐳᓚᕋᖅᑎᑕᖃᓛᕆᓪᓗᑎᑦ ᑕᒪᑐᒥᖓ ᓄᓇᓕᓐᓂ ᓴᖅᑭᐸᓪᓕᐊᓛᖅᑐᓂᓪᓗ.”
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᑎᒪᕕᔾᔪᐊᑎᑦᑎᖃᑦᑕᕐᖓᑕ ᐊᕐᕌᒍᑦ ᑎᓴᒪᑦ ᐊᓂᒍᕋᐃᒻᒪᑕ ᐱᖃᑕᐅᔪᖃᖅᑐᑎᑦ ᓯᓚᕐᔪᐊᑉ ᐅᑭᐅᖅᑕᖅᑐᖏᓐᓂ ᓂᕈᐊᖅᑕᒥᓂᕐᓂᑦ ᐃᔅᓯᕙᐅᑕᕐᓂᑦ ᓯᕗᓕᖅᑏᓪᓗ ᑲᑎᒪᔨᖏᓐᓂ, ᐱᖁᔭᓕᐊᒥᓂᕐᓂᓪᓗ, ᑎᒍᔭᐅᔪᒥᓂᕐᓂᓪᓗ ᓇᓗᓇᐃᖅᑕᐅᔪᓂᒃ ᐊᑐᐊᕈᑕᐅᓂᐊᖅᑐᓂᒃ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐱᒋᐊᕈᑎᖏᓐᓂ ᑲᒪᒋᔭᐅᒋᐊᖃᓛᕐᒥᔪᓂᑦ. ᑲᑎᒪᓂᕐᔪᐊᒥ ᑲᑐᔾᔨᒍᓐᓇᕐᒥᔪᑦ ᑐᓴᕈᑎᓂᒃ, ᐅᖃᐅᓯᖃᕐᓗᑎᓪᓗ ᐃᓱᒫᓘᑎᐅᒐᔪᑦᑐᓂᒃ, ᐊᐃᕙᔾᔪᑕᐅᔪᓂᒃ, ᓇᓪᓕᐅᓂᖅᓯᐅᕈᑕᐅᔪᓂᓪᓗ ᐃᓄᐃᑦ ᐱᖅᑯᓯᖏᓐᓂ, ᐊᒻᒪᓗ ᓴᓐᖓᑎᒃᑲᓂᕐᓗᒋᑦ ᑖᒃᑯᐊ ᐃᓅᖃᑎᒌᓕᒪᑦ.
“ᖃᐅᔨᒃᑲᐃᖃᑦᑕᕐᓂᐊᖅᑐᒍᑦ ᖃᓄᐃᓕᖓᓕᕐᒪᖔᑦᑕ, ᑕᐃᑲᓂ ᑎᓴᒪᓂᑦ ᓄᓇᓕᕐᔪᐊᓂᑦ, ᐊᑐᓕᖅᑎᑦᑎᓂᖏᓐᓂ ᐅᑦᕿᐊᕕᒃ ᓇᓗᓇᐃᖅᑕᐅᓯᒪᔪᒥᑦ,” ᐅᖃᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐃᔅᓯᕙᐅᑕᖓ ᑕᓕ ᓵᒻᐳ ᓴᕈ. “ᓱᓕᒃᑲᓐᓂᖅ, ᑲᑎᓛᕐᒥᒐᑦᑕ ᐅᖃᐅᓯᖃᕐᓗᑎᑦ ᐃᓱᒫᓗᓇᖅᑐᓪᓚᕆᓐᓂ ᐊᑐᖅᑕᐅᕙᑦᑐᓂᑦ ᐃᓄᓐᓄᑦ, ᓯᓚᓗ ᐊᓯᔾᔨᐸᓪᓕᐊᓂᖓᓂ ᐅᑭᐅᖅᑕᖅᑐᒥᓪᓗ ᑎᒍᒥᐊᕐᓂᖓᓐᓂ ᓂᕿᔅᓴᖃᕐᓂᒥᓪᓗ, ᐆᑦᑑᑎᑐᐃᓐᓇᐃᑦ ᑕᒪᒃᑯᐊ. ᐅᑦᕿᐊᕕᒻᒥ ᓇᓗᓇᐃᖅᑕᐅᓯᒪᔪᖅ ᖁᓕᓂᑦ ᑎᑎᕋᖅᓯᒪᔪᖃᕐᖓᑦ ᐱᓪᓚᕆᐅᓂᖅᐹᓂᑦ ᑕᐃᑲᓐᖓᑦ 58−ᖏᓐᓃᑦᑐᓂᑦ ᑎᑎᕋᖅᓯᒪᔪᓂᑦ.”
ᐃᓗᓕᔅᓴᑦ ᐱᖓᔪᒋᔭᐅᒻᒪᑦ ᐊᖏᓂᖅᐹᖑᖃᑎᒋᔭᐅᔪᓂᒃ ᑲᓛᖡᑦ ᓄᓈᓂ ᓅᒃᒥ ᓯᓯᒥᐅᒥᓪᓘ, ᐃᓄᒋᐊᓐᓂᖏᑦ ᐊᑖᓃᒻᒪᑕ 5,000. ᐊᑎᖏᑦ ᑕᒃᑯᐊ ᑐᑭᓖᑦ “ᐱᖃᓗᔭᖅᑕᓕᒃ” ᑲᓛᖠᓱᑦ. ᖃᓂᑦᑐᖅ ᐃᓗᓕᔅᓴᑦ ᐱᖃᓗᔭᖅᑕᓕᓂᒃ ᐊᖏᔪᕐᔪᐊᕌᓘᒻᒪᑦ ᓯᕐᒥᓕᒻᒦᓐᖔᖅᓯᒪᔪᐊᓗᒻᒥ, ᐊᒻᒪᓗ UNESCO ᓯᓚᕐᔪᐊᒥ ᐃᑦᑕᕐᓂᓴᐅᓂᖓᓐᓂ ᐃᓕᓴᕆᔭᐅᒻᒪᑦ.