Julai 6, 2021 – Aatuaa, Kanata – Angiqtitauninga katimajiuqatauqattaqsimajuur Inuit Ukiuqtaqtumiuqatigiit Katimajinginnut (ICC−kut) Iksivautaulluni Miari Saiman Kanatami 30−gijaulluni Kuimut Kiggaqtuijiunirmut alluriarninga sivumut angijuuvuq pijjutiqarningalu taakkuninga Gavamatuqakkut Nunaqaqqaaqsimajullu Atangiqtillugit, ammalu nunarjuami. Saiman sivulliqpaulluni Inuk taijauniqaqsuni iniginiarlugu Kanatami atuqtaulauqsimajuni, ammalu Nunaqaqqaaqsimajuulluni Kuimut Kiggatuqti.
“Miari Saiman Iksivautarilauqsimajavut ICC−kunnut pigiaqsuni 1986 tikitsugu 1992,” uqaqtuminiq ICC−kut Kanatami Angajuqqaanga Maanika Iul−Kanajuq. “Ikajuqsisimajupaaluk pivalliajauliqtillugit sivulliugialiit atuagatsat ikajurniaqtut sivulirviuvallianinganik ullumiuliqtuq ukiuqtaqtuq, piqataulutik pivalliaminingat Ukiuqtaqtumut Katimajiit 25 arraagut qaangiqsimaliqtuni Sitipirimi, 1996. Kanatamut Kiggaqtuilluni Ukiuqtaqtumut, ammalu Kiggaqtuijuminiulluni Tianmaakmut, Kuimut Kiggatuqtigilirataavut tamakkuninga qaujisimavuq Kiggaqtutiulluni Kuimut – tukisiallunilu aksururutaujunit Inungnut asinginnullu Nunaqaqqaaqsimajunut Kanatami.”
Miari Saiman piruqsajuminiq Kangiqsualujjuami, Kuujjuamilu. Angajuqqaangulauqsimajuq Makivik Kuapuriisakkunnut tuttarviqaqsutik Kuujjuami, Nunavik, Kupaik. ICC−kunnut Iksivautarijaulluni 1986−mi tikitsugu 1992. Angajuqqarijaunnirmijuq Inuit Tapiriit Kanatamikkunnut (ITK) pigiaqsuni 2006 tikitsugu 2012. Angajuqqaangulluni Inuit Tapiriit Kanatamikkunnut Angirutiqaqtuminiq mamiavviutillugit pinirluttauqattaqtuminiit ilinniariaqtitauqattaqsutik kiggaqtuilluni inungnit Kanatamiunit mamianniqaqllugu Angajuqqaanga Kanataup Taiksumuuna, upinnammarittumit kiuvatsuni Inuktitut nalunaiqsigutigitsugu Inuit uqausinga annatsimagianganit Nungutitaugasuaqattaqsimagaluaqtillugu Nunaqaqqaaqsimajut Uqausingit Kanatami. Maannaqammiuniqpaami Miari Saimat Angajuqqaangulluni Aajjiqatigiingnirmi Namminiqsunirmut Pivallianirmi Sivuliqtaujumut Makivik Kuapuriisakkunnut piliriniqaqtillugit Gavamakkunginni Kanataup.
“Kanata tikkuasinniqpuq pijunnaqsisimatsiaqtumit kiggaqtuijimit iniqarnialiqtumik ikajuqsiviginiaqtaminik aaqqiqatigiingnirmut pivallianirmi Kanataup piqatauvingani,” uqaqtuminiq Maanika Iul−Kanajuq. “Nunarjuami ikajuqsisimajuq ikajuqtuigumalluni pivaallitillugulu Nunaqaqqaaqsimajut Timiliit Pijunnautingit tamanna pimmariuqatauvuq. Ilaliutitillugugu Ukiuqtaqtumut Katimajinut, ikajuqsisimavuq akuni titiraqtaugiarngaqtumut pivalliajaujunut Katujjiqatigiit Nunalirjuat Angiqatigiigutinganit Pijunnautingit Pillugit Nunaqaqqaqsimajut (UNDRIP−kut), kajusititauniqaqtillugu Katujjiqatigiittut Nunalirjuat katittillugit 2007−ngutillugu Niu Juakmi.”
-30-
Qaujigiarvigiguk:
Kiurul Saiman ICC (Kanata) Email: csimon@inuitcircumpolar.com (613) 293-9728