ᔪᓚᐃ 6, 2021 – ᐋᑐᐋ, ᑲᓇᑕ – ᐊᖏᖅᑎᑕᐅᓂᖓ ᑲᑎᒪᔨᐅᖃᑕᐅᖃᑦᑕᖅᓯᒪᔫᕐ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ (ICC−ᑯᑦ) ᐃᒃᓯᕙᐅᑕᐅᓪᓗᓂ ᒥᐊᕆ ᓴᐃᒪᓐ ᑲᓇᑕᒥ 30−ᒋᔭᐅᓪᓗᓂ ᑯᐃᒧᑦ ᑭᒡᒐᖅᑐᐃᔨᐅᓂᕐᒧᑦ ᐊᓪᓗᕆᐊᕐᓂᖓ ᓯᕗᒧᑦ ᐊᖏᔫᕗᖅ ᐱᔾᔪᑎᖃᕐᓂᖓᓗ ᑖᒃᑯᓂᖓ ᒐᕙᒪᑐᖃᒃᑯᑦ ᓄᓇᖃᖅᑳᖅᓯᒪᔪᓪᓗ ᐊᑕᖏᖅᑎᓪᓗᒋᑦ, ᐊᒻᒪᓗ ᓄᓇᕐᔪᐊᒥ. ᓴᐃᒪᓐ ᓯᕗᓪᓕᖅᐸᐅᓪᓗᓂ ᐃᓄᒃ ᑕᐃᔭᐅᓂᖃᖅᓱᓂ ᐃᓂᒋᓂᐊᕐᓗᒍ ᑲᓇᑕᒥ ᐊᑐᖅᑕᐅᓚᐅᖅᓯᒪᔪᓂ, ᐊᒻᒪᓗ ᓄᓇᖃᖅᑳᖅᓯᒪᔫᓪᓗᓂ ᑯᐃᒧᑦ ᑭᒡᒐᑐᖅᑎ.
“ᒥᐊᕆ ᓴᐃᒪᓐ ᐃᒃᓯᕙᐅᑕᕆᓚᐅᖅᓯᒪᔭᕗᑦ ICC−ᑯᓐᓄᑦ ᐱᒋᐊᖅᓱᓂ 1986 ᑎᑭᑦᓱᒍ 1992,” ᐅᖃᖅᑐᒥᓂᖅ ICC−ᑯᑦ ᑲᓇᑕᒥ ᐊᖓᔪᖅᑳᖓ ᒫᓂᑲ ᐃᐅᓪ−ᑲᓇᔪᖅ. “ᐃᑲᔪᖅᓯᓯᒪᔪᐹᓗᒃ ᐱᕙᓪᓕᐊᔭᐅᓕᖅᑎᓪᓗᒋᑦ ᓯᕗᓪᓕᐅᒋᐊᓖᑦ ᐊᑐᐊᒐᑦᓴᑦ ᐃᑲᔪᕐᓂᐊᖅᑐᑦ ᓯᕗᓕᕐᕕᐅᕙᓪᓕᐊᓂᖓᓂᒃ ᐅᓪᓗᒥᐅᓕᖅᑐᖅ ᐅᑭᐅᖅᑕᖅᑐᖅ, ᐱᖃᑕᐅᓗᑎᒃ ᐱᕙᓪᓕᐊᒥᓂᖓᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ 25 ᐊᕐᕌᒍᑦ ᖄᖏᖅᓯᒪᓕᖅᑐᓂ ᓯᑎᐱᕆᒥ, 1996. ᑲᓇᑕᒧᑦ ᑭᒡᒐᖅᑐᐃᓪᓗᓂ ᐅᑭᐅᖅᑕᖅᑐᒧᑦ, ᐊᒻᒪᓗ ᑭᒡᒐᖅᑐᐃᔪᒥᓂᐅᓪᓗᓂ ᑎᐊᓐᒫᒃᒧᑦ, ᑯᐃᒧᑦ ᑭᒡᒐᑐᖅᑎᒋᓕᕋᑖᕗᑦ ᑕᒪᒃᑯᓂᖓ ᖃᐅᔨᓯᒪᕗᖅ ᑭᒡᒐᖅᑐᑎᐅᓪᓗᓂ ᑯᐃᒧᑦ – ᑐᑭᓯᐊᓪᓗᓂᓗ ᐊᒃᓱᕈᕈᑕᐅᔪᓂᑦ ᐃᓄᖕᓄᑦ ᐊᓯᖏᓐᓄᓪᓗ ᓄᓇᖃᖅᑳᖅᓯᒪᔪᓄᑦ ᑲᓇᑕᒥ.”
ᒥᐊᕆ ᓴᐃᒪᓐ ᐱᕈᖅᓴᔪᒥᓂᖅ ᑲᖏᖅᓱᐊᓗᔾᔪᐊᒥ, ᑰᔾᔪᐊᒥᓗ. ᐊᖓᔪᖅᑳᖑᓚᐅᖅᓯᒪᔪᖅ ᒪᑭᕕᒃ ᑯᐊᐳᕇᓴᒃᑯᓐᓄᑦ ᑐᑦᑕᕐᕕᖃᖅᓱᑎᒃ ᑰᔾᔪᐊᒥ, ᓄᓇᕕᒃ, ᑯᐸᐃᒃ. ICC−ᑯᓐᓄᑦ ᐃᒃᓯᕙᐅᑕᕆᔭᐅᓪᓗᓂ 1986−ᒥ ᑎᑭᑦᓱᒍ 1992. ᐊᖓᔪᖅᑲᕆᔭᐅᓐᓂᕐᒥᔪᖅ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓄᑦ (ITK) ᐱᒋᐊᖅᓱᓂ 2006 ᑎᑭᑦᓱᒍ 2012. ᐊᖓᔪᖅᑳᖑᓪᓗᓂ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓄᑦ ᐊᖏᕈᑎᖃᖅᑐᒥᓂᖅ ᒪᒥᐊᕝᕕᐅᑎᓪᓗᒋᑦ ᐱᓂᕐᓗᑦᑕᐅᖃᑦᑕᖅᑐᒥᓃᑦ ᐃᓕᓐᓂᐊᕆᐊᖅᑎᑕᐅᖃᑦᑕᖅᓱᑎᒃ ᑭᒡᒐᖅᑐᐃᓪᓗᓂ ᐃᓄᖕᓂᑦ ᑲᓇᑕᒥᐅᓂᑦ ᒪᒥᐊᓐᓂᖃᖅᓪᓗᒍ ᐊᖓᔪᖅᑳᖓ ᑲᓇᑕᐅᑉ ᑕᐃᒃᓱᒨᓇ, ᐅᐱᓐᓇᒻᒪᕆᑦᑐᒥᑦ ᑭᐅᕙᑦᓱᓂ ᐃᓄᒃᑎᑐᑦ ᓇᓗᓇᐃᖅᓯᒍᑎᒋᑦᓱᒍ ᐃᓄᐃᑦ ᐅᖃᐅᓯᖓ ᐊᓐᓇᑦᓯᒪᒋᐊᖓᓂᑦ ᓄᖑᑎᑕᐅᒐᓱᐊᖃᑦᑕᖅᓯᒪᒐᓗᐊᖅᑎᓪᓗᒍ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᑲᓇᑕᒥ. ᒫᓐᓇᖃᒻᒥᐅᓂᖅᐹᒥ ᒥᐊᕆ ᓴᐃᒪᑦ ᐊᖓᔪᖅᑳᖑᓪᓗᓂ ᐋᔾᔨᖃᑎᒌᖕᓂᕐᒥ ᓇᒻᒥᓂᖅᓱᓂᕐᒧᑦ ᐱᕙᓪᓕᐊᓂᕐᒥ ᓯᕗᓕᖅᑕᐅᔪᒧᑦ ᒪᑭᕕᒃ ᑯᐊᐳᕇᓴᒃᑯᓐᓄᑦ ᐱᓕᕆᓂᖃᖅᑎᓪᓗᒋᑦ ᒐᕙᒪᒃᑯᖏᓐᓂ ᑲᓇᑕᐅᑉ.
“ᑲᓇᑕ ᑎᒃᑯᐊᓯᓐᓂᖅᐳᖅ ᐱᔪᓐᓇᖅᓯᓯᒪᑦᓯᐊᖅᑐᒥᑦ ᑭᒡᒐᖅᑐᐃᔨᒥᑦ ᐃᓂᖃᕐᓂᐊᓕᖅᑐᒥᒃ ᐃᑲᔪᖅᓯᕕᒋᓂᐊᖅᑕᒥᓂᒃ ᐋᖅᑭᖃᑎᒌᖕᓂᕐᒧᑦ ᐱᕙᓪᓕᐊᓂᕐᒥ ᑲᓇᑕᐅᑉ ᐱᖃᑕᐅᕕᖓᓂ,” ᐅᖃᖅᑐᒥᓂᖅ ᒫᓂᑲ ᐃᐅᓪ−ᑲᓇᔪᖅ. “ᓄᓇᕐᔪᐊᒥ ᐃᑲᔪᖅᓯᓯᒪᔪᖅ ᐃᑲᔪᖅᑐᐃᒍᒪᓪᓗᓂ ᐱᕚᓪᓕᑎᓪᓗᒍᓗ ᓄᓇᖃᖅᑳᖅᓯᒪᔪᑦ ᑎᒥᓖᑦ ᐱᔪᓐᓇᐅᑎᖏᑦ ᑕᒪᓐᓇ ᐱᒻᒪᕆᐅᖃᑕᐅᕗᖅ. ᐃᓚᓕᐅᑎᑎᓪᓗᒍᒍ ᐅᑭᐅᖅᑕᖅᑐᒧᑦ ᑲᑎᒪᔨᓄᑦ, ᐃᑲᔪᖅᓯᓯᒪᕗᖅ ᐊᑯᓂ ᑎᑎᕋᖅᑕᐅᒋᐊᕐᖓᖅᑐᒧᑦ ᐱᕙᓪᓕᐊᔭᐅᔪᓄᑦ ᑲᑐᔾᔨᖃᑎᒌᑦ ᓄᓇᓕᕐᔪᐊᑦ ᐊᖏᖃᑎᒌᒍᑎᖓᓂᑦ ᐱᔪᓐᓇᐅᑎᖏᑦ ᐱᓪᓗᒋᑦ ᓄᓇᖃᖅᑲᖅᓯᒪᔪᑦ (UNDRIP−ᑯᑦ), ᑲᔪᓯᑎᑕᐅᓂᖃᖅᑎᓪᓗᒍ ᑲᑐᔾᔨᖃᑎᒌᑦᑐᑦ ᓄᓇᓕᕐᔪᐊᑦ ᑲᑎᑦᑎᓪᓗᒋᑦ 2007−ᖑᑎᓪᓗᒍ ᓂᐅ ᔪᐊᒃᒥ.”
-30-
ᖃᐅᔨᒋᐊᕐᕕᒃᓴᑦ:
ᑭᐅᕈᓪ ᓴᐃᒪᓐ ICC (ᑲᓇᑕ) Email: csimon@inuitcircumpolar.com (613) 293-9728