ᐃᓄᐃᑦ ᐅᖃᖅᓯᒪᒻᒪᑕ ᑐᑭᓯᔭᐅᔭᕆᐊᖃᕐᓂᖓᓂᒃ “ᑐᑭᓕᒻᒥᒃ ᐱᖃᑕᐅᑎᑕᐅᓂᖅ”
ᓯᑎᐱᕆ 19, 2021 – ᐊᓐᑯᕆᔾ ᐊᓛᔅᑲ – ᑖᒃᑯᐊ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ (ICC), ᐃᓚᒋᔭᐅᖏᓐᓇᖃᑦᑕᖅᑎᐅᓪᓗᑎᒃ ᐱᖃᑕᐅᓂᕐᒥᒃ ᐅᑭᐅᖅᑕᖅᑐᒧᑦ ᑲᑎᒪᔨᓄᑦ, ᐅᖃᖅᓯᒪᔪᑦ ᐊᒥᓱᓂᒃ ᐅᐱᒋᔭᒃᓴᖅᑕᖃᕐᓂᖓᓂᒃ ᐱᓪᓗᒋᑦ ᑲᔪᓯᑎᑕᐅᖃᑦᑕᖅᓯᒪᔪᑦ ᑖᒃᑯᓇᓂ ᐊᕙᑎᑦ ᑕᓪᓕᒪᓪᓗ ᐊᕐᕌᒍᓂ ᐊᓂᒍᖅᑐᓂ. ICC-ᑯᑦ ᐅᐱᒋᔭᖃᖅᓱᑎᒃ ᐊᒥᓱᓂᒃ ᐱᓕᕆᖃᑕᐅᖃᑦᑕᖅᓯᒪᑯᑖᑦᑐᓂᑦ ᐅᑭᐅᖅᑕᖅᑐᒥ ᐊᖓᔪᖅᑲᐅᑎᓂᒃ ᐊᒻᒪᓗ ᑲᑎᒪᔨᓄᑦ ᐱᖃᑕᐅᖏᓐᓇᐸᑦᑐᓂᑦ ᐊᔭᐅᖅᑐᐃᓯᒪᓂᖏᓐᓄᑦ ᐊᑐᐊᒐᕐᓂᒃ ᐊᑐᓕᖁᔭᓕᐊᖑᓯᒪᔪᓂᒃ ᓯᕗᒧᐊᑦᑎᑕᐅᖁᔨᓂᕐᒥᒃ, ᐊᒻᒪᓗ ᑕᒪᓐᓇ ᐊᑐᓕᖅᑎᑕᐅᓯᒪᓕᖅᓱᓂ ᒥᓂᔅᑕᐅᔪᓄᑦ ᑖᒃᑯᓄᖓ ᓯᑕᒪᐅᔪᖅᑐᓄᑦ ᐅᑭᐅᖅᑕᖅᑐᒥ ᓄᓇᓕᔾᔪᐊᓃᑦᑐᓄᑦ ᑖᒃᑯᓇᓂ ᒪᕐᕉᓂᒃ ᐊᕝᕙᖓᓂᓗ ᐱᓕᕆᓂᖃᖅᑎᓪᓗᒋᑦ ᐊᓂᒍᖅᑐᓂ ᐊᕐᕌᒍᓂ.
“ᐃᓄᐃᑦ ᑖᒃᑯᓇᖓᑦ ᓯᑕᒪᓂᒃ ᐅᑭᐅᖅᑕᖅᑐᒥ ᓄᓇᓕᐅᔪᓂᑦ – ᐊᓛᔅᑲ, ᑲᓇᑕ, ᓱᑯᑦᑲ (ᕋᓴ), ᐊᒻᒪᓗ ᑲᓛᖦᖡᑦ ᓄᓈ – ᓂᐱᖃᖅᑎᑦᓯᖃᑦᑕᖅᓯᒪᔪᑦ ᑭᒡᒐᑐᖅᓱᑎᒃ ᐅᕙᑦᑎᓐᓂᒃ ᑖᒃᑯᓄᖓ ᐅᑭᐅᖅᑕᖅᑐᒧᑦ ᑲᑎᒪᔨᓄᑦ, ᐊᖓᔪᖅᑲᐅᑎᓄᑦ ᐅᑭᐅᖅᑕᖅᑐᒧᑦ ᑲᑎᑦᓂᐅᑎᑕᓂ, ᐊᒻᒪᓗ ᐱᖃᑕᐅᖃᑦᑕᓂᕐᒥᒍᑦ ᐊᐃᕙᒍᑕᐅᑎᓪᓗᒍ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐱᓕᕆᖃᑎᒌᖕᓂᖓᑦ ᐱᒋᐊᓚᐅᖅᓯᒪᒻᒪᑕᓂᒃ,”ᐅᖃᖅᑐᒥᓂᖅ ICC−ᑯᑦ ᐃᒃᓯᕙᐅᑕᖓᑦ ᑕᓖ ᓴᒻᐳ ᑐᐊᕉ. “ᐱᒋᐊᓚᐅᖅᑎᓐᓇᒋᑦ ᐃᒃᓯᕙᐅᑕᕆᓯᒪᔭᕗᑦ, ᒥᐊᓕ ᓴᐃᒪᓐ, ᒫᓐᓇ ᑭᒡᒐᖅᑐᖅᑎᒋᔭᐅᓕᖅᑐᖅ ᑯᐃᖕᒧᑦ ᑲᓇᑕᒥ, ᐱᓕᕆᖃᑦᑕᖅᓯᒪᒻᒪᑦ ᐱᒋᐊᖅᑎᑕᐅᓂᖓ ᑎᑭᑦᓱᒍ ᐋᑐᐋᒥ ᓯᑎᐱᕆ 19, 1996−ᖑᑎᓪᓗᒍ.”
ICC−ᑯᑦ ᐃᒃᓯᕙᐅᑕᖓᑦ ᑕᓖ ᓴᒻᐳ ᑐᐊᕉ ᑐᓴᖅᓴᐅᑎᑕᐅᑎᓪᓗᒋᑦ ᑐᓴᕋᑦᓴᓕᐊᖑᓯᒪᔪᑦ ᑕᕝᕘᓇ ICC ᐅᓂᑉᑳ ᐅᑭᐅᖅᑕᖅᑐᒥ ᑐᓴᖅᓴᐅᑎᑕᐅᕙᑦᑐᑎᒍᑦ ᐹᑦᑳᔅᑯᑦ ᐅᖃᖃᑎᒌᒍᑕᐅᑎᓪᓗᒍ ᐊᕐᕌᒍᑦ ᐊᕙᑎᑦ ᑕᓪᓕᒪᓪᓗ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐱᓕᕆᓂᕆᓯᒪᔭᖓᑦ ICC−ᑯᑦ ᑲᓇᑕᒥ ᐊᖓᔪᖅᑳᖓᑕ ᒫᓂᑲ ᐃᐅᓪ−ᑲᓇᔫᑉ, ICC−ᑯᑦ ᑲᓛᖦᖡᑦ ᓄᓈᓂ ᐊᖓᔪᖅᑳᖓ ᕼᐊᔾᔭᓪᒫ ᑖ, ᐊᒻᒪᓗ ICC−ᑯᑦ ᓱᒃᑯᑦᑲ ᐊᖓᔪᖅᑳᖓ ᓕᐅᐸᕝ ᑕᐃᐊᓐ. ᐅᕙᓂ ᐊᑐᐃᓐᓇᐅᑎᑕᐅᔪᖅ: https://bit.ly/3gwLV9w
“ᐃᓱᒪᔪᖓ ᐊᑑᑎᖃᖅᑐᒥᒃ ᐱᖃᑕᐅᑎᑕᐅᓂᖅ ᑕᕝᕘᓇ ᑭᓯᐊᓂᐅᓂᖓᓂᒃ ᓄᓇᖃᖅᑳᖅᓯᒪᔪᓄᑦ, ᐅᑭᐅᖅᑕᖅᑐᒥᑐᐃᓐᓇᐅᖏᑦᑐᖅ, ᑭᓯᐊᓂ ᓄᓇᕐᔪᐊᓕᒫᒥ ᑲᓇᑕᒥ ᓄᓇᖃᖅᑳᖅᓯᒪᔪᑦ ᑲᑎᒪᓂᖃᖅᑎᑕᐅᓂᖏᓐᓂ, ᐅᖃᖅᑐᒥᓂᖅ ICC−ᑯᑦ ᑲᓛᖦᖡᑦ ᓄᓈᓂ ᐊᖓᔪᖅᑳᖓ ᕼᐊᔾᔭᓪᒫ ᑖᓪ. “ᐅᑭᐅᖅᑕᖅᑐᒥ ᑲᑎᒪᔨᓂ, ᐱᖃᑕᐅᙱᓐᓇᖅᑎᑕᐅᓂᒃᑯᑦ ᐃᓚᒋᔭᐅᑎᑕᐅᓂᕐᒧᑦ, ᐱᔪᓐᓇᐅᑎᖃᖅᐳᒍᑦ ᐅᖃᓕᒪᒍᓐᓇᓂᕐᒥᒃ ᑭᓯᐊᓂ ᐱᔪᓐᓇᐅᑎᖃᖅᑎᑕᐅᓇᑕ ᓂᕈᐊᕐᓂᕐᒧᑦ, ᑕᒪᓐᓇ ᐱᓇᐅᓗᑕᐅᓂᖓᓂ ᖃᐅᔨᒪᓪᓗᒍ. ᑕᒪᓐᓇ ᖃᓄᐃᒋᐊᕈᑕᐅᒋᐊᓕᒃ.”
ICC−ᑯᑦ ᑲᓇᑕᒥ ᐊᖓᔪᖅᑳᖓᑕ ᒫᓂᑲ ᐃᐅᓪ−ᑲᓇᔫᑉ ᐅᖃᐅᓯᓕᒥᓂᖅ ᐃᓱᒫᓘᑕᐅᓂᖓᓂᒃ ᓯᓚᐅᑉ ᐊᓯᔾᔨᕐᓂᖓ, ᐃᓄᐃᑦ ᑕᒪᓐᓇ ᐱᓪᓗᒍ ᐅᖃᐅᔾᔨᓯᒪᑎᓪᓗᒋᑦ ᓄᓇᕐᔪᐊᒥ ᐊᕐᕌᒍᑦ ᐊᕙᑎᑦ ᒪᕐᕉᖅ ᐊᓂᒍᖅᑐᓂ, ᑭᓪᓕᓯᓂᐊᖅᑏᑦ ᖃᐅᔨᓴᖅᑎᒻᒪᕆᑦ ᖃᐅᔨᓴᕈᒪᓕᓚᐅᖅᑎᓐᓇᒋᑦ ᑕᒪᑐᒥᖓ. ᐅᖃᐅᓯᖃᖅᑐᒥᓂᖅ ᐊᒃᓱᕈᕈᑕᐅᔪᖅ ᑐᓴᖅᑕᐅᕙᖏᓐᓂᖓᓂᒃ. “ᓂᐱᕗᑦ ᑐᓴᖅᑕᐅᔪᓐᓇᖏᑉᐸᑦ, ᑕᑯᑦᓴᐅᙱᑦᑐᒍᑦ. ᓄᓇ ᓄᓇᒥᓗ ᐊᑐᕋᑦᓴᑦ ᐊᑦᑐᐊᖃᑎᒌᑦᑐᐃᓐᓇᐃᑦ. ᐃᒪᕐᔪᐊᑦ ᐊᑦᑐᐊᖃᑎᒌᑦᑐᐃᓐᓇᐃᑦ. ᑭᓪᓕᓕᐅᑕᐅᓯᒪᔪᑦ ᐅᖓᑖᓄᑦ ᑕᑯᓐᓇᕆᐊᖃᖅᑐᒍᑦ ᐃᖅᑲᓇᐃᔭᖃᑎᒌᕝᕕᒋᓗᒋᓪᓗ ᓴᐳᑎᓂᐊᕐᓗᒍ ᓄᓇ. ᐱᒻᒪᕆᐅᓂᖅᓴᐅᕗ, ᑲᑐᔾᔨᖃᑎᒌᓪᓗᑕ ᐱᓕᕆᖃᑎᒌᖕᓂᖅ ᐊᔾᔨᒌᑎᑕᐅᑦᓯᐊᖅᑐᖃᖁᓪᓗᒍ.”
ᑭᓪᓕᓯᓂᐊᖅᑕᐅᓯᒪᓂᒃᑯᑦ ᐅᖃᐅᓯᒥᓂᖅ ᐱᕕᖃᕐᕕᐅᓂᖓᓂᒃ ᑕᒪᓐᓇ ᓂᐱᖃᕈᑎᒥᓂᖓ ICC−ᑯᑦ ᓱᒃᑯᑦᑲ ᐊᖓᔪᖅᑳᖓᑕ ᓕᐅᐸᕝ ᑕᐃᐊᓐ. “ᐃᓱᐊᕐᕌᒍᓂᒃ ᐊᕙᑎᑦ ᑕᓪᓕᒪᓂᓪᓗ ᐊᐅᓚᓂᖃᖅᓯᒪᓂᖓ ᓇᓪᓕᐅᓯᒪᔪᖅ ᑖᒃᑯᐊ ᐅᑭᐅᖅᑕᖅᑐᒧᑦ ᑲᑎᒪᔩᑦ. ᐃᓱᒪᒍᓐᓇᕈᑦᑕ ᐃᓅᑉ ᐃᓱᒪᐅᓯᖓᒍᑦ, ᐊᕐᕌᒍᑦ ᐊᕙᑎᑦ ᑕᓪᓕᒪᓂᓪᓗ ᐃᓂᕐᓂᐅᓕᖅᑐᑐᑦ ᐊᕐᕌᒎᒻᒪᑦ, ᑭᓯᐊᓂ ᓱᓕ ᓯᓚᑦᑐᐸᓪᓕᐊᑐᐃᓐᓇᖅᑐᖅ.ᑲᑎᒪᔨᓄᑦ ᑕᒪᓐᓇ ᐱᕙᓪᓕᐊᓂᖅ ᓯᓚᑦᑐᓂᕐᒧᑦ ᐊᑐᖅᑕᐅᖁᒐᖓᓗᐊᖅᐸᕋ ᐅᕙᑦᑎᓐᓄᑦ ᐅᑭᐅᖅᑕᖅᑐᒧᓪᓗ ᑲᑎᒪᔨᓄᑦ ᑲᔪᓯᑦᓯᐊᖁᓪᓗᒍ ᑕᒪᒃᑯᑎᒎᓇ ᑲᑐᔾᔨᖃᑎᒌᓐᓂᒃᑯᑦ ᑖᒃᑯᓄᖓ ᓯᑯᑦᑲᒥᐅᓄᑦ ᐃᓄᖕᓄᑦ ᐊᒻᒪᓗ ᐅᑭᐅᖅᑕᖅᑐᒧᑦ ᑲᑎᒪᔨᓄᑦ.”
ᒪᐃᖑᑎᓪᓗᒍ 2021 ᖁᓕᑦ ᒪᕐᕈᓪᓗ ᐅᑭᐅᖅᑕᖅᑐᒧᑦ ᑲᑎᒪᔩᑦ ᒥᓂᔅᑕᐅᑎᖏᑦ ᑲᑎᒪᑎᓪᓗᒋᑦ ᕋᐃᒃᔭᕕᒃᒥ, ᐊᐃᔅᓚᓐ, ICC−ᑯᑦ ᐊᓛᔅᓴᒥ ᐊᖓᔪᖅᑳᖓ ᔨᒥ ᓯᑖᑦᔅ ᐅᐱᒋᔭᓕᒥᓂᖅ ᐅᑭᐅᖅᑕᖅᑐᒧᑦ ᑲᑎᒪᔩᑦ ᐅᑎᕐᓂᖓᓂᒃ ᐱᒋᐊᖅᓯᒪᔭᕐᒥᓐᓄᑦ ᓇᓕᒧᒌᑎᑦᓯᒐᓱᐊᕐᓂᕐᒥᓐᓄᑦ ᐃᑯᐱᕝᕕᓕᕆᓂᕐᒧᑦ ᐱᕙᓪᓕᐊᓂᕐᒧᑦ ᐊᒻᒪᓗ ᓴᐳᔾᔨᓂᕐᒧᑦ ᐊᕙᑎᒥᒃ. “ᐅᖃᕐᕕᒋᓯᒪᔭᕋ ᑖᓐᓇ ᑎᒥᐅᔪᖅ ᐊᕐᕌᒎᓐᓂᒃ ᒪᕐᕉᓐᓂᒃ ᕈᕙᐃᓂᐊᒥ ᓇᓂᔭᐅᒋᐊᖃᕐᒪᑦ ᓇᓕᒧᒌᑎᑦᓯᓂᖅ. ICC−ᑯᑦ ᓱᓕᔪᖅᓴᖅᑐᑦ ᐅᑭᐅᖅᑕᖅᑐᒧᑦ ᑲᑎᒪᔩᑦ ᓱᓕ ᓇᓂᓯᒐᓱᐊᕐᒪᑕ ᑕᒪᒃᓱᒥᖓ ᓇᓕᒧᒌᑎᑦᓯᓂᕐᒥᒃ. ᖁᔭᓇᖅᐳᑦ, ᓄᓇᕐᔪᐊᑉ ᓯᓚᖓᑕ ᐊᓯᔾᔨᖅᐸᓪᓕᐊᓂᖓ ᐱᓪᓗᒍ ᑲᑎᒪᔾᔪᑎᒃᓴᒦᒃᑲᓂᕐᒪᑦ.”
“ᑭᒡᒐᑐᖅᓱᒋᑦ 180,000 ᐃᓄᐃᑦ ᑖᒃᑯᓇᓂ ᓯᑕᒪᓂᒃ ᐅᑭᐅᖅᑕᖅᑐᒥ ᓄᓇᓕᕐᔪᐊᓂ ᖁᕕᐊᓲᑎᒋᕙᕗᑦ ᑲᔪᓯᑎᑕᐅᖃᑦᑕᖅᓯᒪᔪᑦ ᑖᒃᑯᓄᖓ ᐅᑭᐅᖅᑕᖅᑐᒧᑦ ᑲᑎᒪᔨᓄᑦ ᑖᒃᑯᓇᓂ ᐊᕝᕙᖓᑕ ᐊᕝᕙᖏᓐᓂ ᐊᕐᕌᒍᓂ ᐊᓂᒍᖅᑐᓂ, ” ᐅᖃᖅᑐᒥᓂᖅ ICC−ᑯᑦ ᐃᒃᓯᕙᐅᑕᖓᑦ ᑕᓖ ᓴᒻᐳ ᑐᐊᕉ. “ᓂᕆᐅᓐᓂᕆᔭᕗᑦ ᓇᓗᓇᖏᓚᖅ ᓯᕗᒧᐊᑦᑎᑦᓯᑎᓪᓗᑕ ᑲᑐᔾᔨᖃᑎᒌᓐᓂᒃᑯᑦ ᑐᓂᓯᒪᔭᑦᑎᓐᓂᒃ ᐃᑲᔪᖅᓯᓂᒃᑯᑦ ᑐᓴᖅᑕᐅᑐᐃᓐᓇᖏᒻᒪᑕ, ᑭᓯᐊᓂᓕ ᓱᕐᕋᐃᑦᑑᑎᑦᓯᓂᖅ ᑕᑯᑦᓴᐅᑎᑕᐅᒻᒪᑦ ᐃᖅᑲᓇᐃᔮᑦᑎᒍᑦ, ᐊᐃᕙᓂᕆᖃᑦᑕᑕᑦᑎᒍᑦ, ᐊᒻᒪᓗ ᐃᓱᒪᓕᐅᕈᑎᖃᖃᑦᑕᕐᓂᖏᑎᒍᑦ ᑖᒃᑯᓄᖓ ᐅᑭᐅᖅᑕᖅᑐᒧᑦ ᑲᑎᒪᔨᓄᑦ.”
ᖃᐅᔨᒋᐊᕐᕕᒃᓴᑦ:
ᑭᐊᓕ ᐃᓂᖑᕗᒃ ICC (ᐊᓛᔅᑲ) +1 907-274-9058 kelly@iccalaska.org
ᑐᑯᒻᒥᙳᐊᖅ ᓇᐃᒃᔭᐃ ᐆᓪᓴᓐ ICC (ᑲᓛᖦᖡᑦ ᓄᓈ) +299 323632 tukumminnguaq@inuit.org
ᓯᑏᕙᓐ ᕼᐃᐊᓐᑐᕆ ICC (ᑲᓇᑕ) +1 613 668 1923 type88@post.com